Eski Zeova pou reponn mon lapriyer?

1-2. Akoz nou kapab krwar ki Zeova pa pe reponn nou lapriyer?

“ANNAN bokou lazwa akoz Zeova e i pou donn ou tou sa ki ou anvi.” (Ps. 37:4) Pa sa i en zoli promes! Me eski nou devret ekspekte ki Zeova i donn nou tou sa ki nou demande deswit? Akoz i enportan ki nou demann sa kestyon? Annou vwar detrwa legzanp. En ser selibater i priye pour li ganny envite pour asiste Lekol pour bann predikater Rwayonm. Me plizyer lannen i pase e i pa ankor ganny envite. En zenn frer ki malad i demann Zeova pour geri li pour ki i kapab fer plis dan kongregasyon. Me son lasante pa amelyore. En koup Kretyen i priye pour ki zot zanfan i reste dan laverite. Me zot zanfan i deside pour aret servi Zeova.

² Petet ou osi ou’n demann Zeova en keksoz e ou pa ankor gannyen. Petet sa i fer ou krwar ki Zeova i reponn lapriyer lezot me pa pour ou. Oubyen ou kapab mazinen ki ou’n fer en keksoz mal. En ser ki apel Janiceb ti santi koumsa. Janice ek son msye ti priy Zeova parski zot ti vreman anvi al servi dan Betel. I dir: “Mon ti asire ki i pa ti pou pran bokou letan pour nou ganny aksepte dan Betel.” Me plizyer lannen in pase e sa koup pa ankor ganny envite Betel. Janice i dir: “Mon ti santi mwan sagren e konfize. Mon ti demann mon lekor ki mon’n fer pour dezapwent Zeova. Mon’n priy en kantite konsernan al Betel. Me akoz i pa’n reponn mon lapriyer?”

3. Ki nou pou vwar dan sa lartik?

³ Parfwa nou kapab demann nou lekor si Zeova pe ekout nou lapriyer. Menm serten zonm fidel dan lepase ti demann zot lekor sa kestyon. (Zob 30:20; Ps. 22:2; Aba. 1:2) Kwa ki kapab konvenk ou ki Zeova pou reponn ou lapriyer? (Ps. 65:2) Pour nou vwar larepons sa enn kestyon, nou pou reponn sa bann kestyon swivan: (1) Ki Zeova pou fer? (2) Ki Zeova i ekspekte avek nou? (3) Akoz petet nou bezwen sanz sa ki nou pe demann Zeova?

KI ZEOVA POU FER?

4. Dapre Zeremi 29:​12, ki Zeova i promet pour fer?

⁴ Zeova i promet ki i pou ekout nou lapriyer. (Lir Zeremi 29:12.) Nou Bondye i kontan son bann serviter fidel alor i pa pou zanmen inyor zot lapriyer. (Ps. 10:17; 37:28) Me sa pa vedir ki i pou donn nou tou sa ki nou demande. Petet nou bezwen esper ziska ki nou dan nouvo lemonn pour ganny serten keksoz ki nou demande.

5. Ki Zeova i gete ler i pe ekout nou lapriyer? Eksplike.

⁵ Zeova i gete si sa ki nou pe demande i relye avek son plan. (Iza. 55:​8, 9) I dan plan Zeova ki later i ranpli avek zonm ek madanm ki ini e ki kontan pour obei li konman zot Dirizan. Me Satan i dir ki imen ti pou pli zwaye si zot ti diriz zot prop lekor. (Zen. 3:​1-5) Pour montre ki sa ki Dyab i dir pa vre, Zeova in les bann imen diriz zot lekor. Me fason dirize bann imen in anmenn en kantite problenm pour nou ozordi. (Ekle. 8:9) Nou konnen ki Zeova pa pou tir tou sa bann problenm la konmela. Si i ti fer sa, serten ti pou krwar ki fason dirize bann imen i bon e ki bann imen i kapab rezourd bann problenm ki i annan la konmela.

6. Akoz nou bezwen asire ki Zeova pou toultan azir avek lanmour e i toultan zis?

⁶ Zeova i kapab reponn bann lapriyer ki en pe parey, dan diferan fason. Par egzanp, ler Lerwa Ezekya ti vreman malad, i ti sipliy Zeova pour geri li e Zeova ti fer sanmenm. (2 Rwa. 20:​1-6) De lot kote, ler zapot Pol ti sipliy Zeova pour tir ‘en pikan ki ti pe pik li,’ ki petet ti en problenm lasante, Zeova pa ti geri li. (2 Kor. 12:​7-9) Mazin osi legzanp zapot Zak ek zapot Pyer. Lerwa Erod ti anvi touy zot tou le de. Kongregasyon ti priy pour Pyer e i tre probab ki zot ti priy pour Zak osi. Me Zak ti ganny touye e en lanz ti sov Pyer. (Akt 12:​1-11) Nou kapab demann nou lekor, ‘Akoz Zeova ti sov Pyer e pa Zak?’ Labib pa dir.c Me nou kapab asire ki fason fer Zeova “pa zanmen enzis.” (Det. 32:4) Nou konnen ki Pyer ek Zak ti annan laprouvasyon Zeova. (Rev. 21:14) Parfwa larepons nou lapriyer i kapab pa sa enn ki nou pe ekspekte. Me vi ki nou annan konfyans ki Zeova i toultan azir avek lanmour e i toultan zis, nou pa pou konplent konsernan lafason ki i swazir pour reponn nou lapriyer.—Zob 33:13.

7. Ki nou devret evite fer e akoz?

⁷ Nou esey evite konpar nou sityasyon avek sa ki pour lezot. Par egzanp, i kapab ki nou demann Zeova pour ed nou dan en fason spesifik me nou pa ganny sa ki nou demande. Pli tar nou aprann ki en lot dimoun in fer en lapriyer en pe parey e Zeova in reponn son lapriyer. Sanmenm sa ki ti arive avek en ser ki apel Anna. Son msye ki apel Matthew ti ganny kanser e Anna ti priye pour ki son msye i ganny geri. Pandan sa menm letan, de ser aze osi ti ganny kanser. Anna ti priy pour Matthew e pour sa de ser. Sa bann ser ti rekipere me Matthew ti mor. O konmansman Anna ti demann son lekor si sa bann ser ti’n byen parski Zeova ki ti’n geri zot e si Zeova in geri zot, akoz i pa’n geri son msye? Byensir nou pa konnen akoz sa de ser in rekipere. Me sa ki nou konnen i ki Zeova pou tir tou sa ki fer nou soufer e i vreman anvi resisit son bann zanmi ki’n mor.—Zob 14:15.

8. (a) Dapre Izai 43:​2, ki mannyer Zeova i ed nou? (b) Ki mannyer lapriyer i kapab ed nou ler nou pe fer fas avek bann problenm? (Vwar sa video Lapriyer i ed nou.)

⁸ Zeova pou toultan ed nou. Zeova i nou Papa ki kontan nou e i pa kontan vwar nou pe soufer. (Iza. 63:9) Kantmenm sa, i pa anpes tou problenm arive avek nou. Parfwa sa bann problenm i kapab parey larivyer ouswa laflanm. (Lir Izai 43:2.) Me Zeova i promet ki i pou ed nou “travers” bann problenm. I pou fer sir ki nou toultan kapab kontinyen servi li. Zeova i osi donn nou son lespri sen ki pwisan pour ed nou pour kapab andire. (Lik 11:13; Fili. 4:13) Alor nou kapab asire ki nou pou toultan annan sa ki nou bezwen pour nou kapab andire e reste fidel avek Zeova.d

KI ZEOVA I EKSPEKTE AVEK NOU?

9. Dapre Zak 1:​6, 7, akoz nou bezwen annan konfyans ki Zeova pou ed nou?

⁹ Zeova i ekspekte ki nou annan konfyans dan li. (Ebr. 11:6) Parfwa nou kapab santi ki nou bann problenm i tro difisil pour nou fer fas avek. Nou kapab menm konmans annan dout si Zeova pou ed nou. Me Labib i asir nou ki avek pwisans Bondye, nou kapab “grenp en miray.” (Ps. 18:29) Alor olye kontinyen annan dout, nou devret priye e annan lafwa ek konfyans ki Zeova pou reponn nou lapriyer.—Lir Zak 1:​6, 7.

10. Ki mannyer nou kapab azir an armoni avek nou lapriyer? Donn en legzanp.

¹⁰ Zeova i ekspekte ki nou azir an armoni avek nou lapriyer. Par egzanp, en frer i kapab demann Zeova pour ed li kapab ganny bann zour konze pour asiste lasanble rezyonal. Ki mannyer Zeova i kapab reponn lapriyer sa frer? Zeova i kapab donn sa frer sa kouraz ki i bezwen pour koz avek son anplwayer. Me sa frer ki pou bezwen fer zefor lo li menm pour al koz avek son anplwayer. I kapab ki i pou bezwen demann son anplwayer plizyer fwa. I menm kapab demande pour sanz zour travay avek enn son koleg. Si i neseser, i kapab demande pour pran son konze san ganny peye.

11. Akoz nou devret kontinyen priy konsernan bann keksoz ki enportan pour nou?

¹¹ Zeova i ekspekte ki nou kontinyen priy konsernan bann keksoz ki enportan pour nou. (1 Tesa. 5:17) Zezi ti dir ki serten keksoz ki nou demande nou pa pou gannyen deswit. (Lik 11:9) Alor pa abandonnen! Kontinyen priy Zeova avek tou nou leker. (Lik 18:​1-7) Ler nou kontinyen priy Zeova konsernan en keksoz, nou pe montre Zeova ki nou vreman anvi sa ki nou pe demande. Nou osi montre ki nou krwar ki i kapab ed nou.

AKOZ PETET NOU BEZWEN SANZ SA KI NOU PE DEMANN ZEOVA?

12. (a) Ki en kestyon nou devret demann nou lekor konsernan bann keksoz ki nou demann Zeova e akoz? (b) Ki mannyer nou kapab fer sir ki nou lapriyer i montre ki nou annan respe pour Zeova? (Vwar sa bwat “Eski mon lapriyer i montre ki mon annan respe pour Bondye?”)

¹² Si ler nou fer lapriyer e nou pa ganny sa ki nou pe demande, nou kapab demann nou lekor sa trwa kestyon. Premyerman, ‘Eski sa ki mon pe demande dan lapriyer i sa ki mon bezwen?’ Souvandfwa nou krwar ki nou konnen kwa ki pli bon pour nou. Me parfwa sa ki nou demande, i pa sa ki pli bon pour nou. Si nou pe priy konsernan en problenm, i kapab ki i annan en pli bon solisyon pour sa problenm ki sa solisyon ki nou pe demann Zeova. Osi i kapab ki serten keksoz ki nou pe demande i pa an armoni avek lavolonte Zeova. (1 Zan 5:14) Annou vwar legzanp sa koup ki’n ganny mansyonnen pli boner. Zot ti’n demann Zeova pour gard zot zanfan dan laverite. Sa ti paret en keksoz normal pour demande. Me Zeova pa fors personn pour servi li. I anvi ki nou tou nou swazir pour ador li, sa i enkli nou bann zanfan. (Det. 10:​12, 13; 30:​19, 20) Alor sa paran ti kapab demann Zeova pour ed zot tous leker zot zanfan pour ki i kapab kontan Zeova e vin Son zanmi.—Prov. 22:6; Efe. 6:4.

13. Dapre Ebre 4:​16, kan ki Zeova pou ed nou? Eksplike.

¹³ En dezyenm kestyon ki nou kapab demann nou lekor i ‘Eski la i sa letan pour Zeova donn mwan sa ki mon’n demande?’ Petet nou santi ki nou bezwen ganny sa ki nou pe demande deswit. Me Zeova ki konnen ki sa pli bon letan pour ed nou. (Lir Ebre 4:16.) Ler nou pa ganny sa ki nou pe demande deswit, petet nou mazinen ki larepons Zeova i ‘Non.’ Me anfet i kapab ki Zeova pe dir nou ‘I pa ankor ler.’ Par egzanp, mazin sa zenn frer ki’n ganny mansyonnen pli boner ki ti demann Zeova pour geri li. Si Zeova ti’n fer mirak e geri sa frer, Satan ti’n kapab dir ki sa frer pe kontinyen servi Zeova zis akoz Zeova in geri li. (Zob 1:​9-11; 2:4) Osi, Zeova in fini deside kan ki i pou geri tou maladi. (Iza. 33:24; Rev. 21:​3, 4) Me ziska ki sa i arive, nou pa kapab ekspekte ki Zeova i fer mirak pour geri nou ler nou malad. Alor sa frer i kapab demann Zeova pour donn li sa lafors ek lape lespri pour li kapab andire e kontinyen servi Bondye fidelman.—Ps. 29:11.

14. Ki ou aprann avek leksperyans Janice?

¹⁴ Rapel leksperyans Janice, sa ser ki ti priye pour li al servi dan Betel. Senk an ti pase avan ki i ti konpran ki Zeova ti’n reponn son lapriyer. Janice i dir: “Zeova ti servi sa letan pour ansenny mwan e pour ed mwan vin en pli bon Kretyen. Mon ti bezwen annan plis konfyans dan li. Mon ti bezwen amelyor lafason ki mon ti etidye Labib. Mon ti osi bezwen aprann ki mon kapab zwaye nenport sirkonstans ki mon ladan.” Pli tar, msye Janice ti ganny envite pour servi konman sirveyan rezyonal. Ler Janice i reflesir lo sa senk an ki i’n priy Zeova, i dir: “Zeova ti reponn mon lapriyer menm si i pa ti dan sa fason ki mon ti pe ekspekte. I ti pran mwan en pe letan pour konpran ki sa larepons ki Zeova ti donn mwan, ti en zoli kado. Mon vreman rekonesan ki mon’n annan sa loportinite pour eksperyans lanmour ek labonte Zeova.”

15. Petet akoz nou bezwen fer nou lapriyer en pti pe pli zeneral? (Vwar portre.)

¹⁵ En trwazyenm kestyon ki nou kapab demande i ‘Eski mon devret pe priy pour en lot keksoz?’ Menm si i byen pour nou fer bann lapriyer spesifik, petet i ti pou pli byen pour fer nou lapriyer en pti pe pli zeneral. Annou vwar legzanp sa ser selibater ki ti pe priy Zeova konsernan asiste Lekol pour bann predikater Rwayonm. I anvi asiste sa lekol pour li kapab al servi kot i annan bezwen pour plis proklanmater. Alor menm si i pe priye pour li ganny envite pour al sa lekol, i osi kapab demann Zeova pour ed li vwar lezot fason ki i kapab fer plis dan son servis. (Akt 16:​9, 10) Apre i kapab azir an armoni avek son lapriyer par koz avek sirveyan rezyonal konsernan bann kongregasyon ki pros avek kot i reste ki bezwen plis pionye. Oubyen i kapab ekri biro brans pour demande kote i annan plis bezwen pour plis proklanmater.e

16. Ki nou kapab asire?

¹⁶ Parey nou’n aprann, nou kapab asire ki Zeova pou demontre lanmour ek lazistis ler i pe reponn nou lapriyer. (Ps. 4:3; Iza. 30:18) Parfwa nou pa ganny sa larepons ki nou anvi. Me Zeova pa pou zanmen inyor nou lapriyer. I kontan nou en kantite e i pa pou zanmen abandonn nou. (Ps. 9:10) Alor, “toultan annan konfyans dan li” e devid nou leker avek li.—Ps. 62:8.