Pennak Ruahchannak Kong Kan Chimh Hna
1 Hi harnak caan chungah mi tampi cu ruahchannak ngei lo in an um. (Efe. 2:12) A cheu nih thilri chawva, uktu bawi hna, chan thar science fimnak tibantuk kha ruahnak ngei loin an i bochan. Kannih cu hmailei ah a hmaanmi ruahchannak, “kan nunnak caah a fekmi le a ṭhawngmi thir cangai bantuk” a simi ruahchannak kan ngeih caah lunglawmh awk ngai a si!—Heb. 6:19.
2 Pathian Pennak tangah vawlei cu paradis a si cang lai. Kan dawtmi a thimi hna zong an thoṭhan lai. (Lam. 24:15) Sifahnak, din lonak, zawtnak, tarnak le thihnak a um ti lai lo. (Salm 9:18; Matt. 12:20, 21; Biat. 21:3, 4) Mah cucu a rauh hlan ah a tling cang laimi Jehovah biakam cheukhat an si. Mah vialte ah zei kha dah a hlei in naa ruahchan?
3 Thawngṭha Kha Chim: Pennak ruahchannak kha kanmah ca lawngah kan i chiah lo. Pa-thian le innpa kan dawt hnanak nih Jesuh kha i zohchunh awk le ‘sifakmi hna sin i Thawngṭha chim awkah saltangmi hna sin i luatnak thanh awkah le mitcaw mi hna sin i khuahmuh ṭhannak pek awk le hremmi hna luatter dingah khan’ a kan forh. (Luka 4:18) Lamkaltu Paul cu chawdawr le mi an umnak hmun paoh ah thawngṭha bia kha a rak chim. A caan kha a dihlak in phungchimnak ah khan a hman. (Lam. 18:5) Phungchimnak ah teimak chuah in a ṭuanmi Paul zohchunhawk ṭha zulh-nak nih “vawlei cung nunnak le lung retheihnak le chawva [“hlennak,” NW]” hna in Khrihfa ruahchannak kha mawtter lo awkah a kham khawh lai.—Mar. 4:19.
4 Pennak kong thawngṭha a duh lomi le a ralchanmi hna he kan i ton hmanh ah Pennak ruahchannak cu a maw hlei lo. “Kan i ruahchanmi cu fekte in” kan i tlaih peng ko. (Heb. 10:23) Cun ‘thawng ṭha cu kan zahpi lo.’ (Rom 1:16, NW) Fek tein kan zumhnak le kan teimaknak nih a donghnak ah mi cheukhat kha ngaih awkah a forh men hna lai.
5 Baibal chimchung bia tlinnak a simi vawlei cung ṭhat lo-nak kong ah lungthin pek cu aa tlak ko nain thawng chia a chimtu kan si lo. Mah nakcha cun kan phungchimnak cu Pa-thian Pennak kong thawng ṭha a simi Pennak ruahchannak cung-ah lungthin pekter a si. ‘Kan i ruahchanmi cu a tlin nakhnga, a dongh tiangin’ thawng ṭha kha fekte in zumhnak le teimak chuah in thanh hna u sih.—Heb. 6:11.