NSUNZO 49
Koddi Yehova Onele Wakula Malobelo Aga?
“Mugaddithana, mugaddiloba, miyo ddinoutanalani.”—JER. 29:12.
JIBO 41 Vuruwanani Nlobelo Naga
DHINASUNZE IYOa
1-2. Dila dhina txini ennittukulela wubuwela wi Yehova kanakula malobelo ehu?
YEHOVA ddinuttabiha onouvaha enfuna murima wawo. (Masal. 37:4) Ntti njedhelo nowagalaliha vaddiddi! Kuloga Yehova onele onivaha dhetene dhinfunihu? Ninvuzelani dhawene? Kobuwela makattamiho ninga aba. Murogora wa muziye onomukumbirha Yehova wi amukamihedhe odhowa okosa Eskola ya Anamalaleya a Omwene. Vyaka dhinjene dhinovira mbwenyi kankuweliwa. Mbali wa muzombwe onomukumbirha Yehova wi amukamihedhe ovulumuwa mmakattamihoni a oredda wi azuzumele venjene mabasa a mmulogoni. Mbwenyi masiki dhawene kanvulumuwa. Amambali ali Akristu anolobela amukumbirhaga Yehova wi amukamihedhe mwaniwa okalavi mwibaribarini. Mbwenyi mwanaya onottiya omulabela Yehova.
2 Txino weyo wahimulobelela Yehova okumbirhaga elobo mbwenyi masiki dhawene kuwonile yowakulaya. Sabwa ya ejuwene onodhaga wubuwela wi Yehova onakula malobelo a attu ena mbwenyi awo kanakula. Obe txino wahiroma wubuwela wi wahikosa elobo yabure. Murogora dhahi onkuweliwa Janiceb ohiviwamo dhawene. Iyene na mamunaye anlobela sabwa ya efunelo yawa ya odhowa okamihedha o Beteli. Iyene ohiloga dhahi: “Iyo nahikana nikuluvelo wi mohigonela nigahikuweliwa wi nakamihedhe o Beteli.” Mbwenyi myeri ovira, vyaka ovira, atelaniya txipo kakuweliwe. Janice ohiloga dhahi: “Miyo ddahikubanya vina kaddana yokosa. Ddannubuwela wi txino s’ohifuna ddahikosa elobo emusilidhile Yehova. Miyo ddahilobela ddilogaga yafunimi. Iyene okoddele nni wakula nlobelo naga?”
3. Txini enone iyo mwari mwa nsunzo ntti?
3 Dila dhina, ninofwanyela ovivuza akala txibarene Yehova onowakula malobelo ehu. Alabeli ororomeleya a Yehova a nsaka na wale, ankosa ejuwene. (Job 30:20; Masal. 22:2; Hab. 1:2) Txini enaukuluvelihe wi Yehova onowakula malobelo awo? (Masal. 65:2) Wi niwodhe wakula nivuzo ntti, va maromo ninfuna nakule mavuzo aba mararu: (1) Txini enjedhela iyo wa Yehova? (2) Txini ennijedhelana Yehova? (3) Dila dhina enfuneyelani otxinja dholoba dhehu?
TXINI ENJEDHELA IYO WA YEHOVA?
4. Mowiwanana na Jeremiya 29:12, txini epikirele Yehova okosa?
4 Yehova ohipikirhela wi onele wakula malobelo ehu. (Kengesa Jeremiya 29:12.) Mulugu wehu onowakwela alabeli aye ororomeleya nona iyene txipo kampwaza malobelo awa. (Masal. 10:17; 37:28) Mbwenyi ejo kintapulela wi iyene onele onivaha dhetene dhinkumbirhihu. Dhilobo dhina dhinimulobihu ninakele mwilaboni eswa.
5. Txini enubuwela Yehova agavuruwanaga malobelo ehu? Katapulela.
5 Yehova onotanalela akala dholoba dhehu dhinowiwanana na efunelo yaye. (Iza. 55:8, 9) Mpaddi mmodha wa efunelo yaye ja wadhaaliha attu mwilaboni alobwana na ayana awagalala vina awiwanana mutxiddo mwa olamulela waye. Mbwenyi Satana ohiloga wi attu agahikana wagalala kovilamulelaga anyene. (Wita 3:1-5) Wi onihe ottambi oku wa Satana, Yehova onowattiya alamuleli omaningoni olamulelaga mwilaboni mpaka masaka abano. Nona mpaddi mwinji wa makattamiho anoneya mwilaboni ontatamuleya na awene. (Koh. 8:9) Iyo ninoziwa wi Yehova kanagomihe makattamiho otene masaka abano. Yehova kokosa dhawene, attu ena agahubuwela wi dhinkosa alamuleli dhinoweedda pama.
6. Txini ennikuluveliha wi Yehova onokosa dhilobo na okwela vina oligana?
6 Yehova onowodha wakula malobelo oligana na mukalelo wottiyana. Motagiha, Mwene Ezekiya vakaliliye muredda vaddiddi wahilobela wi Yehova anvulumutxe. Yehova wahikosa ejuwene. (2 Amwe. 20:1-6) Mwa mpaddi mwina murumiwi Paulo vamukumbiriliye Yehova wi amukutxemo mwinga wali mmaningoni mwaye, txino makattamiho a egumi, Yehova kanvulumutxile. (2 Kor. 12:7-9) Koona vina epadduwile na murumiwi Tiago na Pedro. Mwene Herodi afuna aape oheli. Txino mulogo wahimulobelela Pedro, enoneya ninga ahimulobelela vina Tiago. Mbwenyi Tiago wahipiwa, na matikiniho Pedro wahifuruliwa na anju. (Mer. 12:1-11) Txino ninodhaga ovivuza, ‘Sabwaya jani Yehova anvuna Pedro nanda ahinvuna Tiago?’ Bibilia kanloga.c Mbwenyi ninokana nikuluvelo wi Yehova kana nsakulano, dhinkosiye soligana. (Olib. 32:4) Iyo ninoziwa vina wi Yehova wanimukwela Tiago vina Pedro. (Ovuh. 21:14) Dila dhina Yehova onowakula malobelo ehu na mukalelo wahajedhelihu. Vina kanina waganyedha wi dhetene dhinkosa Yehova onkosa na okwela vina oligana, nona kanina mwaha wa opambiha mukalelo onakula iyene malobelo ehu.—Job 33:13.
7. Txini enfwanyelihu orabela, nanda sabwaya jani?
7 Iyo kaninfuna oladdaniha makattamiho ehu na makattamiho a attu ena. Motagiha, txino ninodhaga omuloba Yehova wi anikamihedhe mmakattamihoni mwehu mbwenyi nlobelo nehu kuhakuliwa. Na ovira wa mudhidhi iyo ozinddiyela wi muttu mwina wahikosa nlobelo noladdana na nehu, vina mukalelo oli dhilobodha enoneya ninga Yehova ohakula nlobelo naye. Murogora mmodha onkuweliwa Ana ohipadduweliwa ejuwene. Iyene wahilobela akumbirhaga wi mamunaye Matthew avulumuwe oredda wa Kanseri. Nsakanene-ntto, arogora eli awunuwelavo anna eredda yakene. Ana wananlobelela venjene arogora aba vina mamune Matthew. Arogora abale ahivulumuwa mbwenyi mamunaye ohikwa. Vamaromo, Ana wannivivuza akala arogora abale ahivulumuwa Yehova ohakamihedha. Akala Yehova ohakamihedha, okoddeleni onvulumutxa mamunaga? Iyo kanina mwaha wa ovuza evulumuwile arogora abale eli. Mbwenyi iyo ninoziwa wi Yehova onele ogomiha makattamiho otene annitabutxa, vina onofuna venjene wavenyiha akwaye akwile.—Job 14:15.
8. (a) Ninga enloga Izaiya 43:2, Yehova onnikamihedha dhavi? (b) Olobela onnikamihedha dhavi nigawanagana makattamiho? (Koona vidiyu Nlobelo Ninolibiha Omarho Wawo na Mulugu.)
8 Yehova onelege onikamihedha. Ninga Babi wokwela, Yehova kanziveliwa aganona nitabuwaga. (Iza. 63:9) Masiki dhawene, iyene kannibarela wi nihipattiwe makattamiho orutxa anladdanihiwa na minje vina motto. (Kengesa Izaiya 43:2.) Mbwenyi iyene onele onikamihedha “ovira” mmakattamihoni abo otene. Vina txipo kanarumele wi iyo nigweliwe makattamiho anagonele okala nokala-wene. Ottiya ejo iyene onivaha muya waye wokoddela wi niwodhe ovilela. (Lk. 11:13; Fil. 4:13) Nona ninokuluvela wi mudhidhi wotene ninele okana ejile ennijombela wi niwodhe ovilela vina ororomeleya vamentoni va Yehova.d
TXINI ENNIJEDHELANA YEHOVA?
9. Ninga enloga Tiago 1:6, 7, ninfwanyelelani okuluvela wi Yehova onele onikamihedha?
9 Yehova onjedhela wi nimukuluvele. (Aheb. 11:6) Masaka mena makattamiho ehu anokala manddimuwa ofiyedha wubuwela wi kaninawodhe ovilela. Ninodhaga waganyedha wi Yehova kananikamihedhe. Mbwenyi Bibilia ononaddela wi na guru dha Yehova enowodheya iyo owela mwango. (Masal. 18:29) Nona ottiya waganyedha akala Yehova onele onikamihedha, ninofwanyela olobela venjene na nroromelo, na nikuluvelo wi iyene onele wakula malobelo ehu.—Kengesa Tiago 1:6, 7.
10. Kavaha yotagiha ya okosa dhilobo mowiwanana na malobelo ehu.
10 Yehova onjedhela wi nikose dhilobo mowiwanana na malobelo ehu. Motagiha, txino mbali onokumbirha omabasani wi adhowe o kongresoni. Yehova agakulile dhavi? Agahinvaha guru mbali wi awodhe ologa na muzugu waye. Mbwenyi enofuneya mbali okosa mpaddi waye. Odhowa vali muzugu waye wi amukumbirhe. Obe egahifuneya omukumbirha mukwaye womabasani wi alabe vamburoni vaye iyene ageyela alabe. Egakala yofuneya iyene onele orumela muzugu waye ogwaddawo kobiri ya malabo abale anadhowiye omatugumanoni.
11. Ekalele nni yofuneya olobela na ntidi?
11 Yehova onjedhela wi nilobelelege dhilobo esile dhinona iyo wi samakamaka wa iyo. (1 Tes. 5:17) Yezu ohoniha wi malobelo mena ankosihu kagakuliwe momaguva. (Lk. 11:9) Nona kulemena olobela! Kalobelaga na murima wotene dila dhinjene. (Lk. 18:1-7) Nigakalela ntidi olobela nikumbiraga elobo, Yehova onele wona wi yokumbirha enkosihu jamakamaka vaddiddi wa iyo ottiya ejo ninowoniha wi nihikana nroromelo vina iyene onele onikamihedha.
ENKALELANI YOFUNEYA DIILA DHINA OTXINJA DHOLOBA DHEHU?
12. (a) Mavuzo gani anfwanyelihu ovikosa sabwa ya dholoba dhehu, nanda sabwaya jani? (b) Ninalagihe dhavi wi ninomuriha Yehova nigalobelaga? (Koona kasha “Malobelo Aga Anowoniha wi Ddinomuriha Yehova?”)
12 Akala ejile enimukumbirhihu Yehova munlobeloni kimpadduwa nivikose mavuzo mararu. Noroma, ‘Enkumbirha miyo elobo yofwanyelela?’ Dila dhina ninodhaga wubuwela wi enkumbirha iyo elobo yamakamaka. Mbwenyi txino yoloba yehu enodhaga okala yamakamaka mwa mudhidhi mung’onovi. Akala ninolobelela ogoma wa makattamiho, enodhaga woneya wi ehikalawo elobo yamakamaka egadhile ogomiha makattamihoya opitta ejile enkumbirhehu. Txino dhilobo dhinji dhinimuloba iyo Yehova kadhiniwanana na efunelo yaye. (1 Jo. 5:14) Kobuwela yotagiha ya amambali abale alogiwe ddima yoroma. Awene ahimukumbirha Yehova wi amukamihedhe mwaniwa okalavi mwibaribarini. Enkala ninga kavali elobo yabure na yokumbirha eji. Mbwenyi Yehova txipo kanammagelele muttu omulabela. Iyene onfuna wi iyo notene vamodha na anihu nisakule omulabela. (Olib. 10:12, 13; 30:19, 20) Nona ottiya omuloba Yehova wi amukamihedhe mwaniwa okalavi mwibaribarini, amambali anofwanyela omuloba Yehova wi addiginye mirima dhawa, attukuleleye omukwela Yehova vina okala amarho Aye.—Gano 22:6; Ef. 6:4.
13. Mowiwanana na Ahebreu 4:16, mudhidhi gani onanikamihedhe Yehova? Katapulela.
13 Nivuzo nanawili ninfwanyelihu ovikosa ttintti, ‘Koddi obu mudhidhi wofwanyelela wi Yehova addivahe ejile enkumbirhimi?’ Txino onodhaga wubuwela wi yoloba yawo enofwanyela wakuliwa momaguva. Mbwenyi, mwebaribari Yehova onoziwa mudhidhi wofwanyelela wi anikamihedhe. (Kengesa Ahebreu 4:16.) Dholoba dhehu dhigahakuliwe ninofwanyela wubuwela wi yowakula ya Yehova ‘jijuwene.’ Mbwenyi dila dhina txino yowakula ya Yehova jawi ‘Nijedhelege.’ Motagiha, kamubuwele muzombwe oddule walobela wi Yehova anvulumutxe. Yehova kokosa matikiniho nanda bavulumuwa, Satana agalogile wi muzombwe oddule owodhile omulabela Yehova sabwa ya ovulumuwa. (Job 1:9-11; 2:4) Ottiya ejo Yehova ohipikirhela wi musogorho mpo attu otene anele ovulumutxiwa viredda dhawa. (Iza. 33:24; Ovuh. 21:3, 4) Nijedhaga ofiya wa siku ntto, kanijedhe matikiniho a ovulumutxiwa wa viredda dhehu. Txino mbali oddo agahimukumbirha Yehova guru vina murenddele wa muyubuweloni wi adhowegevi avilelaga vina masiki bali muredda amulabelege Yehova nororomeleya.—Masal. 29:11.
14. Txini esunzile weyo na yotagiha ya Janice?
14 Weyo onomubuwela Janice, walobela na efunelo ya okamihedha o Beteli. Dhihivira vyaka tanu iyene ahiwodhile ononelamo mukalelo wakulile Yehova nlobelo naye. Iyene ohiloga dhahi: “Vyaka esi dhotene Yehova ohiddikamihedha vina ohiddisunziha okala mukristu waderetu. Miyo ddanfwanyela omukuluvela venjene iyene. Ddanfwanyela wunuwiha mukalelo wakosa miyo nsunzo nomwinya. Vina ddihisunza wi wagalala kunda sabwa ya mburo onimulabelihu Yehova.” Mwa ovira wa mudhidhi Janice na mamunaye ahikumbirhiwa wi alabe ninga anameddelela milogo. Atanalelaga dhipadduwile, Janice ohiloga dhahi: “Ndde Yehova ohakula malobelo aga, kahiye na mukalelo wajedhela miyo. Vahivira mudhidhi mwinjene mpaka miyo ozinddiyela wi yowakula ya Yehova yali nvaho wokoddela vaddiddi oddivahiliye, miyo ddinotamalela venjene sabwa ya wona okwela na opama wa Yehova.”
Akala onubuwela wi Yehova kanakula malobelo awo kalobela okumbirhaga dhilobo dhina (Kang’ana ddima 15)f
15. Sabwaya jani kaninfwanyela odidela okumbirha elobo modha? (Koona vina mafoto.)
15 Nivuzo nanoraru, ‘Egahikala yapama okumbirha elobo yina?’ Masiki valani elobo yaderetu ologa ejile enfunihu txibarene mmalobeloni ehu, enokala yapama ozinddiyela ennifunana Yehova ehili odidela olobaga elobo modhene. Katanalela yotagiha ya murogora wa muziye walobela akumbiraga okosa Eskola ya Anamalaleya a Omwene. Iyene afuna akose eskola wi awodhe okamihedha venjene wego wafuneya anamalaleya. Mudhidhi walobeliye oku ajedhelaga okuweliwa wi akose eskola, egahikala yapama omuloba Yehova wi amukamihedhe okana mikalelo dhina wi onuwihe mabasa aye a olaleya. (Mer. 16:9, 10) Dhahene agahikosa elobo mowiwanana na nlobelo naye mwa omuloba nameddelela milogo akala wahikalawo mulogo wafuneya apionero wi adhowe akamihedhe. Obe iyene agahilebela o beteli avuzedha akala ohikalawo murudda onjombeliwa anamalaleya a Omwene.e
16. Ninfwanyela okana nikuluvelo gani?
16 Ninga mumalelihu wona, nikane nikuluvelo wi Yehova onele wakula malobelo ehu nokwela vina noligana. (Masal. 4:3; Iza. 30:18) Dila dhina kaninakuliwe ninga mwafunelihu. Mbwenyi Yehova txipo kanapwaze malobelo ehu. Iyene ononikwela vaddiddi. Vina txipo kananinyanyale. (Masal. 9:10) Odhowegevi omukuluvelaga Yehova mudhidhi wotene vina modhela nlobelo omwaddelege dhili mmurimani mwawo.—Masal. 62:8.
JIBO 43 Nlobelo Notamalela
a Nsunzo ntti ninele onikamihedha ononelamo sabwaya enfwanyelihu okuluvela wi Yehova onele wakula malobelo ehu na okwela vina na oligana.
b Mazina mena ahitxinjiwa.
c Koona nsunzo “Onokuluvela Makalelo Ankosa Yehova Dhilobo?” Mwang’aneli wa Feverero 2022 ddima 3-6.
d Wi oziwe mukalelo mwina onnikamihedha Yehova ovilela makattamiho orutxa, koona vidiyu Nlobelo Ninolibiha Omarho Wawo na Mulugu mu jw.org.
e Wi oziwe mukalelo woviperheka wi wakamihedhe mabasa ankosiwa filiali ya elabo yina, koona nivuru Organizados Para Fazer a Vontade de Jeová, kapitulu 10, ddima 6-9.
f FOTO: Arogora eli alobelaga ahinatti ottikitta petisau ya okosa Eskola ya Anamalaleya a Omwene. Murogora mmodha onowobiwa, mwina kawobiwe. Ottiya onyimuwa, murogora ohiwobiwe onomulobelela Yehova wi awodhe woona mikalelo dhina dhowunuwiha mabasa aye a olaleya. Onolebela karta o filiali, ya ovilevela okamihedha onfuneya anamalaleya.