Mbamba foé Jean a nga tili
19 Nde Pilate a nga nyoñe Yésus a bôme* nye. 2 Ane bezimbi be nga lôñ ékate biyo a jalé nye je nlô a jalé nye édut é too évele ne tyaññ, 3 a be nga zu vôm a mbe a jô na: “Mbôlô a wo, Njôô bejuif!” Be nga bibi fe nye mebaé asu. 4 Pilate a nga beta kui nseñ a jô be na: “Tama yenan! Ma zuu mia nye nseñ, ndembene mi yeme na me nji yene mbia jam éziñ be nye.” 5 Nde Yésus a nga kui nseñ a be’e ékate biyo a édut é too évele ne tyaññ. A Pilate a nga jô be na: “Yenané môt!” 6 Ve éyoñe bejôô beprêtre a bezimbi be nga yene nye, be nga yôtane na: “Ve élé ve nye! Ve élé ve nye!”* Pilate a nga jô be na: “Miabebiene nyoñané nye, mi ke nye wôé,* amu me nji yene mbia jam éziñe be nye.” 7 Bejuif be nga yalane nye na: “Bi bili atiñ a aval atiñ éte da jô, a yian awu, amu a bo émiene mona Zambe.”
8 Éyoñe Pilate a nga wô’ô jame be mbe be jô’ô, a nga tu’a ko ko woñ, 9 ane a nga beta nyiine nda be ngovina a jô Yésus na: “Wo so so vé?” Ve Yésus a nji yalane nye. 10 Nde Pilate a nga jô nye na: “Wo bene yalane ma aah? Ye wo yeme ki na, me bili ngule ya suu wo a ngule ya wôé wo?”* 11 Yésus a nga yalane nye na: “Ô nji bi ngul éziñe be ma nge é nji so wo yôp, ajô te nde môt a nga zuu ma be wo a bili beta nsem.”
12 Amu nalé, Pilate a nga ke ôsu a jeñe zene ya suu nye. Ve bejuif be nga yôtane na: “Nge ô suu môte nyi ô nji bo mvôé César. Môt ase a jô na a ne njô bôt a wosane César.”* 13 Nde Pilate, éyoñ a nga mane wô’ô mejô ma, a nga kee Yésus nseñ a tabe si éto njôane yôp, vôme si é ne mbô’an a mekok, vôme ba loone nkobô Hébreu na, Gabbatha. 14 A mbe môse ba kômesane Paska, a a mbe bebé zañe môs.* Ane a nga jô bejuif na: “Yenané! Njô bôte wônan!” 15 Ve be nga yôtane na: “A wo’ok! A wo’ok! Ve élé, ve nye!”* Pilate a nga jô be na: “Ye me wôé njô bôte wônan?” Bejôô beprêtre be nga yalane na: “Bi nji bi njô bôte mfe ve César.” 16 Nde a nga ve be Yésus na be ke tyelé nye élé.
Nde be nga nyoñe Yésus a kee nye. 17 Émien a be’e élé mintaé* jé, a nga kui nseñe na a ke vôme ba loone na, Vôme ya ékôkoé nlô, nnye ate be mbe be loone nkobô Hébreu na, Golgotha. 18 Be nga bômôlô nye élé vôm ate a bôte befe bebaé, wua mfa’a wu, nyu mbo’o mfa’a ôvok, Yésus a too be ézezañ. 19 Pilate fe a nga tili jôé mese’esa a ba’é je élé mintaé* jé. A nga tili na: “Yésus ya Nazareth, Njôô bejuif.” 20 Abui bejuif é nga lañe jôé mese’esa éte amu vôme be nga tyelé Yésus élé a mbe bebé tison, a é mbe ntilane nkobô Hébreu e Latin, a e Grec. 21 Ve bejôô beprêtre bejuif be nga jô Pilate na: “Te tili na, ‘Njôô bejuif,’ ve na a nga jô na, ‘Me ne Njôô bejuif.’” 22 Pilate a nga yalane na: “Me tiliya jame me tiliya.”
23 Nde éyoñe bezimbi be nga bômôlô Yésus élé, be nga nyoñe biyé bié ya yôp a kabe bie ngap ényin, mone bezimbi ase ngabe jé, be nga nyoñe fe éyé jé ya si a mbe a be’e. Ve éyé jé a mbe a be’e é mbe teke nloéan, é too ngumba, ataté yôp akekui si. 24 Nde môt ase a nga jô nyi mbo’o na: “Te bia nyabe je, ve ñwu’ané mimbañe na bi yeme za a ye nyoñe je.” Nalé a nga tôé éfuse ya mintilane ji: “Be nga kabane biyé biam a be nga wua mimbañ asu biyé biam.” Nde bezimbi be nga bo fo’o mame mete.
25 Ve bebé élé mintaé* Yésus si, nyia wé a monyañe nyia wé be mbe be tele valé; a Marie minga Clopas a Marie Madeleine. 26 Nde éyoñe Yésus a nga yene nyia wé a ñyé’é a mbe a nyeke’e abui a tele nye fefel, a nga jô nyia wé na: “A minga, tame yen, nyo mone nyi!” 27 Mvuse ya valé a nga jô ñyé’é na: “Tame yen, nyua nyina!” Ataté awolo éte, ñyé’é ate a nga nyoñe nye nda jé.
28 Éyoñe Yésus a yemeya na, a maneya tôé mame mese mfa’a ya na mintilane mi tôéban, a nga jô na: “Ma wôk évé.” 29 Nka’a woon ô mbe ô tele valé ô too njalan a woon a ne sañ, nde be nga futi éponge be nga dube woon a ne sañe mbeñe hysope* a futi nye je anyu. 30 Éyoñ a nga tye’e sañe woon, Yésus a nga jô na: “É tôébaneya!” Ane nlô wé ô nga jombô ôsu a suu mvebe.*
31 Amu a mbe môse* ba kômesane Sabbat, nde bejuif be nga ke be Pilate a jô nye na mebo map me bu’uban, a na mimbime mi silibane si. 32 Nde bezimbi be nga so a bu’u mebo me môt ôsu a mbe a tyelé nye fefel, a ma me môt mbok a mbe a tyelé nye fefel. 33 Ve éyoñe be nga kui be Yésus be nga zu koone na a wuya, nde be nji bu’u mebo mé. 34 Ve mone bezimbi wua a nga jii nye akoñe mvaé, a été été metyi a mendime me nga kui. 35 A nyu a nga yene jam éte a kañete de, a nkañete wé ô ne été, a yeme na jôm a jô é ne été, ndembene mia fe mi ne buni. 36 É ne été na, mame ma me nga bobane na éfuse ya mintilane ji é tôéban: “Teke évese jé jia ja ye bu’uban.”* 37 A ntilan ôfe wo beta jô na: “Ba ye fombô môte be nga jii akoñ.”
38 Mvuse mame ma, Joseph ya Arimathée, nnye a mbe ñyé’é Yésus asoé, amu a mbe a ko bejuif woñ, a nga sili Pilate nge a ne ve nye mbime Yésus, ane Pilate a nga ve nye ôva’a ngul. Nde a nga nyoñe mbim a kee wô. 39 Nicodème, môt a nga taté so be nye alu, a nga soo fe mbundane* myrrhe a aloès, ô mbe 100 belivre.* 40 Nde be nga nyoñe mbime Yésus a vute wô a nya ndomboo, a bityita’a avale bejuif be mbe be bo’o éjame mbim. 41 Ajô te, afup é mbe vôme be nga wôé* Yésus a afup éte été wôé, mfefé soñ ô mbe. Soñ éte, be mbe be ngenane te tame bôé mbim été. 42 Amu a mbe môse bejuif ba kômesan, a amu soñ é mbe bebé be nga bôé Yésus valé.