Mbamba foé Luc a nga tili

7 Éyoñ a nga mane kate bôte mame mete, ane a nga nyiin e Capernaüm. 2 E wôé, évete bezimbi* é mbe é bili mbo ésaé a mbe a nye’e abui, ve mbo ésaé ate a mbe a konô’ô aval é mbe na awu é ntoo nye bebé. 3 Éyoñ évete bezimbi é nga wô’ô be kobô’ô ajô Yésus, nde é nga lôme bemvendé béziñe ya bejuif na be ke ye’elane Yésus na, a zu saé mbo ésaé wé. 4 Ane be nga zu koone Yésus a taté na ba ye’elane nye biyoñe biyoñe be jô’ô na: “A ne avale môte wo yiane volô, 5 amu a nye’e ayoñe dangan, a nnye fe a nga lôñe synagogue wongan.” 6 Nde Yésus a nga ke a be, ve éyoñe be mbe be ntoo bebé a nda, nde évete bezimbi é nga lôme bemvôé bé na be ke jô nye na: “A monti te ndeñele womien, me nji bo avale môte wo yiane nyiine nda. 7 Ajô te nde ñhe, ma te yene na me nji bo avale môte da yiane zu be wo. Ve jô’ô fo’o ve éfia jia, a mbo ésaé wom a ye bo mvo’é. 8 Amu ma fe me bili bôte be ne éjôé jame si, me bili fe bezimbi be ne éjôé jame si, a ma jô wua na, ‘Kelek!’ A kele fe, a nyu mbo’o na, ‘za’ak!’ A zuli fe, a ma jô mbo ésaé wome na, ‘Bo’o jame di’ a bo fe de.” 9 Éyoñe Yésus a nga wô’ô mame mete, a nga bo fe’e ne vema, ane a nga kôñelan a fombô nsamba bôt ô mbe ô tôñe’e nye mvus, a jô na: “Ma kate mia na, to’o Israël été, me nji yen avale beta mbunane di.” 10 Éyoñe bôt évete bezimbi é nga lôme be nga bulane nda, be nga ke koone na mbo ésaé a ntoo mvo’é.

11 Mvuse mone nté, a nga ke tisone ba loone na Naïn, ba be beyé’é bé a beta nsamba bôt. 12 Éyoñ a nga kui bebé nka’ale ya tison, nde a nga yene be be’e mbime môt, a mbe susu’a mone* minga ate a mbe a bili, nde fe, nyia wé a mbe a ntoo nkus, a beta nsamba bôt a mbe a nye. 13 Éyoñe Tate a nga yene nye, a nga wô’ô nye éngôngol, ane a nga jô nye na: “Te beta yôn.” 14 Nde a nga subu be bebé a nambe ôlañ,* ane bebe’e be nga tebe. Nde a nga jô na: “A ndômane môte ma jô wo na, kôlô’ô si!” 15 Ane môt a mbe ñwuan a nga tabe tetoo a taté na a kobô, ane Yésus a nga ve nye nyia wé. 16 Ane woñ ô nga bi bese, ane be nga taté na ba ve Zambe duma be jô’ô na: “Beta nkulu mejô a yenéya zañe jangan,” a na, “Zambe a wô’ôya bôte bé éngôngol.” 17 A foé ya jam a nga bo é nga mane mialan e Judée ase a minlame mise mia bômane nye.

18 Ane beyé’é be Jean be nga ke kañete nye mame mete mese. 19 Nde Jean a nga loone beyé’é bebaé, a lôme be na be ke sili Tate na: “Ye wo ô ne Môt a yiane so, ye na bia yiane yange môte mfe?” 20 Éyoñe be nga kui be nye, bôte be nga jô nye na: “Jean Baptiste a te lôme bia bi zu sili wo na, ‘Ye wo ô ne Nyu a yiane so, ye na bia yiane yange mfe?’” 21 Awolo éte ébien, a nga saé abui bôt é mbe é bili bone be akon, a ba be mbe be bili beta be akon, a nga vaa fe abui mbia minsisim, a nga bo fe na abui bôt é beta yen. 22 Nde a nga jô be na: “Kele’e katané Jean mame mia te yen a wôk: Mindindime mi nga yen, mimbômbô’ô mi nga wulu, minzezame mi ntoo mvo’é, mindôndo’o mi nga wôk, mimbime mi nga wômô mesoñ a minzôzoé mi wô’ôya mbamba foé. 23 Mevak a nyu a nji bi bisô biziñe mfa’a wom.”*

24 Éyoñe beyé’é be Jean be nga bulan, Yésus a nga taté na a kobô nsamba bôt ajô Jean a jô’ô na: “Jé mi nga ke yene nkôte si? Ye élok é ne ayap* évuñulu é maneya vite si? 25 Nde jé mi nga ke yen? Ye môt a be’e mimfañe biyé?* Ke bôte be be’e mimfañe biyé ba nyiñe mfañ ényiñe menda me njô bôt. 26 Tama katané ma, jé mi nga ke yene yene nseñ? Ye nkulu mejô? Ôwé, ma kate fo’o mia na, a dañedañe nkulu mejô. 27 Môt ate nnye Mintilane mia jô mfa’a wé na, ‘Tame yen! Ma lôme nkate foé wom a ke wo ôsu,* nnye a ye kôme wo zen.’ 28 Ma kate fo’o mia na, e bôte bese be nga bialé be binga, teke wua a dañe Jean, ve môt a dañe tyôtyoé Éjôé Zambe a dañe nye.” 29 (Éyoñe bôte bese a benyoñe toya be nga wô’ô jam éte, be nga jô na Zambe a ne fo’o zôsô, amu e zu koone na be nyoñeya nduane Jean. 30 Ve bepharisien, a bôte be mbe be yeme’e metiñ, be nga bene na Jean a du be, éyoñe be nga bo de, be nga liti na be nji kômbô bo avale Zambe a yi na be bo.)

31 “Ma ye ve’e miaé bôte wu a beza? Ba funane beza? 32 Ba funane bone be bongô be too nseñ éwônga, ba loone bemvôé bap, ba be be be wô’ô bo bivôé be jô’ô na: ‘Bi nga bôme mindiñ, ve mi teke jem, bi nga tabe melunga, ve mi nji yôn.’ 33 Avale te fe Jean Baptiste a nga so a teke di belete nge nyu woon, ve mia jô na, ‘mbia nsisim a jôé nye.’ 34 Mona môt a nga so, nye a ja’a a nya’a fe woon, ve mia jô na, ‘Tama yenan! Môt ate a ne ndôndok a nnyu woon, mvôé benyoñe toya, a bebo minsem!’ 35 Ve jame da, fe’e môte ja yené* a mimboone mi mame mié.”*

36 Nde mone pharisien a nga bañete Yésus na a ke tabe si a di tebele a nye. Ane a nga nyiine nda jé a tabe si na a di. 37 Tame yen! Éyoñe minga éziñe be mbe be yeme’e tison ése na a ne minga bijabô a nga wô’ô na Yésus a di nda be mone pharisien, ane a nga soo albâtre, nde’e mbon ô ne mbamba menyum. 38 A nga ke tebe mebo mé mvus a yônô’ô, a taté na a ve mebo me Yésus émumun a mili’i mé. Wôna, a nga fimi me a ésile jé a latane anyu a mebo mé, a sôé mbon ô mbe mbamba menyume mebo mé. 39 Éyoñ a nga yene de, mone pharisien a nga bañete nye a nga taté na a jô nleme wé été na: “Nge môte nyi a be fo’o nkulu mejô ve a te yem avale minga, minga a nambe nye a ne, na minga ate a ne minga bijabô.” 40 Ve Yésus a nga jô nye na: “A Simon, me bili jame ya kate wo.” A nga jô Yésus na: “Kobô’ô, a Ñye’ele!”

41 “Bôte bebaé, be mbe be bili môt éziñe mvôla, wua a bili nye bedenier* 500, nyi mbo’o ki 50. 42 Mbôle be nji be ngule ya bulane nye mvôla, ane a nga jamé bese bebaane. Nde za ya be be a ye dañe nye’e nye?” 43 Simon a nga yalane nye na: “Ma simesane na môt a mbe a bili nye abui moné.” Nde a nga jô nye na: “Wo te yeme yalan.” 44 Ane a nga fombô minga a jô Simon na: “Nga ô lôô minga nyi? Ma te nyiine nda jôé, ô nji ve ma mendime ya sôbe mebo. Ve minga nyu a te ve ma mebo émumun a mili’i mé, a fimine me a ésile jé. 45 Ô nji wubane ma a nye’an ôse, ve minga nyu, ataté awolo ma te nyiine va, a latan anyu dé a mebo mam teke jô’é. 46 Ô nji sôé ma mbone nlô, ve minga nyu a te sôé ma mbon ô ne mbamba menyume mebo mam. 47 Amu jam éte, ma kate wo na minseme mié, mi kusa bo abui* mi ntoo njaman, amu a nga nye’e abui. Ve nyu ba jamé tyôtyoé a nye’e tyôtyoé.” 48 Nde a nga jô nye na: “Me maneya jamé wo minseme miôé.” 49 Bôte be mbe be too tebele a nye be nga taté na ba jô môt ase a jô’ô nyu mbo’o na: “Môte nyi a ne za a jamé to’o minsem?” 50 Ve a nga jô minga na: “Mbunane wôé ô nyiiya wo; kele’e mvo’é.”