Ki mannyer nou kapab amelyor nou lapriyer?

1. Ki Zeova i envit son bann serviter pour fer? (Vwar portre.)

KI NOU kapab fer ler nou bezwen rekonfor ek gidans? Nou konn larepons sa kestyon. Nou kapab koz avek Zeova dan lapriyer. Zeova i envit nou pour fer sa. Anfet, i anvi ki nou “toultan priye.” (1 Tesa. 5:17) Nou kapab koz avek Zeova dan lapriyer e demann li pour gid nou dan tou sa ki nou fer. (Prov. 3:5, 6) Zeova i zenere alor i dir ki nou kapab koz avek li dan lapriyer nenport kantite fwa ki nou anvi.

2. Ki nou pou vwar dan sa lartik?

² Zeova i permet nou pour koz avek li dan lapriyer. Sa i en kado ki nou vreman apresye. Me nou kapab vwar li difisil pour trouv letan pour priye parski nou annan bokou keksoz pour fer. I kapab ki nou osi santi ki nou bezwen amelyor nou lapriyer. Nou vreman kontan ki Labib i kapab donn nou konsey e ankouraz nou. Dan sa lartik, nou pou vwar ki nou kapab aprann avek legzanp Zezi konsernan ki mannyer nou kapab fer sir ki nou annan letan pour priye. Nou pou osi koz lo senk topik enportan ki nou kapab koz lo la dan nou lapriyer ki pou amelyor nou lapriyer.

ZEZI TI FER LETAN POUR PRIYE

3. Ki Zezi ti konpran konsernan lapriyer?

³ Zezi ti konpran ki nou lapriyer i vreman enportan pour Zeova. Bokou letan avan Zezi ti vin lo later, i ti vwar lafason ki son Papa ti reponn lapriyer bann zonm ek madanm fidel. Par egzanp, Zezi ti avek son Papa ler son Papa ti reponn lapriyer Ana, David, Eliya ek lezot serviter fidel. (1 Sam. 1:10, 11, 20; 1 Rwa. 19:4-6; Ps. 32:5) I pour sa rezon ki Zezi ti ansenny son bann disip pour fer lapriyer souvan e pour annan konfyans ki Zeova pe ekout zot.​—Mat. 7:7-11.

4. Ki nou aprann avek bann lapriyer Zezi?

⁴ Zezi in kit en legzanp pour son bann disip atraver lapriyer ki i ti fer. Ler Zezi ti lo later, i ti souvan priye. I ti bezwen fer letan pour priye parski souvandfwa i ti annan en kantite keksoz pour fer e i ti annan en kantite dimoun avek li. (Mark 6:31, 45, 46) I ti lev granmaten pour li kapab li tousel pour li priye. (Mark 1:35) En fwa, i ti priye tou lannwit avan ki i ti fer en desizyon enportan. (Lik 6:12, 13) Zezi ti priye plizyer fwa sa zour swar avan i ti mor, zis avan ki i ti konplet sa parti pli difisil dan son minister.​—Mat. 26:39, 42, 44.

5. Ki mannyer nou kapab swiv legzanp Zezi ler nou fer lapriyer?

⁵ Legzanp Zezi i montre nou ki menm si nou bizi, nou bezwen fer letan pour priye. Parey Zezi, i kapab ki nou pou bezwen plàn kan ki nou pou fer lapriyer. Petet nou pou bezwen lev boner oubyen dormi en pti pe pli tar aswar pour nou kapab fer lapriyer. Ler nou fer sa, nou montre Zeova ki nou apresye sa zoli kado. En ser ki apel Lynne i rapel ki mannyer i ti santi sa premye fwa ki i ti aprann konsernan sa privilez ki nou annan pour fer lapriyer. I rekonesan pour sa privilez. I dir: “Ler mon ti aprann ki mon kapab koz avek Zeova nenport ler, sa ti fer mwan vwar li konman mon bon zanmi e mon ti anvi amelyor mon lapriyer.” En kantite parmi nou i santi koumsa. Alor, annou vwar senk topik enportan ki nou kapab koz lo la dan nou lapriyer.

SENK TOPIK ENPORTAN KI NOU KAPAB KOZ LO LA DAN NOU LAPRIYER

6. Dapre Revelasyon 4:10, 11, ki Zeova i merite gannyen?

⁶ Loue Zeova. Dan en vizyon ekstraordiner, zapot Zan ti vwar 24 ansyen dan lesyel pe ador Zeova. Sa bann ansyen ti pe loue Bondye e zot ti dir ki i merite ganny “laglwar, loner ek pwisans.” (Lir Revelasyon 4:10, 11.) Bann lanz fidel osi i annan en kantite rezon pour loue Zeova. Zot dan lesyel avek Zeova e zot konn li byen. Zot vwar son bann kalite dan sa ki i fer. Ler zot vwar lafason ki Zeova i azir, sa i motiv zot pour loue li.​—Zob 38:4-7.

7. Konsernan kwa ki nou kapab loue Zeova?

⁷ Nou osi nou devret loue Zeova dan nou lapriyer. Nou kapab fer sa par eksprim nou lanmour ek lapresyasyon pour li dan nou lapriyer. Ler ou lir e etidye Labib, esey vwar bann kalite ki Zeova i annan ki ou vreman kontan. (Zob 37:23; Rom. 11:33) Apre dir Zeova ki mannyer ou santi konsernan sa bann kalite ki i annan. Nou kapab osi loue Zeova parski i ed nou e i ed nou bann frer ek ser osi. I toultan pe pran swen avek nou e pe protez nou.​—1 Sam. 1:27; 2:1, 2.

8. Ki serten rezon nou annan pour nou remersye Zeova? (1 Tesalonisyen 5:18)

⁸ Remersye Zeova. Nou annan en kantite rezon pour remersye Zeova dan lapriyer. (Lir 1 Tesalonisyen 5:18.) Nou kapab remersye li pour tou bann bon keksoz ki nou annan parski apre tou, tou bon kado i sorti kot li. (Zak 1:17) Par egzanp, nou kapab remersye li pour nou zoli plannet later e bann zoli keksoz ki i’n kree. Nou kapab osi remersye Zeova pour sa lavi ki i’n donn nou, pour nou fanmir, nou zanmi ek sa lespwar ki nou annan. Nou anvi remersye Zeova parski in permet nou pour annan en lanmitye avek li.

9. Akoz nou bezwen devlop lapresyasyon pour Zeova?

⁹ I kapab ki nou bezwen pran letan pour reflesir lo bann rezon akoz nou personnelman, nou rekonesan anver Zeova. En kantite dimoun ozordi pa rekonesan. Souvandfwa dimoun i konsantre zis lo ki mannyer zot kapab ganny sa ki zot anvi olye lo ki mannyer pour demontre lapresyasyon pour sa ki zot annan. Si nou konmans annan sa menm latitid, nou lapriyer i kapab vin zis konman en lalis bann keksoz ki nou anvi. Pour anpes sa arive, nou bezwen kontinyen devlop e demontre lapresyasyon pour tou sa ki Zeova in fer pour nou.​—Lik 6:45.

10. Ki mannyer ler en ser ti rekonesan, sa ti ed li pour andire? (Vwar portre.)

¹⁰ Ler nou rekonesan, sa i kapab ed nou pour andire ler nou annan problenm. Annou vwar leksperyans Kyung-sook. Leksperyans sa ser i dan Latour Veyer le 15 Zanvye 2015. Kyung-sook ti dekouver ki i ti ganny kanser poumon. I dir: “Sa problenm lasante ti fer mwan dekouraze. Mon ti santi konmsi mon ti’n perdi tou e mon ti vreman per.” Kwa ki ti ed li andire? I dir ki tou le swar avan i ti al dormi, i ti al anler lo twa son lakaz e i ti priy aotvwa lo senk keksoz ki i ti’n apresye pandan lazournen. Sa ti fer li pa tro enkyet e i ti motiv li pour eksprim son lanmour pour Zeova. Kyung-sook ti vwar ki Zeova i ed son bann serviter fidel ler zot pas dan bann difikilte e i ti realize ki i annan plis bon keksoz dan nou lavi ki bann problenm. Parey Kyung-sook, menm si nou dan problenm, nou annan en kantite rezon pour rekonesan anver Zeova. Ler nou eksprim nou rekonesans anver Zeova dan lapriyer, sa i kapab ed nou pour andire e pour reste kalm.

11. Akoz bann disip Zezi ti bezwen annan kouraz apre ki Zezi ti retourn dan lesyel?

¹¹ Demann Zeova pour donn ou kouraz dan predikasyon. Zis avan Zezi ti retourn dan lesyel, i ti fer son bann disip rapel konsernan zot responsabilite pour donn en temwannyaz konsernan li dan “Zerizalenm, partou dan Zide ek Samari e ziska dan bann landrwa pli elwannyen lo later.” (Akt 1:8; Lik 24:46-48) En pe letan pli tar, bann sef larelizyon Zwif ti tyonbo zapot Pyer ek Zan e anmenn zot devan Sannedren. Zot ti donn lord sa bann zonm fidel pour aret anons sa bon nouvel e zot ti menm menas zot. (Akt 4:18, 21) Ki mannyer Pyer ek Zan ti reazir?

12. Dapre Akt 4:29, 31, ki bann disip ti fer?

¹² Apre ki bann sef larelizyon Zwif ti’n menas zot, Pyer ek Zan ti dir: “Si zot krwar ki i byen devan Bondye pour ekout zot plito ki Bondye, zize zot menm. Me nou, nou pa kapab aret koz lo keksoz ki nou’n vwar e tande.” (Akt 4:19, 20) Ler Pyer ek Zan ti ganny large, bann disip ti fer lapriyer e zot ti demann Zeova pour ed zot fer son lavolonte. Zot ti dir: “Ed ou bann lesklav pour kontinyen anons ou parol avek lardyes.” Zeova ti reponn zot lapriyer.​—Lir Akt 4:29, 31.

13. Ki nou kapab aprann avek leksperyans Jin-hyuk?

¹³ Si gouvernman i donn nou lord pour aret fer sa travay predikasyon, nou kapab swiv legzanp bann disip par kontinyen fer sa travay. Annou vwar leksperyans en frer ki apel Jin-hyuk ki ti ganny met dan prizon akoz i pa ti oule pran kote dan bann zafer politik. Ler i ti dan prizon, i ti ganny sa responsabilite pour pran swen avek bann prizonnyen ki ti zot tousel dan en kaso. Jin-hyuk ti annan drwa koz avek zot zis konsernan bann keksoz ki zot ti bezwen. I pa ti annan drwa koz avek zot konsernan Labib. I ti demann Zeova pour donn li kouraz ek disernman pour ki i kapab servi tou loportinite ki i annan pour anons sa bon nouvel. (Akt 5:29) I dir: “Zeova ti reponn mon lapriyer. I ti donn mwan sa kouraz ek sa lasazes ki mon ti bezwen pour konmans bann letid Labib ki ti dire pour senk minit kot bann laport kaso. Sa menm zour swar, mon ti ekri bann let ki mon ti donn sa bann prizonnyen son lannmen.” Nou osi nou kapab asire ki Zeova pou ed nou fer sa travay predikasyon. Parey Jin-hyuk, nou kapab demann Zeova pour donn nou kouraz ek lasazes.

14. Kwa ki kapab ed nou ler nou annan problenm? (Psonm 37:3, 5)

¹⁴ Demann Zeova pour ed ou andire menm si ou annan problenm. En kantite nou pe soufer akoz en problenm lasante, bann problenm emosyonnel, en dimoun ki nou kontan in mor, en problenm fanmir, persekisyon ouswa akoz en lot kalite problenm. Osi, bann problenm parey pandemi ek lager in fer sa bann problenm vin pli difisil pour nou andire. Dir Zeova egzakteman ki mannyer ou pe santi. Koz avek li lo ou sityasyon zis parey ou ti pou koz avek en bon zanmi. Ou kapab asire ki Zeova pou ed ou.​—Lir Psonm 37:3, 5.

15. Ki mannyer lapriyer i ed nou pour andire ler nou dan problenm? Donn en legzanp.

¹⁵ Ler nou persevere dan lapriyer, sa pou ed nou andire ler nou “rankontre leprev.” (Rom. 12:12) Zeova i konnen ki problenm son bann serviter pe pas ladan e i “antann zot demann pour led.” (Ps. 145:18, 19) En pionye ki apel Kristie, ki annan 29 an, in vwar ki sa i vre. San ekspekte i ti konmans ganny problenm lasante. Sa ti fer li tonm dan en depresyon. Pli tar, i ti aprann ki son manman i annan en maladi grav ki ti pou touy li. Kristie i dir: “Mon ti priy Zeova e mon ti demann li pour donn mwan sa lafors ki mon ti bezwen sak zour. Mon ti esey swiv en routin spirityel par asiste renyon e fer letid personnel.” I osi dir: “Lapriyer ki ti ed mwan pour andire dan sa bann moman difisil. Mon ti konnen ki Zeova ti toultan la e sa ti rekonfort mwan en kantite. Menm si mon problenm lasante pa ti aret deswit, Zeova ti reponn mon lapriyer par fer mwan reste kalm e donn mwan lape lespri.” Annou pa zanmen oubliye ki “Zeova i konnen ki mannyer pour delivre dan leprev bann dimoun ki annan devosyon pour li.”​—2 Pyer 2:9.

16. Akoz nou bezwen led Zeova pour nou reziste tantasyon?

¹⁶ Demann Zeova pour ed ou reziste tantasyon. Vi ki nou enparfe, nou toultan bezwen lager avek sa tandans pour fer sa ki mal. Satan pe fer tou sa ki i kapab pour fer li difisil pour nou reziste tantasyon. En fason ki Satan i esey sali nou lespri i atraver bann divertisman imoral. Bann divertisman koumsa i fer nou annan bann move panse, setadir bann panse ki kapab fer nou vin enpir dan lizye Zeova e ki kapab fer nou fer pese grav.​—Mark 7:21-23; Zak 1:14, 15.

17. Apre ki nou’n demann Zeova pour ed nou reziste tantasyon, ki nou devret fer? (Vwar portre.)

¹⁷ Nou bezwen led Zeova si nou anvi reziste tantasyon. Zezi ti dir sa dan lapriyer model: “Pa les nou tonm dan tantasyon, me sov nou kont sa enn move.” (Mat. 6:13) Zeova i anvi ed nou me nou bezwen demann li led. Apre ki nou’n demann Zeova led, nou osi bezwen fer nou mye pour evit bann keksoz ki pou tant nou. Nou kapab fer nou mye pour evite lir e ekout bann nide ki popiler dan lemonn Satan e ki move. (Ps. 97:10) O kontrer, nou kapab lir e etidye Labib parski sa pou ed nou mazin bann bon keksoz. Ler nou asiste renyon e fer predikasyon, sa pou osi protez nou fason panse. An retour, Zeova i promet ki i pa pou les nou ganny tante plis ki nou kapab siporte.​—1 Kor. 10:12, 13.

18. Ki nou tou nou bezwen fer konsernan nou lapriyer?

¹⁸ Pandan sa bann dernyen zour, nou tou nou bezwen priy Zeova plis ankor pour nou kapab reste fidel. Fer letan toulezour pour fer bann lapriyer senser. Zeova i anvi ki nou ‘devid nou leker avek li.’ (Ps. 62:8) Loue Zeova e remersye li pour tou sa ki i fer. Demann li pour ed ou annan kouraz dan predikasyon. Sipliy li pour ed ou pour andire ler ou annan problenm e pour ed ou reziste tantasyon. Pa les nanryen e pa les personn anpes ou koz avek Zeova dan lapriyer toulezour. Me ki mannyer Zeova i reponn nou lapriyer? Nou pou vwar larepons sa kestyon enportan dan sa lartik ki swiv.