Revelesen—Kolosap I Kasem Nambawan En Blong Hem!
1 “Man we i ridimaot tok ya we God i givim, hem i save harem gud. Mo olgeta we oli harem tok ya, mo oli holem long tingting blong olgeta, olgeta ya tu bambae oli save harem gud, from we taem blong ol samting ya i kam klosap finis.” (Rev. 1:3) Toktok ya i makem se buk blong Revelesen i impoten tumas long yumi ya, we yumi laef long taem ya we God i makem finis blong plante long ol profet tok blong hem i kamtru. Taswe, i stret we long Kongregesen Buk Stadi bambae yumi stadi long buk ya Revelesen—Kolosap I Kasem Nambawan En Blong Hem! Bambae yumi statem buk ya long wik blong Februari 26, 2007.
2 Afta we yumi bin stadi lastaem long Revelesen buk, wol ya i jenis plante. (1 Kor. 7:31, NW) Antap long hemia, i gat plante niufala man blong talemaot gud nius blong Kingdom, we oli no gat janis yet blong joen long stadi we i folem ol wanwan vas long buk blong Revelesen. Bambae stadi ya long Revelesen buk i halpem yumi evriwan blong yumi wekapgud long tingting blong yumi long saed blong ol samting we bambae oli hapen i no longtaem.—Rev. 16:15.
3 Putum wan mak blong yu stap evri wik long buk stadi ya. Ol save we yumi stadi long hem bambae i halpem yumi blong wekapgud, be i no hemia nomo. Ol advaes we Jisas i givim long ol seven kongregesen, bambae oli halpem yumi blong blokem eni samting long laef blong yumi we oli save mekem yumi kam slak long saed blong spirit mo long wok blong prij.—Rev. 1:11, 19.
4 Rere Gud: Bifo long evri buk stadi, ridim ol vas blong Revelesen we bambae yumi stadi long olgeta. Makem gud ol narafala vas blong Baebol we oli givhan blong eksplenem ol vas blong Revelesen. Traehad blong kasem save long ol bigfala poen we oli save gat paoa long hat blong yu. (Neh. 8:8, 12) Tekem taem blong tingting dip. Tingting long ol kwestin ya: ‘?Hemia i givhan long mi blong lanem wanem long saed blong Jeova mo stamba tingting blong hem? ?Olsem wanem mi save mekem laef blong mi i laenap wetem stamba tingting blong hem mo halpem ol narafala?’
5 Stat long “dei ya blong Masta” long 1914 i kam kasem naoia, i gat 92 yia i pas. (Rev. 1:10) Yumi klosap tumas long taem ya we ol bigbigfala samting we buk blong Revelesen i talemaot bambae oli kamtru. Stadi ya long Revelesen buk bambae i mekem hat mo tingting blong yumi i haremgud bakegen. Bambae hem i mekem bilif blong yumi i strong se “faet long bigfala Dei blong God ya we i gat olgeta paoa” mo niufala wol, i klosap tumas.—Rev. 16:14; 21:4, 5.