Ifa Usun Sipwe Néúnéú ewe Brochure Pwóróus Allim Seni Kot!
Ei Minefé Brochure a Ffér pwe Epwe Álisikich le Liwinsefál me Poputááni Káéén Paipel
1. Ifa ewe mineféén brochure a ffér pwe epwe álisikich le chuursefáli me poputááni káéén Paipel, ewe mi katowu lón ewe “Tümwünü Lelukom!” Mwichelap lón Summer?
1 Atun ewe “Tümwünü Lelukom!” Mwichelap lón Summer, sia pwapwa le angei ewe minefé brochure pwe epwe álisikich le liwinsefál me poputááni káéén Paipel. Ewe Pwóróus Allim Seni Kot! brochure a siwili ewe Kutta brochure, iir me ruu ra chék léllé pún ekkewe lesen lón mi chék mwochomwoch. Pokiten ei esin napanap, sia tongeni néúnéú ei brochure le káé ngeni aramas ppen asamen imwer kewe. Ewe Kutta brochure a áweweei met a lamot ekkewe Chón Kraist repwe féri, iwe, ekkewe mineféén chón káé ra weires le etiwa. Iwe nge ei minefé brochure a afóta wóón ewe pwóróus allim seni Paipel.—Föf. 15:35.
2. Pwata ewe Pwóróus Allim brochure a ffér?
2 Pwata ei brochure a ffér? Pwiich kewe wóón unusen fénúfan ra tingor eú sókkun puk mi mecheres le luki aramas ngeni ewe enlet me emmweniir ngeni ewe Paipel A Apasa puk, ewe sia ákkáeúin káé Paipel ngeni aramas lón. Chókkewe mi niwokkus ar repwe káé Paipel lón puk mi maanún, lape ngeni repwe tipemecheres ar repwe káé Paipel ren ar néúnéú ewe brochure. Pwal eú, brochure a kon mecheres le afféú ngeni chómmóng fósun fénúfan.
3. Ifa sókkofesenin ei brochure seni ekkewe ekkóch puk fán iten káé?
3 Napanapen Fférún: Chómmóng me lein néúch kewe puk fán iten káé ra mak pwe aramas repwe tongeni állea me weweiti ewe enlet, pwal mwo atun ese wor a álisiir. Ei puk a sókkóló. A ffér pwe álillisin káéén Paipel nge a wor emén epwe wisen emmweni. Ina popun, atun epwe anéúnéú ngeni emén a mmen múrinné ika epwe pwóróus wóón eú are ruu parakraf. Ekkewe parakraf rese ttam, ina minne a éch le néúnéú atun a fis káé ngeni emén ppen asamen imwan are lón an leenien business. Ikaamwo lesen 1 a múrinné le poputááni ewe káé, nge sia tongeni poputá lón ese lifilifil menni lesen lón ewe brochure.
4. Ifa usun ei brochure a álisikich le néúnéú ewe Paipel pwe sipwe asukula aramas?
4 Lape ngeni lón néúch kewe puk, pélúwen ekkewe kapas eis ra nóm lón ekkewe parakraf. Iwe nge, lón ei brochure pélúwen ekkewe kapas eis ra nóm lón ewe Paipel. Lape ngeni aramas ra mochen káé seni Paipel nge esap seni néúch kewe puk. Ina pwata, arapakkan meinisin ekkewe wokisin rese affatetiw masouan, pwe ekkena wokisin repwe állea seni pwisin ewe Paipel. Ei napanap epwe álisi ekkewe chón káé ar repwe mirititi pwe minne ra káé a feito seni Kot.—Ais. 54:13.
5. Pwata a lamot pwe ekkewe mi wisen emmweni ewe káé repwe ammólnaéchú ewe pwóróus iteiten fansoun káé?
5 Ei brochure ese áweweei meinisin ekkewe wokisin. Pwata? Pún ei brochure a ffér pwe epwe álisi ewe chón káé an epwe kapas eis me mut ngeni ewe chón afalafal an epwe áeá an tufichin asukul. Ina minne iteiten epwe fis fansoun káé, a lamot an epwe fókkun ammólnaéchú ewe pwóróus. Iei met sipwe chechchemeni, sisap achómmónga ach kapas. Sia mmen efich le áweweei ekkeei wokisin. Iwe nge, epwele mmen éch ika sia mut ngeni ewe chón káé an epwe áweweei met a ekieki usun weween ewe wokisin. Ren ach néúnéúfichi ekkewe kapas eis, sia tongeni álisi i le uwawu meefian usun weween eú me eú wokisin.—Föf. 17:2.
6. Ifa usun sia tongeni néúnéú ei brochure (a) ikewe ie aramas ra tipemwaramwar usun Kot me ewe Paipel? (b) lón ewe angangen afalafal imw me imw? (c) le mwittir poputááni káé Paipel? (d) atun sia chuursefáli aramas?
6 Ei brochure a tongeni anéúnéú ese lifilifil ineet usun chék ekkewe ekkóch puk fán iten káé ngeni aramas me lúkún met sipwe anéúnéú lón ena maram. Chómmóng ra pwapwa le néúnéú fán iten ar repwe mwittir poputá káé ngeni aramas ppen asamer kewe. Pwal och, a katowu lón ewe Mwichelap lón Summer pwe atun sia chuursefáli chókkewe mi pwári ar mochen káé, néúnéú ei brochure pwe epwe “fókkun tongeni efisi pwapwaan ewe angangen chuursefáli aramas!” Nengeni ewe pwóór lón pekin taropwe 5-7.
7. Ifa usun kopwe emmweni eú káéén Paipel ren óm néúnéú ewe brochure?
7 Ifa Usun Sipwe Emmweni ewe Káé: Sia tongeni poputááni ach pwóróusfengen ren ach álleani ewe kapas eis mi kon chól makkan. Mwirin, álleani ewe parakraf me ekkewe wokisin mi kopái makkan. Néúnéú kapas eis epwe álisi ewe chón imw án epwe weweiti met weween ewe wokisin. Iwe me mwen kopwe mwékút ngeni ewe pwal eú kinikin, eisini ewe chón imw epwe pélúweni ewe kapas eis mi kon chól makkan ika a weweiti. Ren ekkewe akkomwen fitu fansoun ka chuuri, eli epwe múrinné oupwe pwóróus wóón eú chék ekkena kapas eis mi kon chól makkan. Mwirin och fansoun, eli sipwe tongeni attamaaló ach pwóróusfengen pwe sipwe káé unusen ewe lesen.
8. Epwe ifa usun ach kapas atun sipwe néúnéú wokisin ngeni aramas? Pwata?
8 Ese makketiw masouen ekkewe wokisin mi nóm mwirin ewe kapas “álleani” pwe lape ngeni a pélúweni ekkewe kapas eis mi kon chól makkan. Atun kopwe néúnéú eú wokisin, túmúnú pwe kosap apasa, “Ewe aposel Paulus a makkeei” are, “Nengeni met Jeremaia a oesini.” Eli ewe chón imw epwe ekieki pwe sia álleani alon chék aramas. Nge epwe éch sipwe apasa, “Ewe Kapasen Kot a apasa” are, “Nengeni met ewe Paipel a oesini.”
9. Mi lamot meinisin ekkewe wokisin ese makketiw masouan epwe állea atun ewe káé?
9 Mi lamot sipwe álleani meinisin ekkewe wokisin ese makketiw masouan are ekkewe chék wokisin a mak “álleani”? Epwe chék alóngólóng. Mi wor popun ra nóm ekkewe wokisin ese makketiw masouan. Eú me eú a masou ren pwóróus mi lamot sipwe pwóróus wóón. Nge fán ekkóch ese naf án ewe chón káé fansoun, an pwapwaiti, are an tufichin állea, eli ina met epwe efisi ach sipwele chék suuk ngeni ekkewe wokisin mi mak “álleani.”
10. Ineet sia tongeni néúnéú ewe Paipel A Apasa puk?
10 Ineet Kopwe Néúnéú ewe Paipel A Apasa Puk: Mwirin fán fitu ach pwóróusfengen are sia fen káé iteitan, sia tongeni néúnéú ewe Paipel A Apasa puk are sópwósópwóló chék tori a wesiló ewe Pwóróus Allim brochure. Ekkewe chón afalafal repwe nengeniéchú ika ineet atun repwe siwili met repwe káé lón. Nge atun sia siwili ngeni ewe Paipel A Apasa puk, itá mi lamot sipwe poputá seni lepoputáán? Ese pwal wor pinepinan. A lóngólóng wóón emén me emén. Iwe nge, lape ngeni ekkewe chón káé repwe feiéch ren ar enniwili ekkewe lesen ra fen káé nge epwe kon tichik lón ewe Paipel A Apasa puk.
11. Pwata a lamot sipwe néúnéú ei mineféén brochure?
11 Lón ei ótót ikewe ewe kapas allim ese chéú ie, sia fókkun feiéch le esilefeili ewe pwóróus mi kon luló echipwérún. Ina án Kot we Mwú a nemenem me ekiseló chék epwele poputááni eú ótót sefé ikewe pwúng epwe chéchéló ie! (Mat. 24:14; 2 Pet. 3:13) Sia lúkúlúk pwe chómmóng mi rongorong ei pwóróus allim repwe tipeeú ngeni ei kapas mi pin: “A mürina ewe chon künö mi fetal won ekewe chuk o uwato pworaus allim, ewe a arongafeili kinamwe o uwato kapasen feiöch. A asilefeili pwe aramas ra tongeni küna manau o üreni Sion, ‘Om Kot a nemenem.’” (Ais. 52:7) Amwo sipwe néúnéú ei minefé brochure le atoura pwóróus allim seni Kot ngeni ekkewe aramas mi osupwang lón pekin lúkú mi nóm lón ach we leenien afalafal!
[Pwóór lon pekin taropwe 5]
Ikewe Aramas Ra Tipemwaramwar Usun Kot me ewe Paipel:
● Lón ekkóch leeni, ekkewe chón afalafal ra kúna pwe aramas rese mochen fós usun “Kot” me “Paipel.” Ika ina usun, iwe atun ka liwiniti aramas, eli a múrinné kopwe pwóróus wóón ekkewe mettóch ra lólileniesini, usun lamoten eú mwú mi múrinné, ia sipwe angei me ie álillisin osupwangen ekkewe famili me met epwe fis lón mwachkkan. Nge mwirin fitu fansoun ach pwóróusfengen sia tongeni áiti ngeni ewe Pwóróus Allim brochure me nengeni ifa usun sia silei pwe a wor Kot me pwata sipwe eáni lúkúlúk wóón ewe Paipel.
[Pwóór lon pekin taropwe 6]
Lupwen Sia Afalafal Imw me Imw:
● “Ua etto pwe ua mochen áiti ngonuk usun mecheresin ach silei met Kot a mochen epwe fis ngeni aramas lón mwachkkan. Ka fen mwo ekieki ika Kot epwe angasakich seni riáfféú? [Aúseling ngeni meefian.] Ei brochure epwe áitingonuk ia lón ewe Paipel kopwe tongeni kúna pélúwan ena kapas eis. [Eiti ngeni eú brochure me álleani ewe áeúin parakraf lón lesen 1, pwal Jeremaia 29:11.] Me ren ei pwóróus, ka tipeeú pwe Kot a mochen ach sipwe ápilúkúlúkéch lón mwachkkan? [Aúseling ngeni meefian.] Ika ka mochen ka tongeni néúni ei brochure. Lón naan, sipwe tongeni pwóróusfengen wóón parakraf ruu pwe sipwe kúna pélúwan ei kapas eis lón Paipel, a erá: ‘Ifa usun Kot epwe angasaaló aramas seni ekkewe popun riáfféú?’” Ika a wor an ewe chón imw fansoun lón ewe áeúin ka chuuri, eli ka tongeni álleani me pwóróusfengen wóón parakraf ruu me ekkewe úlúngát wokisin. Akkóta óm kopwe liwinsefál pwe oupwe pwóróusfengen wóón ewe oruuen kapas eis lón ena lesen.
● “Chómmóng aramas ra mochen ar repwe iótek ákkáeúin atun a wor ar osukosuk. En mi pwal iótek fán ekkóch? [Aúseling ngeni meefian.] Ka ekieki pwe Kot mi aúseling ngeni ekkewe iótek meinisin are epwe tongeni fis pwe ekkóch iótek rese apwapwaai i? [Aúseling ngeni meefian.] A wor rei eú brochure epwe affata ifa usun Paipel a pélúweni ekkena kapas eis. [Eiti ngeni eú brochure me pwóróusfengen wóón ewe áeúin parakraf lón lesen 12, me ekkewe wokisin a mak “álleani.”] A fókkun múrinné pwe Kot a mochen aúseling ngenikich, ika met? Nge ren ach sipwe unusen kúna feiéchún iótek, a lamot sipwe silefichi Kot. [Suuk ngeni lesen 2 me apwár ngeni ekkewe itelap kisikis.] Ika ka mochen ua tongeni likiti ngonuk ei brochure, iwe, lón pwal eú fansoun sia tongeni álleani seni Paipel pélúwen ekkewe kapas eis mi amwarar.”
● “Aramas ra lólileniesini met epwe fis ngeni ei fénúfan. Óm ekiek, ach ei fansoun epwe múrinnéló? [Aúseling ngeni meefian.] Chómmóng aramas ra máirú atun ra silei pwe a wor pwóróus allim lón ewe Paipel mi tongeni ngenikich ápilúkúlúkéch. Ikkeei ekkóch kapas eis Paipel a pélúweni.” Eiti ngeni eú brochure me etiwa an epwe filatá eú kapas eis a kon sani mi nóm lúkúnúppen ewe brochure. Mwirin suuk ngeni ewe lesen me áiti ngeni ewe kókkótun káé. Akkóta óm kopwe liwinsefál me pwóróusfengen wóón pwal eú kapas eis lón ena lesen.
[Pwóór lon pekin taropwe 7]
Mwittir Etiwa an Epwe Káé:
● “Ikenái ua mochen áiti ngonuk eú mineféén napanapen káéén Paipel nge ese pwal ttam. Lón ei brochure a wor 15 lesen epwe áitingonuk ia lón noum we Paipel kopwe kúna pélúwan ekkewe kapas eis mi lamot. [Ápwár ngeni lúkúnpéén me lúkúnúppan.] Ka fen sótuni le káé ewe Paipel? [Aúseling ngeni meefian.] Kese mochen upwe áiti ngonuk mecheresin ekkeei lesen. [Pwóróus wóón lesen 3 kapas eis 3 lón áeúin parakraf, me álleani Pwärätä 21:4, 5. Ika mi tufich, pwal pwóróus wóón ewe parakraf mwirin me ekkewe wokisin a mak “álleani.”] Ika ka mochen, ua tongeni likiti ngonuk ei brochure. Nge ám aua peseok pwe kopwe sótuni le káé Paipel mwaren fán eú lón eú wiik. Ika ka sani ka tongeni sópweló. Lón pwal eú fansoun sia tongeni pwóróus wóón ewe áeúin lesen. Nengeni ese pwal ttam pwe a chék eú pekin taropwe.”
[Pwóór lon pekin taropwe 7]
Áiti Ngeni Atun Sia Liwinsefál:
● Atun sia liwinsefáliti emén mi pwáraatá an mochen aúseling, eli sipwe apasa: “A mmen éch pwe ua kúnasefáluk ikenái. Ua wato reom ei brochure mi wor an Paipel kewe pélúwan fán iten ekkewe kapas eis mi amwarar. [Eiti ngeni eú brochure me ereni an epwe katol lúkúnúppan.] Menni lein ekkeei lesen ka kon sani? [Aúseling ngeni meefian. Iwe suuk ngeni ewe lesen a filatá.] Mut ngeniei ai upwe áiti ngonuk ifa usun sipwe néúnéú ei brochure le kútta pélúwan seni Paipel.” Áiti ngeni ewe kókkótun káé ren ámi pwóróusfengen wóón eú ika ruu parakraf me ekkewe wokisin a mak “álleani.” Iwe ren ei, ka fen poputááni eú káéén Paipel! Likiti ngeni ewe chón imw ewe brochure me akkóta le liwinsefál. Lupwen a wes ewe lesen kopwe tongeni pwóróus wóón pwal eú lesen ewe chón imw a filatá are poputááni ewe áeúin lesen lón ewe brochure.