Namba Blong Ol Aoa We Ol Paenia Oli Mas Kasem i Jenis
1 Long ol kongregesen, evriwan i haremgud long hadwok blong ol fultaem mo haftaem paenia. Nating se long samples, teritori i smol mo evri manis, ol pablisa oli kavremap hem fulwan, ol paenia oli givim gudfala eksampel long fasin blong olgeta blong wok strong long wok blong Kingdom. Oli pusum ol narafala pablisa blong gohed oltaem long wok blong faenem olgeta man we oli “stret blong kasem laef we i no save finis.”—Ol Wok 13:48.
2 Sosaeti i makem se ol trabol we ol paenia oli mas fesem oli kam antap. Antap moa taem oli mas faenem wan haftaem wok blong kasem ol samting we oli nidim long laef blong olgeta, mo blong mekem se long sem taem, oli save gohed blong prij fultaem. Mo tu, tede ekonomi blong plante kantri i mekem se i moa had long ol narafala Kristin we oli wantem statem wok blong paenia, nating se oli wantem tumas joen long wok ya. Long ol laswan manis we oli pas, Sosaeti i skelemgud ol samting ya mo sam narafala samting tu.
3 Taswe, from ol trabol ya we yumi tokbaot finis, Sosaeti i putum wan mak we i smol moa long namba blong ol aoa we ol fultaem mo ol haftaem paenia oli mas kasem. Stat long yia 1999, bambae ol fultaem paenia oli gat mak blong mekem 70 aoa evri manis, no blong kasem 840 aoa long wan ful yia. Bambae ol haftaem paenia oli gat mak blong kasem 50 aoa long wan manis. Ol mak blong ol spesel paenia mo ol misinari oli no jenis, from we Sosaeti i lukaot mo i givhan long olgeta blong gat olgeta samting we oli nidim long saed long bodi. From samting ya oli save yusum ful paoa blong olgeta blong joen long wok blong prij mo mekem disaepol.
4 Sosaeti i hop se ol niufala mak ya long namba blong ol aoa we ol paenia oli mas kasem, bambae oli givhan long plante moa paenia blong stap strong long nambawan jans we oli gat long wok ya. Bambae samting ya i givhan tu long plante moa pablisa blong joen long fultaem mo haftaem paenia wok. !Yes, bambae samting ya i wan blesing blong evriwan long kongregesen!