Ang Ipasabot sa mga Balita
Usa ba ka Yawi sa Kalipay?
“Duha ka tuig sa kalisod, kalipay nga dumalayon.” Kini, sumala sa mantalaang Yomiuri Shimbun sa Hapones, mao ang bag-ong panultihon sa mga Intsik nga mga estudyante sa Japan. Naglaom nga madato, kining mga estudyanteha manghulam ug kuwarta aron sa pag-adto sa Japan, diin sila nagtuo nga didto nag-ulan ug kuwarta gikan sa langit. Sila naglaom nga pinaagi sa pagtrabaho ug duha ka tuig sa partaym nga trabaho samtang nagatungha, sila makatigom ug duha ka milyong yen (mga $15,400, U.S.) ug unya mopauli nga magkinabuhi nga malipayon hangtod sa hangtod.
Kini nga pagsalig sa salapi isip yawi sa kalipay kaylap sa tibuok-yuta. Ang surbi dili pa dugay taliwala sa mga batan-on sa 9 sa 11 ka nasod nagbutyag nga ang “‘salapi’ nanguna sa listahan” sa ilang mga problema ug kabalaka, nag-ingon ang Asahi Evening News.
Ang pagsalig ba sa bahandi tinuod nga makabukas sa ganghaan sa kalipay? Ang maalamong Haring Solomon nagpasidaan nga kadtong “nahagugma sa salapi dili matagbaw sa salapi.” (Ecclesiastes 5:10; 7:12) Ang pag-una sa salapi dili moresulta ug matuod nga katagbawan, ni mohatag kinig garantiya sa umaabot nga kasegurohan. Pananglitan, ang Bibliya nag-ingon: “Ang ilang salapi ug ang ilang bulawan dili makaluwas kanila sa adlaw sa kaligutgot ni Jehova.” (Sofonias 1:18) Sa kasukwahi, hinunoa, ang salmistang David misulat: “Malipayon ang tawo nga kang Jehova anaa ang iyang pagsalig.” Ang pagsalig kang Jehova, dili sa salapi, mao ang yawi sa pagtagamtam sa kalipay nga walay kataposan.—Salmo 40:4; Isaias 30:18.
Gumonhap sa Bawtismo
Duha ka suliran maylabot sa pagbawtismo sa masuso mitungha sa panahong dili pa dugay sulod sa Church of England. Ang una maoy bahin sa “walay-pili” nga pagbawtismo, diin gibatbat sa usa ka klerigo ingong usa ka matang sa “espirituwal nga pamakuna.” Ang ikaduha mao ang pagdumili sa nagakadaghang klero sa pagbawtismo sa mga masuso kansang mga ginikanan dili aktibo sa pagsuportar sa Church of England.
Naamgohan sa daghang klero nga ang mga ginikanan walay tinguha sa pag-adto sa simbahan ug dili gusto nga mao usay buhaton sa ilang mga anak. Nan nganong pabawtismohan man ang mga masuso? “Sila gusto nga bunyagan ang ilang mga masuso,” mikomento ang The Times, “sama nga gusto sila nga mohatag o modawat ug mga gasa sa komplianyo, sa pag-adorno sa ilang mga balay sa panahon sa Pasko . . . Kini bahin sa ilang kultura: dili na kinahanglang may katarongan pa.”
Ang usa ka klero miretiro tungod kay nakahukom siya nga ang mga pagbawtismo sa masuso dili angay himoon. Siya miingon: “Ang bugtong tawo nga makahimo niana nga panaad ngadto kang Kristo mao ang tawo mismo.” Makadugang unta siya nga si Jesu-Kristo 30 na ang edad sa dihang siya gibawtismohan ug nga ang Gregong pulong sa bawtismo, ba·pti’zo, nagkahulogan sa pagtuslob o paglusbog. Human nga gibawtismohan sa Suba sa Jordan, si Jesus “mihaw-as gikan sa tubig.” (Marcos 1:10; Mateo 3:13, 16) Wala gayod maghisgot ang Bibliya bahin sa pagwisik sa tubig diha sa mga masuso. Sanglit ang bawtismo maoy simbolo sa pagpahinungod sa usa ngadto sa Diyos ingong sumusunod sa tunob ni Kristo, dili kini desisyon nga mahimo sa usa ka masuso.
Mga Kontraseptibo ug mga Katoliko
Ang pagsupak sa Katolikong Iglesya sa kontraseptibo gilig-on ni Juan Paulo II diha sa Ikaduhang Internasyonal nga Kongreso bahin sa Moral nga Teolohiya nga gihimo sa Roma sa miaging Nobyembre. Sumala sa mantalaan sa Vatican City, L’Osservatore Romano, siya miingon: “Dili kini usa ka doktrina nga giimbento sa tawo. Kini gisulat sa mamugnaong kamot sa Diyos sa mismong kinaiyahan sa tawo. Ang pagduhaduha niini katumbas ra sa pagdumili sa Diyos sa pagsunod sa atong salabotan,” ug busa, siya midugang, “dili makuwestiyon sa Katolikong teologo.”
Apan ang ensiklika nga sulat Humanae Vitae nga gihisgotan ni Papa Juan Paulo ug gisulat hapit 20 ka tuig kanhi ni Paulo VI “gikuwestiyon dihadiha sa daghang teologo,” nagkanayon ang mantalaang La Stampa sa Italya, ug wala tagda sa “kadaghanang Katoliko.”
Sa matin-aw, ang pagkadili-mauyonon sa iglesya bahin sa problema sa pagpugong sa pagpanganak nakapabahinbahin sa mga teologo ug nakatugaw ug dako sa sinserong mga Katoliko. Ang padayong pagkabahinbahin mahitungod sa paggamit ug bisan unsang matang sa kontraseptibo nakatukmod pa ngani kang Juan Paulo sa pag-awhag sa tanang mga teologo sa pagsultig “samang pinulongan.” Bisan pa, sukwahi sa pangangkon sa papa nga ang baroganan sa iglesya bahin sa kontraseptibo “gisulat sa mamugnaong kamot sa Diyos,” ang mantalaang La Repubblica sa Italya miingon nga “walay bersikulo gikan sa mga Ebanghelyo sa Daang Tugon ang gikutlo aron sa paglig-on sa doktrina.”
Wala gayod maghisgot ang Bibliya bahin sa paggamit ug kontraseptibo o pagpugong sa pagpanganak diha sa kaminyoon, ni nag-ingon kini nga ang mga Kristohanon obligado sa pagpanganak. Gitugyan sa Pulong sa Diyos ang suliran sa pagplano sa pagpamilya sa tanlag sa matag Kristohanong magtiayon. Pinaagi sa pagpamugos sa balaod niini bahin sa pagpugong sa pagpanganak, ang Katolikong Iglesya “misaylo na sa mga butang nga gisulat.”—1 Corinto 4:6.