?Wanem Samting Mi Save Talem Blong Mekem Man i Intres Moa?
1 Wan bigfala haf long wok blong talemaot gud nyus i blong mekem disaepol, hem i no blong seremaot ol buk nomo. Taswe, taem yumi faenem wan man we i intres, yumi mas mekem se hem i intres moa mo mekem ol sid we yumi planem finis i gru, yumi mekem se hem i rere blong Jeova i givhan long hem blong hem i gru long saed blong speret. (1 Kor. 3:6) ?Wanem samting bambae yu talem taem yu visitim wan man we yu bin luk hem finis? I gat ol defren samting we maet yu save fesem.
2 Wokem Intres Blong Man We i Stap: “Taem yumi storeyan bifo, yu yu bisi tumas, be yu tekem taem blong soemaot se yu yu wari long fyuja. Maet yu save tingbaot, yumi bin ridim Revelesen 1:3 we i talem se ‘taem blong ol samting ya i kolosap.’ Hemia fyuja blong yumi evriwan. Buk ya i tokbaot vas ya. [Ridim paragraf 11 long pej 17 long buk ya Revelation Climax] Hem i tokbaot ol profet tok long Revelesen bakegen mo i soemaot olsem wanem hem i save givhan long yu wan. ?Yu yu intres blong lanem moa?”
3 Yusum Buk Ya Revelation Climax Blong Statem Baebol Stadi: “I gud blong luk yu bakegen. I gat wan narafala poen we mi wantem tokbaot wetem yu. Yu save faenem long buk we mi bin livim wetem yu, mo hem i rili leftemap tingting blong man. Baebol i tokbaot wan ‘buk blong laef’ taem hem i stap tokbaot laef blong olwe. ?Yu wantem save nem blong hu i stap long buk ya?” Tanem i go long pej 298 long buk ya Revelation Climax. Ridim paragraf 11, mo askem ol kwestin long paragraf ya. Afta we yu kavremap sam paragraf, askem sipos yu save kambak bakegen blong gohed long storeyan ya.
4 Yusum Narafala Buk Blong Statem Wan Baebol Stadi: “Mi mi glad blong faenem yu long haos tede. Las taem yumitu storeyan, yumitu bin ridim promes ya blong Baebol long Revelesen 1:3. [Ridim bakegen.] Makem se fasin glad we i tokbaot i no kam kwiktaem. I gat tu samting we yumi nidim: Yumi mas ridim wanem Baebol i talem mo tingting long hem, no yumi mas mekem samting we oli raetem i wok long laef blong yumi. Buklet ya Yu Yu Save Harem Gud Blong Olwe Long Wol bambae i givhan long yu blong yu glad, taem yu stap ridim buk we mi bin livim wetem yu from we hem i eksplenem ol samting we God i wantem yumi blong mekem. Hem i isi blong kasem save long hem. Long pej 2 i gat ol lis blong ol japta we plante man oli laekem blong tokbaot. ?Weswan long olgeta yu wantem stadi long hem?” Afta we man i jusum, yu save tanem long stret ples insaed long buklet ya mo statem wan Baebol stadi.
5 Yusum Gudfala Fasin Blong Wekemap Intres: Buk ya Revelation Climax i givim plante gudfala pija. Yu save yusum ol pija ya blong wekemap intres blong man. Eksampel: Taem yu visitim man, yu save openem buk long pej 7. Tokbaot pija blong Jon long aelan blong Patmos. Revelesen 1:3 i makem se revelesen ya we God i givim long Jon i wan hapi mesej. ?Olsem wanem hem i wan hapi mesej taem Revelesen i tokbaot ol wael anamol we oli nogud we oli nogud mo ol bigfala trabol? Lukluk paragraf 1 mo 2 long pej 6 blong buk ya. Yu save yusum ol pija we oli stap long las pej, mo tu ol pija we oli soemaot Paradaes long wol long pej 302, 308 mo 309.
6 Taem yumi mekem visit, yumi mas tokbaot ol samting we yumi bin toktok wetem man blong haos long hem finis. Taem yumi tingtinggud long haf ya long minista wok blong yumi bambae yumi mo ol man we oli lesin long yumi, yumi save kasem ol gudfala blesing we i kamaot long Jeova.—1 Tim. 4:16.