Givhan Long Olgeta Blong Kasem Save
1 Aposol Pita i agri se sam tok blong Baebol oli “strong blong save.” (2 Pita 3:16) Plante man oli tingting olsem long saed blong buk blong Revelesen. Be, buk ya Revelesen—Kolosap i Kasem Nambawan En Blong Hem! i mekem mining blong Revelesen i klia we i klia. ?Olsem wanem yumi save givhan long ol man we oli intres, blong oli yusumgud buk ya?
2 Sipos yu bin tokbaot Revelesen 1:3 lastaem, maet tok ya i wekemap intres blong man bakegen:
◼ “Lastaem, yumitu bin tokbaot olsem wanem save long saed blong buk blong Revelesen i save givim glad. Be, glad ya i no kam olsem nomo. Yumi mas mekem tu samting: Stadi Baebol, mo folem ol samting we yumi lanem.” Ridim mo tokbaot Jemes 1:25. Openem buk long haf 9 long pej 8. Soem olsem wanem save long saed blong buk blong Revelesen i save givhan long yumi blong lanem rod blong kasem glad long paradaes long nyufala wol.
3 Sipos yu bin tokbaot Jon 17:3 lastaem, yu save makem nid blong kasem moa save blong Baebol, taem yu talem se:
◼ “Lastaem yumitu bin ridim Jon 17:3 we i talem se save long saed blong God i save givim laef blong olwe. ?Be bambae yu glad blong laef blong olwe wetem ol rabis fasin mo trabol we oli stap long wol ya tede? [Wet long ansa.] Kolosap olgeta man oli no wantem samting ya. Taswe, yumi save glad tumas taem yumi harem promes blong God.” Openem buk long haf 6 long pej 303. Ridim Revelesen 21:4, nao tokbaot wol ya taem “ol samting ya blong bifo oli lus olgeta.” Talem long man se yu glad blong kambak blong storeyan moa.
4 Sipos yu bin yusum pija long pej 302 blong soem se Kingdom blong God bambae i finisim ol trabol, yu save openem buk long pej ya bakegen mo talem se:
◼ “Yumitu bin tokbaot ol blesing we pija ya i soem, we ol man bambae oli kasem aninit long rul blong Kingdom blong God. ?Yu ting se yumi mas mekem wanem blong stap laef aninit long rul blong Kingdom ya? [Wet long ansa.] I gud yumi folem nambawan eksampel blong samfala long Baebol.” Ridim Ol Wok 17:11, mo makem nid blong ‘ridimgud tok blong Baebol evri dei.’ Eksplenem se ol Wetnes blong Jeova long ples blong yu oli stap givhan long ol man we oli rili wantem stadi long Tok blong God mo kasem save moa long hem.
5 Sipos yu bin livim traket ya “?Wol Bambae i Lus No i Stap?” wetem man blong haos we i bisi tumas blong storeyan, yu save talem olsem:
◼ “Taem mi kam luk yu lastaem, yu yu bisi tumas. Mi bin livim wan smol pepa wetem yu we i askem kwestin ya se wol ya i save stanap strong tru long ol trabol blong naoia, no no gat. Yumi save ridim Revelesen 21:4, we i stap long buk ya, Revelesen—Kolosap i Kasem Nambawan En Blong Hem! [Ridim vas ya long haf 6 long pej 303.] Pija ya [long pej 302] i soem se wol bambae i olsem wanem taem ‘God i ravemaot wora blong ae blong ol man.’ Buk ya i givim ol nambawan pruf se promes ya bambae i kamtru i no longtaem long fyuja. Sipos yu laekem blong ridim buk ya, yu save karem blong 350 VT.”
6 Sipos yu faenem wan man we i intres, biaen yu save soem buk ya Save Blong Lidim Yu Long Laef We i No Save Finis, mo yusum blong statem stadi. Bambae yu kasem plante glad taem yu halpem ‘man we i no gat save blong kam waes.’—Sam 119:130.