Néún Chón Israel we Áeménún King

Jiowa a ngeni ekkewe chón Israel ekkewe soukapwúng pwe repwe emmweniir, nge ra mochen epwe wor néúr king. Ra ereni Samuel: ‘Meinisin ekkewe mwú únúkkúch a wor néúr king. Áúa pwal mochen epwe wor néúm.’ Samuel a meefi pwe mi mwáál ena, ina popun a iótek ngeni Jiowa ussun. Jiowa a ereni: ‘Ekkewe aramas rese likitukoló, nge ra likitieiló. Kopwe ereniir pwe ra tongeni néúni emén king, nge ena king epwe oumwesiir le féri chómmóng mettóch.’ Ikáámwo ina, nge ekkewe aramas ra erá: ‘Áúse pwal ekieki. Áúa chék mochen epwe wor néúm king!’

Jiowa a ereni Samuel pwe emén mwán itan Saul, ina i ewe epwe wiliiti ewe áeménún king. Atun Saul a feiló chuuri Samuel lón Rama, Samuel a epiti Saul pwe epwe king ren an ninatiw lé wóón mékúran.

Ekiseló mwirin Samuel a kérato ekkewe chón Israel pwe epwe pwáári ngeniir néúr we minefé king. Nge rese tongeni kúna ia Saul a nóm ie. Ka silei pwata? Pokiten a opoló lein ekkewe pisek. Atun ra kerán kúna Saul, ra uweato me aútáái lein ekkewe aramas. Saul a ttam seni meinisin me a fókkun átéch. Samuel a erá: ‘Iei ewe Jiowa a filaatá.’ Ekkewe aramas ra léúwommóng le erá: ‘Ewe king epwe manawattam!’

Me akkomwan, King Saul a aúseling ngeni Samuel me álleasochisi Jiowa. Nge mwirin a siwil. Áwewe chék, itá esap wisen ewe king an epwe eáni asor. Lón eú atun, Samuel a ereni Saul an epwe witi, nge Samuel a mmang. Iwe Saul a filaatá le pwisin eáni ewe asor. Met meefien Samuel? A ereni: ‘Itá kosap álleasolapa Jiowa.’ Itá Saul a káé seni met a mwáálliló wóón?

Ekiseló, atun Saul a feiló pwe epwe fiu ngeni ekkewe chón Amalek, Samuel a ereni Saul pwe epwe fókkun nireló meinisin. Nge Saul a filaatá an esap nieló King Akak. Jiowa a ereni Samuel: ‘Saul a likitieiló, me ese pwal aúseling ngeniei.’ Samuel a fókkun letipengaw, me a ereni Saul: ‘Pokiten kese chúen álleasochisi Jiowa, iwe epwe filaatá pwal emén king.’ Atun Samuel a kul pwe epwele ló seni, Saul a turufi lepwúlún úfan we iwe a kamw. Mwirin Samuel a ereni Saul: ‘Jiowa a kamwei sonuk ewe mwú.’ Jiowa epwele ngeni emén ewe mwú, emén mi fókkun tongei me álleasochisi.