Lafason ki Zeova i reponn nou lapriyer

1-2. Ki kestyon nou kapab demande konsernan nou lapriyer?

ESKI ou’n deza mazinen si Zeova pe reponn ou lapriyer? Si wi, ou pa tousel. En kantite frer ek ser in demann sa kestyon sirtou ler zot annan problenm. Si nou pe soufer, i kapab ki nou osi nou vwar li difisil pour vwar ki mannyer Zeova pe reponn nou lapriyer.

² Annou vwar akoz nou kapab asire ki Zeova i reponn lapriyer son bann serviter. (1 Zan 5:15) Nou pou osi reponn sa bann kestyon swivan: Akoz parfwa i kapab paret ki Zeova pa pe reponn nou lapriyer? Dan ki fason ki Zeova i reponn nou lapriyer ozordi?

I KAPAB KI ZEOVA PA REPONN NOU LAPRIYER DAN FASON KI NOU PE EKSPEKTE

3. Akoz Zeova i anvi ki nou koz avek li dan lapriyer?

³ Labib i asir nou ki Zeova i kontan nou en kantite e ki nou presye pour li. (Aga. 2:7; 1 Zan 4:10) I pour sa rezon ki i envit nou pour demann li led dan lapriyer. (1 Pyer 5:6, 7) I anvi ed nou reste pros avek li e pour fer fas avek nou bann problenm.

4. Ki mannyer nou konnen ki Zeova i reponn lapriyer son bann serviter? (Vwar portre.)

⁴ Dan Labib, nou lir ki Zeova ti reponn lapriyer son bann serviter. En legzanp i Lerwa David. David ti annan en kantite lennmi e souvan i ti demann Zeova led dan lapriyer. En fwa, i ti sipliy Zeova: “O Zeova, ekout mon lapriyer, ekout mon siplikasyon pour led. Dan ou fidelite e dan ou ladrwatir, reponn mwan.” (Ps. 143:1) Zeova ti reponn lapriyer David e i ti sov li. (1 Sam. 19:10, 18-20; 2 Sam. 5:17-25) Alor David ti kapab dir avek konfyans: “Zeova i pros avek tou sa ki apel li.” Nou osi nou kapab annan sa menm konfyans.​—Ps. 145:18.

5. Eski Zeova ti toultan reponn lapriyer son bann serviter dan lepase dan en fason ki zot ti pe ekspekte? Donn en legzanp. (Vwar portre.)

⁵ I kapab ki Zeova pa reponn nou lapriyer lafason ki nou, nou ekspekte. Sanmenm ki ti arive avek zapot Pol. Zapot Pol ti demann Bondye pou tir en ‘pikan ki ti pe pik li.’ Trwa fwa Pol ti priy spesifikman konsernan sa problenm. Eski Zeova ti reponn sa lapriyer? Wi. Me pa dan sa fason ki Pol ti anvi. Olye tir sa problenm, Zeova ti donn Pol sa lafors ki i ti bezwen pour kontinyen servi li fidelman.​—2 Kor. 12:7-10.

6. Akoz parfwa i paret ki Zeova pa pe reponn nou lapriyer?

⁶ Parfwa i kapab ki Zeova i reponn nou lapriyer dan en fason ki nou pa ti pe ekspekte. Me nou kapab asire ki Zeova i konn sa pli bon fason pour ed nou. I kapab menm “fer bokou bokou plis ki tou sa ki nou kapab demande oubyen imazinen.” (Efe. 3:20) I pour sa rezon ki son larepons i kapab vin dan en moman ouswa dan en fason ki nou pa ti pe ekspekte.

7. Akoz i kapab ki nou bezwen sanz sa ki nou demann Zeova dan lapriyer? Donn en legzanp.

⁷ Ler nou konpran lavolonte Zeova pli byen, i kapab ki nou bezwen sanz sa ki nou demann Zeova dan lapriyer. Annou vwar leksperyans Martin Poetzinger. Pa bokou letan apre ki Frer Poetzinger ti’n marye, i ti ganny anvoye dan en kan konsantrasyon Nazi. O konmansman, i ti demann Zeova pour fer li sorti dan sa kan konsantrasyon pour li kapab pran swen avek son madanm e pour li kontinyen dan sa travay predikasyon. Me apre de semenn, i pa ti paret ki Zeova ti pe al fer li sorti dan prizon. Alor i ti konmans priye: “Zeova, silvouple montre mwan ki ou anvi mon fer.” Apre i ti konmans reflesir lo sa ki lezot frer ki ti dan sa kan konsantrasyon ti pe fer fas avek. En kantite parmi zot ti vreman enkyet pour zot madanm ek zot zanfan. Apre Frer Poetzinger ti dir Zeova dan son lapriyer: “Zeova, mersi pour sa nouvo servis ki ou’n donn mwan. Ed mwan pour ankouraz mon bann frer.” Frer Poetzinger ti fer sanmenm sa pour sa ne-v-an ki ti swiv.

8. Ki en keksoz enportan ki nou devret gard antet ler nou pe fer lapriyer?

⁸ Nou bezwen rapel ki Zeova i annan en plan e ki i pou akonpli sa plan dan sa letan ki i’n deside. I dan plan Zeova pour tir tou problenm ki fer nou soufer ozordi. Sa bann problenm pou ganny tire pour touzour. Sa i enkli bann problenm parey dezas natirel, maladi ek lanmor. Zeova pou akonpli son plan atraver son Rwayonm. (Dan. 2:44; Rev. 21:3, 4) Me ziska ki sa letan i arive, Zeova pe les Satan diriz sa lemonn.b (Zan 12:31; Rev. 12:9) Alor, si Zeova ti rezourd tou problenm ki imen i annan la konmela, i ti pou paret konmsi Satan pe byen diriz sa lemonn. Menm si nou bezwen esper Zeova akonpli serten son bann promes, sa pa vedir ki i pa ed nou. Annou vwar serten fason ki Zeova i ed nou.

SERTEN FASON KI ZEOVA I REPONN NOU LAPRIYER OZORDI

9. Ki mannyer Zeova i kapab ed nou ler nou bezwen fer en desizyon? Donn en legzanp.

⁹ Zeova i donn nou lasazes. Zeova i promet pour donn nou sa lasazes ki nou bezwen pour fer bann bon desizyon. Nou sirtou bezwen son lasazes ler nou pe fer bann desizyon ki pou sanz nou lavi. Par egzanp, ler nou pe deside si nou pou marye oubyen non. (Zak 1:5) Annou vwar leksperyans en ser selibater ki apel Maria.c Pandan ki i ti pe servi konman en pionye ordiner, i ti zwenn en frer. I dir: “Anmezir ki nou lanmitye ti devlope, nou santiman ti vin pli for. Mon ti konnen ki mon bezwen fer en desizyon. Mon ti priy en kantite konsernan sa. Mon ti bezwen gidans Zeova me mon ti osi konnen ki Zeova pa ti pou fer sa desizyon pour mwan.” Maria i santi ki Zeova ti reponn son lapriyer e I ti donn li lasazes. Ki mannyer sa? Maria ti fer resers dan nou piblikasyon e i ti vwar bann lartik ki ti ed li trouv larepons pour bann kestyon ki i ti annan. I ti osi ekout konsey saz ki son manman ti donn li. Sa konsey ti ed Maria pour egzamin son bann santiman. Sa ti ed li pour fer en desizyon ki saz.

10. Dapre Filipyen 4:13, ki mannyer Zeova i ed son bann serviter? Donn en legzanp. (Vwar portre.)

¹⁰ Zeova i donn nou lafors pour andire. Zeova pou donn nou sa lafors ki nou bezwen pour andire ler nou annan problenm, zis parey i ti fer pour zapot Pol. (Lir Filipyen 4:13.) Annou vwar ki mannyer Zeova ti ed en frer ki apel Benjamin pour andire pandan bann moman difisil. Benjamin ek son fanmir ti reste dan bann kan refizye Lafrik e Benjamin ti pas laplipar son lanfans dan bann kan refizye. Benjamin i dir: “Mon ti toultan koz avek Zeova dan lapriyer e mon ti demann li pour donn mwan lafors pour fer sa ki fer li plezir. Zeova ti reponn mon lapriyer par donn mwan lape lespri, sa kouraz pour kontinyen anons sa bon nouvel ek bann piblikasyon ki ti ed mwan pour reste pros avek li.” Benjamin i osi dir: “Ler mon ti lir leksperyans bann frer ek ser e mon ti vwar ki mannyer Zeova ti ed zot pour andire, sa ti fer mwan pli determinen pour reste fidel avek Zeova.”

11-12. Ki mannyer Zeova i kapab servi nou bann frer ek ser pour reponn nou lapriyer? (Vwar portre.)

¹¹ Zeova i servi nou bann frer ek ser pour ed nou. Sa zour swar avan Zezi ti mor, i ti fer en lapriyer siplikasyon. I ti sipliy Zeova pour pa les li ganny kondannen konman en dimoun ki napa respe pour Bondye e pour non Bondye. Olye anpes Zezi ganny kondannen, Zeova ti ed Zezi par anvoy en lanz pour ankouraz li. (Lik 22:42, 43) Pareyman, Zeova i kapab ed nou par servi nou bann frer ek ser. Enn nou bann frer ouswa ser i kapab telefonn ouswa vizit nou pour ankouraz nou. Nou tou nou kapab rod loportinite pour dir en frer oubyen en ser “en bon parol.”​—Prov. 12:25.

¹² Annou vwar leksperyans en ser ki apel Miriam. Detrwa semenn apre ki msye Miriam ti’n mor, Miriam ti li tousel kot li. I ti sagren e i ti dekouraze. I pa ti kapab aret plere e i ti bezwen koz avek en dimoun. I dir: “Mon ti napa lafors pour telefonn personn. Alor mon ti koz avek Zeova.” Pandan ki i ti pe plere e ankor pe priye, son telefonn ti sonnen. En ansyen ki ti son bon zanmi ki ti pe telefonn li. Sa ansyen ek son madanm ti rekonfort Miriam. Miriam i asire ki Zeova ki ti motiv sa frer pour telefonn li.

13. Ki mannyer Zeova i kapab servi bann ki pa ador li pour reponn nou lapriyer? Donn en legzanp.

¹³ Zeova i kapab servi bann dimoun ki pa ador li. (Prov. 21:1) Parfwa Zeova i reponn lapriyer son pep par motiv bann dimoun ki pa servi li pour ed zot. Par egzanp, i ti motiv Lerwa Artazerzes pour les Neemya retourn Zerizalenm pour li kapab ede pour rekonstri lavil Zerizalenm. (Nee. 2:3-6) Pareyman, ozordi Zeova i kapab motiv bann ki pa ador li pour ed nou ler nou bezwen led.

14. Ki mannyer leksperyans Soo Hing in ankouraz ou? (Vwar portre.)

¹⁴ En ser ki apel Soo Hing ti santi ki Zeova ti servi en dokter pour ed li. Garson Soo Hing i annan plizyer problenm lasante mantal. Ler son garson ti ganny en aksidan, Soo Hing ek son msye ti bezwen aret travay pour zot kapab pran swen avek zot garson. Sa ti fer zot annan problenm larzan. Soo Hing i dir ki i ti santi ki i pa ti pou kapab andir lezot problenm. I ti dir Zeova ki mannyer i ti pe santi e i ti demann Zeova led. Sa dokter ki ti pe tret garson Soo Hing ti deside pour rod en fason pour ed Soo Hing ek son fanmir. Sa ti fer ki zot ti ganny led avek gouvernman ek en landrwa reste ki ti pli bon marse. Apre sa, Soo Hing ti dir: “Nou ti vwar ki mannyer Zeova ti ed nou. Zeova i vreman ‘sa Enn ki ekout lapriyer.’”​—Ps. 65:2.

NOU BEZWEN ANNAN LAFWA POUR ROD E AKSEPTE LAREPONS ZEOVA

15. Kwa ki ti ed en ser pour realize ki Zeova ti pe reponn son lapriyer?

¹⁵ Zeova pa toultan reponn nou lapriyer dan bann fason ekstraordiner. Me larepons ki nou gannyen i sa ki nou bezwen pour reste fidel avek nou Papa ki dan lesyel. Alor port latansyon pour ou kapab vwar ki mannyer Zeova i reponn ou lapriyer. En ser ki apel Yoko ti santi ki Zeova pa ti pe reponn son lapriyer. Me apre i ti konmans ekri dan en liv sa ki i demann Zeova. Apre ki en pe letan ti’n pase, i ti get dan son liv e i ti realize ki Zeova ti’n reponn laplipar son bann lapriyer, menm serten ki i ti’n oubliye ki i ti’n koz avek Zeova lo la. Pareyman, tanzantan nou bezwen pran letan pour reflesir lo ki mannyer Zeova pe reponn nou lapriyer.​—Ps. 66:19, 20.

16. Ki mannyer nou kapab demontre lafwa ler nou fer lapriyer? (Ebre 11:6)

¹⁶ Nou montre ki nou annan lafwa dan Zeova pa zis par koz avek li dan lapriyer me par aksepte nenport larepons ki i donn nou. (Lir Ebre 11:6.) Annou vwar leksperyans Mike ek son madanm Chrissy. Mike ek Chrissy ti anvi servi dan Betel. Mike i dir: “Nou’n fer laplikasyon plizyer fwa e nou’n priy Zeova plizyer fwa konsernan sa lobzektif. Me nou pa’n zanmen ganny envite pour servi dan Betel.” Me kantmenm sa, zot ti kontinyen annan konfyans ki Zeova i konnen ki sa pli bon fason pour servi zot dan son lorganizasyon. Zot ti kontinyen fer tou sa ki zot ti kapab. Zot ti servi konman pionye ordiner dan bann landrwa kot i annan bezwen pour plis proklanmater e zot ti ede dan travay konstriksyon pour lorganizasyon Zeova. Ozordi Mike ek Chrissy i vizit bann kongregasyon parski Mike i sirveyan rezyonal. Mike i dir: “Zeova pa’n toultan reponn nou lapriyer dan sa fason ki nou ti pe ekspekte me i’n reponn nou lapriyer. I ti reponn nou lapriyer dan bann fason ki ti pli meyer ki sa ki nou ti’n kapab mazinen.”

17-18. Dapre Psonm 86:6, 7, ki nou kapab asire?

¹⁷ Lir Psonm 86:6, 7. Psalmis David ti asire ki Zeova ti ekout son lapriyer e i ti reponn li. Ou osi ou kapab asire ki Zeova i ekout ou e reponn ou lapriyer. Bann leksperyans ek legzanp ki nou’n vwar dan sa lartik, i asir nou ki Zeova i kapab donn nou sa lasazes ek sa lafors ki nou bezwen pour andire. I kapab servi nou bann frer ek ser ouswa bann dimoun ki pour le moman pa pe servi li pour ed nou.

¹⁸ Menm si Zeova pa toultan reponn nou lapriyer dan sa fason ki nou pe ekspekte, nou konnen ki i pou reponn nou lapriyer. I pou donn nou sa ki nou bezwen e dan sa moman ki nou bezwen sa keksoz. Alor, annou kontinyen annan lafwa ler nou priye. Annan konfyans ki Zeova pou pran swen avek ou la konmela e ki dan nouvo lemonn, i pou “satisfer dezir tou sa ki vivan.”​—Ps. 145:16.