Kan Thlacam Ning Ṭhanchoternak

1. Jehovah nih amah a biami hna kha zei tuah awkah dah a sawm hna? (Hmanthlak zong zoh.)

HNEMHNAK le lamhruainak kan herh tikah aho sinah dah kan hal khawh? Mah biahalnak i a phi kha kan hngalh. Jehovah Pathian kha thlacamnak in kan naih khawh. Jehovah nih cutin tuah awkah a kan sawm. Atu le atu—“a zungzal in thlacam” hna seh ti zong a kan duh. (1 Thes. 5:17) A sinah zalong tein thla kan cam khawh i kan nunnak kip caah a lamhruainak kha kan hal khawh. (Ptb. 3:5, 6) Jehovah cu a siang tukmi Pathian a si caah kan duh tik paohah a sinah voi tampi thla nan cam khawh tiah a kan ti.

2. Hi capar ah zei kong dah kan i ruah hna lai?

² Thlacamnak laksawng kha kan sunsak tuk. Asinain kan dihlak in a dang tuah dingmi thil hna kan ngeih caah thlacam awkah a caan pek kha kan i harh men lai. Cun kan thlacam ning zong ṭhanchoter a hau tiah kan ruah men lai. Lunglawmh awk ngai a simi cu Baibal in thazaang peknak le lamhruainak tampi kan hmuh khawh. Hi capar ah Jesuh kong ṭha tein hlathlainak thawngin thlacam awkah a caan pek khawh ning kong kan i ruah hna lai. Cun a biapi tukmi a kong panga i telin kan thlacam ning ṭhanchoter khawh ning kong zong kan i ruah hna lai.

Jesuh Nih Thlacam Awkah A Caan A Pek

3. Thlacamnak kong he aa tlaiin Jesuh nih zeidah a hngalh?

³ Jehovah nih kan thlacamnak a sunsak tuk ti kha Jesuh nih a hngalh. Vawleicung a rat hlanpi in a Pa nih zumhfekmi nu le pa pawl i an thlacamnak a lehmi hna kha a hmuh. Tahchunhnak ah, Hannah, David, Elijah le a dang zumhfekmi tampi nih lungtak tein thla an cammi a leh hna lioah Jesuh cu a Pa pawngah a rak um. (1 Sam. 1:10, 11, 20; 1 Si. 19:4-6; Salm 32:5) Cucaah Jesuh nih a zultu pawl kha zumhnak he atu le atu thlacam dingin a cawnpiakmi hna cu khuaruahhar awk a si lo.—Matt. 7:7-11.

4. Jesuh thlacamnak in zeidah kan cawn khawh?

⁴ Jehovah sinah amah theng thla a camnak thawngin Jesuh nih a zultu pawl caah zohchunhawk ṭha a chiah. Phungchim rian a ṭuan chungah atu le atu thla a rak cam. A pawngkam ah mi an tam tuk i a rian zong a tam tuk tawn caah thlacam dingin a caan a rak pek. (Mar. 6:31, 45, 46) Cun amah lawng tein thla a cam khawh nakhnga zingka tuan tein a tho. (Mar. 1:35) Voikhat cu a biapimi biakhiahnak a tuah hlanah zan khuadei thla a rak cam. (Luka 6:12, 13) Vawleicung a rian lakah a har bikmi zuamcawhnak a liim hlante i a thih lai zan zongah atu le atu thla a rak cam.—Matt. 26:39, 42, 44.

5. Thla kan cam tikah Jesuh kha zeitindah kan i zohchunh khawh?

⁵ Jesuh nunning nih zeitluk in kan rian a tam tuk hmanhah thlacam awkah a caan pek a hau ti kha a kan cawnpiak. Jesuh bantukin thlacam awkah a caan pek kan hau ve kho men. Thlacam awkah zingka tuan tein kan tho kho asiloah zan ah tlai deuh tiang kan ṭhu kho. Cutin kan tuah tikah mah a sunglawi tukmi laksawng kan sunsak kha Jehovah sinah kan langhtermi a si. Lynne timi unaunu nih thlacamnak tinvo sung kong a theih hmasa bik lioah zeitluk in dah a rak i lawmh ti kha aa cinken. Hitin a ti: “Zeitik caan paohah Jehovah kha bia ka ruah khawh ti ka hngalh tikah Jehovah kha ka Hawikom ṭha pakhat in hmuh awk le ka thlacam ning ṭhanchoter awkah a ka bawmh.” Kan lak i tam deuh nih cutin kan ruah ve lai ti cu a fiang ko. Thlacamnak ah kan telh khawhmi, a biapimi a kong panga kha i ruah hna u sih.

Thlacamnak Caah A Biapimi A Kong Panga

6. Biathlam 4:10, 11 ningin Jehovah cu zeidah hmuh awkah aa tlak?

⁶ Jehovah kha thangṭhat. Khuaruahhar a simi langhnak pakhat ah lamkaltu Johan nih vancung ah upa 24 nih Jehovah an biakmi kha a hmuh. Annih nih Pathian kha “sunparnak le upatnak le lianhngannak kha hmuh awkah aa tlakmi na si” tiah an thangṭhat. (Biathlam 4:10, 11 rel.) Zumhfekmi vancungmi hna zong Jehovah thangṭhat awk le upat awkah a ruang tampi an ngei. Jehovah he vancung ah an umṭi i a kong kha ṭha tein an hngalh. A tuahmi thil ah a langmi a sining hna kha an hmuh. Jehovah rianṭuan ning kha an hmuh tikah amah kha thangṭhat awkah a forh hna.—Job 38:4-7.

7. Jehovah kha zei caah dah kan thangṭhat khawh?

⁷ Kannih zong kan thlacamnak in Jehovah kha thangṭhat kan duh i amah kan dawtnak le kan sunsaknak kha langhter kan duh. Baibal na rel i na hlathlai tikah a hleiin na duh bikmi Jehovah sining hna kha hngalh awkah i zuam. (Job 37:23; Rom 11:33) Cun mah sining hna he aa tlaiin na hmuh ning kha Jehovah sinah chim. Cun kanmah le thlaraulei kan chungkhar dihlak caah a kan tuahpiakmi thil ca zongah Jehovah kha kan thangṭhat khawh. Anih cu a zungzal in a kan zohkhenhtu le a kan hupphengtu a si.—1 Sam. 1:27; 2:1, 2.

8. Jehovah cungah kan i lawmhnak a ruang chuekhat cu zei hna dah an si? (1 Thesalon 5:18)

⁸ Jehovah sinah lawmhnak bia chim. Thlacamnak in Jehovah sin lawmhnak bia chim awkah a ruang tampi kan ngei. (1 Thesalon 5:18 rel.) Kan ngeihmi thilṭha vialte caah a sinah lawmhnak kan chim khawh, zeicahtiah laksawng ṭha viate cu Jehovah sinin a rami an si caah a si. (Jeim 1:17) Tahchunhnak ah, aa dawh tukmi vawlei ca le khuaruahhar a simi sermi thil hna ca zongah kan i lawmhnak kha kan langhter khawh. Kan nunnak, kan chungkhar, kan hawile le kan i ruahchannak ca zongah lawmhnak bia kan chim khawh. Cun amah he a sunglawi tukmi hawikomnak caanṭha a kan pek ca zongah Jehovah cungah lawmhnak langhter kan duh.

9. Jehovah cungah zeicah kan i lawmh a herh?

⁹ Jehovah cung i lawmh awkah pumpak in kan ngeihmi a ruang hna kha ṭha tein ruah a hau men lai. Lawmh a hngal lomi vawlei mi hna lakah kan nung. Mi nih an ngeihmi thil caah lawmhnak zeitindah kan langhter khawh timi nakin an duhmi thil zeitindah kan hmuh khawh timi kong lawng kha an ruah tawn. Cu bantuk lungput kha kan i cawn ve ahcun kan thlacamnak cu kan duhmi halnak cazin a hung si kho. Cutin a si nakhnga lo Jehovah nih a kan tuahpiakmi thil vialte cungah lawmhnak lungput ngeih awk le sunsak awkah kan i zuam peng a hau.—Luka 6:45.

10. Lawmhnak lungput nih unaunu pakhat kha inkhawhnak ngeih awkah zeitindah a bawmh? (Hmanthlak zong zoh.)

¹⁰ Lawmhnak lungput nih harnak inkhawh awkah a kan bawmh khawh. 2015, January 15, Vennak Innsang ah langhtermi Kyung-sook kong kha ruathmanh u. Anih cu a zual tukmi cuap cancer a ngei. Hitin a ti: “Mah ka zawtnak ruangah ka lung a dong tuk. Zeizong vialte ka sung dih tiah ka ruah i ka ṭih tuk.” Inkhawhnak ngeih awkah zeinihdah a bawmh? Zan fatin a ih hlanah inncung ah a kai i mah ni caah aa lawmhnak a ruang panga kha thlacamnak in ka phuan tiah a ti. Mah nih a lungretheihnak kha a zorter i Jehovah a dawtnak langhter awkah a forh. Jehovah nih a harmi thil sining an ton tikah zumhfekmi a salle a bawmh hna ning kha a hmuh i kan nunnak ah harnak nakin thluachuah kan hmuhmi a tam deuh tuk ti kha a hun hngalh. Kyung-sook bantukin harnak kan ton hmanhah Jehovah cungah kan i lawmh awk a sinak a ruang tampi kan ngei. Thlacamnak in a sinah lawmhnak bia kan chimmi nih inkhawhnak ngeih awk le lungdai tein um peng awkah a kan bawmh khawh.

11. Jesuh vancung a kir hnuah a zultu pawl cu zeicah ralṭhatnak ngeih an herh?

¹¹ Phungchimnak ah ralṭhatnak ngeih dingin Jehovah sinah hal. Jesuh nih vancung a kai hlante ah a zultu pawl kha “Jerusalem khua le Judea ram vialte le Samaria ram ah le vawleicung khuazakip ah” amah kong tehte khaan dingin rian a pekmi hna kha a hngalhter ṭhan hna. (Lam. 1:8; Luka 24:46-48) Caan tlawmpal hnuah Judah biaknaklei hruaitu pawl nih lamkaltu Peter le Johan kha an tlaih hna i Sanhedrin hmaiah an chuahpi hna. Mah zumhfekmi pa hna kha phungchim rian ngol dingin nawl an pek hna i a tlerh hmanh an rak tlerhkhonh hna. (Lam. 4:18, 21) Peter le Johan nih zeitindah an lehrulh?

12. Lamkaltu 4:29, 31 ningin zultu pawl nih zeidah an tuah?

¹² Judah biaknaklei hruaitu pawl i tlerhkhonhnak kha Peter le Johan nih hitin an lehrulh hna: “Pathian mithmuh ah nanmah bia ngaih cu maw a ṭha deuh, Pathian bia ngaih dah a ṭha deuh, ti cu nanmah nih ruat ko ngat u. Zeiti si hmanhah kannih nih cun kanmah hrimhrim nih kan hmuh komi le kan theih komi cu chim lo cun kan um kho bal lai lo.” (Lam. 4:19, 20) Peter le Johan an luat tikah zultu pawl nih a duhnak tuahnak he aa tlaiin Jehovah sinah hitin thla an cam: “Kannih na sal rual nih hin na bia cu ralṭha chinchin in kan chim nakhnga a nawl kan pe ko.” Jehovah nih cu bantuk lungtak tein thla an cammi kha a rak leh hna.—Lamkaltu 4:29, 31 rel.

13. Jin-hyuk kong in zeidah kan cawn khawh?

¹³ Vawlei nawlngeitu pawl nih an kan thlauh hmanhah phung kan chim pengnak thawngin zultu pawl kha kan i zohchunh khawh hna. Khoikalei hmanh a ṭan lo ruangah thong thlak a tongmi unaupa Jin-hyuk kong kha ruathmanh. Thonginn ah anmah te lawngin chiahmi thongtla cheukhat kha zohkhenh awkah rian pek a si. Asinain Baibal i telin mah rian he aa tlai lomi zei kong hmanh chimnak nawl a ngei lo. Cucaah caanṭha a hmuh fatin ralṭha te le fimkhur tein phung chim khawh awkah thla a cam. (Lam. 5:29) Hitin a ti: “Jehovah nih thonginn kutka ah minit panga a raumi Baibal cawnpiaknak tampi thawk khawh awkah fimnak le ralṭhatnak a ka peknak thawngin ka thlacamnak kha a ka leh. Cun a thaizing ah thong a tla vemi pawl pek awkah zan ah cakuat ka ṭial.” Kannih zong Jehovah nih phungchim rian liim dingin a kan bawmh lai ti kha kan zumh khawh. Jin-hyuk bantukin ralṭhatnak le fimnak caah thla kan cam khawh ve.

14. Harnak kan ton tikah zeinihdah a kan bawmh khawh? (Salm 37:3, 5)

¹⁴ Harnak inkhawh awkah Jehovah sinah bawmhnak hal. Kan lak i tam deuh cu pumsalei asiloah lungthinlei zuamcawhnak, dawtmi thihtaknak, chungkhar harsatnak, hremnak asiloah a dang buaibainak hna kan tong. Pulrai le raldohnak ti bantuk thil sining nih mah zuamcawhnak hna kha inkhawh awkah a harter chin. Na intuarnak kong kha a dikthliar in Jehovah sinah chim. Na hawikom ṭha sinah bia na chim bantukin na sining kha chim. Jehovah nih “aan bawmh lai” ti kha zum.—Salm 37:3, 5 rel.

15. Thlacamnak nih “harnak” inkhawh awkah zeitindah a kan bawmh khawh? Tahchunhnak pe.

¹⁵ Teima tein thlacamnak nih “harnak” inkhawh awkah a kan bawmh lai. (Rom 12:12) Jehovah nih amah a biami hna nih an tonmi thil kha a hngalh i “an aunak kha a theih.” (Salm 145:18, 19) Kum 29 a simi hmaikal unaunu Kristie nih mah cu a hmaan ti kha a hmuh. Ruahlopi in a zual tukmi zawtnak a hun ngei. Mah ruangah a lung a dong tuk. A hnuah a nu zong a dam kho ti lo dingmi zawtnak a ngei ti kha a hun hngalh. Kristie nih hitin a ti: “Nifatin Jehovah sinah ka herhmi thazaang ka pe tiah lungtak tein thla ka cam. Pumhnak le pumpak hlathlainak ka tuahnak thawngin thlaraulei tuah tawnmi thil hna kha tuah peng awkah kaa zuam.” Hitin a ti chap: “Thlacamnak nih a har caan ah inkhawhnak ngeih dingin a ka bawmh. Jehovah cu ka pawngah a um zungzal ti kha ka hngalh i mah nih lungdaihnak a ka hmuhter. Ka ngandamnak cu a ṭha colh lo nain Jehovah nih chunglei daihnak le lungdaihnak a ka peknak thawngin ka thlacamnak kha a ka leh.” “Pathian nih harnak an inmi chungin Pathian a ṭihmi hna khamh cu a thiam” ti kha i cinken peng hna u sih.—2 Pet. 2:9.

16. Lemsoinak doh khawh awkah zeicah Jehovah bawmhnak kan herh?

¹⁶ Lemsoinak doh khawh awkah Jehovah sinah bawmhnak hal. Mitlinglo kan si caah a ṭha lomi thil tuah dingin lemsoinak kha kan doh peng a hau. Satan nih lemsoinak kan doh khawh nakhnga lo a si khawh chungin aa zuam. Kan ruahnak kha hrawh awkah aa zuamnak lamkhat cu a ṭha lomi nuamhsaihnak in a si. Cu bantuk nuamhsaihnak nih kan lungthin chungah a thiang lomi ruahnak in a khahter khawh. Mah nih kan chunglei minung kha a thurhnawmhter i sualnak ngan a kan tuahter khawh.—Mar. 7:21-23; Jeim 1:14, 15.

17. Lemsoinak hrial khawh awkah thla kan cammi ningin zeitindah kan tuah khawh? (Hmanthlak zong zoh.)

¹⁷ A ṭhalomi thil tuah dingin lemsoinak kha tei khawh awkah Jehovah bawmhnak kan herh. Jesuh nih Bawipa thlacamnak ah mah hna hi a telh: “A harmi hneksaknak chungah kan phakter hlah, Miṭhalo pa sin khan him tein kan umter tuah.” (Matt. 6:13) Jehovah nih bawmh a kan duh, asinain kanmahlei in bawmhnak kan hal a hau. Cun kan thlacam ning zongin kan nun a hau. Satan vawlei ah a laar tukmi, a ṭha lomi ruahnak a kan ngeihter khomi carelnak le ngaihnak kha a si khawh chungin hrial awkah kan i zuam a hau. (Salm 97:10) Baibal relnak le hlathlainak thawngin kan lungthin chungah a ṭhami ruahnak kha kan khahter khawh. Pumhnak le phungchim rian ah i telnak nih kan ruahnak zong a kilven lai. Cun Jehovah nih kan inkhawh leng tiangin lemsoinak kaan tonter hna lai lo ti zongin bia aa kam.—1 Kor. 10:12, 13.

18. Kan thlacammi ningin zeidah kan tuah a herh?

¹⁸ Harnak caan a simi ni hmanung bik caan ah Jehovah cungah zumhfek tein kan um peng nakhnga a hlan nakin thla kan cam chinchin a hau. Nifate lungtak tein thlacamnak caah a caan pe. Jehovah nih thlacamnak in ‘kan harnak vialte kha chim dih’ hna seh ti a kan duh. (Salm 62:8) Jehovah kha thangṭhat law a tuahmi thil viate caah lawmhnak bia chim. Cun ralṭha tein phung na chim khawh nakhnga bawmhnak hal. Na ton khawhmi zei bantuk harnak paoh inkhawh awk le lemsoinak hna doh khawh awkah Jehovah sinah bawmhnak hal. Jehovah sinah hmaan tein thlacamnak kha ahohmanh asiloah zeithil hmanh i dawnhter hlah. Asinain Jehovah nih kan thlacamnak kha zeitindah a kan leh? A hnu capar ah mah a biapimi biahalnak kong kha kan i ruah hna lai.