Tabe’e ndi na Yéhôva a ye volô wo

1. Kate’e aval ényiñe bejuif é mbe Babylone.

BEJUIF be nga bo Yéhôva melo mimbu mimbu, ane Yéhôva a nga kañese na bôte ya Babylone be mane zu tyame si jap a kee be minkôm. Nde, aval avé be mbe be nyiñi’i wôé? (2 Mka. 36:15, 16, 20, 21) É ne été na bone be Israël be mbe fili ya bo mame méziñ. (Jér. 29:4-7) Ve ényiñ é nji mbe tyi’ibi asu dap, a Babylone a nji be vôme be mbe be kômbô’ô nyiñ. Nde, aval avé bejuif be mbe be yene’e été jap? Môte wua ya be be a nga kabetane Yéhôva a nga jô na: “Mfôm ôsôé ya Babylone, vôm ate bi nga too si va, yaa, bi nga yi, éyoñe bi nga simesane Sion.” (Bsa. 137:1) Da kôme yené na bejuif be mbe be yiik mvolane minlem, ve za a mbe ve volô be minlem?

2-3. (a) Jé Yéhôva a nga bo asu bejuif be mbe minkôm? (b) Jé bia zu yen ayé’é di?

² Yéhôva a ne “Zambe ya mvolane minlem ôse.” (2 Cor. 1:3) Mbôl a ne Zambe ya nye’an, a bili nkômbane ya volô minleme mi bôte bese ba subu nye bebé. Yéhôva a mbe a yeme’e na bôte béziñe be mbe minkôme ba ye kañese melep a nga ve be a bulane be nye. (Ésa. 59:20) Jôme te nje mimbu 100 a mvuk ôsusua na bone be Israël ba ke minkôm, Yéhôva a nga ve nkulu mejô Ésaïe mfufube nsisime wé asu na a tili kalate a be’e éyôlé jé. A nsôñan ôvé? Ésaïe a jô na: “‘Vola’ane minlem, vola’ane bôte bame minlem’ nalé Zambe wônan a jô.” (Ésa. 40:1) Ôwé, a zene ya mintilane mi ne kalate Ésaïe, Yéhôva a nga volô bejuif be mbe minkôme minlem aval é mbe é yiane be.

³ Aval ane bejuif be mbe minkôm, bia fe bi wô’ô yi na be volô bia minleme biyoñe biziñ. Ayé’é di, bia zu yene mezene melale Yéhôva a nga belane me asu na a volô minleme mi bone be Israël be nga ke minkôm: (1) A nga ka’ale na a ye jamé bôte ba kôñelane minlem, (2) a nga ve ayoñe dé ndi nlem a (3) a nga volô be na be bo teke beta ko woñ. Bia zu fe yen aval avé Yéhôva a volô bia minleme melu ma.

YÉHÔVA A LITI BIA FULU NKOON ÉNGÔNGOL ÉYOÑ A JAMÉ BIA

4. Aval avé Yéhôva a nga liti na a ne Zambe ya nkoon éngôngol? (Ésaïe 55:7)

⁴ Yéhôva a ne “Ésa wongan a wô’ô bia éngôngol abui.” (2 Cor. 1:3) A nga liti fulu éte éyoñ a nga ka’ale na a ye jamé bejuif be nga kôñelane minlem. (Lañe’e Ésaïe 55:7.) A nga jô na: “Ma ye ko wo éngôngol a mvame ya nnôm éto.” (Ésa. 54:8) Aval avé Yéhôva a mbe ve liti fulu nkoon éngôngole jé? Akusa bo bejuif be nga bo abui mimbu Babylone be nyoñe’e ma’ane ya melo map, ve Yéhôva a nga ka’ale be na ba ye ke tabe wôé nnôm éto. (Ésa. 40:2) Mejô mete me nga yiane kôme volô bejuif be nga kôñelane minlem a ve Yéhôva nlem avak!

5. Amu jé bia bia yiane dañe tabe ndi na Yéhôva a ye jamé abé dangan a lôte bejuif?

⁵ Ñye’elan ôvé bi ne nyoñ? Yéhôva a ne ôjeja’a ya jamé bebo bisaé bé a nlem ôse. Den bi bili abui beamu ya tabe ndi na Yéhôva a jamé abé dangan a dañe bejuif be mbe minkôm. Amu jé bia jô nalé? Amu bia kôme wô’ô mbôka’a ya njamane Yéhôva. Mintete mimbu mvuse nkulan ajô Ésaïe, Yéhôva a nga lôm édiñe Mone jé si va na é zu ve ényiñe jé asu bebo minseme ba kôñelane minlem. Mbôle Yésus a nga wu asu dangan, Yéhôva a ne tyame nge “mane jamé” minseme miangane mise. (Mame mi. 3:19; Ésa. 1:18; Éphé. 1:7) Ôwé Yéhôva a ne fo’o Zambe a jamé!

6. Amu jé minleme mia bômbô bia si éyoñe bia yeme na Yéhôva a jaméya bia? (Fombô’ô fe fôtô.)

⁶ Mejô Yéhôva a nga jô bejuif bia koone me kalate Ésaïe 55:7 me ne fe volô bia minleme nge da kui na bi ke ôsu a ve biabebiene bijô asu mbia be mame bi nga bo melu mvus, a too ke na bi maneya tyendé abo dulu dangan. Bi ne dañe wô’ôtane nalé éyoñe bia ke ôsu a tôbane minjuk amu jame bi nga bo. Ve nge bi nga mem abé dangan a tyendé abo dulu dangan, bi ne tabe ndi na Yéhôva a jaméya bia. A éyoñe Yéhôva a jamé bia, a tyi’i na a beta ki fe simesan abé dangan. (Ve’ek a Jérémie 31:34.) Mbôle Yéhôva a nji ke ôsu a simesane minseme bi nga bo melu mvus, bia fe bia yiane mie vuan. Jame da dañe mfi mise me Yéhôva é ne mame bia bo éyoñe ji, sa ke bikobe bi nga bo melu mvus. (Ézé. 33:14-16) Ana’ana, mfefé émo, Ésa wongane ya nkoon éngôngol a ye mane vaa minju’u mise bi nga tôbane mie amu bikobe biangan.

7. Jé é ne tindi bia na bi jeñe mvolane nge bi nga solé abé éziñ?

⁷ Jé ki bi ne bo nge bia ke ôsu a ve biabebiene bijô amu bi nga bo mbia nsem a solé nye bôte bevok? Kalate Zambe a lebe bia na bi ke jeñe mvolane be bemvendé. (Jacq. 5:14, 15) É ne été na é nji bo tyi’ibi na bi kate be jame bi nga bo. Ve bi nji yiane vuane na Yéhôva a belane bôte bete na be volô bia, a na ba ye liti bia fulu nye’an a fulu nkoon éngôngol ane Yéhôva. Nge bia ba’ale jam éte ôsimesan, a nge bia kôñelane minleme nya nkôñelane, bia ye bi nkômbane ya ke laan a bemvendé. Bi tame zu yen avale Yéhôva a nga belane bemvendé asu na a volô nleme mojañ Arthur.a Arthur a mbe a va’a émiene bijô a lôte nné amu mbia jam éziñ a nga bo. A jô na: “Me nga bo bebé ngume mbu me yene’e pornographie. Ve éyoñe me nga wô’ô nkañete éziñ ô mbe ô kobô’ô ajô mone môte ya nlem, me nga ke kate minga wom a bemvendé nseme me nga bo. Éyoñe me nga mane kate be, nlem ô nga bômbô ma si ne mieññ. Ve me nga ke ôsu a ve mamiene bijô amu mbia jame me nga bo. Bemvendé be nga jô ma abui biyoñe na Yéhôva a nji lume ma mvus. Nge a komekane bia a ne amu a nye’e bia. Mbamba bifia biap bi nga bôône ma nleme si a volô ma na me yeme na Yéhôva a jaméya fo’o ma.” Den, Arthur a ntoo nkpwa’a mefan a mvolô ya ékôane bekristen. Bia kôme bi nya ngule nyul éyoñe bia yeme na Yéhôva a ne nkômesane ya jamé bia nge bia tyendé abo dulu dangan.

YÉHÔVA A VE BIA NDI NLEM

8. (a) Ndi nleme fé Yéhôva a nga ve bejuif be mbe minkôm? (b) Avale kalate Ésaïe 40:29-31 a liti, aval avé ndi nlem é mbe ve volô bejuif be nga tyendé abo dulu dap?

⁸ E mise me bôt, é mbe ve yené na bejuif be vo’o ki beta bulane si jap. Bôte bese be mbe be yeme’e na éjôé ya Babylone é ne teke suu minkôme mié. (Ésa. 14:17) Ve Yéhôva a nga ve ayoñe dé ndi nlem. A nga ka’ale na a ye kôté ayoñe dé, a teke jôm éziñ é mbe ve kamane nye na a tôé ngaka’a jé. (Ésa. 44:26; 55:12) E mise me Yéhôva, Babylone a mbe zezé jôm ane mbuluk. (Ésa. 40:15) Éyoñe môt a vuñulu mbuluk, wo mane yele. Avale te fe é mbe tyi’ibi asu Yéhôva na a kôté bone be Israël minkôme Babylone. Mfa’a ôvé ndi nlem é mbe mfi asu bejuif? É mbe é yiane volô be minlem. Ve ndi nlem é mbe fe é yiane bo jam afe. Ésaïe a nga tili na: “Ba ba yange Yéhôva ba ye bo mfefé ngu.” (Lañe’e Ésaïe 40:29-31.) Ôwé, ndi nlem é mbe é yiane beta ve be ngul; ndembene ba ye beta “yele yôp a mefap aval ane bendôé.”

9. Mame mevé me nga yiane volô bejuif na be tabe ndi a bengaka’a be Yéhôva?

⁹ Yéhôva a nga ve fe bejuif beamu ya tabe ndi a bengaka’a bé. Aval avé? Tame ve’ele simesane minkulane mejô mi mbe mi maneya tôéban. Éve’an é ne na, be mbe be yeme’e na Assyrie a nga dañ Éjôé ya nord ya Israël bita a kee bôte ya wôé minkôm. (Ésa. 8:4) Be nga yen ane bôte ya Babylone ba mane tyame Jérusalem a kee bôte ya wôé minkôm. (Ésa. 39:5-7) Be nga yen ane be nga mane tube Njô bôte Sédécias mis a kee nye minkôme Babylone. (Jér. 39:7; Ézé. 12:12, 13) Jam ése Yéhôva a nga jô é nga mane tôéban. (Ésa. 42:9; 46:10) Mame mete mese me nga yiane volô be na be tu’a tabe ndi na Yéhôva a ye tôé ngaka’a a nga bo na a ye kôté be minkôm.

10. Jé é ne volô bia na bi ke ôsu a ba’ale ndi nleme jangane melu ma su’ulane ma?

¹⁰ Ñye’elan ôvé bi ne nyoñ? Éyoñe bia wô’ôtane na bi ne atek, ndi nlem é ne bôône bia minleme si a volô bia na bi beta bi ngul. Bia nyiñe mbia biyoñ, a bôte ba wosane bia be ne ngul. Ve bi nji yiane bili atek. Yéhôva a nga ve bia mbamba ndi nlem, ndi nleme ya nyiñe nnôm éto, e mvo’é été minleme mi bôô bia si ne mieññ. Bia yiane kôme ba’ale ndi nlem éte vevee ôsimesane wongan a minleme miangan été. Nge nalé momo, ndi nleme jangan é ne su’ulane bo ane mbamba vôme bia kate kui na bi yen, amu biyete ya vundu ya nda jangane bi ne mvit. Ve aval avé bi ne kôme “fimi biyete ya vundu wongan,” nge ke ôsu a ba’ale ndi nleme jangane ngul? Bi ne bo bi nyoñe’e éyoñe ya simesan abim avé ényiñe ya mfefé émo ja ye bo abeñ. Bi ne fe lañe minlô mejô, a yene bevidéo nge ke wô’ô bia bia kobô ajô ndi nleme jangan. Bi ne fe kate Yéhôva meye’elan été bengaka’a bi ne ôjeja’a ya yen ane ba tôébane paradis.

11. Jé ja volô sita éziñ a ne ntutuñe na a beta bi ngule nyul?

¹¹ Sita a ne jôé na Joy a ne ntutuñ. Bi tame zu yen aval avé ndi nlem é nga volô nye nlem a ve nye ngule nyul. A jô na: “Éyoñe nlem ô ne ma ntya’an, ma yoé Yéhôva nleme wom a kate nye mame mese ma ndeñele ma, a me too ndi na a yeme tebe été jam. Avale biyoñ éte, Yéhôva a wô’ô ma ve ‘ngule ja dañe nyi ja yian.’” (2 Cor. 4:7) Sita Joy a wô’ô fe nyoñ éyoñe ya fas aval ényiñe ja ye bo mfefé émo, vôme “môt éziñ a ye bo te jô na: ‘Ma kon.’” (Ésa. 33:24) Nge bia fe bia yoé Yéhôva minleme miangan a kate nye mame ma ndeñele bia, a bem ôsimesane wongane ndi nleme jangan, nalé a ye volô bia na bi bi ngule ya jibi minju’u bia tôbane mie.

12. Mame mevé ma volô bia na bi tabe ndi a bengaka’a be Yéhôva? (Fombô’ô fe fôtô.)

¹² Avale Yéhôva a nga ve bejuif abui beamu ya tabe ndi a bengaka’a bé, avale te fe nde a bo melu mangane ma. Nyoñe’e éyoñe ya bindi minkulane mejô mia tôébane melu mangane ma. Éve’an é ne na, bia yen ane éjôé é ne “ngabe jia ngu, ngabe fo’o mbu’an.” (Dn. 2:42, 43) Bia wô’ô fe be kobô’ô ajô “mimfô’ôsane mi si mia [bobane] bevôme bevôm,” a bia kañete bôte ya “meyoñe mese.” (Matt. 24:7, 14) Mbôle bia yene minkulane mejô mite a abui minkulane mejô mife mi tôéban, nalé a yemete ndi nleme jangane na mbamba be mame bese Yéhôva a nga ka’ale ba ye tôéban.

YÉHÔVA A VOLÔ BIA NA BI BO TEKE BETA KO WOÑ

13. (a) Minju’u mivé bejuif be nga yiane tôbane mie éyoñe be nga kôlô minkôm? (b) Avale kalate Ésaïe 41:10-13 a jô, aval avé Yéhôva a nga volô bejuif minlem?

¹³ Akusa bo Yéhôva a nga ve bejuif ngule nyul éyoñ a nga ve be ndi nlem, ve a mbe a yeme’e na ba ye tôban abui minjuk éyoñe ba ye kôlô minkôm. Yéhôva a nga jô na éyoñe bejuif ba ye bo be nga zu kôlô minkôm, éwôlô njô bôte ja ye dañe meyoñe me mbe me bôma’ane Babylone mewosan, a su’ulane wosane Babylone émien. (Ésa. 41:2-5) Ye jam éte é nga ye bo na bejuif be tyelé minleme yôp? Ôsusua na jam éte da kui, Yéhôva a nga volô ayoñe dé nlem éyoñ a nga jô na: “Te ko woñ, amu me ne be wo; te fombô beyeye, amu me ne Zambe wôé.” (Lañe’e Ésaïe 41:10-13.) Jé a mbe a kômbô’ô jô éyoñ a nga jô na: “Me ne Zambe wôé?” A nji be a kômbô’ô jô bejuif na ba yiane nye kañ, amu be mbe be yeme’e na a ne jame ba yiane bo. Ve a mbe a yiik na be yeme na a ne ngame jap, a na a ye volô be.—Bsa. 118:6.

14. Jé Yéhôva a nga beta bo asu na a volô bejuif na be bo te ko woñ?

¹⁴ Yéhôva a nga volô bone be Israël na be bo teke beta ko woñ, éyoñ a nga kate be na ngule jé a fe’e jé bi ne teke nné. A nga jô be na be bete mis a fombô ateté ya yôp. A nga kate be na ane ô vaa na a nga té ateté, ve a yeme fe éyôlé ôteté ôse. (Ésa. 40:25-28) Nge Yéhôva a yem éyôlé ôteté ôse, ngumane ki biyôlé bebo bisaé bé! Nge Yéhôva a nga bi ngule ya té ateté, a bili fe ngule ya volô bebo bisaé bé. Ôwé, bejuif be mbe minkôme be nji mbe be yiane ko jôm éziñe woñe nge tyelé minleme yôp.

15. Aval avé Zambe a nga volô bejuif na be tabe nkômesan asu mame me mbe me yange’e be ôsu?

¹⁵ Yéhôva a nga kate fe ayoñe dé jame da yiane bo ôsusua na a kôté de. E kalate Ésaïe, Zambe a nga taté jô ayoñe dé na: ‘Nyi’ine menda môé, a dibe mimbé miôé mia bômane wo: solé’é womiene mon étun, akekui ayaa da ye mane lôt.’ (Ésa. 26:20) Éko éziñe nkulan ajô ôte ô nga taté tôéban éyoñe Njô bôte Cyrus a nga dañe Babylone bita. Ñyeme mam éziñe ya Grèce a nga jô na éyoñe Cyrus a nga nyiine Babylone, a “nga jô [bezimbi bé] na be wôé môt ase ba ye koon a tele nseñ.” Tame ve’ele simesan abim avé bôte be mbe be nyiñi’i Babylone be nga yiane ko woñ! Éko éziñe bone be Israël be nga nyiñ amu be nga tôñe mebendé Yéhôva a nga ve be.

16. Amu jé bi nji yiane dañe tyelé minleme yôp asu mame ma yange bia melu ma zu? (Fombô’ô fe fôtô.)

¹⁶ Ñye’elan ôvé bi ne nyoñ? Ana’ana, beta étibila’a a zu taté, a aval étibila’a éte é ngenane teke tame bobane môs éziñ émo minlañ. Éyoñ étibila’a éte ja ye taté, abui bôte da ye bo fe’e ne vema a ko mbia woñ. Ve bebo bisaé be Yéhôva be ba ye ke tyelé minleme yôp. Bia yeme na Yéhôva a ne Zambe wongan. Bia ye tebe ne bip bi yeme’e na “nyiiane [wongan] ô ntoo bebé.” (Luc 21:28) To’o éyoñe nsamba meyoñe ya si nyu wo ye wosane bia, bia ye tebe ne bip. Ane ô vaa na Yéhôva a ye ba’ale bia a zene ya beéngele, a ye fe ve bia mebendé ma ye nyii bia. Aval avé bia ye bi mebendé mete? Bia ye yange a yen ane jam éte da ye boban. Éko éziñe bia ye bi mebendé mete a zene ya bikôane bekristene biangan. Bikôane bekristene bite mbie bia ye yiane bo ane “bitune bi nda” ya ke sobô, vôme mbia jam a ye bo te kui bia. Jé bi ne bo asu na bi tabe nkômesan asu mame ma yange bia melu ma zu? Bia yiane subu bobejañ a besita bebé a tôñe mebendé ékôane Yéhôva ja ve bia a nleme wongan ôse. Bia yiane fe kôme tabe ndi na Yéhôva nnye a wulu ékôane jangan.—Héb. 10:24, 25; 13:17.

17. Aval avé ô ne jeñe mvolane nleme be Yéhôva?

¹⁷ Akusa bo ényiñe bejuif é nji be tyi’ibi Babylone, ve Yéhôva a nga ve be mvolane minlem ô mbe ô yiane be. A ye fe bo avale da asu dangan. Ajô te, to’o wo ye tôban avale minjuk avé melu ma zu, kele’e ôsu a jeñe mvolane nleme be Yéhôva. Ôwé, tabe’e ndi a beta fulu nkoon éngôngole wé. Ba’ale’e ndi nleme jôé vevee. A te ve’ele vuane na, éyoñe Zambe wôé Yéhôva a ne wo ngam, ô nji yiane ko jôm éziñe woñ.