Mino Pawl Atu Ah Hin Nanmah An Sertu Kha Philh Hlah U

“Nan tlanval lioah hin nanmah an Sertu kha philh hlah u.”—PCT. 12:1.

1. Amah a biami mino a zumh hna kha Jehovah nih zeitindah a langhter?

JEHOVAH nih Khrihfa mino pawl kha a man a sungmi le zinglei dap bantukin mi a hrimhtermi in a hmuh hna. A Fapa cu “na ral kha na tuk” hna ni ah mino pawl nih “anmah lungtho tein an in chuahhnawh” lai tiah Pathian nih a rak chimchung. (Salm 110:3) Mah chimchungbia cu Pathian zei ah a rellomi, mah le mah aa dawmi, tangka a duh tukmi le nawl a ngai lomi tampi an um tik caan ah a tling dingmi a si. Asinain amah a biami mino pawl cu an i thleidang lai ti kha Jehovah nih a hngalh. Nannih mino pawl zeitluk in dah an zumh hna!

2. Jehovah hngalh timi ah zeidah aa tel?

² Mino nih Pathian kha nanmah an Sertu hna in nan philh lomi a hmuh tikah aa lawmh lai ning khi ruat hmanh u. (Pct. 12:1) Jehovah philh lo timi ah a kong lung chung-​ah um lawng a si lo. A duhnak tuah, a nawlbia le a phunglam hruainak nifate zulh tinak a si. Cun Jehovah kha kan ca ṭha bik a ruatmi in hngalh le i bochan ti zong a si. (Salm 37:3; Isa. 48:17, 18) Nangmah an Sertu cung-​ah cuticun na um maw?

‘Jehovah Kha Na Lung Chung Dihlak In I Bochan’

3, 4. Jehovah aa bochan kha Jesuh nih zeitindah a langhter, tuchan ah Jehovah i bochan cu zeicah a biapit?

³ Jehovah aa bochanmi lakah zohchunh awk ṭha bik cu Jesuh Khrih a si. “BAWIPA kha na lung chung dihlak in i bochan law Nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai” timi Ptb. 3:5, 6 ningin a nung. Tipil a in hnu tlawmpal ah Jesuh cu Satan nih a naih i vawlei nawlngeihnak le sunparnak cohlan awkah a lem. (Luka 4:3-13) Asinain a lem kho lo. “Rumnak le upatnak le nunsaunak” taktak cu ‘Jehovah ṭih le mi toi ah i dornak’ thawngin hmuh a si kha a hngalh.’—Ptb. 22:4.

⁴ Tuchan vawlei cu hakkauhnak le mah zawn lawng ruahnak nih a khuh. Cu bantuk pawngkam ah Jesuh nunning zulh cu fim a si. Nunnak lam bi cungin Jehovah salle thlak awkah Satan cu fak piin aa zuam lai ti kha hngal peng. Rawhnak ah a phanmi lam kau ah mikip an kal kha hmuh a duh. Amah kha i hlenter lai cih! Mah canah nangmah an Sertu kha philh lo awkah bia khiak. Amah kha tling tein i bochan law a rauh hlan ah hmuh hrimhrim dingmi “nunnak taktak” kha fek tein i tlaih.—1 Tim. 6:19.

Mino Pawl, Fim U!

5. Hi vawlei hmailei kongah zeitindah na um?

⁵ Sertu a philhlomi mino cu an ṭhirual dang nakin an fim deuh. (Salm 119:99, 100 rel.) Jehovah bantuk hmuhnak an ngei i a rauh hlan ah hi vawlei a loh cang lai kha ṭha tein an hngalh. Nannih mino pawl caan tawite nun chung hmanh ah ṭihphannak le lungretheihnak a tam chin lengmang kha nan hmuh ko lai. Sianginn a kai liomi na si ahcun thurhhnawmhnak, vawlei pumpi lumnak, thing hau dihnak le harnak dangdang kong kha na theih ko lai. Mi tampi cu cu kongah an lungre a thei ngaingai, asinain cu thil cu Satan vawlei donghnak hmelchunhnak ah aa telmi an si kha Jehovah Hngaltu lawng nih ṭha tein an hngalh.—Biat. 11:18.

6. Mino cheukhat cu zeitindah hlen an si?

⁶ Ngaihchiat awk cu Pathian salle mino cheukhat cu ralring tein an um ti lo i hi vawlei cu chikkhat te lawng a hmun cang lai ti kha an philh. (2 Pit. 3:3, 4) Mino a cheu cu hawi ṭhalo le hornak hmanthlak in sualnak ngan tuah awkah lem an si. (Ptb. 13:20) Donghnak caan a nai tukmi atu ah Pathian mithmai ṭha sungh cu ngaihchia a va si dah! B.C. 1473 ah Israel miphun Biakammi Ram an luh laite Moab nelrawn an riah lio ah a cangmi thil in fimnak i lak. Zeidah a rak cang?

Kawltung Phak Lai ah An Tlu

7, 8. (a) Moab nelrawn ah Satan nih zeidah a hman? (b) Tuchan ah Satan nih zei lam dah a hman?

⁷ Cu lioah Satan nih Israel mi kha biakammi ram coter a duh hna lo ti cu a fiang ko. Profet Balaam chiatserhnak hlawh a tlinlo hnu ah, Satan nih kha nak fimzer deuh in Jehovah thluachuah hmu tlak si lo dingin tuah aa zuam. Moab nu pawl hmang in a lem hna i cu lio ah Satan cu a zei maw zat tiang a hlawh a rak tling. Mi cu Moab fanu hna he hlawh an hlang i Baal pathian kha an hun biak! An ro sung, Biakammi Ram phak laite ah Israel mi 24,000 cu an rak thi. Zeitluk ngaihchia dah a si!—Nam. 25:1-3, 9.

⁸ Atu ah biakammi ram nakin a ṭha deuhmi vawlei thar kan phan deng cang. Hlan a tuah tawn bantukin Satan nih Pathian mi hna kha hrawh awkah nu le pa sualnak kha a hman ṭhan. Vawlei ziaza cu a ṭumchuk ngaingai, nu le pa sualnak cu thil sawhsawh a si cang i nu le nu, pa le pa sualnak cu mah duh thim awk ah an ruah. Khrihfa nu pakhat nih hitin a chim, “Nu le nu, pa le pa sualnak le ṭhitum loin nupa sualnak tuah cu Pathian hmai ah thil ṭhalo a si ti kha kan inn le Kingdom Hall lawng ah ka fale cu cawnpiak an si.”

9. Nungak tlangval saling ah zei thil dah a cang kho i mino pawl nih zeitindah tonghtham khawh a si?

⁹ Sertu a philh lomi mino nih cun nupa ih ṭinak cu nunnak le tefa ngeihnak caah tuahmi a sungmi laksawng a si kha an hngalh. Cucaah nupa ih ṭinak cu Pathian lamhruainak tangah nuva a simi lawng nih tuah ding a si. (Heb. 13:4) Asinain, nungak tlanval saling, nupa umṭi duhnak a ṭhawn lio le ruahnak a palh khawh lio caan ah thiang tein um cu a har ko lai. (1 Kor. 7:36) Na lung chungah aa dawhcah lomi thil a hung luh tikah zeidah na tuah khawh? A thiangmi thil lawng lungthin ah a um nakhnga lungtak in Jehovah sinah thlacam. Jehovah nih lungtak in a fuhmi hna kha an bia a ngaihpiak zungzal hna. (Luka 11:9-13 rel.) Thazang a pemi bia i ruahnak zong bawmtu a si kho.

Na Hmuitinh Kha Fim Tein Thim

10. Zei ruahnak ṭhalo dah hrial ding a si i zei biahalnak dah i hal khawh a si?

¹⁰ Vawlei mino pawl i sum loin an pumsa duh ningin an nunnak a ruang pakhat cu Pathian lamhruainak asiloah hmailei ruahchannak ṭha an ngeih lo caah a si. (Ptb. 29:18) ‘A nih salam men in a ni i puai tu a tuah . . . i zu a dingmi’ Pathian lamhruainak a zul ti lomi Isaiah chan i Israel mi hna he an i lo. (Isa. 22:13) Annih kha hngar can ah zumhfekmi hna caah Jehovah nih a chiahmi ruahchannak sung kha fakpi in ruah awk a si. Pathian sal mino pakhat na si ahcun vawlei thar kha lungtak in na hngak maw? Na hmai ah Jehovah nih an chiahpiakmi ‘ruahchannak’ na hngah lio ah “mah le mah aa uk khomi” si naa zuam maw? (Titas 2:12, 13) Na bialeh-​nak cu naa tinhmi le biapi na chiahmi cungah hmual a ngei lai.

11. Sianginn a kai liomi Khrihfa mino nih fimnak kha teima tein zeicah an cawn?

¹¹ Vawlei nih mino thazang kha aa tinhmi caah hman a duh. Sianginn a kai liomi hna nih a hrampi fimcawnnak thiam lakin cawn ding a si cu a hmaan ko. Asinain naa tinhmi cu rian ṭha hmuhnak lawng si loin khrihfabu caah man ngeimi, hmual ngei in phungchim khotu si awk a si. Cuti si khawh awkah ṭha tein bia a chim khomi, phung le lam ngei in khua a ruatmi, dai tein khua a tuak khomi le midang a upatmi si a herh. Zei ti a si hmanh ah Baibal a hlathlai i Baibal phunglam a nunnak ah hman aa zuammi mino cu a ṭha bik fimcawnnak an hmu i hlawh a tlingmi le zungzal in a hmunmi hmailei caah hram ṭha an domh.—Salm 1:1-3 rel.a

12. Khrihfa innchungkhar nih zei zohchunh awk dah i cawn ding a si?

¹² Israel ram ah nu le pa nih fale chimhmi fim cawnnak cu biapi bik a si. Mah fim cawnnak cu nunnak kap dihlak, a hleiin thlarau lei ah man a ngei. (Deut. 6:6, 7) Cucaah nu le pa le Pathian a ṭihmi tar pawl bia a ngaimi Israel mino pawl cu hngalhnak an ngeih lengah fimnak, thleidan thiamnak, hngalhthiamnak le khuaruah khawhnak zong an ngei. Cucu Pathian pekmi fim cawnnak in hmuhmi a ṭha ngaingaimi sining an si. (Ptb. 1:2-4; 2:1-5, 11-15) Nihin Khrihfa innchungkhar nih fim cawnnak kha cu bantuk cun biapi ah chiah ding a si.

An Dawmi Hna Bia Kha Ngai

13. Zei bantuk ruahnak cheuhnak dah mino nih an hmuh, zeicah an i ralrin awk a si?

¹³ Vawlei cungah hlawhtlinnak hmuh khawhnak kong lawng ruahnak a pe tawnmi sianginn ruahnak cheutu pawl tel in miphun zakip sinin ruahnak cheuhnak kha mino nih an hmuh. Zaangfahnak in mah ruahnak cheuhnak vialte kha Pathian Bia le zumhawk a tlakmi le a fimmi sal timhpiakmi cauk bawmhnak in thlacam law tuak. Baibal na hlathlainak in mino le hmuhtonnak a tlawm-​mi pawl kha Satan nih a hmuitinh ah a chiah hna kha na hngalh. Tahchunhnak ah Eden dum ah a hmuhtonnak a tlawmmi Evi nih a cungah dawtnak a langhter bal lomi mising, Satan bia a rak ngaih. Lam phunphun in a dawtnak a langhtermi Jehovah bia kha rak ngai sehlaw a phi chuak aa thleidang tuk lai!—Gen. 3:1-6.

14. Jehovah le zumtu nu le pa bia kha zeicah ngaih ding a si?

¹⁴ An Sertu nih an dawt i mah dawtnak cu a thiang i a tling. Atu lawng si loin zungzal in i nuam seh ti an duh! Cucaah ṭha tein mi a zohkhenhmi pa bantukin nangmah le amah a biami vialte kha “lam cu hika leiah hin a si. Lam kha zul u” tiah a kan ti. (Isa. 30:21) Jehovah a daw taktakmi nu le pa na ngeih ahcun cucu thluachuah phun khat na hmuh chapmi a si. Hmasa chiah ding le zei i tinh ding kongah ruahnak an in cheuhmi kha upatnak in ngai. (Ptb. 1:8, 9) Mah lengah hi vawlei rumnak le upatnak nakin man a ngei deuh suaumaumi nunnak kha hmuhter an in duh.—Matt. 16:26.

15, 16. (a) Zei caah dah Jehovah kha fek tein kan zumh khawh? (b) Baruk tonmi in zei a biapimi fimnak dah kan i lak khawh?

¹⁵ Sertu a philh lomi cu sawhsawh tein an nung i Jehovah nih a kan “kaltak bal” lai lo ti le a kan “hlaw” lai lo ti kha an zumh. (Hebru 13:5 rel.) Man ngeimi lungput cu hi vawlei ruahnak he aa dan caah vawlei ruahnak nih a kan khuh nakhnga lo ralrin ding a si. (Efe. 2:2) Mah kong he aa tlai in Jeremiah chungṭuan Baruk kong kha ruat hmanh, B.C. 607 i Jerusalem khua a rawh hlan caan a har lio ah a rak nungmi a si.

¹⁶ Baruk cu thilri chawva he nuam ngai in nun a rak duh men lai. Mah kha Jehovah nih a hmuh tikah “thil lianngan” kawl ti lo awkah zaangfahnak he ralrin a pek. Jehovah bia a ngaih i Jerusalem rawhnak in a luat caah Baruk nih toidormi le mifim a si kha a langhter. (Jer. 45:2-5) Phundang cun “thil lianngan” a kawl i Jehovah kha hnu ah a chiami Baruk a chankhat mi pawl cu babilon mi hna kut in an ngeihmi vialte an sung dih. Cu lengah mi tampi cu an thi. (2 Chan. 36:15-18) Baruk tonmi nih Pathian he a ṭhami pehtlaihnak cu hi vawlei rumnak le minthannak nakin a biapit deuh kha hngalh awkah a kan bawmh.

Zohchunhawk Ṭha Bik Kha Zoh

17. Jesuh, Paul le Timote cu tuchan Jehovah salle caah zeicah zohchunhawk ṭha an si?

¹⁷ Zohchunhawk ṭha tampi a kan peknak thawngin nunnak lam cung kal awkah Baibal nih a kan bawmh. Tahchunhnak ah, Jesuh cu a nung balmi lakah thil a ti kho bik a si nain, mi kha zungzal in a bawm khomi “pennak kong thawng ṭha” thanhnak ah aa hmang. (Luka 4:43) Jehovah kha a ṭha bik pek awkah lamkaltu Paul nih tangka tampi hmuhnak rian kha a hlawt i thawng ṭha chim awkah a caan le a thazang kha a hman. “Zumhnak i [a] fa taktak a simi Timote” nih Paul nunning kha aa cawn. (1 Tim. 1:2) Jesuh, Paul le Timote nih an zulhmi lam kongah an i ngaichih maw? Ngaichih hlah! Paul nih hi vawlei pekmi thil kha Pathian rian ṭuannak tinvo he a tahchunh tikah “hmunthur men” ah ka ruah tiah a ti.—Fil. 3:8-11.

18. Unau pa pakhat cu zei thlennak nganpi dah a tuah i zeicah aa ngaihchih lo?

¹⁸ Tuchan Khrihfa mino tampi nih Jesuh, Paul le Timote ngeihmi zumhnak kha an i cawn. Tahchunhnak ah, rian ṭha a ngeimi mino unau pa pakhat nih hitin a ṭial: “Baibal phunglam ningin ka nun caah a rauh hlan ah ka rian a kai. Tangka tampi ka hmu nain thlitu a dawimi ah kaa ruat. Cu tikah company committee sinah ka kal i caan tling phung-​chimtu si ka duhnak kong kha ka chimh hna, rian a ṭuan rih lai tiah an ruah i tangka tampi kan in pek chap lai tiah an ti. Asinain bia ka khiah cang. Tangka tampi hmuhnak rian kha kaltak in zeicah caan tling rian ka ṭuan kha mi nih an hngalthiam lo. Ka bialehnak cu Pathian sin kaa pumpek ningin nun ka duh taktak caah a si. Atu ka nunnak ah Pathian rian ah lungthin ka pek khawh cang i tangka le upatnak pek khawh lomi lawmhnak le lungtlinnak ka hmu cang.”

19. Mino pawl kha fim ngai in zei thimnak tuah awkah dah forh an si?

¹⁹ Vawlei cung pumpi mino thong tampi cu cu bantukin fim ngaiin thimnak an tuah. Cucaah seino pawl nan hmailei kong nan ruah tikah Jehovah ni kha nan lung chungah i cinken u. (2 Pit. 3:11, 12) Hi vawlei i a hlawh a tlingmi pawl kha hngar hna hlah. Mah can ah an daw taktakmi hna bia kha ngai. ‘Vancung khua ah chaw khon’ cu zumhawktlak bik thilri khon a si i mah lawng nih zungzal ṭhatnak a chuahpi. (Matt. 6:19, 20; “1 Johan 2:15-17 rel.”) A si nangmah an Sertu kha philh hlah. Cuti a si ahcun Jehovah nih thluachuah an pek lai.

[A Tanglei Fianternak]

Naa Cinken Maw?

• Pathian kan i bochan kha zeitindah kan langhter?

• A ṭha bik fim cawnnak cu zeidah a si?

• Baruk sinin zeidah kan cawn khawh?

• Ahote dah zohchunhawk ṭha an si, zeicah a si?

[Cahmai 13nak i hmanthlak]

Jehovah nih a ṭha bik fim cawnnak kha a timhtuah

[Cahmai 15nak i hmanthlak]

Baruk nih Jehovah bia kha a ngaih i Jerusalem khua rawhnak in a rak luat, mah in zei dah naa cawn khawh?