Jisas We i Hae Pris Blong Yumi i Gat Sore

1-2. (1) ?From wanem Jehova i sanem Boe blong hem i kam long wol? (2) ?Bambae yumi tokbaot wanem long stadi ya? (Hibru 5:​7-9)

SAMWE 2,000 yia i pas, Jehova God i sanem Boe blong hem i kam long wol. ?From wanem? Wan risen, hemia blong sevem ol man long sin mo ded mo blong finisim ol trabol we Setan i mekem. (Jon 3:16; 1 Jon 3:8) Mo tu, Jehova i save se ol samting we Jisas bambae i fesem taem hem i kam long wol olsem wan man, bambae i rerem hem blong kam wan Hae Pris we i gat sore long ol man. Jisas i stat blong mekem wok ya olsem Hae Pris afta we hem i baptaes long yia 29 K.T.a

² Long stadi ya, bambae yumi luk olsem wanem ol samting we Jisas i fesem long wol, i givhan long hem blong i kam wan Hae Pris we i gat sore long yumi. Taem yumi kasemsave se Jisas i “naf gud” blong mekem wok ya, bambae yumi no fraet blong kam klosap long Jehova, nating se samtaem yumi harem nogud from ol sin blong yumi, o yumi harem se yumi no gat paoa.—Ridim Hibru 5:​7-9.

PIKININI BLONG GOD I KAM LONG WOL

3-4. ?Jisas i lego wanem taem hem i kam long wol? ?Mo laef blong hem long wol i olsem wanem?

³ Plante long yumi i fesem ol samting we i mekem se laef blong yumi i jenis. Maet yumi mas lego haos blong yumi o ol famle mo fren blong yumi. Ol jenis olsem oli no isi. Be i no gat wan long yumi we i olsem Jisas, we i mas lego gudfala ples blong hem long heven, mo hae posisen we hem i gat olsem fasbon Pikinini blong God we i impoten moa long ol narafala enjel. Jehova i lavem hem tumas mo oltaem Jisas i glad blong stap long raetsaed blong God blong wok wetem hem. (Sam 16:11; Prov. 8:30) Nating se i olsem, Filipae 2:7 i talem se hem i glad nomo blong “lego olgeta samting ya,” blong i kam stap long wol wetem ol sinman.

⁴ Mo tu, yu traem tingbaot ol samting we i hapen long ol faswan yia afta we Jisas i bon. Jisas i bon long wan famle we i pua. Yumi luksave samting ya taem yumi tingbaot sakrefaes we papa mo mama blong hem i givim afta we hem i bon. (Lev. 12:8; Luk 2:24) Mo biaen, taem King Herod i harem se Jisas i bon, hem i traem blong kilim hem i ded. From samting ya, famle blong hem i mas ronwe i go long Ijip blong smoltaem. (Mat. 2:​13, 15) Yes, !laef blong Jisas long wol i defren olgeta long laef we hem i bin gat long heven!

5. ?Jisas i luk wanem taem hem i stap long wol? ?Mo olsem wanem hemia i givhan long hem blong i kam wan Hae Pris we i gat sore? (Mo tu, yu luk pija.)

⁵ Taem Jisas i stap long wol, hem i luk we ol man raonabaot long hem oli stap safa. I sua se hem tu i lusum sam fren mo famle long ded, olsem papa blong hem Josef. Mo long taem we hem i stap prij, hem i mitim ol man we oli gat leprosi, ol man we bodi blong olgeta i ded, ol blaenman, mo ol perens we oli lusum ol pikinini blong olgeta long ded, mo hem i sore long olgeta. (Mat. 9:​2, 6; 15:30; 20:34; Mak 1:​40, 41; Luk 7:13) I tru se taem hem i stap long heven, hem i luk we ol man oli safa. Be taem hem i kam long wol olsem wan man, hem i kasemsave moa long filing we ol man oli gat taem oli safa. (Aes. 53:4) Ol samting we Jisas i fesem long wol i mekem se samtaem hem i taed, i harem nogud, mo tingting blong hem i trabol. Mo hemia i givhan long hem blong i kasemsave long ol defdefren filing we yumi save gat.

JISAS I SOEMAOT SE HEM I GAT SORE LONG OL MAN

6. ?Ol pijatok we profet Aesea i yusum i tijim yumi se Jisas i gat wanem fasin? (Aesea 42:3)

⁶ Taem Jisas i stap long wol, hem i soemaot bigfala sore long ol man we oli no gat paoa mo ol narafala oli stap mekem i nogud long olgeta. Taem hem i mekem olsem, hemia i mekem ol profet tok blong Baebol i kamtru. Samtaem, Hibru Haf Blong Baebol i tokbaot ol man we oli strong se oli olsem wan garen we ol kakae blong hem i gru gud o ol bigfala tri. (Sam 92:12; Aes. 61:3; Jer. 31:12) Be Baebol i tokbaot ol man we oli no gat paoa mo ol man we ol narafala oli stap spolem olgeta, se oli olsem ol waelken we oli brobrok finis mo wik blong laet we faea blong hem klosap i ded. (Ridim Aesea 42:3; Mat. 12:20) Profet Aesea i yusum ol pijatok ya blong soemaot se Jisas bambae i lavem mo i sore long ol man we ol narafala oli ting nating long olgeta.

7-8. ?Olsem wanem Jisas i mekem profet tok blong Aesea i kamtru?

⁷ Gospel blong Matiu i soemaot se Jisas i mekem ol tok blong profet Aesea i kamtru, we i se: “Ol waelken we oli brobrok finis, bambae hem i no brekemaot, mo wik blong laet we faea blong hem klosap i ded, bambae hem i no kilim.” Jisas i mekem sam merikel blong givhan long ol man we oli harem olsem ol waelken we oli brobrok finis, mo wik blong laet we faea blong hem klosap i ded. Eksampol, Jisas i mitim wan man we bodi blong hem i fulap long leprosi, we i mekem se hem i no save joen wetem ol narafala. Traem tingbaot, ating man ya i harem se bambae hem i neva save kam gud mo harem gud blong joen bakegen wetem ol famle mo fren blong hem. (Luk 5:​12, 13) Mo tu, Jisas i mitim wan man we sora blong hem i fas mo i no save toktok gud. Traem tingbaot filing blong man ya taem hem i luk we ol narafala oli harem gud blong storian tugeta, be hem i no naf blong kasemsave. (Mak 7:​32, 33) Be i gat wan narafala samting tu we i mekem se ol man olsem oli harem nogud.

⁸ Long taem blong Jisas, plante man Jiu oli bilif se ol sik olsem, hemia ol panis we ol man oli kasem from sin blong olgeta o sin blong papa mo mama blong olgeta. (Jon 9:2) From samting ya, ol narafala oli stap tritim nogud olgeta mo mekem oli harem se oli nating nomo. Be Jisas i mekem profet tok blong Aesea i kamtru, taem hem i hilim olgeta mo i givhan long olgeta blong oli luksave se God i kea long olgeta. ?Hemia i tijim wanem long yumi?

9. ?Olsem wanem Hibru 4:​15, 16 i soemaot se Hae Pris blong yumi i gat bigfala sore long ol sinman?

⁹ Ridim Hibru 4:​15, 16. Yumi save sua se oltaem Jisas bambae i gat sore tu long yumi. ?Hemia i minim wanem? Wan man we i gat sore i harem nogud taem hem i luk we wan narafala man i stap safa. Grik tok ya we oli tanem i kam “sore” i minim se wan man i kasemsave long filing blong wan narafala man. (Yu save luk semfala Grik tok ya we Pol i yusum bakegen long Hibru 10:34.) Taem yumi ridim ol stori blong ol merikel we Jisas i mekem, yumi luksave se Jisas i kasemsave long filing we ol narafala oli gat taem oli safa. Hem i hilim ol man, i no from we hem i mas mekem olsem nomo, be hem i kea long olgeta mo i wantem tumas blong givhan long olgeta. Eksampol, taem hem i hilim man ya we i gat leprosi, hem i save stanap longwe nomo mo hilim hem, be hem i go klosap mo i tajem man ya we maet blong plante yia, i no gat wan man i tajem hem. Mo Jisas i tekem man ya we sora blong hem i fas i go longwe long hip blong ol man we oli stap mekem noes, mo taem tufala nomo i stap, hem i hilim hem. Mo taem Jisas i harem we wan Farisi i stap daonem woman ya we i tanem tingting blong hem mo i stap wasem leg blong Jisas wetem wota blong ae blong hem, mo i waepem long hea blong hem blong mekem i drae, hem i difendem woman ya. (Mat. 8:3; Mak 7:33; Luk 7:44) Jisas i no stap longwe long ol man we oli gat ol sik o we oli bin mekem ol bigfala sin. Defren olgeta, hem i glad taem ol man olsem oli kam klosap long hem, mo hem i soemaot se hem i lavem olgeta. Yumi save trastem se hem i gat bigfala sore tu long yumi.

FOLEM FASIN BLONG HAE PRIS BLONG YUMI

10. ?Yumi save yusum wanem blong givhan long olgeta we sora blong olgeta i fas o oli blaen? (Mo tu, yu luk ol pija.)

¹⁰ Yumi ol disaepol blong Jisas, yumi wantem folem fasin blong hem blong soemaot lav mo sore long ol narafala. (1 Pita 2:21; 3:8) Nating se yumi no naf blong hilim olgeta we sora blong olgeta i fas o oli blaen, be yumi save givhan long olgeta blong oli kam klosap long Jehova. Eksampol, naoia oli tanem ol buk blong yumi i go long bitim 100 saen lanwis. Mo blong givhan long olgeta we oli blaen, oli wokem ol buk blong yumi long braille long bitim 60 lanwis, mo oli mekem wan odio rikoding long ol video blong eksplenem samting we i stap hapen, long bitim 100 lanwis. Ol samting ya oli givhan long olgeta we sora blong olgeta i fas mo olgeta we oli blaen, blong oli kam klosap long Jehova mo Boe blong hem.

11. ?Olsem wanem oganaesesen blong Jehova i sore long ol defdefren kaen man olsem Jisas? (Ol Wok 2:​5-7, 33) (Mo tu, yu luk ol pija.)

¹¹ Oganaesesen blong Jehova i traehad blong givhan long ol defdefren kaen man blong oli kam klosap long Jehova. Afta we Jisas i laef bakegen, hem i kafsaedem tabu spirit i go long ol disaepol blong hem, blong mekem se olgeta man we oli kam long Lafet Blong Pentekos oli save harem gud nius long “lanwis blong olgeta.” (Ridim Ol Wok 2:​5-7, 33.) Tede, oganaesesen i folem eksampol blong hem, taem i transletem ol buk blong yumi we i stanap long Baebol i go long bitim 1,000 lanwis. Sam long ol lanwis ya, smol man nomo oli yusum. Eksampol, i gat sam lanwis long Not mo Saot Amerika we smol nomo oli yusum. Be oganaesesen i transletem ol buk blong yumi i go long bitim 160 long ol lanwis ya, blong mekem se olgeta tu oli gat janis blong harem gud nius. Mo tu, ol buk blong yumi i stap long bitim 20 lanwis blong ol man Roma. From samting ya, plante taosen man we oli toktok ol lanwis ya oli kam long trutok.

12. ?Wanem sam narafala samting we oganaesesen blong Jehova i mekem blong givhan long ol man?

¹² Oganaesesen blong Jehova i no talemaot gud nius nomo, be i givhan tu long ol man we oli safa long taem blong disasta. Plante taosen volontia oli glad nomo blong givhan long ol brata mo sista blong olgeta we oli fesem ol disasta. Mo tu, oganaesesen i givhan blong wokem ol ples blong wosip we ol man oli save joen wanples long hem, blong oli save lanem moa olsem wanem Jehova i lavem olgeta.

HAE PRIS BLONG YUMI I SAVE GIVHAN LONG YU

13. ?Wanem sam samting we Jisas i stap mekem blong givhan long yumi?

¹³ From we Jisas hem i gudfala man blong lukaot long sipsip, hem i meksua se yumi wanwan i gat samting we yumi nidim blong fren gud wetem God. (Jon 10:14; Efes. 4:7) Samtaem, ol samting we yumi fesem long laef blong yumi i save mekem yumi harem olsem wan wik blong laet we klosap i ded o wan waelken we i haf brok finis. Maet tingting blong yumi i foldaon from we yumi kasem wan strong sik, yumi mekem wan mastik, o yumi gat wan problem wetem wan brata o sista. Long taem olsem, maet yumi tingbaot nomo ol problem we yumi stap fesem, be yumi no tingbaot ol promes blong fiuja. Be tingbaot se Jisas i luk samting we yu stap fesem, mo i kasemsave long ol filing blong yu. Jisas i sore long yu mo i wantem givhan long yu. Eksampol, hem i save yusum tabu spirit blong givim paoa long yu taem yu no gat paoa. (Jon 16:7; Taet. 3:6) Mo tu, hem i save yusum ol elda we oli “olsem presen” mo ol narafala brata mo sista, blong oli givhan long yu mo leftemap tingting blong yu.—Efes. 4:8.

14. ?Yumi save mekem wanem taem tingting blong yumi i foldaon?

¹⁴ Sipos tingting blong yu i foldaon o yu harem nogud, i gud yu tingting dip long wok we Jisas i stap mekem olsem Hae Pris blong yumi. Tingbaot se Jehova i sanem hem i kam long wol, i no jes blong hem i givim laef blong hem olsem wan ransom, be from we hem i wantem se Jisas i kasemsave long ol problem we ol sinman oli stap fesem. Taem tingting blong yumi i foldaon from ol sin blong yumi o from yumi harem se yumi no gat paoa, Jisas i rere blong givhan long yumi “long stret taem we yumi nidim help.”—Hib. 4:​15, 16.

15. ?Wanem i halpem wan brata blong i kambak long kongregesen?

¹⁵ Jisas i stap lidim ol man blong hem tu, taem oli stap traehad blong lukaotem mo givhan long olgeta we oli lego kongregesen. (Mat. 18:​12, 13) Traem tingbaot ekspiriens blong Stefano.b 12 yia afta we kongregesen i putumaot hem, hem i mekem desisen blong go long wan miting. Hem i talem se: “I no isi nating, be mi wantem joen bakegen long famle blong Jehova. Ol elda we oli toktok wetem mi, oli soemaot se oli wantem we mi kambak. Samtaem, mi harem se mi gilti from we mi bin lego Jehova, mo mi wantem blong givap. Be ol elda oli mekem mi tingbaot se Jehova mo Jisas oli wantem se mi gohed. Taem oli talemaot se mi kambak long kongregesen, ol brata mo sista oli welkamem bak mi. Biaen, waef blong mi i stat blong stadi Baebol, mo tede mifala i mekem wok blong Jehova tugeta olsem wan famle.” !I sua se Hae Pris blong yumi we i lavem yumi i glad tumas blong luk we ol man olsem, oli tanem tingting blong olgeta mo oli kasem help we oli nidim blong kambak long kongregesen!

16. ?From wanem yu glad se yumi gat wan Hae Pris we i gat sore?

¹⁶ Taem Jisas i stap long wol, hem i givhan long plante man long stret taem we oli nidim help. Tede tu, yumi save trastem fulwan se bambae hem i givhan long yumi long stret taem we yumi nidim. Mo long niufala wol, bambae hem i givhan long ol gudfala man blong oli kam fri fulwan long olgeta trabol we i kamaot from sin. !Yumi talem tangkiu long God blong yumi Jehova we i lavem yumi, nao i putumap Boe blong hem blong i kam Hae Pris blong yumi we i gat sore!