Halpem Ol Narafala Blong ‘Folem Ol Tok We God i Givim’
1 I no naf blong “harem” nomo ol profet tok long buk blong Revelesen. Blong tok ya i halpem wan man fulwan, hem i mas ‘folem.’ (Rev. 1:3) Taem yumi livim buk wetem man, hemia faswan samting nomo blong mekem hem i kam wan disaepol. Taem yumi faenem ol man we oli intres mo oli wantem lesin, yumi mas gobak kwiktaem blong halpem olgeta blong kasem moa save. ?Yumi save tokbaot wanem taem yumi gobak?
2 Sipos yu bin tokbaot pijatok blong fo man blong ron long hos long fastaem we yu mitim man, maet yu statem storeyan blong yu olsem:
◼ “Bifo finis yumi tokbaot buk blong Revelesen mo olsem wanem ol profet tok blong hem oli stap kamtru long wol naoia. Revelesen japta 6 i talemaot ol fo man ya blong ron long hos, we bambae oli mekem plante raf fasin mo trabol i kamaot long wol. Yumi luk samting ya wetem prapa ae blong yumi. Plante man oli wantem save wetaem bambae ol trabol ya oli finis, blong yumi save haremgud long laef long wan wol we i gat pis. ?Wanem tingting blong yu long kwestin ya? [Letem man i ansa.] Ol disaepol blong Jisas oli intres blong faenemaot ansa long kwestin ya.” Ridim Matyu 24:3 we i talem kwestin ya, mo biaen ridim ansa blong Jisas long vas 34. Sipos man i glad, eksplenem moa long saed blong ol las dei.
3 Sipos yu bin tokbaot Kingdom blong God long fastaem we yu mitim man ya, maet yu tingting blong gohed long poen ya wetem kwestin ya:
◼ “Long tingting blong yu, ?wanem kaen gavman i save givim ol samting we ol man oli nidim? [Letem man i ansa. Ridim Jeremaea 10:23.] Olsem yu save luk, God i no mekem man blong hem i folem tingting blong hem wan nomo. Be hem i traem blong folem tingting blong hem wan we i no gat help blong God. Samting ya nao i stampa blong bighaf blong ol problem blong yumi. Kingdom blong God, hem i wan gavman nomo we i save givim ol samting we yumi nidim.” Openem Reasoning buk long pej 230 (339) mo tokbaot ol vas aninit long faswan smol stampa tok. Gohed long storeyan ya, eksplenem from wanem yumi save trastem God fulwan.
4 Maet yu wantem yusum rod ya blong statem wan storeyan long Baebol:
◼ Soem pija long pej 302 long Revelation Climax buk, mo eksplenem se: “Bambae olgeta man oli haremgud long ol fasin ya taem wil blong God i kamaot long wol olsem i kamaot finis long heven. Be, samfala oli fraet se bambae ol nogud fasin oli kambak bakegen. Samting ya i no save hapen from we ol rabis man bambae oli no moa stap.” Ridim Ol Sam 37:10, 11. Askem man blong haos blong mekem wan Baebol stadi blong kasem moa save.
5 Sipos yu bin livim traket ya “Laef Long Pis Bong Nyufala Wol,” soem pija long faswan pej mo ridim paragraf 1 aninit long smol stampa tok “Laef Long Nyufala Fasin Blong God.” Nao yu save talem se:
◼ “Sipos yumi wantem blong laef long wan wol olsem, i gat wan impoten samting we yumi mas mekem.” Ridim laswan paragraf, mo askem man blong karem Revelation Climax buk.
6 From we mak blong yumi i blong statem ol Baebol stadi, yumi mas gat gudhan blong mekem ol visit bakegen. Makemaot wan stret taem blong mekem olgeta, mo reregud fastaem. Long rod ya, yumi save halpemgud ol man we hat blong olgeta i stret.—Rev. 22:6, 7.