Ang Hunahuna sa Bibliya

Pag-ampo Diha sa mga Dula—Mamati ba ang Diyos?

MAY kakisaw sa kahanginan samtang ang libolibong dumadayeg nangabot sa estadyum, nga nanghugyaw sa suportar alang sa ilang paboritong tem. Bag-o pang natapos ang mga magdudula sa ilang pangandam nga ehersisyo, ug hapit nang pagahuyopon ang silbato sa pagsugod sa dula. Sa usa ka kiliran sa dulaanan, ang mga magdudula nag-alirong nga nagtikubo, ug nagluhod ang kapitan sa taliwala, nga nag-ampo: “Diyos, hinaot imong panalanginan ang among tem, nga imo kaming hatagan sa kadaogan batok sa among kaatbang, ug imo kaming panalipdan gikan sa kadaotan. Amen.” Ang pagtapok nabungkag uban ang kusog nga singgit, nga ang mga magdudula miposisyon sa dulaanan, ang silbato gihuyop, ug misugod ang organisadong kagubot sa Amerikanhong potbol.

Ang pag-ampo nga tinagsa ug sa tem una pa, panahon sa, ug tapos sa pagsalmot sa lainlaing dula nahimong kasagarang talan-awon. Apan nagapamati ba ang Diyos? O sumala sa gipatuo sa pipila, kini ba nagayagayaga sa pag-ampo?

“Dugmoka ang Imong Silingan”

Sa tibuok nga kalibotan, halos tanang dula gidaot sa kabangis​—diha sa dulaanan ug lingkoran sa tumatan-aw. Ang usa ka kanhi propesyonal nga magdudulag potbol sa Tinipong Bansa misulat: “Malantugian nga ang pagguba sa lawas mao ang tuyo mismo sa potbol, maingon nga ang pagpatay ug pagpiang maoy sa gubat.” Siya mikomento sa dugang: “Ang maindigon, organisadong pagsamad maoy dimalaksing bahin sa atong paagi sa kinabuhi, ug ang potbol maoy usa sa mas tin-awng mga salamin . . . sa pagpakita kanako unsa ka makapaukyab ug mapuslanon ang Dugmoka ang Imong Silingan.”

Dugmoka ang imong silingan? Si Jesus miingon nga higugmaon ang imong silingan. (Mateo 22:39) Imposible ang paghanduraw sa Diyos sa gugma nga mapresente ug magbendisyon sa usa sa mga bangga sa dula karong adlawa, uban sa pasiugda niini diha sa pagdaog bisag unsay mahitabo.​—1 Juan 4:16.

Ang Diyos Nagatambong ba sa mga Bangga sa Dula?

Usa ka butang nga nagadasig sa pag-ampo diha sa mga dula mao ang relihiyosong pagtulon-an nga ang Diyos omnipresente, nga ang Diyos, sa tanang panahon, aktuwal nga presente diha sa tanang nagalungtad lugar ug mga butang. Pananglitan, diha sa librong God Goes to Football Games, ang klerigo ug kanhing tsaplin sa tem sa mga magdudula si L. H. Hollingsworth nagaingon: “Ang matag pormal nga pagtuo nga atong nabatonan bahin sa Diyos nagaapil sa ideya sa Iyang pagkaomnipresente, ang ideya, kon gusto nimo, nga Siya presente gayod diha sa atong ginatawag nga atong sekular nga kasinatian . . . Nga buot ingnon, ang Diyos nagaadto sa simbahan, ug ang Diyos nagaadto sa mga dulang potbol.”

Ugaling lamang, ang Bibliya wala magtudlo nga ang Diyos omnipresente. Ang Kristohanong si apostol Pablo misulat: “Si Kristo misulod . . . sa langit mismo, aron moatubang sa Diyos alang kanato.” (Hebreohanon 9:24) Adunay duha ka hinungdanong punto nga ang maong teksto nagatabang nato sa pag-ila: nga ang Diyos maoy usa ka espiritung persona ug siya may tinong dapit nga puluy-anan, ang langit. (1 Hari 8:49; Juan 4:24) Busa siya dili mahimong anaa sa bisan unsang laing dapit sa samang panahon.

Ang Diyos Nagapamati sa Iyang mga Higala

Aw, kon ang Diyos dili motambong sa mga bangga sa dula, labing menos siya ba mamati sa mga pag-ampo? Aron ang mga pag-ampo makaabot sa nagapamating mga igdulongog sa maong Diyos sa langit, nga sa iyang atubangan si Jesus mipakita, ang usang nagaampo kinahanglang may kahibalo, kahibalo sa mga katuyoan sa Diyos, sa iyang personalidad, sa iyang mga hiyas, sa iyang mga dalan, ug sa iyang ngalan. (Santiago 4:3) Sa pagpasiugda sa panginahanglan nga maila ang Diyos, si Jesus miampo: “Kini nagkahulogan sa kinabuhing walay kataposan, ang ilang pagkuhag kahibalo kanimo, ang bugtong matuod nga Diyos.”​—Juan 17:3.

Gikinahanglan ang komunikasyon aron mailhan ang usa ka persona. Ang Diyos nagapakigkomunikar sa tawo pinaagi sa Bibliya, ug ang Bibliya mao ang paagi aron mailhan nato ang Diyos sa langit. Kini nagatug-an kanato sa iyang ngalan, si Jehova. (Salmo 83:18) Ang Bibliya nagaingon usab nga gihigugma pag-ayo sa Diyos ang kalibotan nga iyang gipadala ang iyang bugtong nga Anak, si Jesus, nganhi sa yuta aron ang tawo makabaton sa higayon sa kinabuhing walay kataposan. (Juan 3:16) Samtang basahon ug tun-an nato ang Bibliya, si Jehova mahimong tinuod alang kanato, ug kita masuod kaniya pinaagi kang Jesus. (Juan 6:44, 65; Santiago 4:8) Tungod kay si Jehova tinuod, maugmad nato ang suod personal nga relasyon uban niya.

Ang pakighigala sa Diyos, hinunoa, nagalangkit sa duhag-dalan nga komunikasyon. Nagakinahanglan kini sa pagpakigsulti kang Jehova pinaagi sa pag-ampo. Ang Bibliya nagaingon nga ang Diyos maoy “Tigpatalinghog sa pag-ampo” ug nga “siya dili halayo gikan sa matag usa kanato.” (Salmo 65:2; Buhat 17:27) Bisan pa niana, kini wala magpasabot nga ang Diyos nagapamati sa tanang pag-ampo. (Isaias 1:15-17) Kansang mga pag-ampo ang buot patalinghogan sa Diyos?

Ang salmistang si David miingon: “Ang pakigsuod kang Jehova iya niadtong may kahadlok kaniya.” (Salmo 25:14) Sa orihinal nga Hebreohanon, ang gamot sa “pakigsuod” (sohd) nagkahulogan sa “paghugot.” Busa, kining bersikuloha nagapasa sa ideya nga pasudlon sa sulod nga pundok ni Jehova o nganha sa pakighigala nga may pakigtugon uban niya. Kadto lamang mga magsisimba nga nagapakitag tukmang pagtahod ang ginapasulod. Busa, ang atong suod nga pakighigala sa Diyos magpahinabo nga mahadlok kita nga mabugto ang relasyon pinaagi sa pagbuhat sa bisan unsa nga makapasuko niya, sama sa pag-isip sa pag-ampo ingong usa ka anting-anting sa suwerte aron tinong makadaog sa usa ka dula.

Si Jehova nagapamati sa mga pag-ampo sa mga tawong mabuot ug kasingkasing nga nagatinguhang makighigala uban niya, ug siya walay pinalabi. Siya dili mopaborpabor o mopasidungog sa usa ka nasod, rasa, o bisan tem sa magdudula, kay sa lain. (Salmo 65:2; Buhat 10:34, 35) Kon ang Diyos namati sa mga pag-ampo sa mga tigsalmot sa bangga sa dula ug ang duha ka tem moampo kaniya alang sa kadaogan, hain kanila ang iyang panalanginan? O kon ang usa ka magdudula seryosong madaot sa usa ka dula, pasanginlan ba ang Diyos?

Busa, kinahanglang moampo kita alang sa hustong mga butang. Si apostol Juan nagapatin-aw niini niining paagiha: “Bisan kon unsa ang atong pangayoon sumala sa iyang kabubut-on, kita iyang patalinghogan.” (1 Juan 5:14) Si Jehova nagapamati sa mga pag-ampo nga nahiuyon sa iyang kabubut-on. Kinahanglang atong masayran ang iyang kabubut-on ug mga katuyoan aron ang atong mga pag-ampo mahiuyon niini kanila.

Ang kabubut-on ug mga katuyoan sa Diyos ug ang iyang mahimayaong ngalan wala malangkit sa maindigon ug mabangisong mga bangga sa dula karong adlawa. Ang Diyos walay pinalabi. Busa, sa dihang ang mga pag-ampo himoon sa panahon sa maong mga bangga, ang Diyos nagapamati ba? Bug-os wala!