Nye’ane Zambe wo tabe nnôm éto

1, 2. Amu jé bia nye’e Yéhôva Zambe?

YE WO nye’e Zambe? Éko éziñ nye’an ôte ñwô ô nga tindi wo na ô ve womien ngumba be nye. Éko éziñ ô lôô nye ane nya Mvôé wôé. Ve ôsusua na wo nye’e Yéhôva, nnye a nga taté nye’e wo. Bible a jô na: “Bia nye’e, amu a nga taté nye’e bia.”​—1 Jean 4:19.

² Tame fas abime biyoñ Yéhôva a litiya bia na a nye’e bia. A nga ve bia si, mbamba vôme ya tabe, a mam mese bia yi asu na bi bi mbamba ényiñ. (Matthieu 5:43-48; Nlitan 4:11) A yi na bi bo bemvôé bé, jôm éte nje a nga ve bia fane ya yeme nye. Éyoñe bia lañe Bible, bia vô’ôlô Yéhôva. Éyoñe bia ye’elan, a vô’ôlô bia. (Besam 65:2) A liti bia zen, a ve fe bia ngul a zene ya mbamba nsisime wé. (Luc 11:13) A nga lôm édima Mone jé asu na, a zu vaa bia minkôm ya abé a awu.​—Lañe’e Jean 3:16; Beromain 5:8.

3. Jé bia yiane bo asu na bi bo bemvôé be Yéhôva?

³ Tame simesan nya mvôé wôé, nyi a nga su’u wo biyoñe ya mevak a biyoñe ya minjuk. Asu na ô bi aval mvôé éte, wo yiane ve abui ngul. Nalé a sili fe mfa’a ya amvô’é dangan a Yéhôva, amu nnye a ne Mvôé ja dañ bemvôé bese. Amvôé éte é ne tabe nnôm éto. Bible a jô bia na: ‘Bi ba’ale biabebien nye’ane Zambe été.’ (Jude 21) Nde aval avé bi ne de bo? Émien a yalane na: “Jame dina nde e ne nye’ane Zambe [na, bi] ba’ale metiñe mé: a metiñe mé me nji bo adit.”​—1 Jean 5:3.

“JAME DINA NDE E NE NYE’ANE ZAMBE”

4, 5. (a) Jé Bible a loone na “nye’ane Zambe”? (b) Aval avé nye’ane Zambe ô nga faa wo nlem?

⁴ Jé Bible a loone va na “nye’ane Zambe”? A nji kômbô jô nye’ane Zambe a nye’e bia, ve nye’ane bia nye’e nye. Ye ô ngenan ô simesa’an éyoñ nye’an wo nye’e Zambe ô nga faa wo nlem?

⁵ Tame simesan aval ô nga wô’ôtan éyoñ ôsu ô nga yé’é na, Yéhôva a yi na ô nyiñe nnôm éto paradis e si va. Ô nga yé’é mame mese a nga bo asu na nkômbane wé ô boban, ô nga tu’a fe wôk aval beta jam Zambe a nga bo, éyoñ a nga lôme Mone wé asu dangane si va. (Matthieu 20:28; Jean 8:29; Beromain 5:12, 18) Éyoñ ô nga yem abim avé Yéhôva a nye’e wo, wo fe ô nga taté na wo nye’e nye.​—Lañe’e 1 Jean 4:9, 10.

6. Aval avé ô ne liti môt éziñe na wo nye’e nye? Nye’ane Zambe wo tindi wo na ô bo jé?

⁶ Nalé a mbe ve atata’a ya nye’an wo nye’e Zambe. Amu éyoñ wo nye’e môt, wo jô ke nye ve anyu anyu na, “Ma nye’e wo.” Nye’an wo tindi wo na, ô bo mam ma ve nye nlem avak. Aval ete da da, nye’ane bia nye’e Yéhôva wo tindi bia na bi bo mam a nye’e. Éyoñe nye’an ôte ô keya ôsu a yaé, nde ô nga ve womien ngumba be Yéhôva a duban. A mboan ôte, ô nga ka’a Yéhôva na, wo zu bo nye ésaé nnôm éto. (Lañe’e Beromain 14:7, 8.) Aval avé ô ne tôé ngaka’a éte?

“BI BA’ALE METIÑE MÉ”

7. Aval avé bi ne liti na bia nye’e Yéhôva? Tame lañe mame méziñ a kamane bia na bi bo.

⁷ Bia “ba’ale metiñe” me Yéhôva amu bia nye’e. Aval avé bi ne bo de? Bia yiane nye bo mewôk. Bible a liti bia avale Yéhôva a yi na bi nyiñ. A jô bia na, bi nji yiane so’o meyok, nge wup, nge ke laa minsos, bi nji yiane ke binoñ a môt bia be nye bi nji bo nlu’an, nge ke kañe môt mfe nge jôm éfe.​—1 Becorinthien 5:11; 6:18; 10:14; Beéphésien 4:28; Becolossien 3:9.

8, 9. Aval avé bi ne nyoñe mbamba ntyi’ane éyoñe Yéhôva a nji kate bia ne sañesañe jam bia yiane bo? Va’a éve’an.

⁸ Nge bia kombô ve Yéhôva nlem avak, bia yiane bo metiñe mé mewôk, bia yiane fe bo mame mefe. A nji ve bia beta nkobe metiñ asu bité bise ya ényiñ. Nde aval avé bi ne nyoñe mbamba mintyi’an? (Beéphésien 5:17) Bible a ve bia miñye’elan mi ne volô bia na bi tu’a yem ôsimesan Yéhôva éyoñ bi tele bité biziñ. Éyoñ bia lañe Bible, bia ye kui na bi yem avale môt Yéhôva a né. Bia ye taté na bia yem ôsimesane wé; mam a nye’e, a ma a vini.​—Lañe’e Besam 97:10; Minkana 6:16-19; lañe’e Ayemé 1.

⁹ Bi tame nyoñ éve’an: jé é ne volô bia na bi tobe jam bia ye yene télé, nge internet? Yéhôva a nji kate bia ne sañesañe jam bia yiane bo. Ve miñye’elan a ve bia mi ne volô bia na bi nyoñ mbamba mintyi’an. Abui mimvômane ya den, e ne njalan a njet a mame bisôk. Yéhôva a jô bia kalate wé na, “a vini môt a nye’e évô,” nde fe “aye tyi’i bôte bijabô mejô a bebo mejian.” (Besam 11:5; Behébreu 13:4) Nde aval avé miñye’elane mite mi ne volô bia na, bi nyoñe mbamba mintyi’an? Éyoñe bia yeme na Yéhôva a vini jam éziñ, nge ke na e ne mvite mise mé, bia yiane tube de.

10, 11. Amu jé bia bo Yéhôva mewôk?

¹⁰ Amu jé bia yiane bo Yéhôva mewôk? A nji yiane bo v’amu bia koo fonose woñ, nge ke mbia jam a ne kui bia mbôle bia te nyoñe mbia ntyi’an. (Begalate 6:7) Momo, bia yiane bo Yéhôva mewôk amu bia nye’e nye. Aval ane bon ba kômbô ve ésa wop nlem avak, aval ete fe bia kômbô ve Ésa wongane ya yôp nlem avak. Teke jam éziñ é ne mvaé ane meva’a bi bili éyoñe bia yeme na, Yéhôva a wô’ô bia mvaé!​—Besam 5:12; Minkana 12:2; lañe’e Ayemé 2.

¹¹ Bi nji yiane bo Yéhôva mewô’ô ve éyoñ mam me ne bia tyi’ibi, nge ke éyoñ bi nji bi ngule ya bo aval afe. Bia fiale ki miñye’elan mi Yéhôva bia tôñe nge mi bia tôñe ki. (Deutéronome 12:32) Bia yiane bo nye mewôk a nlem ôse aval ane ntili Besam a jô: “M’ayen mvaé jam mebendé môé été, mme mete me nye’eya.” (Besam 119:47; Beromain 6:17) Bia yiane bo ane Noé. A nga liti na a nye’e Yéhôva amu a nga bo nye mewô’ô mimfa’a mise. Bible a jô na, avale Yéhôva a nga jô Noé na a bo “nalé a nga bo.” (Metata’a 6:22) Ye wo fe wo yi na, Yéhôva a jô nalé éyoñ a kobô ajô dôé?

12. Aval avé bi ne ve Yéhôva nlem avak?

¹² Yéhôva a wô’ô aya éyoñ bia bo nye mewôk? Bia ve nye “nlem avak.” (Minkana 11:20; 27:11, Mfefé Nkôñelan) Avale mbamba jam ete! Bia ve Nté ya biôm bise nlem avak éyoñe bia bo nye mewôk. Ve a nji yemete bia na bi bo nye mewôk. A nga ve bia fili ya top. Nalé a tinane na, bi ne fili ya top na bia bo mbamba be mam nge mbia be mam. Yéhôva a yi na bi nyoñ mbamba mintyi’an amu bia nye’e nye, nalé a ye ve bia ényiñe ja dañe mvaé.​—Deutéronome 30:15, 16, 19, 20; lañe’e Ayemé 3.

“METIÑE MÉ ME NJI BO ADIT”

13, 14. Aval avé bia yeme na metiñe me Zambe me nji dañe bo ayaé ya tôñ? Va’a éve’an.

¹³ Jé bi ne bo nge bia yene metiñe me Yéhôva méziñ mbia ayaé ya tôñ, a nge bia simesane na, bi nji ve’ele bo fili nge bia tôñe me? Bible a jô na: “Metiñe mé me nji bo adit.” (1 Jean 5:3) Éfia ya nkobô Grek be nga kôñelane na “adit” ja tinane na, “mbe’e ô ne adit.” Bible a belane bifia bite bevôme befe asu na, a kobô ajô ya bôte ba ka’a ba bevok adite mimbe’e, nge ke ba ba kômbô jôé ba bevok. (Matthieu 23:4; Mam Minlôman 20:29, 30) Mfefé Traduction du monde nouveau (nkobô Énglis) a jô na: “Metiñe mé me nji bo mbe’e ô ne adit.” Metiñe me Yéhôva me nji fo’o bo “mbe’e ô ne adite ya be’e,” nalé a tinane na, me nji dañe bo ayaé ya tôñ. Yéhôva a vo’o ke jô bia na, bi bo jam émien a kôme yeme na, bi nji bo ngule ya bo.

¹⁴ Bi tame jô na, wo ke volô mvôé jôé éziñ éyoñ a ke tabe nda fe. A te mane ka’a mimbe’e mevale meval. Mimbe’e miziñ mi ne ôveves a tyi’ibi ya be’e, mivo’o ki angôndô ya adit, avale bôte bebaé ba yiane be’e. Ye mvôé jôé é ne jô wo na ô be’e mbe’e ô ne adit ôte étam? Momo! Amu jé? K’amu a nji yi na mbia jam éziñ a kui wo. Aval ete da da, Yéhôva a vo’o ke jô bia na, bi bo jam émien a kôme yeme na, é ne nya ayaé ya bo. (Deutéronome 30:11-14) Yéhôva a kôme bia yem. A “yem ntéane wongan, a simesane na bi ne metek.”​—Besam 103:14.

15. Aval avé bia yeme na metiñe me Yéhôva me ne asu mfi wongan?

¹⁵ Moïse a nga kat ayoñ Israël na Metiñe me Yéhôva me ne “mvo’é asu melu mese.” (Deutéronome 5:28-33; 6:24) E ne fe nalé den. Jam ése Yéhôva a jô bia na bi bo e ne asu mfi wongan. (Lañe’ Ésaïe 48:17.) Yéhôva, Ésa wongan a yeme jame da dañe mvo’é asu dangan. (Beromain 11:33) Bible a kate bia na: “Zambe a ne nye’an.” (1 Jean 4:8) Nalé a tinane na, nye’an ñwô Yéhôva a telé ôsu éyoñ ése a bo jame éziñ, nge ke éyoñ ése a jô jôm éziñ.

16. Aval avé bia yeme na bi ne bo Yéhôva mewôk akusa bo bi ne mbialan abé été, a na bia nyiñe émo Satan?

¹⁶ E nji bo tyi’ibi ya bo Zambe mewôk kom ése. Bia nyiñ mbia émo, émo Satan a jôé. A jeñe na a tindi bôte na be bo mbia be mam. (1 Jean 5:19) Bia yiane fe wosane mbia mefulu a mbia beasimesane bangan, amu ba tindi bia na bi bo Yéhôva melo. (Beromain 7:21-25) Ve nye’ane bia nye’e Yéhôva wo ve bia ngule ya bo mbamba be mam. A yene ngul ése bia ve asu na bi bo nye mewôk, a volô fe bia a zene ya mbamba nsisime wé. (1 Samuel 15:22, 23; Mam Minlôman 5:32) Mbamba nsisim ate a volô bia na bi bi mbamba mefulu ma volô bia na, e bo tyi’ibi ya bo Yéhôva mewôk.​—Begalate 5:22, 23.

17, 18. (a) Jé kalate nyi a ye ye’ele bia? (b) Jé bia ye yene kabetôlô a zu?

¹⁷ Kalate nyi a ye ye’ele bia avale bi ne ve Yéhôva nlem avak. Bia ye yé’é avale bi ne tôñe miñye’elane ya Bible, a memvinda me ne mfi asu ényiñe jangan. Te vuane na, Yéhôva a nji yemete bia na bi bo nye mewôk. Éyoñe bia tobe na bia bo nye mewôk, ényiñe jangan ja bo nya abeñe, nalé a ye fe ve bia mbamba ényiñe melu ma zu. Jame da dañ e ne na, mewô’ô mangan ma liti Yéhôva abim avé bia nye’e nye.​—Lañe’e Ayemé 4.

¹⁸ Yéhôva a nga ve môt ase ya be bia mone môte ya nlem, asu na bi yem jam é ne mvaé a di é ne abé. Nge bia ye’ele mone môte ya nleme wongan, a ye volô bia na ‘bi tôñe metiñe mé.’ Nde ñhe, jé é ne ne mone môte ya nlem, a aval avé bi ne ye’ele nye? Jame bia ye yen kabetôlô a zu, nde le.