NSUNZO 22
JIBO 15 Attittimihiwe Nammodha wa Yehova!
Nzina na Yehova Nintapulela Eni mwa Yezu?
“Miyo ddihaziwiha nzina nenyu vina ddinele waziwihavi.”—JO. 17:26.
DHINASUNZE IYO
Wona mukalelo oziwihile Yezu nzina na Yehova vina owodhile dhavi okoddeliha vina wamelela nzina na Babe.
1-2. (a) Txini ekosile Yezu omattiyu obule ahinakwa? (b) Mavuzo gani anakuliwe mwari mwa nsunzo ntti?
OMATTIYU wa txinayi 14 wa Nisani, yaka ya 33 nsaka na Kristu. Yezu wahimala oja Siyari ya Nabuya na arumiwi aye ororomeleya. Iyene wanziwa wi mohigonela Juda agahimuguliha, agahitabutxiwa vina musogorhomwa agahipiwa na amwiddani aye. Nona musogorhomwa mmaleliye oja siyari, iyene wahawaddela dhilobo dhinji dhopangarhaza arumiwi aye. Vafiyile mudhidhi wi otene adhowe, Yezu wahikosa nlobelo namakamaka vaddiddi. Murumiwi Joau ohileba nlobelo ntti; nlobelona ninfwanyeya va Joau kapitulu 17.
2 Yezu wazuzumeletxa eni mudhidhi okosiliye nlobelo ntti? Nlobelo ntti ninnikamihedha dhavi ononelamo ejile yalitxi yamakamaka mwa Yezu valiye velaboni ya vati? Ninele wona dhowakula dha mavuzo aba.
“MIYO DDIHAZIWIHA NZINA NENYU”
3. Txini elogile Yezu mwaha wa nzina na Yehova vina txini yafuniye ologa? (Joau 17:6, 26)
3 Munlobeloni mwaye Yezu ohiloga dhahi: “Miyo ddihaziwiha nzina nenyu.” Kavali waganyedha wi makani aba àli amakamaka mwa Yezu sabwani iyene ohiloga dila bili. (Kengesa Joau 17:6, 26.) Yezu afuna aloge eni? Koddi iyene afuna àsunzihe anamafwara aye nzina na Mulugu? Anamafwara a Yezu àli Ayuda nona awene anziwa wi nzina na Mulugu ddi Yehova. Nzina ntti ninofwanyeya waddamela dila 7.000 mMaleboni a Ebrayiko. Nona ejile ekosile Yezu kahiye ologa bahi wi nzina na Mulugu ddi Yehova; mwebaribari iyene ohisunziha ejile entapulela nzina ntti. Yezu ohakamihedha anamafwara aye omuziwa pama Yehova, oziwa efunelo yaye na elabo ya vati vina na nlogo na attu, ejile ekosiliye, enakosiye vina mikalelo dhaye. Ddi Yezu bahi agawodhile osunziha dhotedhene esi pama, sabwani iyene onomuziwa deretu Yehova opitta muttu mwina.
4-5. (a) Nzina na muttu nindaga dhavi okala na ttima mwa iyo? Kavaha yotagiha. (b) Nzina na Yehova nidhile dhavi okana ttima enddimuwa mwa anamafwara a Yezu?
4 Kobuwela wi mmulogoni mwawo muhikala munddimuwa wa mmulogoni onkuweliwa Davidi, iyene vina dotoro. Weyo onomuziwa mwari mwa vyaka dhinjene. Labo dhahi egumi yawo okala vangovini vina onatamela nikamihedho na dotoro, musogorhomwa weyo onodhowa osipitale vina mbali oddu oli dotoro onovuna egumi yawo. Ovano weyo onomukwela venjene mbali oddu vina ogewa nzina naye onowubuwela ejile ewukoseliye. Davidi ddi munddimuwene oddule wa mmulogoni omuziwiliwe wale, mbwenyi ovano ddi dotoro ovunile egumi yawo.
5 Namukalelo wakakene, anamafwara a Yezu anziwa nzina na Yehova. Mbwenyi sabwa ya mabasa a Yezu, nzina ntti nahiroma okana ttima vaddiddi mwa awene. Sabwaya? Sabwani Yezu wanlagiha mikalelo dha Babe mwa dhotedhene dhalogiye vina dhakosiye. Nona vavuruwana anamafwara a Yezu masunziho aye vina vonani mukalelo waweddihiye attu, awene anwodha omuziwa pama Yehova.—Jo. 14:9; 17:3.
“NZINA NENYU, NZINA NIDDIVAHILENYU”
6. Txini yamuttukulele Yezu ologa wi nzina na Yehova ohivahiwa iyene? (Joau 17:11, 12)
6 Munlobeloni mwaye Yezu wahakumbirhela anamafwara aye dhahi: “Kawang’aneleni mwaha wa nzina nenyu, nzina niddivahilenyu.” (Kengesa Joau 17:11, 12.) Eji entapulela wi nzina na Yezu ovano nigali Yehova? Nne. Addagana nzina na Yehova, Yezu ohiloga “nzina nenyu.” Eji enolagiha wi Yezu kakuweliwa Yehova. Kito Yezu walogelani wi nzina na Mulugu wahivahiwa iyene? Yoroma, Yezu wali mwimeleli vina Mwana-mukwatti wa Yehova. Iyene ohidha mwa nzina na Babe vina ohikosa mabasa a guru modhela nzina naye. (Jo. 5:43; 10:25) Nzina na Yezu nintapulela “Yehova Nvuni.” Nona nzina na Yehova ninowiwanana kakamwe na nzina na Yezu.
7. Kavaha yotagiha entonyihedha wi Yezu agahiwodha ologa na nzina na Yehova.
7 Wi niwodhe ononelamo pama, katanalela yotagiha eji: Mulamuleli onowodha omuruma muttu wi aloge na ena na nzina naye. Nona muttuya agalogaga onokana ettomo yakakene ya mulamuleliya. Moligana na ejene, Yezu wannimwimelela Yehova vina wanloga mwa nzina Naye.—Mt. 21:9; Lk. 13:35.
8. Nzina na Yehova nali dhavi na Yezu masiki iyene ahinadha velaboni ya vati? (Obudduwa 23:20, 21)
8 Bibilia onomuloga Yezu ninga Nzu sabwani Yehova ohimulabihedha wi àvahe miselu vina malago anju na attu. (Jo. 1:1-3) Txino Yezu ddi anju wamulabihedhile Yehova wi àsogorhele ana Izrayel valani mwiddeddereni. Yehova vawaddeliye ana Izrayel wi anfwanyelela omwiwelela anju oddule, iyene ohiloga mwahaya: “Iyene onloga na nzina naga.”a (Kengesa Obudduwa 23:20, 21.) Yehova ohiloga ejuwene sabwani Yezu ddi mwimeleli waye vina ddi muttu wamakamaka ombarela vina onkoddeliha nzina na Babe.
“BABANI KATTITTIMIHANI NZINA NENYU”
9. Ttima gani yavaha Yezu nzina na Yehova? Katapulela.
9 Ninga monilihu nzina na Yehova nali na makamaka vaddiddi mwa Yezu masiki iyene ahinadha velaboni ya vati. Dhotedhene dhikosile Yezu valiye velaboni ya vati dhihilagiha wi nzina na Yehova nali namakamaka vaddiddi mwa iyene! Omamalelo wa mabasa aye a olaleya, Yezu ohimukumbirha Yehova: “Babani, kattittimihani nzina nenyu.” Mudhidhene obule, Babe wahakula na lizu nowiweya nakala ninga jahi, alogaga: “Miyo ddimala ottittimiha vina ddinele ottittimiha wili.”—Jo. 12:28.
10-11. (a) Yezu ottittimihile dhavi nzina na Yehova? (Koona vina foto.) (b) Nzina na Yehova ninfwanyelela nni okoddelihiwa vina wameleliwa?
10 Yezu vina ohittimiha nzina na Babe. Dhavi? Modhela ologa mikalelo dhotikiniha dha Babe vina dhilobo dhapama dhinkosiye. Mbwenyi ejo kiyakwanile. Nzina na Yehova nanfwanyela okoddelihiwa vina wameleliwa.b Yezu ohilagiha ttima ya okosa ejuwene mudhidhi wasunzihiliye anamafwara aye olobela dhahi: “Baba wehu muli wirimu, nzina nenyu nikoddelihiwe.”—Mt. 6:9.
11 Nzina na Yehova nafwanyelela nni okoddelihiwa vina wameleliwa? Sabwani mmunddani mwa Edeni, Satana wahimusadduwela Yehova Mulugu vina wahiloga dhottambi mwaha wa iyene. Satana wahiloga wi Yehova wali muttambi vina wannavitela elobo yapama Adamu na Eva. (Wi. 3:1-5) Satana vina ohiloga wi mukalelo onkosa Yehova dhilobo bwa bure. Sabwa ya dhottambi dhilogile Satana, attu txino anokana monelo wohifwanyelela sabwa ya ejile eli Yehova. Musogorhomwa nsaka na Job, Satana wahiloga wi abale animwebedha Yehova kanimwebedha na efunelo ya ebaribari. Iyene vina ohiloga wi attu kanimukwela Yehova na murima wetene mpaka odhowavi amulabelaga mmidhidhini dhorutxa. (Job 1:9-11; 2:4) Na mudhidhiya egahiwodheya woona bani oli muttambi, Yehova obe Satana.
Yezu ohasunziha anamafwara aye ttima ya okoddeliha nzina na Mulugu (Kang’ana ddima 10)
“DDINOPERHEKA EGUMI YAGA”
12. Txini yaganile Yezu okosa sabwa ya okwela nzina na Yehova?
12 Sabwa ya omukwela Yehova, Yezu wanfuna okosa dhotene dhigawodhiliye wi akoddelihe vina amelele nzina na Yehova. Iyene wali womala-nawale wi akwe wila alagihe wi Yehova ddokoddela vina mukalelo Waye wa okosa dhilobo bwa pama.c Nona Yezu ohiloga: “Ddinoperheka egumi yaga.” (Jo. 10:17, 18) Amambali ehu oroma oligana Adamu na Eva, ahimusadduwela Yehova vina ahikala mpaddi wa Satana. Mottiyana na awene, Yezu wali womala-nawale wi adhe velaboni ya vati vina alagihe omukwela waye Babe. Iyene ohikosa ejuwene modhela omwiwelela Yehova mwigumini mwaye mwetene. (Ahe. 4:15; 5:7-10) Yezu wahikalavi wororomeleya egumi yaye yotene mpaka okwa vapingirhizini ya goyi. (Ahe. 12:2) Dhahene, iyene ohilagiha omukwela waye Yehova vina nzina Naye.
13. Sabwaya jani Yezu wali muttu wofwanyelela wila alagihe wi Satana muttambi? (Koona vina foto.)
13 Dhotedhene dhikosile Yezu, dhihilagiha mowakwana-mwene wi muttambi ddi Satana ottiya Yehova! (Jo. 8:44) Yezu wanimuziwa pama Yehova opitta muttu-muttuvi okalilewo velaboni ya vati. Dhottambi dhilogile Satana mwaha wa Yehova kokala ebaribari, Yezu agahiziwa. Mbwenyi dhotene dhilogiliye dhali ottambi, nona n’oliba murima Yezu wahidhowavi abarelaga nzina na Yehova. Masiki ekalaga ninga Yehova wahimunyanyala, Yezu wahisakula okwa ottiya omusadduwela Babe wokwela.—Mt. 27:46.d
Omaromo vina omamalelo wa egumi ya Yezu velaboni ya vati iyene ohitonyihedha kakamwe wi Satana muttambi ottiya Yehova! (Kang’ana ddima 13)
“DDIHIPULIHA MABASA ADDIVAHILENYU”
14. Yehova omururihile dhavi Yezu sabwa ya okala muttu wororomeleya?
14 Nlobelo nikosile Yezu omattiyu womariha ahinatti okwa iyene ohiloga: “Ddihipuliha mabasa addivahilenyu.” Yezu wankuluvela wi kodhowavi akalaga wororomeleya, Yehova agahimuttuva. (Jo. 17:4, 5) Iyene kavonyile wubuwela dhahene. Yehova kamuttiyile okalavi mmasiye. (Mer. 2:23, 24) Yehova ohinvenyiha Yezu mukwani vina ohinvaha ettomo yamakamaka wirimu. (Flp. 2:8, 9) Musogorhomwa, Yezu ohiroma olamulela ninga Mwene wa Omwene wa Mulugu. Txini enakose Omwene obu? Yezu ononivaha yowakulaya munlobeloni nasunzihiliye anamafwara aye, ninloga: “Omwene wenyu odhe. Ofuna wenyu [wa Yehova] okosiwege vati apano ninga wirimu.”—Mt. 6:10.
15. Txini yina enakose Yezu?
15 Mohigonela Yezu onele owana na amwiddani a Mulugu vina onele watolotxa attu abure mukoddoni ya Harmagedón. (Ovu. 16:14, 16; 19:11-16) Musogorhomwa Yezu onele omponyela Satana muntxelani “novaya,” mwenemo Satana kanawodhe okosa elobwene, onakale ninga okwile. (Ovu. 20:1-3) Yezu onele odhana velaboni ya vati murenddele vina onele wakamihedha attu okala oligana mwari mwa Olamulela waye wa Vyaka Txikwi. Iyene onele wavenyiha akwile vina onele okosa elabo yotene okala Paraizu. Omamalelowa efunelo ya Yehova enele wakwanihedheya!—Ovu. 21:1-4.
16. Egumi enakale dhavi omamalelo wa Olamulela wa Vyaka Txikwi?
16 Egumi enakale dhavi omamalelo wa Olamulela wa Vyaka Txikwi? Ottega vina ohiligana dhinele ottiya okalawo. Kinakale yofuneya vina attu okumbiraga nlevelelo mwa dhottega dhawa, attu kanafune vina yobolo, nne vina mulogeli obe anamakutta wi awodhe okala amarho a Yehova. Omamalelowa mwiddani womariha onatolotxiwe, okwa oravilihu mwa Adamu. Abale akwile anele ovenya mukwani. Otene velaboni ya vati anele okala oligana.—1 Ko. 15:25, 26.
17-18. (a) Txini enapadduwe omamalelo wa Olamulela wa Vyaka Txikwi? (b) Txini enakose Yezu omamalelo wa olamulela waye? (1 Korinto 15:24, 28) (Koona vina foto.)
17 Elobo gani yina ya ttima enapadduwe omagomo wa Olamulela wa Vyaka Txikwi? Kawo muttu onaganyedhege wi Yehova, Mulugu wokoddela vina woligana. Dhavi? Mmunddani mwa Edeni Satana ohiloga wi Yehova kanalamulela attu na okwela vina muttambi. Oromana mudhidhene obule nzina na Yehova nihikoddelihiwa dila dhinjene na abale animuttittimiha vina animuriha. Nona omamalelo wa Olamulela wa Vyaka Txikwi mweddelo wa Yehova onele wameleliwa kakamwe. Iyene onele olagiha wi Babi wokwela.
18 Omamalelo wa Olamulela wa Vyaka Txikwi, otene anele oziwa wi dhotene dhilogile Satana mwaha wa Yehova dhali ottambi. Txini enakose Yezu olamulela waye ogagoma? Koddi iyene onele ofwara yotagiha ya Satana vina bamusadduwela Yehova? Nne! (Kengesa 1 Korinto 15:24, 28.) Yezu onele omwiyihedha Omwene Babe vina onele wiwelela ottonga waye. Ndde, mottiyana na Satana, Yezu oli womala-nawale wi anvahe ettomo yaye Yehova sabwani onomukwela.
Yezu onele wagalala mwa omwiyihedha Yehova Omwene omamalelo wa Olamulela waye wa Vyaka Txikwi (Kang’ana ddima 18)
19. Nzina na Yehova nintapulela eni mwa Yezu?
19 Yehova wahikana mwaha dhapama dha onvaha Yezu nzina Naye! Yezu mwimeleli woligana wa Babe. Kito nzina na Yehova nintapulela eni mwa Yezu? Nzina ntti ttamakamaka mwa Yezu opitta elobo yina. Yezu ohifiyedha operheka egumi yaye mwaha wa nzina ntti. Vina omamalelo wa Vyaka Txikwi iyene onele omperhekela Babe dhotedhene. Ninawodhe dhavi ofwara yotagiha ya Yezu? Ninele wona yowakulaya nsunzo ninfwarela.
JIBO 16 Nimukokorele Yehova vina Mwanaye Yezu
a Dila dhinjene Yehova ohalabihedha anju ninga emeleli aye wi aziwihe miselu mwa nzina naye. Nona dila dhina Bibilia agalogaga wi Yehova onologa, mbwenyi mwebaribari onloga anju mwa nzina naye. (Wi. 18:1-33) Motagiha Bibilia onologa wi Yehova wahinvaha Mizé Nlamulo, mbwenyi maversu mena antonyihedha wi Yehova walabihedhile anju wi akose ejuwene.—Ona. 27:34; Mer. 7:38, 53; Gal. 3:19; Ahe. 2:2-4.
b MAZU MENA ATAPULELIWE: Nzu ntti “okoddeliha” nintapulela ottittimiha elobo, wona ninga yokoddela, obe weddiha na nriho ninddimuwa. Vina nzu ntti “wamelela” nintapulela obarela mweddelo wokoddela wa muttu mwa abale animmageedha ottambi obe olagiha wi iyene kana muladdu attu ena agaloga dhilobo dhabure mwaha waye.
c Okwa wa Yezu ohavaha attu gari ya wakela egumi yohimala.
d Koona “Mavuzo Ankosa Anamengesa” Mwang’aneli wa Abrili 2021, nikuku 30-31.