Nawl A Ngaimi Hna Kha Jehovah Nih Thluachuah A Pek Hna I A Huhphenh Hna
“Sihmanhsehlaw ka bia a ngaimi cu him tein an um lai i vanchiatnak zeihmanh ṭih lo in, zalawng tein an um lai.”—PHUNGTHLUKBIA 1:33.
1, 2. Zeiruang ahdah Pathian a nawl ngaih cu biapi a si? Tahchunhnak pe.
AHMUL a chahmi, a aihremi arkeuh ka tete hna cu an cungah mupi aa hel len kha an hmu hrimhrim lo i, ram lak i rawl a ummi kha i manh lo ngai in an cuk. An nu arpi cu a aw ther nawn pi in, aw sangpi in hmakkhat te ah khin ralrin peknak ah a kio hnawh hna i a thla kha a hun samh. A fale cu a sinah an rak le i, a thla tangah cun himte in an i thup. Mupi nih a pelnak cu a ngol.a Kan i cawn awk zeidah a um? Nawlngaihnak nih nunnak a khamh!
2 Nihin Khrihfa hna caah hi kong cu a hlei in a biapimi a si, zeitintiah Pathian minung hna kha Satan nih a thazang dihumnak in doh awkah aa zuam. (Biathlam 12:9, 12, 17) A hmuitinhnak cu Jehovah mithmai ṭha le zungzal nunnak kan sungh nakhnga kan thlarau lei kha hrawh awk caah a si. (1 Piter 5:8) Asinain, Pathian kha kan naih i a Bia le a bupi hmangin kan hmuhmi lamhruainak kha rianrang tein kan lehrulh ve a si ahcuh, a huhphenhnak cu kan hmu hrimhrim ko lai. “A thla in an huh lai i himte in na um lai” tiah salm caṭialtu nih a rak ṭial.—Salm 91:4.
Nawl A Ngai Lomi Miphun Cu Tlaih An Si
3. Israelmi hna i atu le atu an nawl ngaih lonak a phi chuak cu zeidah a si?
3 Israel miphun nih Jehovah a nawl an rak ngaih tikah, Pathian zohkhenhnak inkhan ṭhathnemnak a hmaan tein an rak hmu peng. Asinain, an Sertu kha an rak kaltak ṭheu tawn i ‘pakpalawng thil kha pial hnawh in ṭhathnemnak zong a pe kho hna loin a khamh zong a khamh kho lomi,’—thing le lung pathian hna leiah khan an rak i mer. (1 Samuel 12:21) Cubantuk in kum zabu tampi ralchannak an tuah hnu ahkhan, remh ṭhan khawh ti lo an si caah an miphun ningpi in zumhpialnak ah an i hnim cikcek. Cucaah, Jesuh nih hitin ṭahhla a rak lawh hna: “Maw Jerusalem, Jerusalem, Profet kha na rak thah hna i nangmah sinah Pathian nih a run thlahmi hna lamkaltu hna kha lung in na rak den hna. Arpi nih a fale cu a thla tangah a huh hna bantuk in na fale cu voi zeizat dik ka kut in huh ka timh hna i an duh lo. Atu cu na inn cu kin taktak in a king cang lai.”—Matthai 23:37, 38.
4. C.E. 70 ah Jerusalem mi hna kha Jehovah nih a rak hlawt hna tikha zeitindah a rak langh?
4 An zumhnak a kaltakmi Israelmi kha Jehovah nih a rak hlawt hnanak cu C.E. 70 ah ngaihchia awk tlak ngai in a rak lang. Mah kum ah khan, Rom ralkap hna nih mupi hmanthlak an hmelchunhmi an thanzar hna kha an i tlaih i, Jerusalem kha ṭih a nungmi tukthahnak in an hun zuan hnawh hna. Mah lio ahcun an khuapi cu Lanhtak puai tuah in mi an i but saling a rak si. An khanghthawinak tampi cu Pathian mithmai ṭha kha a rak hmuh lo. Hi cu nawl a rak ngai lomi Siangpahrang Saul sinah Sameul i ngaihchiat awk ralrin peknak bia kha a hngalhter ṭhantu a rak si: “BAWIPA nih hin BAWIPA aw zulhnak i lawmhnak ngan a ngeih tluk hin maw, Khanghthawinak le raithawinak ah hin lawmhnak a ngeih ve? Zohhmanh, nawlngaihnak hi raithawinak nakin a ṭha deuh i amah bia ngaih hi tukawng hna thau nakin a ṭha deuh.”—1 Samuel 15:22.
5. Zeibantuk phun nawlngaihnak khadah Jehovah nih a halmi a si i, cubantuk nawlngaihnak cu a si khomi a si tikha zeitindah kan hngalh?
5 Nawlngaihnak kha fakpi in a hal ko hna nain, Jehovah cu a tling lomi minung i chamhbaunak kha ṭha tein a hngalmi a si. (Salm 130:3, 4) Zumhnak, dawtnak le amah lung a lawmhtermi ṭihzahnak cungah aa hngatmi a hmaanmi lungthin le nawlngaihnak kha a halmi cu an si. (Deuteronomi 10:12, 13; Phungthlukbia 16:6; Isaiah 43:10; Mikah 6:8; Rom 6:17) Cubantuk nawlngaihnak hna cu langhter khawh a si tikha thihnak tiang hmanh a simi, ṭih a nungmi hneksaknak hna kha an ton tikah an zumhfehnak kha aa rak i tlaihmi, ‘Khrihfa chan hlan i a nganmi tehte bu,’ nih an rak langhter. (Hebru 11:36, 37; 12:1) Hi hna nih hin Jehovah kha a lung an rak lawmhter taktak! (Phungthlukbia 27:11) Asinain, adang cu a hramthawk ahcun zumh awk tlak an rak si ko nain an nawlngaihnak lam ah khan an rak hmun peng lo. Hi hna lakah pakhat cu hlanlio Judah Siangpahrang Joash kha a rak si.
Hawikom Ṭhalo ruangah a Rak Rawkmi Siangpahrang Pakhat
6, 7. Jehoiada a rak nun lio ah Joash cu zeibantuk phun siangpahrang dah a rak si?
6 Siangpahrang Joash cu bawhkeuh a rak si lio ah thahnak in a rak luat fangfang a si. Joash cu kum sarih a rak si tikah, Tlangbawi Ngan Jehoiada nih a rak thuhnak inkhan a rak chuah i ralṭha ngai in siangpahrang ah a rak ser. Pathian a ṭihmi Jehoiada cu Joash i a pa bantuk le ruahnak cheutu bantuk a rak si caah, hi mino te a simi bawi nih hin “BAWIPA mithmuh i a dikmi kha a tuah.”—2 Chanrelnak 22:10–23:1, 11; 24:1, 2.
7 Thil ṭha a rak tuahmi lakah ‘Joash nih aa timhmi’—Jehovah biakinn a thar in remhnak kha aa tel. Remhṭhannak rian i tangka hmuh nakhnga caah, ‘Moseh nih nawl a rak pekmi hna,’ ningin, Judah le Jerusalem mi hna sinin ngunkhuai khawlh a herhnak kha Tlangbawi Ngan Jehoiada cu a rak theihter. A fiang tein, Jehoiada nih mino te a simi siangpahrang kha Pathian a Nawlbia cawn awk le ngaih awkah tha a rak pek khawh. Cu ruangah cun, biakinn le biakinn thilri hna sernak rian cu chikkhat te ah an rak lim.—2 Chanrelnak 24:4, 6, 13, 14; Deuteronomi 17:18.
8. (a) Zeinihdah a bik in Joash kha thlarau lei in a zorchukter? (b) Siangpahrang i nawl ngaih lonak nih a donghnak ah zeidah a rak tuahter?
8 Ngaihchiat awk cu, Jehovah sin i Joash a nawlngaihnak cu a donghtiang a rak hmun lo. Zeiruang ahdah? Pathian Bia nih hitin a kan chimh: “Jehoiada thih hnu ah khan Judah ram bawi hna cu an ra i siangpahrang sinah cun upatnak an tuah i siangpahrang nih an bia cu a ngaih hna. Cun annih nih BAWIPA, an pupa hna Pathian inn kha an hlawt i Asherim le siasal kha an rian an ṭuan hna. Cun hi an mawhnak ruangah hin Judah le Jerusalem cungah thinhunnak a tlung.” Judah bawi hna i a ṭhalomi hruainak zongnih siangpahrang kha Pathian profet hna an bia a rak ngaihter lo, cu profet hna lakah pakhat cu nawl an ngaih lo caah Joash le mi hna kha ralṭha ngai in a rak mawhchiatmi, Jehoiada a fapa Zekhariah kha a si. I ngaihchih hlei loin, Joash nih Zekhariah kha lung in thi lakin a rak chehter hna. Joash cu zangfahnak a ngei lomi, nawl a ngai lomi ah a rak cang i—cu vialte cu hawikom ṭhalo nih fawi tein lam an hruai khawh caah a rak si ai!—2 Chanrelnak 24:17-22; 1 Korin 15:33.
9. Nawlngaihlonak a ṭhatlonak kha Joash le bawi hna i hmanung bik an sining nih zeitindah a langhter?
9 Jehovah kha a rak kaltaknak thawngin, Joash le a hawi le a simi bawi hna cungah zeidah a rak cang? “Mi tlawmte” lawnglawng a simi—Siria ralkap run pakhat nih khan—Judah cu an rak doh i “mi zapi i an bawi hna cu an thah hna.” A rak domi hna nih khan a pumpak thil lawng kha si lo in biakinn thiang chung i sui le ngun tibantuk hna zong kha pek awkah an rak hal. Joash cu a rak luat ko nain, a tha a thlep i zawtnak nih a rak tlak. Cu hnu tlawmpal ahkhan, amah a sal le lakin rawiphiartu hna nih khan an rak thah. (2 Chanrelnak 24:23-25; 2 Siangpahrang 12:17, 18) Israel mi hna sin i Jehovah nih hitin a rak chimmi bia cu a va hmaan dah: “Phungbia le nawlbia vialte kha felte in ulh awkah BAWIPA nan Pathian bia cu zeirel lo in nan um ahcun, hi chiatnak vialte hi nan cungah a tlung lai i an zulh hna lai”!—Deuteronomi 28:15.
Nawlngaihnak Nih A Rak Khamhmi Cazi Pakhat
10, 11. (a) Jehovah nih Baruk sinah ruahnak a cheuhmi kha ruahṭhan cu zeiruang ahdah bawmtu a si? (b) Jehovah nih Baruk kha zeitindah ruahnak a rak cheuh?
10 Khrihfa rian na ṭuannak ah thawngṭha hngalh a duhmi an tlawm tuk caah na tha a chia tawn maw? An khuasak a ṭhatmi le an nunning a nuamhning hna kha hngar in na um pah tawn maw? Cutin a si ahcun, Jeremiah i a cazi, Baruk kha Jehovah nih dawtnak he a rak cawnpiakmi kha ruat hmanh.
11 Baruk nih chimchung bia pakhat kha a rak ṭial cuahmah lio ah amah kha Jehovah nih a hlei in a rak zohkhenh a rak herh. Zeiruang ahdah? Baruk nih a nuncan kha a zang a rak fak i Pathian rian a ṭuannak tinvo ṭha nakin a dang a ṭha deuhmi tu kha a hun duh caah a si. Baruk a lungput aa thlenning kha zoh in, Jehovah nih a fiang i zangfahnak zong aa tel mi ruahnak cheuhnak kha hitin a rak pek: “Na caah thil lianngan kha na kawl hna. Sihmanhsehlaw cu kawl cu ngol ko hna, zeicahtiah mi vialte cungah rawhralnak kha ka tlunter lai, . . . nang cu na kalnak paoh ah kan nunter ko lai, sihmanhsehlaw na nunnak lawnglawng kha naa khamh kho lai i zeihmanh a dang na thil cu na chanh khawhmi an um lai lo.”—Jeremiah 36:4; 45:5.
12. Atu thil hna ningcang ah hin kan caah “thil liangngan” hna kawl kha zeiruang ahdah kan hrial awk a si?
12 Jeremiah he zumh awk tlak tein le ralṭha tein rian a rak ṭuanmi, hi miṭha pa caah Jehovah nih zawnruahnak A rak ngei taktak tikha Baruk sinah a chimmi bia ah hin na hmu kho maw? Cu bantuk in nihin ah, hi thil hna ningcang ah a ṭha deuhmi tiah an ruahmi thil kha zulh aa zuammi hna kongah Jehovah cu a thin a phang taktak ve. Baruk bantuk in, cubantuk minung tampi nih ṭuanvo a ngeimi thlarau lei unau hna nih dawtnak he an chimhhrinhnak kha an lehrulhmi cu lunglawmh awk a va si dah. (Luka 15:4-7) Asi, hi ningcang ah hin anmah caah “thil lianngan” a kawlmi hna caah hmailei ah zeihmanh a um lo tikha kan dihlak in hngalthiam hna u sih. Cubantuk mi hna nih a hmaanmi lunglawmhnak kha an sungh lawnglawng si lo in, a zual deuhmi cu, hi vawlei le a pumpak duhnak hna he hin a rauh hlan ah an liam ve lai.—Matthai 6:19, 20; 1 Johan 2:15-17.
13. Baruk a kong nih toidawrnak kong he aa tlai in zeidah a kan cawnpiak?
13 Baruk a konglam nih toidawrnak kong he aa tlaiin a kan cawnpiak. Jehovah nih Baruk kha amah theng nih deng teomeo tein chimh loin, Baruk a tlam a tlin lonak le a a chamhbaunak ṭha tein hngalh dawh a rak simi, Jeremiah kha hmangin a rak chawnh. (Jeremiah 45:1, 2) Asinain, Baruk cu i porhlawtnak a rak ngei lo; ruahnak a rak cheutu taktak cu—Jehovah a si tikha toidawr tein a rak hngalhthiam. (2 Chanrelnak 26:3, 4, 16; Phungthlukbia 18:12; 19:20) ‘Sualnak kan tuah sual’ i Pathian Bia in ruahnak cheuhnak kan hmuh a si ahcun, Baruk i patling a sinak, a thlarau lei hngalhthiamnak, le a toidawrnak kha i zohchunh hna u sih.—Galati 6:1.
14. Kanmah a kan hruaitu hna an nawl ngaih cu zeiruang ahdah a ṭhat?
14 Cubantuk kanmah lei in toidawrnak lungthin kan ngeihnak nih khan ruahnak a kan cheumi hna zong kha a bawmh hna lai. Hebru 13:17 nih hitin a ti: “Nan hruaitu pawl kha an bia ngai hna u law an nawl zul hna u. An rianṭuan ningcang kha Pathian hmai ah chim an duhte lai caah, i din lo in nannih kha an in zohkhenh hna. An nawl nan ngaih hna ahcun an rian kha lunglawm tein an ṭuan lai, nan ngaih hna lo ahcun ngaihchia in an um lai i cucu nan caah a ṭhahnem lai lo.” Khrihfa upa hna nih hi a har ngaimi an tuukhal rian kha a tlamtlinh khawh awkah a herhmi ralṭhatnak, fimnak le, thil ti thiamnak kha hal in Jehovah sinah an lungthin kha atu le atu an bungh i thla an cam lengmang tawn! “Anmah bantuk minung hi kan thangṭhat” hna lai.—1 Korin 16:18.
15. (a) Jeremiah nih Baruk cungah a zumhnak kha zeitindah a rak langhter? (b) Baruk cu toidawr tein nawl a ngaih caah zeitindah laksawng pek a rak si?
15 Baruk nih a khuaruahning aa remh ti cu a fiangtuk mi a si, zeitintiah Jeremiah nih a chim lioah amah theng nih a ṭialmi kha biakinn ah va kal in a thangpi in va rel ding a simi—a har bikmi rian pakhat kha Jeremiah nih a rak fial. Baruk nih nawl a rak ngai maw? A rak ngaih, “profet Jeremiah nih tuah awk i a fialmi vialte kha a tuah dih.” A ngai tein, Jerusalem i bawi hna sinah cu bantuk thawngpang va rel cu, ralṭhat taktak a hau ti cu a fiang ko. (Jeremiah 36:1-6, 8, 14, 15) Kum 18 a hun rauh i khuapi cu Babilon mi hna kuttang ah a tlak tikah, Jehovah ralrin peknak bia kha a rak zulh i amah caah “thil lianngan” hna kawlnak kha a rak ngol caah a rak luat tikah Baruk cu zeitluk indah aa lawmh hnga tikha ruat hmanh!—Jeremiah 39:1, 2, 11, 12; 43:6.
Kulh An Si Lioah Nawlngaihnak Nih An Nunnak A Rak Khamh
16. B.C.E. 607 ah Babilon mi hna nih an rak kulh hna lio ah khan Jehovah nih Judah mi hna cungah zangfahnak kha zeitindah a rak langhter?
16 B.C.E. 607 kum ah Jerusalem cu a rawh tikah, nawl a ngaimi hna cung i Pathian nih a ngeihmi zangfahnak cu a rak lang ṭhan. An rak kulh hna lingcing ah khan, Jehovah nih Judah mi hna sinah hitin a rak ti: “Zoh hmanh u, nunnak lam le thihnak lam i thim awkah kan pek hna. Hi khua chung i a taang mi paohpaoh cu vainam le mangṭham le rai in an thi lai; sihmanhsehlaw a chuak i aan kulhtu hna Khaldi mi hna sinah aa pemi cu an nung lai; a nunnak ceoceo tal cu aa luat pi lai.” (Jeremiah 21:8, 9) Jerusalem i a ummi hna cu hrawh awk tlak an si ko nain, Jehovah nih biapi ngaingai a simi, a donghnak caan ah khan amah a bia a ngaimi hna cungah zangfahnak kha a rak langhter.b
17. (a) Kulh a simi Judah mi hna nih ‘Khaldi mi hna sinah zaam awkah’ va chim dingin Jehovah nih Jeremiah kha a fial tikah Jeremiah caah a nawl ngaihnak cu zei lam pahnih indah hneksak a rak si? (b) Ral ṭha tein nawl a ngaimi Jeremiah a nunning in zeitindah ṭhathnemnak kan hmuh khawh?
17 Na ka tei cang ti in i pek awkah Judah mi hna va chimhnak nih Jeremiah a nawlngaihnak cu a rak hneksak ngaingai ko lai. A ruang pakhat cu, Pathian a min caah i zuamnak a rak ngei taktakmi a si. Teinak an hmuhmi cu nunnak a ngei lomi siasal ruangah a si tiah a ruatmi ral hna thawngin Pathian min nehsawh a si lai kha a rak duh hrimhrim lo. (Jeremiah 50:2, 11; Ṭahnak Hla 2:16) Mah lengah, na ka tei cang ti in i pek awkah a chimhnak nih, a nunnak kha harnak a pek khawh tikha a rak hngalh, zeitintiah mi tampi nih a bia kha hnahnawhnak a chuahtermi bia tiah an rak ruah ko lai. Asinain, a rak ṭih lo, Jehovah thawngthanhnak kha nawl ngai bu tein a rak thanh. (Jeremiah 38:4, 17, 18) Jeremiah bantuk in, kannih zong mi tampi nih an ngaih huam lomi thawngpang kha kan thanh ve. Mah nih khan Jesuh kha nautatnak a rak inter. (Isaiah 53:3; Matthai 24:9) Cucaah, ‘mi kha ṭih’ hna hlah u sih law, Jehovah kha i bochan taktak in, a bia tu kha ralṭha tein ngai hna u sih.—Phungthlukbia 29:25.
Gog Dohnak Ton lioah Nawlngaihnak
18. Jehovah a salle hna cu an nawl ngaihnak kha hmailei ah zeibantuk indah hneksal a si lai?
18 A rauhhlan ah, Satan i ningcang ṭhalo pumpi cu a fak bikmi “harnak nganpi” ah hrawh a si cang lai. (Matthai 24:21, NW) Mah hlan deuhte ah khan le mah caan lio ahkhan, Pathian a mi hna cu an zumhnak le nawl an ngaihnak cu fakpi in hneksak a si te lai. Tahchunhnak ah, Baibal nih ‘Magog ram i Gog’ in a langhtermi, Satan nih “vawlei a khuhtu khuadawm bantuk . . . rel cawk lomi ralkapbu nganpi” pakhat bantuk in Jehovah a salle kha a tha a dihumnak in a doh hna lai tiah a kan chim. (Ezekiel 38:2, 14-16) Pathian a mi hna cu an milu zong a tlawm deuh i hriamnam zong an ngeih lo caah, nawlngaimi hna a hup khotu, Jehovah a “thla” ah himnak hmuh awkah an kawl lai.
19, 20. (a) Israel mi hna Rili Sen ah an um lioah nawlngaihnak cu zeiruang ahdah a hlei in a biapi? (b) Rili Sen kong thlacam buin ṭha tein ruahnak nih nihin ah zeitindah a kan ṭhathnem khawh?
19 Hi thil sining nih Israel mi hna Izipt ram in an hun chuah lio kha a kan hngalhter ṭhan. Iziptmi hna kha rai pahra in a tuk hna hnu ah, Jehovah nih a mi hna kha Biakammi Ram ah lam a tawibiknak in a rak hruai hna lo, doh an si tikah fawi tein thuhnak an hmuh khawh lonak, Rili Sen lei tu in a rak hruai hna. Raldohnak mit in zoh ahcun, mah cu rawhnak a phaktermi tuahsernak a lo ko. Mahka ah cun rak um ve law, Moses hmangin a chimmi Jehovah a bia kha na rak ngai ve lai maw, Biakammi Ram cu kaa dang lei ah a um ti na hngalh ko bu in, Rili Sen lei ah cun na zawh ko lai maw?—Exodus 14:1-4.
20 Exodus angan 14 chung kha kan rel thluahmah tikah, Jehovah nih a mi hna kha khuaruahhar a simi a ṭhawnnak rak langhter in zeitindah a rak khamh hna tikha kan hmuh khawh. Cubantuk kong kha cawn in ruahṭhannak nih kan zumhnak kha a fehter taktak! (2 Piter 2:9) A fekmi zumhnak nih khan Jehovah a nawl kha ngaih awkah, a kan halmi cu minung ruahnak he aa ralchanh hmanh ah khan kan tha a kan ṭhawnter ṭhan. (Phungthlukbia 3:5, 6) Cucaah nangmah le nangmah kha hitin i hal hmanh, ‘Baibal kha i zuam ngai in cawnnak, thlacamnak le fakpi in ruahnak, cun Pathian a mi hna he a hmaan tein i pehtlaihnak hna hmangin ka zumhnak kha fehter awkah kaa zuam maw?’—Hebru 10:24, 25; 12:1-3.
Nawlngaihnak Nih Ruahchannak A Ngeihter
21. Atu ah le hmailei ah zeibantuk thluachuahnak hnadah Jehovah a bia a ngaimi hna nih an hmuh lai?
21 Jehovah a nawl a ngaimi hna nih Phungthlukbia 1:33 i hitin a chimmi a tlinnak kha a tu hmanh ah an nunnak lam ah an ton: “Sihmanhsehlaw ka bia a ngaimi cu him tein an um lai i vanchiatnak zeihmanh ṭih lo in, zalong tein an um lai.” A ra liomi Jehovah i teirul cham ni ah hi bia hna cu hnangamnak a pemi an si taktak lai! A ngai tein, Jesuh nih a zultu hna kha hitin a rak ti hna: “Mah hi vialte hi um hram aa thawk tikah dir u law cunglei kha zoh tuah u, zeicahtiah nan luatnak cu a nai cang.” (Luka 21:28) A fiangte in, Pathian a bia a ngaimi hna lawnglawng nih mah bia hna kha zumhfek tein an zulh lai.—Matthai 7:21.
22. (a) Jehovah a mi hna nih zumhfehnak ngeih awkah zeibantuk a konglam hnadah an ngeih? (b) A hun zulmi capar ah zei kong hnadah kan i ruah hna lai?
22 A dang zumhfehnak ngeih khawhnak a kong pakhat cu “BAWIPA PATHIAN nih aa tinhmi kha a sal profet hna theihter hmasa lo in zeihmanh a tuah bal lo.” (Amos 3:7) Nihin ah, Jehovah nih a hlan lio bantuk in profet hna kha thaw a chuah ti hna lo, mah nakin, A innchungkhat mi kha amah le a caante ah thlarau rawl kha pek awkah zumh awk a tlakmi sal kha a fial cang hna. (Matthai 24:45-47) Cucaah, mah “sal” hna an bia ngaihduhnak lungput cu zeitluk biapi dah a si! A hun zulmi capar nih a langhter te lai bantuk in, cu bantuk nawlngaihnak nih mah ‘sal hna’ i an bawipa, Jesuh cungah kan lungput zong kha a langhter. Amah cu “miphun hna i nawlngaihnak cu a ta a si” hngadingmi pakhat a si.—Genesis 49:10, NW.
[A Tanglei Fianternak Hna]
a A ral a chiami in langhter ṭheu tawn a si ko nain, “arpi nu pakhat nih a fale kha harnak in huhphenh awkah thih ngamh in a doh lai,” tiah saram zohkhenhnakbu pakhat i cauk pakhat nih a ti.
b Jeremiah 38:19 nih Khaldi mi hna sinah “a zaam” i an nunnak cu a luat ko nain sal ah tlaih a simi Judah mi hna an um tikha a langhter. Jeremiah a bia ningin, na ka tei cang ti in i pekmi a si le si lo cu kan chim kho lo. Zei a si hmanh ah, an luatnak nih profet bia a hmaan ti a langhter.
Na Cinken Maw?
• Israel mi hna i a tu le atu nawl an ngaih lonak a phichuak cu zeidah a si?
• Siangpahrang Joash cu a ngakchia lio ah siseh, upa a si hnu ah siseh, a hawile nih zeitindah an hruai khawh?
• Baruk sinin zeidah kan i cawn khawh?
• Atu ningcang a donghnak a naih ko nain Jehovah a nawl a ngaimi hna cu zeiruang ahdah an ṭih a herh lo?
[Cahmai 7nak i Hmanthlak]