Popular Sayop nga mga Pagsabot Bahin sa Bibliya
KAPIN sa 8,000,000 ka pounds sterling (kuwarta sa Britanya)! Pagkadakong kantidad nga gibayad alang sa usa ka libro! Apan, sa gihimo ang subasta sa London sa Disyembre 1983, mao kana ang prisyo nga gibayad sa pumapalit, nga hawas sa Pederal nga Republika sa Alemanya. Unsa bang libroha nga may kantidad nga ingon niana? Kadto maoy bahin sa Bibliya, nga ika-12ng siglong libro sa mga Ebanghelyo nga may mga hulagway.
Bisan unsay pay katarongan sa pagbayad ning dakong kantidad alang sa manuskrito niining libroha, makaikag nga kadtong kantidara sa buhat sa arte maoy bahin sa Bibliya. Nagpabanaag kini sa panghunahuna sa daghang mga tawo nga bililhon ang Bibliya. Apan, ang uban, maduhaduhaon ug masupakon sa Bibliya. Ngano?
Popular Sayop nga mga Pagsabot
Daghang tawo, ilabina sa Protestanteng kayutaan, nag-ingon nga ang Bibliya kaamgid sa daang biyolen nga mapatokar sa daghang tuno. Sila mibati nga magamit ang Bibliya sa pagpamatuod sa daghang nagkasumpaking mga doktrina. Sila moingon: ‘Depende kini sa paagi sa imong pag-interpretar niana.’ Husto ba kini?
Matuod, ang Bibliya mahimong makutlo sa pagpaningkamot sa pagpalig-on sa nagkasumpaking mga punto de bista. Apan kon ang mga pulong kuhaon gikan sa konteksto, dili ba ang sinulat sa awtor mopatim-awng nagkasumpaki? Matinud-anon ba kini? Ang mga Saksi ni Jehova nagtuo nga ang matinud-anong pagbasa sa Bibliya dili magatugot ug magkasumpaking mga interpretasyon sa pangunang mga doktrina sa Bibliya.
Ang Bibliya mismo nag-ingon, “Kinahanglang inyong mahibaloan kini una sa tanan, nga walay tagna diha sa Kasulatan nga magagikan sa kaugalingong pagsabot.” (2 Pedro 1:20) Sa laing pagkasulti, ang gahom nga nagdasig sa pagsulat sa matagnaong mga Kasulatan dili yanong tawhanong gahom, kondili kadto maoy balaang espiritu, o aktibong gahom, sa Diyos. Siya ang una sa tanang mga manalagna ug Magdadasig sa tanang tinuod nga mga tagna sa Bibliya pinaagi sa iyang dili makitang aktibong gahom.
Laing popular sayop nga pagsabot mao nga, ang Diyos sa dinasig Kristohanon Gregong Kasulatan maluluton ug mahigugmaon, ang Diyos sa dinasig Hebreohanong Kasulatan mabangis ug mapanimaslon. Ang magsusulat nga Pransis si Stendhal misulat nga ang Diyos maoy “usa ka mapintas nga hari, ug, sa ingon, puno sa mga ideya sa pagpanimalos; ang iyang Bibliya naghisgot lamang ug makalilisang nga mga silot.” Dili katingad-an kining opinyona, nga gikan sa usa ka tawong nailhang ateyista. Apan, kanang maong opinyon ginaambitan sa daghan nga nagtawag sa ilang kaugalingon nga mga Kristohanon, lakip sa ubang mga klerigo.
Ang kamatuoran nga ang duha sa bahin nga gisulat sa Hebreohanon ug sa bahin nga gisulat sa Grego, ang Kasulatan nag-ingon nga adunay “usa lamang ka Diyos.” (1 Corinto 8:6; Deuteronomio 6:4) Ang duha ka bahin nagpakita nga ang Diyos maluloy-on, makataronganon, mahigugmaon, ug malig-on. (Exodo 34:6, 7; Salmo 103:6-8; 1 Juan 4:8; Hebreohanon 12:28, 29) Ang pipila sa labing malulutong mga teksto sa Kasulatan makita sa Hebreohanong bahin sa Bibliya, sama sa Mga Salmo. Gani, ang “Bag-ong Testamento” naundan ug makapukawng kabatbatan sa mabug-at nga silot nga ihatag sa mga daotan. (2 Tesalonica 1:6-9; Pinadayag, kapitulo 18 ug 19) Ang Bibliya sa sinugdanan ngadto sa kataposan naghikyad ug katingalahang paglaom sa mga matarong. (Genesis 22:17, 18; Salmo 37:10, 11, 29; Pinadayag 21:3, 4) Busa, ang Bibliya nagkaharmoniya sa iyang kaugalingon gikan sa sinugdanan ngadto sa kataposan.
Usa ba ka “Libro sa Protestante”?
Ang popular sayop nga pagsabot taliwala sa ginatos ka milyong mga Katoliko sa kalibotan mao nga ang Bibliya maoy usa ka “libro sa Protestante.” Dili mabasol ang sinserong mga Katoliko niini nga panglantaw. Sa dugay nang kasiglohan gidili sa Romano Katolikong Iglesya ang pagbasa sa Bibliya sa bisan unsang pinulongan gawas sa Latin. Maoy hinungdan nga dili mabasa sa kadaghanang Katoliko ang Kasulatan. Tinuod, sukad sa 1897 ug ilabina sukad sa ikaduhang Konselyo sa Batikano (1962-1965), may katungod ang mga Katoliko sa pagbasa sa Bibliya sa kaugalingong pinulongan nga aprobado sa Roma. Apan malisod hunongon ang tradisyon. Busa diha sa mga nasod nga daghan ang Katoliko, ang pagbasa sa Bibliya gilangkit gihapon sa Protestantismo.
Daghang mga Katoliko nga nakabaton ug Bibliya ning ulahi nga katuigan nagabasa niini nga may pagpanuko. Ngano man kana? Tungod kay ang ilang iglesya nagtudlo gihapon nga peligroso ang pagbasa sa Bibliya. Ngano? Tungod kay ang Romano Katolikong Iglesya nagtudlo nga wala magaunod ang Bibliya sa kompletong kapahayagan sa Kristohanong kamatuoran; kinahanglang taposon kini pinaagi sa “tradisyon.” Diha sa iyang librong La Parole de Dieu (The Word of God), si Georges Auzuo, usa ka Katolikong propesor sa Balaan nga Kasulatan, misulat: “Ang tradisyon nagauna, nagakobre, nagauban ug nagasaylo sa Kasulatan. . . . [Kini] nakatabang kanato sa pagsabot kon nganong wala gayod himoa sa Iglesya ang pagbasa sa Bibliya o ang pagtuon sa Bibliya nga usa gayod ka kaakohan o bug-os nga kinahanglanon.”
Nganong Basahon ang Bibliya?
Apan, daghang sinserong mga Katoliko sa tibuok nga kalibotan nakabaton ug Bibliya ug nagapangitag tabang nga masabtan kini. Tinuod usab kana sa daghang nawad-ag kasibot nga mga Protestante ug sa uban nga mibutang sa ilang pagsalig diha sa komunismo, sosyalismo, o siyensiya.
Gianalisar ang mga hinungdan sa napasig-uling kaikag sa espirituwal nga mga butang, ang magsusulat sa relihiyon si Alain Woodrow misulat sa peryodiko sa Paris nga Le Monde: “Kini maoy unang kinaiyanhong reaksiyon sa pagkanawad-ag kasibot nga maoy resulta sa kapakyasan sa mga sistema sa hunahuna, mga ideolohiya, politika, ug siyensiya.” Siya mihatag dugang katarongan nga “nawad-ag kasibot diha sa dagkong mga iglesya tungod sa ilang pagkompromiso sa politikal ug sa pinansiyal nga mga gahom ning kalibotana,” ug, ang kataposan, kanang iyang gitawag nga “kahadlok sa kataposan.”
Tingali usa ikaw niadtong misugod na sa pagbasa sa Bibliya. Kon mao, kinahanglan nimong masayran kon unsaon sa paghimo sa imong pagbasa sa Bibliya nga mapuslanon.