Helt Mo Ol Samting Raonabaot Long Yumi

Man blong Wekap! long Naejeria i raetem store ya

Evri yia long olgeta ples blong wol, i gat 49 milyan man oli ded. Ripot blong Wol Helt Ogenaesesen (WHO) i talem se kolosap 75 pesen blong ol man ya we oli ded, oli no kam olfala yet. Be oli ded from we laef blong olgeta, mo ples we oli laef long hem, i nogud. Tingbaot sam eksampel:

◼ Kansa i kilim i ded faef milyan man evri yia. WHO i mekem ripot se, bighaf blong sik ya i “kamaot from we namba blong ol man we oli stap smok i go antap bigwan long ol 30 yia we oli jes pas.”

◼ Sitsitwora i kilim i ded bitim tri milyan pikinini evri yia. Plante taem, stampa blong samting ya, hemia se kakae mo wora i no klin, mo ples i no klin.

◼ Tibi (Tuberkulosis), wan sik we i kilim i ded tri milyan man evri yia, i kamtru long ol ples we i pua mo taem i gat tumas man oli stap wanples, antap moa taem ples ya i doti.

◼ Ol sik blong waet leva, olsem strong kof, evri yia oli kilim i ded tri milyan haf pikinini we oli no kasem faef yia yet. Bighaf blong olgeta ya oli laef long taon we win i doti tumas.

Antap long ol trabol ya, evri yia i gat samwe long tu bilyan haf man​—kolosap stret haf blong olgeta man long wol​—we oli kasem sik from we oli no gat wora no from we wora blong olgeta i doti, mo from oli no stap long ples we i klingud. Mo tu, ol problem ya olsem ren we asid i stap long hem, blangket we i blokem hot blong san raon long wol hem i stap lus, mo wol i stap kam hot moa, WHO i talem se olgeta samting ya oli joen blong mekem helt blong ol man i kam nogud. Ripot blong WHO i talem se, taem yumi ademap olgeta samting ya, i gat bitim tu bilyan man we oli laef long ol ples we oli denja long laef mo helt blong olgeta.

Dokta Hiroshi Nakajima, wan bigfala bos blong WHO, i givim woning ya se: “Sipos yumi no tekem aksin naoia, trabol we i save kamaot long wol ya mo long ol man blong hem, bambae i kam bigwan tumas we yumi no moa save stopem. Mo ol samting raonabaot long man bambae oli no moa gud blong mekem man i laef.”

Baebol i promes se i gat wan taem i stap kam we bambae “i no gat wan man ples we i save talem se: ‘Mi mi sik.’” (Aesea 33:24) I no man we bambae i mekem samting ya i kamtru, be Kingdom blong God nomo, hem nao bambae i karemaot ol sik mo stampa blong olgeta.​—Revelesen 21:​3, 4.

[Foto Credit Line pej 30]

Godo-Foto