Ol Tok We Oli Pulum Man Blong Lesin
1 Ol tok we oli pulum man blong lesin hemia ol tok ya we oli stret long ol samting we man blong haos i wari long hem, samting we hem i nidim no hem i save yusum. Taem yu toktok, givhan long man blong haos blong luksave se, “Samting ya i stret long mi.” Taem yumi mekemrere toktok blong yumi, yumi mas askem yumi wanwan se: ‘?Wanem samting ol man long teritori blong mi oli wari moa long hem? ?Wanem nid blong olgeta? ?Olsem wanem mi save talemaot mesej long fasin we i soem se Jeova i save long ol nid blong olgeta?’ Ol tok we bambae oli kamaot biaen oli soemaot ol impoten samting we ol man tede oli intres long hem. ?Yu yu save yusum wan long olgeta ya no wan samting we i kolosap sem mak taem yu storeyan long olgeta? Makem tu olsem wanem ol poen long buk ya Revelation Climax oli save joen wetem ol tok blong yu.
2 Wari From Fasin Glad: “Mifala i stap toktok wetem ol man we oli rili wari from ol fasin long ples blong yumi. Nating se ol man oli gat ol samting we oli nidim, plante man oli no rili glad long laef blong olgeta. ?Yu ting se ol man oli save glad long laef blong olgeta? [Letem hem i ansa.] Wan samting we i save mekem ol man oli glad i stap long Revelesen 1:3. [Ridim.] Sipos yu kasem save long ol samting we bambae oli kamaot long fyuja we Revelesen i tokbaot bambae yu glad from. Tingbaot wan long ol profet tok ya blong hem.” Ridim Revelesen 21:3, 4, mo soem pija we i stap long pej 302 long buk ya Revelation Climax.
3 Wari Long Saed Blong Fyuja: “Mifala i stap traem blong toktok wetem ol man raonabaot, long wan gudfala fyuja. ?Yu yu ting se fyuja bambae i gud no no gat? [Letem hem i ansa.] Folem wanem Baebol i talem, yumi gat risen blong ting se bambae ol man oli gat gudfala fyuja sipos yumi mekem ol samting we Revelesen 1:3 i talem.”
4 Wari Long Saed Blong Gud Helt: “Plante man raonabaot long yumi oli wari from helt blong olgeta. Nating se yumi lukaot gud, be yumi stil kasem sam sik. ?Yu yu wantem laef long wan wol we evri man oli no sik mo oli gat strong bodi? Maet i hadwok blong bilivim samting olsem, be buk blong Revelesen i tokbaot wan taem olsem mo i talem se hem i kolosap.” Ridim Revelesen 21:3, 4. Nao yu save soem ol pija we i stap long pej 308 kasem 309 long buk ya Revelation Climax. Soemaot olsem wanem ol man bambae oli kasem ol gudfala samting long laef taem Kraes i rul long Wan Taosen Yia.
5 Wari From Man Oli Mekem Doti Long Win Mo Solwora Mo Ol Narafala Samting We Oli Stap Raonabaot: “Taem mifala i toktok wetem ol man raonabaot long mifala, mifala i faenemaot se plante oli wari from ol man oli mekem win we yumi stap pulum, wora we yumi dring, mo ol kakae, oli doti. ?Yu ting se ol gavman bambae oli save stopem samting ya? [Letem hem i talem tingting blong hem.] I gud blong save se Baebol i talemaot samting we bambae i hapen long ol man we oli stap spolem wol.” Ridim Revelesen 11:18b. Poenemaot se narafala samting we God bambae i mekem bakegen, se ol man we oli gat tingting daon oli save stap long paradaes long wol ya, olsem we Sam 37:10, 11 no Aesea 65:21, 22 i tokbaot.
6 Long Olgeta We Oli Gat Tingting Blong Skul: “Mifala i stap askem ol man raonabaot long mifala wan kwestin: “Yu ting se buk blong Revelesen i blong man i kasem save long hem, no hem i mas stap oltaem olsem wan tok haed? [Letem hem i ansa.] Plante man oli gat tingting olsem yu. Yumi ridim wanem Baebol i talem long Revelesen 1:3.”
7 Taem yu stap traehad blong kasem hat blong ol man we oli lesin, bambae olgeta we oli hanggri from trutok mo stret fasin oli lesin long yu.—Mat. 5:3, 6.