?Doa Blong Kam Fultaem Paenia i Open Finis Long Yu?—!Kasem Mak Ya: 60 Fultaem Paenia!
1 Vas blong yia 1999 i mekem yumi tingbaot se yumi stap long “dei blong sevem ol man” we Jeova i makem. (2 Kor. 6:2) Be bambae i no longtaem dei ya i finis. Afta, bambae “dei blong jajem ol man” i stat. (2 Pita 2:9) Jeova i stap traem yet blong sevem plante moa man. !Taswe yumi haremgud blong luk plante taosen man we oli agri blong hem i sevem olgeta!
2 Ol man blong Jeova oli wok strong blong traem kasem ol man wetem mesej ya bifo we i let. Plante pablisa blong Kingdom, oli wantem tumas blong mekem olsem, taswe oli kam paenia. ?Olsem wanem long yu? ?Doa blong kam fultaem paenia i open finis long yu?
3 Oli Talem Tangkiu: Olsem Kingdom Wok blong Janewari 1999 i talem finis, ol fultaem mo haftaem paenia oli no moa mas mekem plante aoa olsem bifo. Ol fultaem paenia oli mas mekem 70 aoa evri manis long minista wok, nao oli kasem 840 aoa long wan ful yia. Ol haftaem paenia oli mekem 50 aoa long wok blong prij long manis we oli paenia. Hemia nao sam leta blong talem tangkiu we mifala i kasem afta we ol aoa ya oli godaon:
“!Wan nambawan blesing ya we Papa blong yumi long heven i givim!”
“!Mi no save faenem ol prapa toktok blong talemaot glad, lav mo tangkiu we mi gat from jenis ya!”
“!Bambae i moa isi blong folem program blong mifala wanwan!”
“Mifala i prea se plante moa brata sista oli kam fultaem paenia from we bambae oli glad, olsem ol narafala we oli stap spenem plante aoa finis long wok blong Jeova.”
4 Yumi stap kam klosap long en blong “dei blong sevem ol man.” I klia nao we Jeova i wantem se ol man blong hem oli givim wan laswan strongfala mesej blong presem hem. I gat tu samting we oli save mekem mesej ya i kasemgud ol man: (1) namba blong ol pablisa blong Kingdom we i stap gru mo (2) evriwan i traem mekem bes blong hem blong talemaot Kingdom. Jeova i blesem tufala fasin ya long wok blong hem from we “God nomo i stap mekem kakae ya i gru gud,” mo from samting ya plante moa man oli save kasem sef.—1 Kor. 3:6, 7; Sam 110:3.
5 Wok Ya i No Blong Nating: Long saed blong dei blong sevem ol man, Pol i givim wan woning i go long ol narafala Kristin. Hem i se: “From we mifala i stap joen blong wok wetem God, mifala i talem long yufala bakegen, se God i givhan long yufala finis, long gladhat blong hem. Plis yufala i no letem gudfala wok ya blong hem i go blong nating nomo.” Bambae wok ya i no go “blong nating nomo” sipos yumi luksave “taem ya blong givhan long man” mo yumi holem ol jans we yumi gat blong sevem olgeta. (2 Kor. 6:1, 2) Long taem blong yumi, wok ya we Pol i tokbaot, i stap hareap tumas. Ol Kristin we oli laekem tumas Jeova, oli tinghae long wok ya we hem i givim long olgeta, nao oli traehad blong joen moa long hem. ?Olsem wanem long yu? ?Ating yu tu yu save mekem wok blong fultaem paenia?
6 I No Hadwok Tumas Blong Kasem: Long trifala kantri blong Nyukaledoni, Vanuatu, mo Walis & Futuna, yumi save putum wan mak we bambae yumi traem kasem long Septemba 1: 60 fultaem paenia, no maet yumi save bitim namba ya. Mifala i ting se namba ya, i no hadwok tumas blong kasem. ?From wanem? From se long Maj 1998, 249 brata sista long Nyukaledoni oli haftaem paenia, mo 59 long Vanuatu. Long Epril 1998 bakegen, 203 oli mekem wok ya long Nyukaledoni, mo 38 long Vanuatu. Mo long Janewari 1999, 9 pablisa oli mekem haftaem paenia long Walis mo Futuna. Bighaf blong olgeta oli mekem 60 aoa, !we i jes sot long 10 aoa nomo blong mekem ol aoa blong ol fultaem paenia! I stat naoia go kasem Septemba 1, sipos i gat 12 long olgeta nomo we oli kam fultaem paenia, bambae yumi gat 60 fultaem paenia. !Mo maet yumi save bitim mak ya!
7 Yu Nidim Wan Program: Maet yu ting se 70 aoa, i hadwok tumas blong yu kasem mak ya evri manis. Be, traem tingbaot hamas yu mas mekem long wan wik: 17 aoa nomo. Yu save yusum ol program long nekis pej blong traem mekem wan prapa program blong yu we i stret long laef blong yu. Blong mekem program ya i wok gud, traem storeyan fastaem wetem ol narafala fultaem paenia we oli gat ekspiryens. Oli save olsem wanem blong skelemgud wok blong prij wetem ol narafala wok we oli mas mekem afsaed mo long famle blong olgeta. Yu save askem long seket elda tu, olsem wanem ol narafala paenia oli mekem program blong olgeta i wok gud. Mo biaen, yu save trastem Jeova blong hem i blesem plan blong yu blong kam paenia.—Prov. 16:3.
8 Mekem Plan Wetem Ful Famle: ?Olsem wanem? ?Yu save toktok wetem famle blong yu, blong wan long yufala i mekem plan olsem? Long famle blong yu, i gud yufala i sidaon tugeta mo storeyan. Sipos yufala i wokem gudfala plan mo yufala i givgivhan long yufala, ating wan no tu long yufala i save kam paenia. I tru, maet storeyan ya i soemaot we i no gat wan memba blong famle we i save kam paenia naoia stret. Oraet, be yu save tingbaot blong kam paenia long fiuja. Yu save mekem plan naoia mo putum wan dei long fiuja blong bambae yu kam paenia. Mo tu, maet yu save mekem wok blong haftaem paenia plante taem long wan yia, gogo samting ya i mekem yu yu naf blong kam fultaem paenia.
9 Long Nyukaledoni mo Vanuatu, olgeta 48 brata sista we oli fultaem paenia naoia, oli gat laef we i defren. Sam oli gat sik, fulap oli gat wan famle mo oli mas wok blong pem ol samting blong laef evri manis. Long olgeta, 25 oli gat bitim 50 yia blong olgeta, mo tu long olgeta oli bitim 65 yia. I gat 16 long olgeta we oli no mared, we samfala oli bin mared bifo mo samfala nogat. Mo 3 nomo long olgeta paenia ya oli no bitim 25 yia blong olgeta. I gat 39 sista mo 9 brata, we bighaf blong olgeta oli gat wan famle mo oli gat sam wok long kongregesen tu. Olgeta evriwan oli mas “pemaot taem” blong kam paenia. Blong mekem olsem, oli mekem laef blong olgeta i isi moa, i no paspas long plante samting we oli no impoten. Maet oli no gat plante vatu, be laef blong olgeta i hapi.—Kol. 4:5.
10 ?Yu Save Mekem Laef Blong Yu i Moa Isi? Sipos yu mekem laef blong yu i isi moa, i olsem we yu faenem ki blong openem doa. Ale bambae yu save openem doa blong kam paenia. ?Olsem wanem long laef blong yu? ?Hem i paspas no hem i isi? Maet yu luk we hem i paspas olsem wan bigfala haos we i gat plante tumas rum insaed, wetem fulap samting we man i mas klinim mo fiksimap oltaem. Samting ya i save tekem fulap taem, plante wok mo mane blong man ya. Sipos i olsem long yu, ?olsem wanem? ?Maet yu save mekem laef blong yu i moa isi mo kam paenia? ?Maet yu save katem taem we yu mas spenem long wok blong yu? ?Maet yu save yusum taem we yu stap yusum blong pleplei mo katem taem long ol narafala wok we oli no impoten?
11 Long 1 Timoti 6:8, Baebol i talem se: “Sipos yumi gat kakae blong yumi, mo klos blong yumi, hemia i naf, yumi save harem gud.” Sipos yumi harem gud wetem smol samting nomo, bambae i moa isi blong yumi joen fulwan long wok blong Jeova, mo bambae i moa isi blong yumi givim fas ples long ol wok long saed blong spirit long laef blong yumi. (Mat. 6:22, 33) Long 1998 Yearbook, long pej 104, ripot we i kamaot long Japan i givim sam risen from wanem fulap brata sista blong Japan oli gat strong tingting blong kam paenia. Wan risen i olsem: “Ol man Japan, bighaf blong olgeta oli gat haos we i no flas tumas. Nao oli spenem smol taem nomo blong klinim. Mo fasin blong laef blong olgeta tu i isi.” !Ol fasin ya oli folem stret advaes ya we Pol i givim long 1 Timoti 6:8!
12 Long olgeta ples long wol, ol man blong God oli stap wok strong moa blong prij, gogo bigfala dei ya blong Jeova blong sevem ol man bambae hem i finis. Long las yia, long trifala kantri blong yumi, evri manis i gat 168 brata sista we oli stap mekem wok blong paenia, fultaem no haftaem. I gat 141 long Nyukaledoni, 21 long Vanuatu mo 6 long Walis mo Futuna. !Hemia i nambawan! Ating yu tu yu save jenisim laef blong yu smol, blong yu save joen wetem olgeta. Mifala i pulum tingting blong yu, blong yu tekem taem blong tingtinggud long laef blong yu. Yu mas ansa long kwestin ya: “?Olsem wanem? ?Doa blong kam paenia i open finis long mi?”