PWÓRÓUS LÚKÚNPÉÉN
Lupwen Emén Attongeom A Máló
“Nei, Kot a silei minne epwe múrinné. . . . Kele . . . chipiló.”
Ekkena kapas emén a mwéngúnúngúnúlóng lón selingen emén fefin itan Bebe atun felin wóón málóón seman we, ewe a máló lón eú ákseten.
Ina alon emén chiechien án Bebe we famili mi mochen oururu i, nge usun minne a apasa a fen ekinása letipen Bebe ese fen oururu i. Bebe a fókkun pacheéch ngeni seman we. I a kan ekkekieki: “Án Papa máló sap minne a múrinné.” Fite ier mwirin ena, lupwen Bebe a makkeei eú puk me a apwóróusa lón met a fis ngeni, a ffat pwe a chúen meefi letipeta ren málóón seman we.
Usun met Bebe a fen mirititi, epwe tongeni ttam ewe fansoun án emén epwe letipeta, ákkáeúin ika ewe mi letipeta a kon pacheéch ngeni ewe mi máló. Ewe Paipel a erá pwe máló ina ‘ewe amüchülan chon oput.’ (1 Korint 15:26) Málóón emén attongeach a fókkun efitikokooi kinamween manawach, ákkáeúin ika a weiweitá an fis, me ese wor emén mi tongeni eppeti efeiengawan. Kich meinisin a torikich osukosuken máló. Ina popun sise máirú ika sia meefi osukosuk ren ifa usun sipwe likiitú fán ach letipeta.
Eli ka fen ekieki: ‘Ifa úkúkún ttamen ach sipwe letipeta? Ifa usun emén a tongeni likiitú fán an letipeta? Ifa usun ua tongeni oururu chókkewe mi fen má seniir attongeer? Mi wor ápilúkúlúk fán iten attongeach kewe mi fen máló?’