Mbamba foé Marc a nga tili

10 Éyoñ a nga kôlô valé, a nga tyi’ilane Jourdain a ke minné mi si ya Judée, a nsamba bôt ô nga beta zu koone nye. A nga beta taté na a ye’ele be aval a mbe a jaé bo. 2 Ane bepharisien be nga zu koone nye be bili nsôñane ya ve’ele nye, nde be nga sili nye nge atiñe da kañese na, fam é tyam aluk a minga. 3 A nga yalane be na: “Jé Moïse a nga jô mia?” 4 Be nga yalane na: “Moïse a nga ve ôva’a ngule na, nge môt a kômbô suu minga wé, a tili nye kalate ntyaman aluk.” 5 Ve Yésus a nga yalane be na: “Moïse a nga tili mia atiñ éte, amu ayete minleme denan. 6 Ve aso atata’a, Nyu a nga té be, ‘A nga té be fam a minga. 7 Amu nalé, fame ja ye lik ésa wé a nyia wé, 8 a bebaane ba ye bo nsône wua,’ nde be nji beta bo bebaé, ve be ntoo nsône wua. 9 Nde jôme Zambe a maneya lat, môt a bo’o te kandé je.” 10 Éyoñe be nga beta nyiine nda été, ane beyé’é be nga beta sili nye ajô éte. 11 A nga jô be na: “Môt ase a tyam aluk a minga wé a beta ke lu’u minga mfe a boya mejian, a boya nye abé; 12 a nge minga, éyoñ a tyameya aluk a nnôm a beta ke lu’u môte mfe a bo mejian.”

13 Ane bôte be nga taté na ba zuu nye bone be bongô na a nambe be, ve beyé’é be nga komekane be. 14 Éyoñ a nga yene de, Yésus a nji wô’ô nalé mvaé, ane a nga jô be na: “Jôka’ane bone be bongô be zu be ma, te jeñané na mi kamane be na be zu be ma, amu Éjôé Zambe é ne asu avale bôte dap. 15 Ma kate fo’o mia na, mia yiane kañese Éjôé Zambe, aval ane mone mongô, nge mia bo te bo nalé, mi yeme’e na, mia ye ke nyiin été a zen éziñ.” 16 Ane a nga wubane be, a taté na, a botane be a beté’é be mo nyul.

17 Nté a mbe a kele’e a wulu zene zen, ane môt a nga mate mbil akekui vôm a mbe, a kute meboñe si a sili nye na: “A Mbamba Ñye’ele, jé ma yiane bo na me bi ényiñe ya nnôm éto?” 18 Yésus a nga jô nye na: “Amu jé wo loone ma na, mbamba? Susu’a môt é ne mbamba môt é ne fo’o ve Zambe. 19 Wo yeme metiñ: ‘Te wôé môt, te bo mejian, te wup, te bôte môt ajô, te du’u bôte bevok, semé’é éso ba nyua.’” 20 Môt a nga jô nye na: “A Ñye’ele, ma tôñe metiñe ma mese aso mongô.” 21 Yésus a nga fombô nye a nye’e nye a jô nye na, “Jame da da jembane wo: Kele’e kuane biôme biôé a ve minzôzoé, a wo ye bi akume yôp été, a za’a bo ñyé’é wom.” 22 Ve môt a nga tiñeti asu éyoñ a nga wôk éyalane Yésus a nga ve nye a ke éyôé éyôé, amu a mbe a bili abui akum.

23 Éyoñ a maneya fombô bôte be mbe be bôma’ane nye, Yésus a nga jô beyé’é bé na: “Da ye fo’o bo ayaé asu bôte be bili abui moné na be nyiin Éjôé Zambe!” 24 Ve beyé’é be Yésus be nga kam éyoñe be nga wô’ô mejô mete. Ane Yésus a nga jô be na: “A bon, da ye fo’o bo ayaé ya nyiin Éjôé Zambe! 25 Da ye dañe bo tyi’ibi na, chameau a tulan abé ndôndo a lôte na nkukume môt ô nyiin Éjôé Zambe.” 26 Be nga dañe kam a jô nye* na: “Za fo’o a ne bi bi ényiñ?” 27 Yésus a nga fombô be mis été a jô be na: “Mfa’a bôte jam éte é vo’o boban, ve mfa’a Zambe mame mese me ne boban.” 28 Pierre a nga taté na a jô nye na: “Tame yen! Bi maneya li’i biôme bise a tôñe wo.” 29 Yésus a nga jô na: “Ma kate fo’o mia na, môt ase a nga li’i nda, nge bobenyañ, nge bekal, nge nyia, nge ésa, nge bon, nge mesi amu jôé dam a amu mbamba foé 30 a ye nyoñe biôme bite bise biyoñe 100 ataté éyoñe ji, menda, bobenyañ, bekal, benyia, bon a mesi étibila’a été, a émo* ja zu ényiñe ya nnôm éto. 31 Ve bôt abui be tele ôsu, ba ye su’ulane tebe mvus, a bôte be ne mvus, ba ye su’ulane tebe ôsu.”

32 Éyoñe be mbe be kele’e njoñe wo ke Jérusalem, Yésus a mbe a tele be ôsu, ane be nga kam. Ve ba be mbe be tôñe’e nye be nga taté na ba ko woñ, ane Yésus a nga beta nyoñe minlôman Awôm a mibaé fefel a taté na a kate be mame ma yiane kui nye: 33 “Tama yenan! Bia ke Jérusalem, a ba ye kee Mona môte mo bejôô beprêtre a bescribe, a ba ye tyi’i na a yian awu. Mvuse ya valé, ba ye kee nye be bôte ya meyoñ, 34 a ba ye kpwe’ele nye, ba ye tui nye menden a bôme* nye a wôé nye, ve mvuse melu melal a ye wômô.”

35 Jacques a Jean, bone be Zébédée be nga zu koone nye a jô nye na: “A Ñye’ele, bia yi na, ô bo bia jôm ése bia zu sili wo.” 36 A nga sili be na: “Jé mia yi na me bo mia?” 37 Be nga yalane nye na: “Kañese’e na, bi tabe étôto’o jôé, wua mbo nnôme wôé, nyu mbo’o mbo ngale wôé.” 38 Ve Yésus a nga jô be na: “Mi nji yeme jame mia sili le. Ye mi ne ngule ya nyu élaé ma nyu ji, nge ke na, ye mi ne ngule ya duban avale ma dubane di?” 39 Be nga jô nye na: “Bi ne nyu je.” Ane Yésus a nga jô be na: “Élaé ma nyu ji, mia ye je nyu, nde fe, avale nduane ma dubane di, mia ye dubane de. 40 Ve sa ke ma ma tyi’i za a ye tabe mbo nnôme wome nge ki mbo ngale wom, ve bito bite bi ne asu bôte Zambe émien a nga tobe na ba yiane tabe été.”

41 Éyoñe minlômane mivok awôme mi nga wô’ô de, mi nga wô’ô Jacques ba Jean mbia ôlun. 42 Ve Yésus a nga loone be a jô be na: “Mia yeme na bejô bôte ya meyoñe ba jôé* bôt, ane bemasa, a beta be bôte bap ba jôé be a ngul. 43 Nalé a nji yiane bobane be mia, ve môt ase a kômbô bo beta môt, a yiane bo mia mbo ésaé, 44 a nyu ase a kômbô bo ntebe ôsu zañe jenan a yiane bo ôlo wônane mia bese. 45 Amu to’o Mona môt a nga so si va, sa ke na bôte be bo nye bisaé, ve na a bo bôte bisaé a ve ényiñe* jé ane ntañ asu bôt abui.”

46 Ane be nga kui Jéricho, nté Yésus a beyé’é bé be mbe be kôlô’ô Jéricho a beta nsamba bôt a mbe a tôñe’e be, Bartimée, mone Timée, ndindim a nzôzoé môt,* a mbe a too fefele njoñ. 47 Éyoñ a nga wô’ô na Yésus ya Nazareth, nnye a lôte le, a nga yôtan a jô na: “A Yésus, Mone David, mvama’ane ma!” 48 Abui bôt é nga komekane nye é jô’ô nye na a tabe évôl, ve nye ki a nga dañe yôtane a jô na: “A Mone David, mvama’ane ma!” 49 Nde Yésus a nga tebe a jô na: “Lo’oné ma nye.” Nde be nga loone ndindim a jô wô na: “Te ko woñ! Tebe’e tetele, a loone wo.” 50 Ane a nga wua éyé jé ya yôbe si a bo avôle ya kôlô si a ke koone Yésus. 51 Nde Yésus a nga jô nye na: “Jé wo yi na me bo wo?” Nde ndindim ô nga jô nye na: “A Rabbouni,* bo’o na me beta yen.” 52 Ane Yésus a nga jô nye na: “Kelek, mbunane wôé ô saéya wo.” A été été a nga taté na a yen, ane a nga taté na a ke a tôñe Yésus.