Balay sa Pagsimba Gisunog

SA DOMINGGO sa hapon, Oktubre 4, 1992, usa ka tawong nawad-ag maayong panimbang sa hunahuna mikalit ug sulod sa gamay, duha-ka-andanang Kingdom Hall sa Wŏnju, Republika sa Korea, nga puno sa kapin sa 90 ka magsisimba. Misinggit siya makadaghan: “Ipagawas ang akong asawa!” Sa dihang nakadungog niini, ang iyang asawa migawas dayon sa emerhensiya nga pultahan sa likod.

Gibubo sa tawo ang sudlanang may gasolina diha sa alpombra sa atubangan nga pultahan. Unya, bisan pa sa pagpakiluoy sa mga tawo didto, iyang giduslitan ang alpombra. Ang gasolina mibuto, nga nagpaulbo sa kalayo ug sa itom nga aso hangtod sa kisame, nga mipaingon sa entablado, ug unya sa enterong tigomanan. Sa pipila lamang ka segundo, ang kadaghanan sa tumatambong gilamoy. Ang kalayo ug aso migawas gikan sa tanang bintana.

Daghan ang nakaikyas sa likod nga pultahan o sa mga bintana ngadto sa gamayng tumbanan sa gawas sa bungbong. Gikan didto miagi sila sa atop sa sumpay nga tinukod ug unya nanaog sa yuta. Ang uban miambak lang gikan sa ikaduhang andana. Human nga nakaikyas ang arsonista o magsusunog, masuk-anon niyang gitindakan ang nasamdan nga miambak ngadto sa yuta.

Ang nagapanawng magtatan-aw, nga naghatag sa pakigpulong publiko, misinggit: “Dali, luwasa ang mga bata.” Ang mga nangabuhi nagtuo nga siya ug ang iyang asawa makaikyas unta kon sila wala pa mosulay sa pagtabang sa uban. Sila maoy apil sa 15 nga nangamatay; tanan-tanan, 26 pa ang nasamdan. Gipameligro sa laing tawo, nga namatay sa ulahi sa ospital, ang iyang kinabuhi sa pagtabang sa mga tigulang aron makagawas.

Ang nangamatay ang didto sa atubangan sa tigomanan. Ang nagapanawng magtatan-aw ug ang iyang asawa natabonan sa baga nga aso ug nalumos sa aso. Ang mga nangamatay maoy gikan sa siyam ka pamilya; tulo ka bata, edad 3, 4, ug 14. Halos milagro nga daghan ang wala namatay ug nasamdan, kon palandongon nga ang mga kuwarto hagip-ot ug nga naalihan sa kalayo ang gawasanan diha sa pultahan sa atubangan.

Pito ka trak sa sunog ug 30 ka bombero ang miabot dayon sa dapit, apan ang kakalit sa kalayo nakapatay na ug mga kinabuhi. Ang kalayo napalong sulod sa usa ka oras. Apan, tungod sa kagrabe sa sunog, ang pag-ila sa patay lisod kaayo, nga mikabat ug kapin sa duha ka oras.

Gidakop sa mga polis sa Wŏnju ang tawo nga nanunog ug gikiha siya sa pagbuno ug pagpanunog. Samtang gibilanggo sa polis, siya napakyas sa pagsulay sa paghikog.

Nag-antos sa Mapintas nga Pagtratar

Sa dihang nagdako ang interes sa asawa sa arsonista sa mga pagtulon-an sa Bibliya, nahimo na niyang batasan ang paghulga kaniya. Sa tungatunga sa Septiyembre, mga duha ka semana una pa miduaw ang nagapanawng magtatan-aw sa Kongregasyon sa Wŏnju sa mga Saksi ni Jehova, gibukbok sa arsonista ang iyang asawa hangtod nga nawad-an siya ug panimuot. Unya, human nga siya naulian, iyang gibuboan ug lacquer thinner ang iyang ulo ug gisunog siya. Apan sa misiga ang kalayo, siya nakaamgo sa iyang gihimo ug dalidali kining gipalong.

Sa makalilisang nga Dominggo, ang tawo mimando sa iyang asawa sa dili pag-adto sa Kingdom Hall. Bisan pag nasuko kaayo siya, ang iyang asawa wala magpadala sa kahadlok. Iyang gibati nga kinahanglang iyang sundon ang Diyos niining bahina sa pagsimba inay ang si bisan kinsa nga tawo, apil ang iyang bana. (Buhat 5:29; Hebreohanon 10:24, 25) Busa siya mitambong sa tigom.

Human nga gisunog ang Kingdom Hall, ang abogado sa bana misulay sa pagpugos sa babaye sa pagpirma sa deklarasyon nga napugos ang iyang bana sa paghimo sa iyang makalilisang nga buhat tungod kay midumili siya sa paghunong sa iyang panatikal nga relihiyon ug tungod kay siya napakyas sa pagkahimong maayong asawa kaniya. Apan, wala siya mopirma sa deklarasyon. Siya midumili sa pagkompromiso sa kamatuoran pinaagi sa pagpadayag nga ang makalilisang nga trahedya maoy tungod sa iyang pagtuon sa Bibliya.

Sa milabay ang hinapos sa semana human sa trahedya, diha sa asembliya sa mga Saksi ni Jehova, ang babaye mipadayon sa iyang desisyon nga magpabawtismo sa pagsimbolo sa iyang dedikasyon sa pag-alagad kang Jehova nga Diyos, ang Soberano sa uniberso.​—Salmo 83:18.

Tabang Gikan sa Daghang Dapit

Sa dihang nadawat sa sangang buhatan sa mga Saksi ni Jehova sa Ansung ang balita bahin sa trahedya, duolan sa 100 kilometros gikan sa Wŏnju, may gipadalang tabang alang sa mga nasamdan ug sa ilang mga pamilya, maingon man alang sa mga membro sa pamilya nga namatyan. Dili lamang kuwarta ang gihatag kondili gipadala ang Kristohanong mga ansiano gikan sa sanga sa pagtino kon unsa pang ubang tabang ang gikinahanglan.

Gihimo ang kahikayan sa pagbalhin sa kongregasyon diha sa laing Kingdom Hall sa Wŏnju, ug ubang mga tagana ang gipaabot ngadto sa mga nanginahanglan. Nagpangabot ang tabang gikan sa isigka-Kristohanon sa tibuok Republika sa Korea. Gani, daghang tawo ang miabot gikan pa sa ubang mga siyudad ug mitanyag ug tabang human sa katalagman. Ang pananglitan mao ang donasyon nga $1,200 gikan sa usa ka kongregasyon sa 75 ka Saksi, ug laing kongregasyon sa 87 ka tawo midonar ug $2,200.

Ang Kristohanong mga ansiano sa kongregasyon nga maoy nahitaboan sa trahedya naghimo sa ilang maarangan sa pagtabang sa uban, apan lakip sila niadtong nag-antos ug dakong mga kapildihan. Duha ka anak sa nagamandong magtatan-aw maoy lakip sa namatay, laing Kristohanong ansiano namatyan sa iyang anak nga lalaki, ug ang nawong sa lain pang ansiano grabeng pagkasunog. Bisan pa sa nangapildi niining maong mga Kristohanon, sila ug ang kongregasyon sa katibuk-an nagpabiling kalmado ug nagpabiling malig-on sa pagtuo.

Pipila ka adlaw human sa trahedya, usa ka hawas sa sangang buhatan ang nagdumala sa paglubong sa tanang nangamatay. Daghang mga Saksi sa tibuok nasod mitambong, sa ingon nagpakita sa ilang gugma ug kabalaka sa ilang mga higala. Ang mga pahayag sa simpatiya nadawat pa gani gikan sa daghang sangang buhatan sa mga Saksi ni Jehova sa nagkalainlaing bahin sa kalibotan.

Ang pangulo sa Intelligence Division sa lokal nga departamento sa kapolisan mitambong sa paglubong ug nakadayeg sa paggawi sa mga Saksi. Iyang nakita kon unsa ka hilom ug ka kalmado sila ug kon unsa ka maluluton ang ilang pagtagad sa uban nga nag-antos sa mga kapildihan sa sunog. Ang direktor sa Bureau of Society and Industry diha usab sa paglubong. Sa ulahi, sa dihang gisultihan bahin sa mahigugmaong mga donasyon nga nadawat gikan sa tibuok nasod, siya miingon nga kon walay pagtuo kini dili unta mahimo. Ang deputadong mayor sa Wŏnju nagpakita usab ug tinuod nga kaikag. Siya miingon nga siya mismo nakadayeg sa pagkakalma, mutuwal nga gugma, ug organisasyonal nga katakos sa mga Saksi.

Kini nga trahedya sa yano maoy dugang pamatuod nga kita nagakinabuhi na “sa kataposang mga adlaw [uban] ang kritikal nga mga panahon nga malisod nga sagubangon.” (2 Timoteo 3:1) Malaoman usab nga ang makalilisang nga mga butang nga sama niini mahitabo. Apan ang mga Saksi ni Jehova sa Wŏnju wala mawad-i ug paglaom. Sila determinado sa pagpadayon sa ilang pagsimba sa bugtong matuod nga Diyos, si Jehova, ug magpadayon sa pagtuman sa iyang kabubut-on.​—Gitaho sa koresponsal sa Pagmata! sa Republika sa Korea.

[Mga hulagway sa panid 26]

Patuo: Ang Kingdom Hall, ug (ubos) ang naugdaw nga entablado diin daghan ang namatay

Ubos: Suh, Sun-ok, nga namatyan ug duha ka anak diha sa sunog, gilipay sa isigka-Saksi, ug Shim, Hyo-shin, Kristohanong ansiano nga nasamdan ug duha ka anak