Talemaot Gud Nyus—Wetem Buk Revelation Climax
1 Ol pikinini blong Kora oli storebaot Jeova, oli se: “God ya blong Saeon, hem i God blong yumi. Hem bambae i God blong yumi oltaem. Hem bambae i lidim yumi, gogo i no save finis.” (Sam 48:14) Ol man ya oli folem Jeova nomo, oli putum tingting blong olgeta i stap long hem nomo, mo oli obei long ol rul blong hem long laef blong olgeta. !Wan gudfala eksampel blong yumi! Long taem blong yumi naoia, olgeta we oli letem Jeova i lidim olgeta, hem i leftemap tingting blong olgeta, mo i givim laet long olgeta. (Aes. 58:11) Long rabis wol ya, “olgeta oli lida, be oli blaen nomo,” oli lidim ol man oli go krangke, oli foldaon long wan “hol.” Yes, oli save kasem plante trabol, mo tingting blong ol i konfyus nomo. Be ol man we oli folem Jeova oli no save kasem trabol olsem.—Mat. 15:14.
2 Yumi nidim we God i lidim yumi tede, from we tingting blong ol man blong wol raon long yumi i fasfasgud, mo i gat plante denja i stap long wol ya. Plante man oli wantem kasem gudfala ansa long ol kwestin we oli gat. Taswe, i stret nomo we yumi enkarajem olgeta blong oli ridim buk Revelation Climax. Buk ya i talemaot ol rul we God i givim long ol man blong hem. Hem i yusum ol profet tok blong Revelesen blong eksplenem ol bigfala jenis we i stap hapen long wol. Buk ya i leftemap tingting blong man mo i givim plante gudfala advaes we yumi save folem blong gat wan laef we God i glad long hem.
YUMI SEREMAOT BUK REVELATION CLIMAX
3 Wan gudfala poen blong buk Revelation Climax, se hem i gat ol pija blong tijim yumi long plante samting. Taem bambae yu seremaot buk ya long minista wok, yusumgud ol pija we i stap long hem. Wan eksampel, long pej 302, wan naesfala pija i soemaot ol blesing we ol man we oli stap aninit long rul blong Kingdom bambae oli kasem. Pija ya i soemgud ol samting we 2 Pita 3:13 mo Revelesen 21:4 i tokbaot. Tufala vas ya nao, yumi yusum long manis ya.
4 Yu save talemaot nem blong yu long wan man, nao yu save statem toktok blong yu olsem: “Mifala i stap toktok wetem ol man long saed blong mining blong ol samting we i stap hapen long wol naoia. Sam lida blong wol oli gat tingting se bambae i no longtaem, i save gat pis long wol. ?Yu yu gat tingting olsem? [Letem man i ansa.] I tru we ol gavman oli save stretem sam trabol long saed blong politik. Be long semtaem, plante man oli tingting nogud long narafala man, mo oli mekem nogud long olgeta. Fasin ya i save spolem ol hadwok we ol man oli mekem blong putum pis long wol. Be long 2 Pita 3:13, Baebol i mekem promes se i no longtaem bambae wan nyufala kampani blong man oli laef long wol, mo wan gavman we i stap long heven bambae i rul long olgeta. [Ridim vas ya mo openem buk Revelation long pej 302.] Pija ya i soemgud ol samting we vas ya blong Baebol i stap tokbaot. ?Yu yu harem olsem wanem taem yu luk pija ya? [Letem man i ansa.] Long Revelesen 21:4, Baebol i talemaot ol samting we bambae i kamaot long wol. [Ridim vas ya we i stap long pej 303, haf 6.] Ded tu bambae i no save kam spolem pis ya we God hem wan i putum.” Yu save jusum ol fas tok we oli stret long teritori blong yu long Reasoning buk, pej 9 kasem 15.
5 Taem yumi talemaot gud nyus, yumi storeyan long ol blesing we ol man bambae oli kasem aninit long rul blong Kingdom blong God. Mo tu, yumi mas halpem ol man we oli laekem trutok blong oli kasem save long impoten mesej mo woning we Kraes i givim long buk blong Revelesen. Taswe, taem yumi finisim wan toktok wetem wan man, yumi mas talem long hem se yumi save halpem hem blong kasem save long trutok. Mo hem i mas kasem save ya kwiktaem nao, from we i no longtaem God bambae i spolem rabis wol ya mo ol man we oli sapotem hem.
6 Ol profet tok blong Revelesen oli save leftemap tingting blong man mo mekem hem i stap glad. Jeova i singaot long evri stret man blong oli folem hem, nao oli save kasem blesing. Taswe, yumi mas strong blong seremaot buk Revelation Climax, blong ol man oli letem Jeova i lidim olgeta long fasin waes.