Mekem Ae Blong Yu i Kliagud
1. ?I minim wanem blong gat wan ae we i kliagud, mo from wanem samting ya i impoten?
1 Long Bigfala Toktok blong Jisas antap long Hil, hem i pulum tingting blong ol man blong tingbaot paoa we ae i save gat long laef blong wan man. Hem i talem se: “Sipos ae blong yu i kliagud, bambae i olsem we bodi blong yu i fulap olgeta long laet. Be sipos ae blong yu i nogud, bambae i olsem we bodi blong yu i fulap olgeta long tudak.” (Mat. 6:22, 23, Nyutesteman wetem Ol Sam long Bislama) Man we ae blong hem i kliagud i min se hem i lukluk i go long wan samting nomo, hemia blong mekem samting we God i wantem. Man olsem i no wari long ol samting long saed blong bodi we oli pulum ae blong hem. (Mat. 6:19-21, 24-33) ?Wanem nao i save halpem yumi blong gat wan ae we i kliagud?
2. ?Baebol i leftemap tingting blong yumi blong gat wanem tingting long ol samting long saed blong bodi?
2 Stap glad long samting we yu gat: Baebol i talem se wan man i mas givim stret samting we famle blong hem i nidim. (1 Tim. 5:8) Be samting ya i no min se yumi mas spenem fulap taem blong lukaot ol beswan mo laswan samting we wol i save givim. (Prov. 27:20; 30:8, 9) Defren olgeta, Baebol i pulum yumi blong yumi harem gud long ‘kakae mo klos’ we yumi gat, hemia ol samting we yumi rili nidim long laef. (1 Tim. 6:8; Hib. 13:5, 6) Taem yumi folem advaes ya, ale samting ya i save givhan long yumi blong lukluk long ol samting we oli moa impoten.
3. ?Wanem i save givhan long yumi blong blokem ol samting we oli karem baden i kam long laef blong yumi?
3 Yumi waes sipos yumi blokem ol samting we oli save kam olsem baden long laef blong yumi. Ol samting ya olsem fasin blong gat kaon olbaot, fasin blong gat plante samting tumas, mo fasin blong ronem ol sas samting we oli no rili impoten mo we oli westem taem blong yumi. (1 Tim. 6:9, 10) ?Olsem wanem yumi save mekem samting ya? Taem yumi stap mekem wan disisen, i gud blong tokbaot bisnes ya long prea mo blong luksave sipos disisen ya bambae i no blokem yumi blong mekem ol wok long saed blong spirit. Tingting blong yumi i mas strong blong putum ol samting long saed blong spirit long fasples long laef blong yumi.—Fil. 1:10; 4:6, 7.
4. ?From wanem yumi mas lukaot sam rod blong mekem se laef blong yumi i no fasfas?
4 Mekem Laef Blong Yu i No Fasfas: Wan narafala samting we i save givhan blong no laekem tumas ol samting long saed blong bodi, hemia blong faenem wan rod blong mekem laef blong yumi i no fasfas wetem tumas samting. Wan brata i luksave se famle blong hem i gat gudfala laef nomo, nating se oli no gat plante samting long saed blong bodi. Hem i talem se: “Naoia mi save mekem moa wok insaed long kongregesen blong givhan long ol brata blong mi. Mi save talem se Jeova i blesem evri man blong hem taem oli stap putum trufala wosip blong hem fastaem long ol narafala samting.” Yu tu yu save haremgud long fulap blesing sipos yu mekem laef blong yu i no fasfas wetem tumas samting.
5. ?From wanem i nidim bigfala traehad blong mekem se ae blong yumi i stap kliagud oltaem?
5 I nidim bigfala traehad blong blokem paoa blong Setan, wol ya blong hem we i fulap long ol samting long saed blong bodi, mo sin we i stap long yumi. I gud we yumi putum tingting, no ae, blong yumi i stap long samting we God i wantem mo nambawan hop ya blong yumi hemia laef we i no save finis. Yes, yumi no mas letem ol samting blong wol ya oli pulum ae blong yumi i go long wan narafala samting.—Prov. 4:25; 2 Kor. 4:18.