Mi Mwáál Ach Sipwe Letipeta?

Eli a wor eú atun ka semmwen nge ka mwittir chikar seni, iwe ka fen mwittir ménúkaaló ena atun. Letipeta esap ina usun. Iei alon Dr. Alan Wolfelt lón néún we puk itelapan Healing a Spouse’s Grieving Heart: “Sise tongeni apasa pwe a unusen wesiló ach letipeta.” Iwe nge, a pwal apasa: “Ren ekkóch fansoun me pwal ren álillisin ekkewe ekkóch, óm letipeta epwe kisikisiló.”

Áwewe chék, nengeni ifa meefien Apraham lupwen pwúlúwan we a máló. Ewe Paipel a apasa pwe “Apraham a poputá le kechiweiti Sara.” Ei mwuten kapas “poputá le,” a pwáraatá pwe a likiitú fán an letipeta ren ekkóch fansoun.a A pwal wor pwóróusen Jakop, ewe a lúkúoló pwe emén manmwacho a nieló néún we Josef. A letipeta lón “chomong rän,” me chón an we famili rese tongeni echipa letipan. Mwirin fite ier, Jakop a chúen ekieki málóón Josef.​—Keneses 23:2; 37:34, 35; 42:36; 45:28; NW.

Lón ei fansoun a pwal ina usun meefien chómmóng aramas mi letipeta ren málóón emén atongeer ra fókkun pacheéch ngeni. Sipwe ppii ekkeei ruu pwóróus.

• “Pwúlúwei we itan Robert, a máló lón July 9, 2008. Ewe sossorun a fis ewe ákseten lón mi chék usun ekkewe pwal ekkóch rán. Mwirin ám mwéngéén lesossor, aua féri met aua féfféri iteitan me mwen an epwe ló angang, aua kis fengen, turufengen, me erá ‘Ai tong ngonuk.’ Nge mwirin wonu ier a chúen metek letipei. Ai lúkú esap tongeni wesiló ai pwosiiti Rob.”​—Gail, ierin 60.

• “Inaamwo ika a fen má seniei pwúlúwei we mi áchengicheng lón lap seni 18 ier, nge ua chúen pwosiiti me meefi letipeta. Iteiten ai kúna och férien Kot mi amwarar, ua chemeni pwúlúwei we me ekieki ifa usun epwe pwal pwapwaiti minne ua kúna.”​—Etienne, ierin 84.

A ffat pwe pwúkún ina usun aramas, repwe meefi ena esin riáfféún letip lón fansoun langattam. Mi sókkofesen napanapen án emén me emén letipeta, iwe ese éch ach sipwe apwúngú napanapen emén lón an letipeta. Pwal kich, neman sisap mochen pwisin apwúngúkich ika usun itá a kon ssenúkúló féfférúch me meefiach lupwen sia letipeta. Ifa usun sipwe likiitú fán ach letipeta?