Makaseguro Ka nga Giuyonan Ka ni Jehova

1. Sa unsa tingali nagduhaduha ang ubang matinumanong alagad ni Jehova?

MAKAPAHUPAY gyod ang pagkahibalo nga giuyonan ni Jehova ang iyang katawhan ingong grupo! Ang Bibliya nag-ingon: “Si Jehova nalipay sa iyang katawhan.” (Sal. 149:4) Pero usahay, ang uban madismayar kaayo maong makahunahuna sila, ‘Giuyonan ba gyod ko ni Jehova?’ Daghang matinumanong magsisimba ni Jehova sa panahon sa Bibliya ang mibati pod ana.—1 Sam. 1:​6-10; Job 29:​2, 4; Sal. 51:11.

2. Kinsay makadawat sa pag-uyon ni Jehova?

² Klarong gipakita sa Bibliya nga ang dili hingpit nga mga tawo puwedeng makadawat sa pag-uyon ni Jehova. Sa unsang paagi? Kinahanglan tang magpakitag pagtuo kang Jesu-Kristo ug magpabawtismo. (Juan 3:16) Pinaagi ana, atong gipakita atubangan sa daghan nga naghinulsol na ta sa atong mga sala ug nanaad sa Diyos nga himoon ang iyang kabubut-on. (Buh. 2:38; 3:19) Malipay kaayo si Jehova dihang himoon nato kining mga butanga aron masuod kaniya. Ug kon padayon natong tumanon ang atong panaad sa pagpahinungod, uyonan ta ni Jehova ug isipon ta niya ingong iyang suod nga higala.—Sal. 25:14.

3. Unsay atong hisgotan niining artikuloha?

³ Pero nganong ang uban mobati man usahay nga wala sila uyoni sa Diyos? Giunsa pagpakita ni Jehova nga giuyonan ta niya? Ug sa unsang paagi makaseguro ang usa ka Kristohanon nga giuyonan gyod siya sa Diyos?

KON NGANONG ANG UBAN MIBATI NGA WALA SILA UYONI NI JEHOVA

4-5. Bisan kon ubos ang atong panglantaw sa kaugalingon, sa unsa ta makaseguro?

⁴ Ang uban kanato ubos ug panglantaw sa kaugalingon sukad sa pagkabata. (Sal. 88:15) Ang brader nga si Adrián miingon: “Pirme kong mobating walay pulos. Mahinumdom ko nga sa bata pa ko, mag-ampo ko nga unta ang among tibuok pamilya makapuyo sa Paraiso, bisag segurado ko nga dili ko takos mopuyo didto.” Si Tony, nga wala magdako sa Saksi nga pamilya, miingon: “Wala gyod ko sultihi sa akong ginikanan nga gimahal ko nila o nga proud sila nako. Gibati nako nga bisag unsa pay akong himoon, dili gyod nako sila mapalipay.”

⁵ Kon mobati ta usahay nga wala tay pulos, atong hinumdoman nga si Jehova mismo ang nagkabig nato. (Juan 6:44) Nakita niya ang atong maayong mga hiyas nga tingali wala nato makita sa atong kaugalingon, ug nahibalo siya sa atong kasingkasing. (1 Sam. 16:7; 2 Cron. 6:30) Busa makasalig ta sa iyang giingon nga bililhon kaayo ta para niya.—1 Juan 3:​19, 20.

6. Unsay gibati ni apostol Pablo sa iyang nangaging mga sala?

⁶ Sa wala pa makakat-on sa kamatuoran, ang uban nato nakahimog dili maayong mga butang, ug tingali nakonsensiya gihapon ta niana hangtod karon. (1 Ped. 4:3) Bisan ang matinumanong mga Kristohanon naningkamot nga masuklan ang ilang mga kahuyangan. Gihukman ba ka sa imong kasingkasing? Kon mao, mahupayan ka sa pagkahibalo nga mao pod nay gibati sa matinumanong mga alagad ni Jehova kaniadto. Pananglitan, si apostol Pablo naguol pag-ayo ug mibati nga makaluluoy kaayo siya tungod sa iyang mga kasaypanan. (Roma 7:24) Siyempre, si Pablo naghinulsol na sa iyang mga sala ug nagpabawtismo. Pero gitawag gihapon niya ang iyang kaugalingon ingong ang “labing ubos sa mga apostoles” ug “kinalabwan” sa mga makasasala.—1 Cor. 15:9; 1 Tim. 1:15.

7. Unsay angay natong hinumdoman bahin sa atong nangaging mga sala?

⁷ Ang atong langitnong Amahan nagsaad nga pasayloon ta niya kon mahinulsolon ta. (Sal. 86:5) Busa kon naghinulsol gyod ta sa mga sala nga atong nahimo, makasalig ta sa giingon ni Jehova—nga iya na tang gipasaylo.—Col. 2:13.

8-9. Sa unsang paagi madaog nato ang pagbati nga dili gyod nato mapalipay si Jehova bisag unsa pay atong himoon?

⁸ Gusto natong himoon ang tanan sa pag-alagad kang Jehova. Pero ang uban mobati nga dili gyod nila mapalipay si Jehova bisag unsa pay ilang himoon. Ang sister nga si Amanda miingon: “Sagad maghunahuna ko nga aron mahatag nako ang akong pinakamaayo kang Jehova, kinahanglang dugangan pa nako ang akong mga paningkamot. Pirme kong magdahom ug sobra sa kaya nakong himoon. Kon ‘mapakyas’ ko, madismayar kaayo ko sa akong kaugalingon, ug maghunahuna ko nga mao pod nay gibati ni Jehova nako.”

⁹ Sa unsang paagi madaog nato ang pagbati nga dili gyod nato mapalipay si Jehova bisag unsa pay atong himoon? Hinumdomi nga si Jehova makataronganon. Wala siya magdahom ug sobra sa kaya natong himoon. Naapresyar niya ang bisan unsa nga atong gihimo para niya, basta kay gihimo nato ang atong pinakamaayo. Hunahunaa pod ang mga pananglitan sa Bibliya niadtong mga nag-alagad kang Jehova nga kinasingkasing. Usa nila mao si apostol Pablo. Daghang tuig nga nagkugi siya pag-ayo sa pag-alagad, nga mibiyaheg linibo ka kilometro ug nagtukod ug daghang kongregasyon. Pero dihang limitado na lang ang iyang mahimo sa pagsangyaw, nawad-an ba siya sa pag-uyon sa Diyos? Wala. Padayon niyang gihimo ang iyang maarangan ug gipanalanginan siya ni Jehova. (Buh. 28:​30, 31) Sa susama, mausab usahay ang kaya natong ihatag kang Jehova. Pero ang importante kang Jehova mao ang atong motibo sa pag-alagad kaniya. Hisgotan nato karon ang pipila ka paagi nga gipakita ni Jehova ang iyang pag-uyon kanato.

GIUNSA PAGPAKITA NI JEHOVA NGA GIUYONAN TA NIYA?

10. Sa unsang paagi “madungog” nato nga giuyonan ta ni Jehova? (Juan 16:27)

¹⁰ Pinaagi sa Bibliya. Ginapakita gyod ni Jehova ang iyang pag-uyon sa mga tawo nga iyang gimahal. Sa Bibliya, duha ka higayon nga gisultihan ni Jehova ang iyang Anak nga iya siyang gihigugma ug giuyonan. (Mat. 3:17; 17:5) Gusto ba nimong madungog nga giuyonan pod ka ni Jehova? Si Jehova dili makig-estorya nato gikan sa langit, pero makig-estorya siya nato pinaagi sa iyang Pulong. “Madungog” nato ang pag-uyon ni Jehova dihang basahon nato ang giingon ni Jesus sa Ebanghelyo. (Basaha ang Juan 16:27.) Hingpit nga gisundog ni Jesus ang personalidad sa iyang Amahan. Busa dihang mabasa nato nga gipahayag ni Jesus ang iyang pag-uyon sa dili hingpit pero matinumanon niyang mga sumusunod, ma-imagine pod nato si Jehova nga nagsulti nianang mga pulonga kanato.—Juan 15:​9, 15.

11. Nganong ang atong mga kalisdanan wala magpasabot nga wala na ta uyoni ni Jehova? (Santiago 1:12)

¹¹ Pinaagi sa iyang tabang. Si Jehova gusto kaayong motabang nato, sama pananglitan sa pagtagana sa atong materyal nga mga panginahanglan. Usahay, itugot tingali ni Jehova nga makaatubang tag mga kalisdanan, sama sa nahitabo sa matarong nga si Job. (Job 1:​8-11) Pero ang mga pagsulay wala magpasabot nga wala na ta uyoni sa Diyos. Hinuon, naghatag ni natog kahigayonan nga pamatud-an kon unsa ka dako ang atong gugma ug pagsalig sa Diyos. (Basaha ang Santiago 1:12.) Ug nianang mga panahona, makita gyod nato nga gimahal kaayo ta niya kay tabangan ta niya nga makalahutay.

12. Unsay atong makat-onan sa eksperyensiya ni Dmitrii?

¹² Konsideraha ang eksperyensiya sa brader nga si Dmitrii nga taga-Asia. Nawad-an siyag trabaho ug wala siyay panginabuhi sulod sa daghang bulan. Mao nga nakadesisyon siya nga dugangan ang iyang panahon sa ministeryo, nga nagpakita sa iyang pagsalig kang Jehova. Milabay ang daghang bulan, ug wala gihapon siya makakitag trabaho. Dayon nasakit siya ug naglubog na lang sa iyang higdaanan. Tungod ana, mibati siya nga wala siyay pulos nga bana ug amahan ug nga wala na siya uyoni ni Jehova. Dayon usa ka gabii, gi-print sa iyang anak ang teksto sa Isaias 30:15: “Mahimo mong kusgan kon magpabilin mong kalmado ug mosalig mo.” Gihatag ni sa iyang anak ug giingnan siya, “Pa, kon maguol ka, hinumdomi ni nga teksto.” Nakaamgo si Dmitrii nga sa tabang ni Jehova, ang iyang pamilya naa gihapoy igong pagkaon, sinina, ug puy-anan. Siya miingon, “Kinahanglan lang kong magpabiling kalmado ug padayong mosalig sa akong Diyos.” Kon nag-atubang kag susamang pagsulay, makasalig ka nga gimahal ka ni Jehova ug tabangan ka niya nga makalahutay.

13. Kinsa tingali gamiton ni Jehova aron pasaligan ta nga iya tang giuyonan, ug sa unsang paagi?

¹³ Pinaagi sa mga igsoon. Gamiton ni Jehova ang mga igsoon aron pasaligan ta nga giuyonan ta niya. Pananglitan, palihokon tingali niya ang uban nga dasigon ta sa panahon nga gikinahanglan kaayo nato ni. Kanay naeksperyensiyahan sa usa ka sister sa Asia dihang nakaatubang siyag lisod kaayo nga mga problema. Nawad-an siyag trabaho ug grabeng nasakit. Dayon ang iyang bana nakahimog seryosong sala ug natangtang sa pagkaansiyano. “Wala ko kasabot kon nganong nahitabo to,” siya miingon. “Naghunahuna ko nga basig naa koy nahimong sayop maong wala na ko uyoni ni Jehova.” Mihangyo ang sister kang Jehova nga pasaligan siya sa Iyang pag-uyon. Giunsa na paghimo ni Jehova? Ang sister miingon, “Ang mga ansiyano sa kongregasyon nakig-estorya nako ug gipasaligan ko nila nga gimahal ko ni Jehova.” Sa ulahi, nangayo na pod siyag tabang kang Jehova. “Niana mismong adlawa, nakadawat kog sulat gikan sa pipila ka igsoon sa kongregasyon,” siya miingon. “Samtang ako ning gibasa, nahupayan kaayo ko, ug gibati nako nga gipaminawan gyod ko ni Jehova.” Sagad, gamiton ni Jehova ang mga igsoon aron hupayon ug pasaligan ta nga iya tang giuyonan.—Sal. 10:17.

14. Unsa ang laing paagi nga gipakita ni Jehova ang iyang pag-uyon kanato?

¹⁴ Gipakita pod ni Jehova ang iyang pag-uyon kanato pinaagi sa paggamit sa mga igsoon aron hatagan tag tambag nga atong gikinahanglan. Pananglitan, sa unang siglo, gigamit ni Jehova si apostol Pablo sa paghimog 14 ka sulat para sa mga Kristohanon. Ang maong mga sulat naay prangka pero mahigugmaong tambag. Nganong gigiyahan ni Jehova si Pablo sa pagtambag kanila? Si Jehova maayo nga Amahan, ug iyang ginadisiplina ang “pinangga niyang [mga] anak.” (Prov. 3:​11, 12) Busa kon makadawat tag binase sa Bibliya nga tambag, wala ni magpasabot nga nasuko si Jehova nato. Hinuon, nagpakita ni nga giuyonan ta niya. (Heb. 12:6) Unsa pay ubang ebidensiya nga giuyonan ta ni Jehova?

UBANG EBIDENSIYA NGA GIUYONAN TA NI JEHOVA

15. Kinsay hatagan ni Jehova sa iyang balaang espiritu, ug nganong nindot ni nga pasalig para nato?

¹⁵ Ihatag ni Jehova ang iyang balaang espiritu ngadto sa mga tawo nga iyang giuyonan. (Mat. 12:18) Puwede natong pangutan-on ang atong kaugalingon, ‘Napakita ba nako ang mga bahin sa bunga sa espiritu sa Diyos?’ Pananglitan, mas mapailobon ba ka karon kay sa niadtong wala pa ka makaila kang Jehova? Sa tinuod lang, kon maningkamot ta nga mapakita ang bunga sa espiritu sa Diyos, mas makombinsir ta nga giuyonan ta ni Jehova. Tan-awa ang kahong “Ang Bunga sa Espiritu mao ang . . . ”

16. Kinsay gigamit ni Jehova sa pagsangyaw sa maayong balita, ug unsay imong gibati niana? (1 Tesalonica 2:4)

¹⁶ Gisalig ni Jehova ang maayong balita ngadto sa mga tawo nga iyang giuyonan. (Basaha ang 1 Tesalonica 2:4.) Matikdi kon sa unsang paagi naeksperyensiyahan sa sister nga si Jocelyn ang pag-uyon sa Diyos. Usa ka buntag, na-depress kaayo si Jocelyn. “Guol kaayo ko, ug gibati nako nga wala koy pulos,” siya miingon. “Pero payunir ko, ug eskedyul nako nga mosangyaw anang adlawa. Busa nag-ampo ko kang Jehova ug misangyaw.” Nianang buntaga, nailaila ni Jocelyn si Mary, usa ka buotang babaye nga misugot nga magpa-Bible study. Paglabayg pipila ka bulan, si Mary miingon nga dugay na siyang nag-ampo sa Diyos nga tabangan siya, ug sa kalit lang, nanuktok si Jocelyn sa ilang balay. Tungod ani nga eksperyensiya, si Jocelyn miingon, “Gibati nako nga samag gisultihan ko ni Jehova, ‘Giuyonan ti ka.’” Siyempre, dili tanan ang maminaw sa mensahe nga atong ginasangyaw. Pero makasalig ta nga malipay si Jehova dihang himoon nato ang atong maarangan sa pagsangyaw sa maayong balita.

17. Unsay imong nakat-onan sa giingon ni Vicky bahin sa lukat? (Salmo 5:12)

¹⁷ Ipadapat ni Jehova ang bili sa lukat ngadto sa mga tawo nga iyang giuyonan. (1 Tim. 2:​5, 6) Pero komosta kon gibati nato nga wala gihapon ta uyoni ni Jehova bisag naa tay pagtuo sa lukat ug bawtismado na? Hinumdomi nga dili ta pirmeng makasalig sa atong pagbati, pero makasalig ta kang Jehova. Giisip niya nga matarong kadtong nagpakitag pagtuo sa lukat, ug nagsaad siya nga panalanginan niya sila. (Basaha ang Salmo 5:12; Roma 3:26) Ang pagpamalandong sa lukat nakatabang kang Vicky. Tungod niini, naamgohan niya: “Dugay na kaayong nagpailob si Jehova nako. . . . Pero, morag giingnan ra nako siya: ‘Kulang pa ang kadako sa imong gugma aron maapil ko. Kulang pa ang sakripisyo sa imong Anak aron mapasaylo ang akong mga sala.’” Pinaagi sa pagpamalandong sa regalo nga lukat, gibati niya nga gimahal gyod siya ni Jehova. Bation pod nato nga gimahal ug giuyonan ta ni Jehova kon pamalandongon nato pag-ayo ang lukat.

18. Kon padayon natong higugmaon ang atong langitnong Amahan, sa unsa ta makasalig?

¹⁸ Bisag maningkamot ta nga ipadapat ang atong nakat-onan niini nga artikulo, usahay madismayar gihapon ta ug magduhaduha kon giuyonan ba gyod ta ni Jehova. Kon mahitabo na, hinumdomi nga giuyonan niya kadtong “padayong nahigugma Kaniya.” (Sant. 1:12) Busa, padayon sa pagpakigsuod kang Jehova ug matikdi ang mga ebidensiya nga iya kang giuyonan. Hinumdomi kanunay nga si Jehova “dili layo sa matag usa kanato.”—Buh. 17:27.