Sa Unsang Paagi Ipatungha sa Diyos ang Kalinaw? Ug Kanus-a?
“Sukad pa sa sinugdanan sa sibilisasyon, ang nangibabawng institusyon sa Tawo mao ang mga estado . . . Wala pay bisan usa ka estado sukad ang nakapasakop sa tibuok buhing kaliwatan sa katawhan sa tibuok globo.”
“Kanunay nga may daghang estado . . . ug ang ilang mga kasungian miresultag mga gubat nga nahlmong usa sa mga sakit sa sibilisasyon.”
“Ang presenteng adlawng grupo sa lokal nga soberanong mga estado walay katakos sa pagtipig sa kalinaw.”—Arnold Toynbee, Mankind and Mother Earth.
SUMALA sa kahayag sa mga pulong sa ibabaw, unsa ang usa sa labing dakong babag sa pagtukod sa kalinaw? Ang panagbahinbahin sa katawhan ngadto sa soberanong mga nasod. Sa yano, ang nasyonalismo.
Gibatbat sa manalaysayng si Arnold Toynbee ang nasyonalismo ingong “labing gamhanan ug labing mapintas sa tulo ka ideolohiya sa Kasadpan nga mitungha tapos sa Kristohanong panahon. [Ang uban, sumala kang Toynbee, mao ang ‘komunismo sa kalibotan’ ug ‘kapitalismo sa kalibotan.’] . . . Ang nasyonalismo maoy mga nuybenta porsiento nga relihiyon sa mga nuybenta porsiento sa tibuok tawhanong kaliwat.” Bisan pa ang nasyonalismo nakapabahin sa katawhan sa libolibong katuigan. Nan sa unsang paagi ang Diyos sa kalinaw magawagtang sa hampak niining yutaa?
Basehanan sa Kausaban
Sa mahilom nga paagi nagakahitabo na ang kausaban. Ang binhi sa kalinaw ug ang labaw-nasodnong kaisipan mao ang ginapugas diha sa mga hunahuna sa minilyong katawhan sa tibuok kalibotan. Sa unsang paagi ginahimo kana? Pinaagi sa tibuok-yutang edukasyonal nga buluhaton nga ginahimo sa mga Saksi ni Jehova. Kining relihiyosong grupo nagpakita sumala sa iyang rekord nga kini dili politikanhon—bug-os nga neyutral sa politikal ug nasyonalistikong mga isyu. Kining maong baroganan gibase sa pagsunod sa mga pagtulon-an ni Kristo, nga gikan niini gipasukad ang paninugdang kamatuoran nga ang “Diyos gugma.”—1 Juan 4:8.
Si Jesus miingon: “Pinaagi niini ang tanan mahibalo nga kamo maoy akong mga tinun-an, kon kamo may paghigugma sa usag usa.” Siya miingon usab: “Higugmaa ang imong mga kaaway ug sa pag-ampo niadtong nagalutos kanimo.” (Juan 13:35; Mateo 5:44) Tungod sa mga pulong ni Jesus, sa unsang paagi ang iyang tinuod nga mga sumusunod dili na gayod makakat-on pa mahitungod sa gubat? Unsaon nila sa pagdumot ug sa pagpatay nga walay katarongan tungod sa nasyonalismo? Sa pagkatinuod, dili gayod sila makahimo!
Maoy hinungdan nga ang mga Saksi ni Jehova nakaporma nag tibuok yutang panag-igsoonay nga nangandam alang sa kinabuhi diha sa usa ka bag-ong kahikayan dinhi sa yuta ilalom sa pagmando sa langitnong Gingharian. Sila maoy buhing pamatuod nga posible ang pagpaedukar sa katawhan aron sila magkinabuhi diha sa kalinaw uban sa ilang mga silingan sa tanang rasa ug mga banay ug mga pinulongan. Sa usa ka diwa, sila naporma ingong usa ka organisadong lawas nga gilangkoban sa mga hawas sa tanang katawhan sa tibuok yuta. Bisan karon ang minilyon sa mga Saksi ug ang ilang mga kauban ‘nakahimo na sa ilang mga espada nga mga punta sa daro ug ang ilang mga bangkaw gihimong mga galab.’ Wala silay tinguha sa pagpakiggubat batok sa ilang isigkatawo o sa pagkakat-on pa mahitungod sa gubat.—Isaias 2:4.
Haduol na ang Dakong Kausaban
Kapin sa 2,500 ka tuig kanhi ang Bibliya miingon bahin sa mga hitabo sa panahon sa kataposan: “Ang Diyos sa langit magatukod ug usa ka gingharian nga dili gayod malumpag . . . Kini magadugmok ug magaut-ot sa tanan niining [nag-ilogay nga politikal] mga gingharian, ug kini molungtad sa walay kataposan.” (Daniel 2:44) Mao kini ang mismong Gingharian nga maoy gitudlo sa mga Kristohanon nga iampo diha sa Pag-ampo sa Ginoo. Ginapahayag sa mga Saksi ni Jehova kanang maong kagamhanan sa Gingharian, ug sila nasayod nga ang Diyos dili mapakyas sa pagpatungha niini tungod kay “dili gayod arang makabakak ang Diyos.”—Hebreohanon 6:18; Tito 1:2.
Aron makapatungha ang Diyos ug kalinaw sa yuta, laing dakong kausaban ang kinahanglang himoon—usa ka kausaban sa espirituwal nga pagmando. Kinahanglang mawagtang si Satanas. Kana maoy usa sa hinungdan kon nganong si Jesu-Kristo mamatay ingong martir, “aron nga pinaagi sa iyang kamatayon iyang malaglag ang may gahom sa kamatayon, nga mao, ang Yawa.” (Hebreohanon 2:14) Sumala sa tagna sa Pinadayag, si Satanas sa dili madugay gaposon. Human niana wala na unyay politikal nga mga magmamando nga maimpluwensiyahan niya sa pagpatunghag propaganda sa pagpakiggubat. Ang mahigugmaog kalinaw nga mga katawhan makahimo sa pagduol sa Diyos diha sa kalinaw alang sa pagmando ug pakigdait.—Pinadayag 20:1-3.
Diha sa matahom nga panan-awon, nakita ni Juan kining langitnong kagamhanan nga nagalihok sa yuta, ug siya nakadungog ug tingog gikan sa langit nga nag-ingon: “Tan-awa! Ang puloy-anan sa Diyos anaa uban sa mga tawo, ug siya magapuyo uban kanila, ug sila mahimong iyang katawhan. . . . Ug iyang pagapahiran ang tanang luha gikan sa ilang mga mata, ug ang kamatayon wala na, wala na usab unyay pagminatay, ni paghilak ni kasakit kay ang unang mga butang nangagi na.”—Pinadayag 21:1-4.
Ikaw, usab, makakaplag kalinaw bisan karon, ug sa hingpit nga kalinaw sa umaabot, pinaagi sa pagkuhag kahibalo sa mga katuyoan sa Diyos alang sa katawhan ug sa matahom, bisag giabusohan, nga yuta.
[Blurb sa panid 12]
Ang binhi sa kalinaw ug ang labaw-nasodnong kaisipan mao ang ginapugas diha sa mga hunahuna sa minilyong katawhan sa tibuok yuta