Ang Diyos ba May Gidapigan Diha sa mga Esport?

USA ka nakadaog nga maglulumba miluhod ug mikompas nga mainampoon, nga nagpasalamat tungod sa iyang kalamposan. Bisan pa niana, kita maghunahuna gayod nga ang pipila sa ubang nga maglulumba sa bangga miampo usab sa Diyos alang sa kadaogan​—ug napildi.

Ang duha ka boksidor nagluhod sa managkaatbang nga eskina sa boksinganan una pa ang unang hugna sa ilang sumbagay. Ang duha nanguros, usa ka matang sa hilom nga pag-ampo sa Diyos alang sa kalamposan. Unya ang usa nagpukan sa lain. Sa ubang mga sangka, ang usa lamang ka boksidor ang lagmit mohangyo sa Diyos alang sa kadaogan, apan kasagaran kon unsa ka subsob ang iyang kadaogan mao sab ang iyang kapildihan.

Sa tem nga mga esport, ang pundok sa mga magdudula lagmit nga mag-ampo sa dili pa, panahon sa, o bisan human sa dula. Pananglitan, panahon sa kataposang mga segundo sa American Super Bowl nga dula sa potbol, usa ka tigsipa milinya alang sa kinataposang gol nga maoy modaog sa dula alang sa iyang tem o mopildi niana kon siya mosipyat. Ang tigsipa sa ulahi miingon: “Ako nag-ampo bahin niana.” Apan ang pipila sa kaatbang nga tem nag-ampo usab alang niana​—alang sa kaatbang nga resulta.

Bisan kon ang duha ka kiliran tingali ang nag-ampo, ang usa ka kiliran kinahanglang mapildi. Bisan ang mananaog nga tem kang kansang mga magdudula nag-ampo alang sa kadaogan mahimong mapildi sa sunod nga dula. Sa pagkatinuod, ngadtongadto, sa kataposan sa panahon sa dula, ang tanang ubang tem kinahanglang mapildi, kay usa lang ang mahimong kampeon sa tanan sa usa ka liga. Apan, kadaghanan niadtong napilding mga tem may mga magdudula nga nag-ampo alang sa kadaogan.

Sa usa ka artikulo nga nag-ulohang “Palihog, Tipigi ang Inyong mga Pag-ampo,” usa ka kolumnista sa esport misulat: “Kon ikaw nanghambog mahitungod sa imong gihunahunang suod nga relasyon sa Diyos, wala kana magkahulogan nga kana tinuod. . . . Sa Gubat sa Kalibotan II, ang kasundalohang Aleman may prase nga gikulit sa belya sa ilang bakos: Gott mit uns. Ang hubad: ‘Ang Diyos nagauban kanamo.’” Laing manunulat bahin sa esports nag-ingon: “Ang Diyos walay gidapigan sa mga dulang potbol. Ang kalibotanong mga butang sama niini gihukman sa mga lalaki ug babaye, dili sa Labing Gamhanan.”

Ang apostol nga si Pedro misulat: “Ang Diyos walay pinalabi, apan sa matag nasod ang tawo nga mahadlok kaniya ug nagbuhat ug pagkamatarong maoy dalawaton kaniya.” Ang pag-apil sa mabangis nga mga esport dili ang ‘pagbuhat ug pagkamatarong.’ (Buhat 10:34, 35; Roma 14:19) Kon ang Diyos nakadungog sa mga pag-ampo niadtong naghangyo ug kadaogan ug ang usa ka magsasangka nasamdan o namatay pa gani, ang Diyos ba maoy pasanginlan?

Ang Pulong sa Diyos nag-ingon: “Bisan unsay atong pangayoon sumala sa iyang kabubut-on, siya magpatalinghog kanato.” (1 Juan 5:14) Aron dunggon ang mga pag-ampo, ang usa kinahanglang mahibalo sa kabubut-on ug katuyoan sa Diyos, ug ang mga kalihokan sa usa kinahanglang kaharmoniya niana.​—Itandi ang Mateo 6:9, 10.

Wala, ang kabubut-on ug mga katuyoan sa Diyos wala malangkit sa mga bangga sa esports. Busa, sa dihang ang mga pag-ampo alang sa kadaogan gitanyag panahon sa maong mga dula, ang Diyos ba namati? Labing segurado nga wala.

[Picture Credit Line sa panid 31]

UPI/​Bettmann