Johan Pakhatnak

4 Ka dawtle hna, Pathian sinin rat dawh a lomi bia paoh kha zum hlah u, Pathian sinin a ra taktakmi a si le si lo va hneksak u. Zeicahtiah profet deu tampi cu vawleicung ah an chuak cang.

2 Pathian sinin a rami bia a si le si lo hitihin nan hngalh khawh: Jesuh Khrih cu minung pakhat in a ra ti a cohlangmi bia paohpaoh cu Pathian sinin a rami a si. 3 Jesuh a cohlang lomi bia paohpaoh cu Pathian sinin a rami a si lo. Cun Khrih ralchanhtu* nih cu bantuk bia cu a chim lai ti kha nan rak theih cang i atu ah hi vawleicung ah a chim cang.

4 Ka fale hna, nannih cu Pathian lei ah a ṭangmi nan si i profet deu kha nan tei cang hna. Nanmah he lungthin khat tein a ummi Pathian cu vawlei he lungthin khat tein a ummi Satan nakin a ṭhawng deuh. 5 Annih cu vawlei lei ah a ṭangmi an si caah vawlei he aa tlaimi bia kha an chim i vawlei nih an bia cu a ngaih. 6 Kannih cu Pathian lei ah a ṭangmi kan si. Pathian a hngalmi nih cun kan bia kha an ngaih; Pathian lei ah a ṭang lomi nih cun kan bia kha an ngai lo. Cuticun a hmaanmi bia le a hmaan lomi bia kha kan thleidan khawh.

7 Ka dawtle hna, pakhat le pakhat i daw peng hna u sih. Zeicahtiah dawtnak cu Pathian sinin a rami a si, dawtnak a ngeimi cu Pathian fa a si i Pathian kha a hngalh. 8 Dawtnak a ngei lomi nih cun Pathian kha a hngal lo, zeicahtiah Pathian cu dawtnak a si. 9 Pathian dawtnak cu kan sinah hitin langhter a si: Pathian nih a Fapa ngeihchunhte kha hi vawleicung ah a run thlah. Cuticun a Fapa thawng in zungzal nunnak kan hmu kho. 10 Pathian nih kan sualnak caah sual thawinak in a Fapa kha a rak thlah. Pathian nih cutin a tuahmi cu kanmah nih kan dawt caah si loin amah nih a kan dawt caah a si.

11 Ka dawtle hna, Pathian nih cu tluk in a kan dawt ahcun kannih zong pakhat le pakhat i dawt awkah rian kan ngei ve. 12 Ahohmanh nih Pathian cu an hmu bal lo. Asinain pakhat le pakhat kan i dawt peng ahcun Pathian cu kan sinah a um zungzal lai i a dawtnak cu kan chung ah a tling lai. 13 Pathian nih thiang thlarau a kan pek caah amah he lungthin khat tein kan um i amah zong kanmah he lungthin khat tein a um ti kha kan hngalh. 14 Mah leng ah Pa nih a Fapa kha vawlei khamhtu in a rak thlah ti kha kanmah theng nih kan hmuh i tehte kan khaan. 15 Jesuh cu Pathian Fapa a si ti a cohlangmi cu Pathian he lungthin khat tein a um i Pathian zong amah he lungthin khat tein a um ve. 16 Pathian nih a kan dawt ti kha kan hngalh i kan zumh.

Pathian cu dawtnak a si i dawtnak ah a hmunmi cu Pathian he lungthin khat tein a um i Pathian zong amah he lungthin khat tein a um ve. 17 Cucaah dawtnak cu kan chung ah tlinter a si. Cuticun biaceihnak ni ah zalong tein biachimnak nawl* kan ngei kho lai. Zeicahtiah hi vawleicung ah kanmah hrimhrim hi Khrih bantuk kan si. 18 Dawtnak ah cun ṭihnak a um lo, asinain dawtnak tling nih ṭihnak kha a hloh. Zeicahtiah ṭihnak cu kan caah dawnkhantu a si. Ṭihnak a ngeimi cu dawtnak tling a ngei rih lo. 19 Dawtnak kan langhtermi cu Pathian nih a kan dawt hmasa caah a si.

20 Pakhatkhat nih “Pathian cu ka dawt” tiah a ti nain a unau a huat ahcun mi lihchim a si. Zeicahtiah a hmuhmi a unau kha a dawt lo ahcun a hmuh lomi Pathian cu a daw kho lai lo. 21 A sinin kan hmuhmi nawlbia cu hihi a si, Pathian a dawmi nih cun a unau kha a dawt awk a si.