Mifim Bantukin Um
1 Jesuh nih ngatlai pali kha a hnu zulh awk a auh tik hna ah i cungcang loin “chikkhat te ah . . . an zulh.” (Matt. 4:18-22) Tarsas khuami Saul zong biaknak aa tlen i a mit khua a hmuh ṭhan hnu ah “pumhnak inn ah khan i cungcang loin a va kal i, ‘Jesuh cu Pathian Fapa a si,’ tiah a chimh hna.” (Lam. 9:20) A caan cu a liam thluahmah i a liam cia caan kha zeitikhmanh ah hmuh khawh a si ti lo. Cucaah a caan hman ning he aa tlai in “mifim bantukin um” cu a biapi tuk.—Efe. 5:15, 16.
2 Hmuhchung Khawh Lomi Thil Sining: Jehovah rianṭuan awkah nihin ah kan hmuhmi caan ṭha hi thaizing ah hmuh khawh a si ti lo. (Jeim. 4:14) ‘Hmuhchung khawh lomi thil sining’ hna hin ahohmanh luat khawh a si lo. (Pct. 9:11, NW) Cun hi chan ṭha lo ah kan dihlak in Jehovah rian tling tein ṭuan khawh lo caan “ni ṭha lo hna an phak” tik tar caan zong hrial khawh a si lo. (Pct. 12:1) Cucaah Pa-thian sin pumpeknak tuah asiloah phungchimnak rian a si khawh chung karhter awk caah i relrem tik caan hngah cu fim a si lo. (Luka 9:59-62) Abraham nih a nunnak kha Jehovah sinah lungthin dihlak in a pek caah “chan tling cikcek in a nun” hnu ah a thi.—Gen. 25:8.
3 Caan Hi Tampi A Taang Ti Lo: “Caan hi tampi a tang ti lo” i cucaah a caan kha fim ngai in hman kan duh. (1 Kor. 7:29-31) A rauh hlan ah hi chan ṭha lo a dong cang lai. ‘Vawlei cung rawl ṭuan’ caan chungah tuu bantuk mi hna pumhnak rian ṭuannak caan ṭha cu a dih cang lai. (Biat. 14:15) Cucaah khuasak tintuk harnak lawng ruah le lung vaivuanhtertu thil hna nih phungchimnak rian ah hman hngami a caan kha chuh lo awkah kan i ralring lai. (Luka 21:34, 35) A luancia kong ruah tikah rawl ṭuannak rian ah tling tein kan i tel timi hngalh-nak nih lungsinak a kan ngeih-ter lai.
4 Pathian rian ah hmuh khawh-mi lunglawmhnak tinvo kha sungh lo awkah kan i ralrin zungzal awk a si. “‘Nihin’ a timi kha nan caah nihin a si chung paoh” cu Jehovah rian kha a si khawh chung ṭuan awkah biakhiak hna u sih. (Heb. 3:13) Cu ti tuahnak thawngin mifim bantukin kan um kan langhter khawh lai. Zeicahtiah “Pathian duhnak a tuahmi cu zungzal in an nung.”—1 Johan 2:17.