¿A womix baʼ wʌcʼ a bʌ ti Jehová?

1, 2. ¿Chuqui yom maʼ mel mi a womix chʼʌmjaʼ?

TI JIÑI joʼpʼejl jab ñumen bʌ tilel, ñumen ti 1 millón hermanojob an i chʼʌmʌyob jaʼ. Cabʌlob tsiʼ cʌñʌyob i sujmlel cheʼ bʌ chutobto (2 Tim. 3:14, 15). I an ñucobix bʌ tsiʼ cʌñʌyob Jehová o wen añobix i jabilel. Jumpʼejl ejemplo, juntiquil hermana tsiʼ chʼʌmʌ jaʼ cheʼ añix 97 i jabilel.

² Tajol an majqui woli (choncol) i yʌqʼueñet estudio, o tajol jiñi a papá a mamá i testigojob Jehová i jin woliʼ cʌntesañetob. Tajol añix a ñaʼta a chʼʌmjaʼ, i weñʌch jiñi. Pero an chuqui yom maʼ ñaxan mel: Maʼ wʌcʼ a bʌ ti Jehová. Ti ili estudio mi caj laj qʼuel chuqui yom i yʌl cheʼ mi la cʌcʼ lac bʌ ti Jehová. Cheʼ jaʼel, mi caj laj qʼuel chucoch mach yomic maʼ bʌcʼñan a wʌcʼ a bʌ ti Jehová yicʼot maʼ chʼʌmjaʼ mi chajpʌbiletix.

¿CHUQUI YOM I YɅL CHEʼ MI LA CɅCʼ LAC BɅ TI JEHOVÁ?

3. ¿Majqui tsiʼ yʌcʼʌyob i bʌ ti Jehová wajali?

³ Jiñi Biblia miʼ pʌs chaʼan cheʼ bʌ juntiquil miʼ yʌcʼ i bʌ ti Jehová tʼoxbilix o yajcʌbilix chaʼan jin jach miʼ melben i yeʼtel (troñel). Jumpʼejl ejemplo, jiñi tejclum Israel tsiʼ yʌcʼʌ i bʌ ti Jehová. Pero Jehová tsaʼto i yajca chaʼtiqui uxtiquil israelitajob chaʼan miʼ melob yambʌ eʼtel. Juntiquil jiñʌch Aarón, tsaʼ bʌ yajcʌnti chaʼan miʼ yochel bajcheʼ jiñi ñumen ñuc bʌ sacerdote. Jin chaʼan, yaʼ tiʼ pam jiñi i xojti i jol miʼ ñʌpʼbentel junwejl oro muʼ bʌ i pʌs chaʼan yajcʌbilix ti Jehová (Lv. 8:9). Cheʼ jaʼel, jiñi nazareojob an bajcheʼ tsiʼ yʌcʼʌyob i bʌ ti Jehová chaʼan miʼ melbeñob i yeʼtel. Jiñi tʼan nazareo tilem ti hebreo, i yom i yʌl «acʼbil bʌ» o «yajcʌbil bʌ». I jiñi Mandar miʼ yʌl chaʼan an tacʌch maʼañic bʌ miʼ mejlel i melob (Nm. 6:1-8).

4. a) ¿Chuqui yom i yʌl cheʼ mi la cʌcʼ lac bʌ ti Jehová? b) ¿Chuqui yom i yʌl cheʼ maʼañic mi lac bajñel sʌclan lac wenlel? (Qʼuele jaʼel jiñi dibujo).

⁴ Cheʼ mi la cʌcʼ lac bʌ ti Jehová yom i yʌl chaʼan mi lac sujtel ti xcʌntʼan i chaʼan Jesús yicʼot chaʼan tiʼ pejtelel ora ñaxan mi caj lac mel chuqui yom Dios. ¿Chuqui yom i yʌl jiñi? Jesús tsiʼ yʌlʌ: «Mi an majqui yom i tsajcañon, laʼ i cʌy i bajñel sʌclan i wenlel» (Mat. 16:24). Jiñi tʼan am bʌ ti griego muʼ bʌ i chaʼlentel ti traducir bajcheʼ «laʼ i cʌy i bajñel sʌclan i wenlel», miʼ mejlel ti chaʼlentel ti traducir jaʼel bajcheʼ «laʼ i suben i bʌ chaʼan maʼañic». Jin chaʼan, cheʼ mi la cʌcʼ lac bʌ ti Jehová, mi laj cʌy pejtelel maʼañic bʌ miʼ mulan (2 Cor. 5:14, 15). Yaʼ ochem jaʼel jiñi «i melbal tac lac bʌcʼtal», bajcheʼ jiñi tsʼiʼlel (Gál. 5:19-21; 1 Cor. 6:18). ¿Wocol ba ti melol? Maʼañic mi mucʼʌch a cʼuxbin Jehová yicʼot maʼ ñop chaʼan jiñi muʼ bʌ i subeñonla chaʼañʌch a wenlel (Sal. 119:97; Is. 48:17, 18). Juntiquil hermano i cʼabaʼ Nicholas miʼ yʌl: «Miʼ mejlel a qʼuel i jacʼol i mandar tac Jehová bajcheʼ jumpʼejl cárcel muʼ bʌ i mʌctañet a mel chuqui a wom. O bajcheʼ jumpʼejl zoológico joy mʌcʌl bʌ, pero chaʼan miʼ cʌntañet ti jiñi añimal tac jontol bʌ (simaron bʌ)».

5. a) ¿Bajcheʼ mi la cʌcʼ lac bʌ ti Jehová? b) ¿Chucoch mach lajalic yicʼot jiñi chʼʌmjaʼ? (Qʼuele jaʼel jiñi foto tac).

⁵ ¿Bajcheʼ mi la cʌcʼ lac bʌ ti Jehová? Jiñʌch cheʼ mi lac mel jumpʼejl oración baqui mi lac suben chaʼan jin jach mi caj lac chʼujutesan yicʼot mi caj lac melben i yeʼtel come jiñʌch jiñi ñumen ñuc bʌ i cʼʌjñibal. Lajal bajcheʼ woli (yʌquel) lac suben Jehová chaʼan mi caj laj cʼuxbin tiʼ pejtelel lac pusicʼal, laj cuxtʌlel, lac ñaʼtʌbal yicʼot lac pʼʌtʌlel (Mar. 12:30). Cheʼ bʌ mi la cʌcʼ lac bʌ ti Jehová maʼañic majqui yambʌ miʼ qʼuel, cojach la cujil joñonla yicʼot Jehová. Pero cheʼ mi lac chʼʌmjaʼ jiñi yambʌ lac piʼʌlob miʼ qʼuelob i miʼ ñaʼtañob chaʼan tsaʼix la cʌcʼʌ lac bʌ ti Jehová. Cheʼ mi la cʌcʼ lac bʌ ti Jehová yomʌch mi lac wen qʼuel ti ñuc i yomʌch mi lac tsʼʌctesan lac tʼan, jiñʌch muʼ bʌ i pijtan jaʼel (Ec. 5:4, 5).

¿CHUQUI MI CAJ I COLTAÑET CHAʼAN MAʼ MULAN A WɅCʼ A BɅ TI JEHOVÁ?

6. ¿Chuqui miʼ coltan juntiquil chaʼan miʼ yʌcʼ i bʌ ti Jehová?

⁶ Jiñi cʼuxbiya jiñʌch muʼ bʌ caj i coltañet chaʼan maʼ wʌcʼ a bʌ ti Jehová. Ili cʼuxbiya mach cheʼ jach miʼ waʼ tilel, miʼ colel cheʼ bʌ maʼ cʌn majlel Jehová, maʼ «cʌn ti tsʼʌcʌl chuqui yom» yicʼot maʼ «chʼʌmben i sujm jiñi i chaʼan tac bʌ Dios» (Col. 1:9). Cheʼ bʌ tsaʼ pejca jiñi Biblia tsaʼ cʼoti a ñop chaʼan 1) añʌch Dios, 2) chaʼan jin tsiʼ yʌcʼʌ ti tsʼijbuntel jiñi Biblia, yicʼot 3) chaʼan an jumpʼejl organización muʼ bʌ i cʼʌn chaʼan miʼ mel chuqui yom.

7. ¿Mi a wom a wʌcʼ a bʌ ti Jehová chuqui yom maʼ mel?

⁷ Mi woli a ñaʼtan a wʌcʼ a bʌ ti Jehová, yom i yʌl chaʼan muqʼuix a chʼʌmben i sujm muʼ bʌ i pʌs jiñi Biblia, chaʼan woli a jacʼ yicʼot chaʼan wolix a suben yambʌyob jiñi woli bʌ a cʌn (Mat. 28:19, 20). Cheʼ jaʼel, maʼ wen cʼuxbin Jehová i ti jumpʼejl a pusicʼal a wom a chʼujutesan. ¿Cheʼʌch ba maʼ wubin a bʌ? Mi cheʼʌchi mi caj a wʌcʼ a bʌ ti Jehová yicʼot mi caj a chʼʌmjaʼ come maʼ wen cʼuxbin, mach chaʼañic a wom a tijicñesan jiñi woli bʌ i yʌqʼueñet estudio. I mi xcolelet, maʼañic mi caj a mel chaʼan jach a wom a tijicñesan a papá a mamá o chaʼan cheʼ woliʼ melob jiñi a wamigojob.

8. ¿Chuqui yambʌ mi caj i coltañet chaʼan maʼ wʌcʼ a bʌ ti Jehová i chucoch? (Salmo 116:12-14).

⁸ Junchajp muʼ bʌ caj i ñijcañet chaʼan maʼ wʌcʼ a bʌ ti Jehová jiñʌch cheʼ maʼ ñaʼtan pejtelel am bʌ i mele ti a tojlel i maʼ qʼuel ti ñuc (pejcan Salmo 116:12-14). Jiñi Biblia miʼ yʌl chaʼan «pejtelel wem bʌ yicʼot toj bʌ majtañʌl» tilem ti Jehová (Sant. 1:17). Jiñi ñumen wem bʌ lac majtan jiñʌch cheʼ tsiʼ yʌcʼʌ i Yalobil chaʼan mi laj coltʌntel. Ili miʼ coltañonla chaʼan mi lac mejlel ti sujtel tiʼ yamigo Jehová yicʼot mi lac chumtʌl tiʼ pejtelel ora (1 Juan 4:9, 10, 19). Jin chaʼan, cheʼ bʌ mi la cʌcʼ lac bʌ tiʼ tojlel jiñʌch jiñi ñumen wem bʌ bajcheʼ mi lac pʌs chaʼan mi laj qʼuel ti ñuc pejtelel am bʌ i mele ti lac tojlel chaʼan i cʼuxbiya (Dt. 16:17; 2 Cor. 5:15). Jiñʌch muʼ bʌ i taj ti tʼan jiñi cʌntesʌntel 46, punto 4, ti jiñi libro Ubin a tijicñʌyel baqui miʼ tilel jiñi video Muʼ bʌ i mejlel la cʌqʼuen Dios.

¿CHAJPɅBILETIX BA CHAʼAN MAʼ WɅCʼ A BɅ TI JEHOVÁ YICʼOT MAʼ CHʼɅMJAʼ?

9. ¿Chucoch mach xicʼbilonla yom mi la cubin lac bʌ chaʼan mi la cʌcʼ lac bʌ ti Jehová?

⁹ Tajol maʼ ñaʼtan chaʼan maxto chajpʌbiletic chaʼan maʼ wʌcʼ a bʌ ti Jehová i maʼ chʼʌmjaʼ. Tajol come anto chuqui yom maʼ qʼuextan ti a cuxtʌlel o yomto maʼ ñumen pʼʌtʼesan a ñopoñel (Col. 2:6, 7). Pero cʼajtesan chaʼan mach junlajalic miʼ cʼotel laj cʼuxbin Jehová. An maxto bʌ jalic i cajelob ti estudio i miʼ ñaʼtañob chaʼan muqʼuix caj i yʌcʼob i bʌ ti Jehová. Cheʼ jaʼel, an xcolelob ñumen sejelto bʌ i jabilelob miʼ yʌcʼob i bʌ ti Jehová i an mach bʌ cheʼiqui. Jin chaʼan mach a laj a bʌ a wicʼot yambʌlob i ñaʼtan jach chuqui yom bʌ maʼ weñʼesan o yom bʌ maʼ qʼuextan (Gál. 6:4, 5).

10. ¿Mi maxto chajpʌbiletic maʼ wubin chuqui yom maʼ mel? (Qʼuele jaʼel jiñi recuadro «Mi Testigojob jiñi a papá a mamá»).

¹⁰ Mi tsaʼ qʼuele chaʼan maxto chʌjpʌbiletic, bej chaʼlen wersa. Cʼajtiben Jehová chaʼan miʼ coltañet a weñʼesan yomto bʌ maʼ qʼuel (Filip. 2:13; 3:16). Miʼ mejlel a ñop chaʼan mi caj i ñʌchʼtañet yicʼot mi caj i coltañet (1 Juan 5:14).

¿CHUCOCH AN MAXTO BɅ YOMOBIC I YɅCʼOB I BɅ TI JEHOVÁ?

11. ¿Bajcheʼ mi caj i coltañonla Jehová chaʼan xucʼul mi la cajñel?

¹¹ An chajpʌbilobix bʌ chaʼan miʼ yʌcʼob i bʌ ti Jehová i miʼ chʼʌmob jaʼ, pero maʼañic miʼ melob come tajol miʼ bʌcʼñañob chaʼan mi caj i chaʼleñob mulil i mi caj i chaʼlentelob ti expulsar. Pero jiñi Biblia miʼ yʌl chaʼan Jehová mi caj i yʌqʼuen i cʼʌjñibal bʌ i chaʼan jiñi i wiñicob chaʼan miʼ melob chuqui wen i cheʼ bajcheʼ jiñi miʼ yʌqʼueñob i tijicñʌyel (Col. 1:10). Jin chaʼan, miʼ mejlel a ñop chaʼan Jehová mi caj i yʌqʼueñet a pʼʌtʌlel chaʼan maʼ mel chuqui wem bʌ. Añix i colta yambʌlob, jin chaʼan mach cabʌlobic expulsado bʌ miʼ loqʼuelob (1 Cor. 10:13). Tiʼ coltaya Jehová xucʼul mi caj a wajñel.

12. ¿Chuqui mi caj i coltañonla chaʼan maʼañic mi lac chaʼlen mulil?

¹² An i tajol miʼ tilel ti lac pusicʼal chaʼan mi lac mel mach bʌ weñic come xmulilonla. Pero jiñi mach yomic i yʌl chaʼan cheʼʌch mi caj lac mel, come joñonla mi lac ñaʼtan mi mucʼʌch caj lac mel o maʼañic (Sant. 1:14). An muʼ bʌ i yʌlob chaʼan maʼañic miʼ mejlel lac ticʼ lac bʌ, pero jiñi mach i sujmic. Miʼ mejlel laj cʌn lac ticʼ bajcheʼ yubil mi la cubin lac bʌ yicʼot muʼ bʌ lac mel. ¿Chuqui mi caj i coltañonla? Jiñʌch cheʼ mi lac chaʼlen oración, mi lac pejcan jiñi Biblia, mi lac majlel ti tempa bʌ yicʼot mi lac chaʼlen subtʼan. Mi mucʼʌch lac mel pejtelel iliyi pʼʌtʌl mi caj la cajñel i mi caj lac tsʼʌctesan lac tʼan. Cheʼ jaʼel, mach lac bajñelic, Jehová miʼ coltañonla (Gál. 5:16).

13. ¿Chuqui mi laj cʌn tiʼ tojlel José?

¹³ Junchajp muʼ bʌ caj i coltañonla chaʼan maʼañic mi lac yajlel ti mulil jiñʌch cheʼ mi lac wʌn ñaʼtan chuqui mi caj lac mel. Jiñi Biblia miʼ yʌl tiʼ tojlel tsaʼ bʌ i meleyob bajcheʼ jiñi i xucʼul tsaʼ ajñiyob ti Jehová anquese xmulilob. Juntiquil jiñʌch José. Jiñi i yijñam Potifar mach junsujtelic jach tiʼ sube chaʼan miʼ piʼlen, pero José yujilix bajcheʼ mi caj i jacʼ. Jiñi Biblia miʼ yʌl chuqui tsiʼ yʌlʌ: «¿Bajcheʼ mi mejlel c chaʼlen jini ñuc bʌ mulil? ¿Bajcheʼ mi mejlel c chaʼlen mulil tiʼ contra Dios?» (Gn. 39:8-10). Iliyi miʼ pʌs chaʼan José wʌn ñaʼtʌbilix i chaʼan bajcheʼ mi caj i jacʼ. Jin chaʼan mach wocolic tsiʼ yubi chaʼan maʼañic miʼ jacʼ jiñi woli bʌ i subentel.

14. ¿Chuqui mi caj i coltañonla chaʼan maʼañic mi lac mel tsʌts bʌ mulil?

¹⁴ ¿Bajcheʼ miʼ mejlel lac lajin José i xucʼul mi la cajñel? Jiñʌch cheʼ mi lac wʌn ñaʼtan chuqui mi caj lac mel cheʼ bʌ miʼ tilel jumpʼejl wocol muʼ bʌ i mejlel i yʌcʼonla ti mulil. Ti orajach yom mi la cʌl chaʼan maʼañic, mi yomicto mi lac ñaʼtan chaʼyaj uxyajl (Sal. 97:10; 119:165). Jiñʌch muʼ bʌ caj i coltañonla chaʼan maʼañic mi lac yajlel ti tsʌts bʌ mulil, come cheʼ bʌ miʼ tilel jiñi wocol la cujilix chuqui mi caj lac mel.

15. ¿Bajcheʼ miʼ mejlel a pʌs chaʼan woli a chaʼlen wersa a sʌclan Jehová? (Hebreos 11:6).

¹⁵ Tajol a wujilix chaʼan tsaʼix a taja i sujmlel i a wom a melben i yeʼtel Jehová tiʼ pejtelel a pusicʼal. Pero ¿am ba chuqui woliʼ mʌctañet chaʼan maʼ mel jiñi? Mi cheʼʌchi, miʼ mejlel a mel cheʼ bajcheʼ jiñi rey David i maʼ suben Jehová: «Tsajiñon, Dios. Qʼuelbeñon c pusicʼal. Cʌmbeñon c pensar. Qʼuele mi an c sajtemal. Pʌyʌyon majlel tiʼ bijlel j cuxtʌlel mach bʌ anic miʼ jilel» (Sal. 139:23, 24). Cheʼ bʌ maʼ chaʼlen wersa chaʼan maʼ wʌcʼ a bʌ ti Jehová i maʼ chʼʌmjaʼ mi caj a pʌs chaʼan woli a chaʼlen wersa a sʌclan. I jiñi Biblia miʼ yʌl chaʼan muʼ bʌ i melob bajcheʼ jiñi miʼ yʌqʼuentelob bendición (pejcan Hebreos 11:6).

CHɅN LɅCʼTESAN A BɅ TI JEHOVÁ

16, 17. ¿Bajcheʼ miʼ pʌy tilel Jehová jiñi xcolelob Testigojobix bʌ i papá i mamá? (Juan 6:44).

¹⁶ Jesús tsiʼ yʌlʌ chaʼan Jehová jiñʌch muʼ bʌ i pʌy tilel lac piʼʌlob tiʼ tejclum (pejcan Juan 6:44). ¡Wen utsʼatax iliyi! ¿Chucoch? Ñaʼtancu, Jehová an chuqui wem bʌ miʼ qʼuel tiʼ tojlel jujuntiquil muʼ bʌ i pʌy ochel tiʼ tejclum. Jujuntiquil muʼ bʌ i melben i yeʼtel i chaʼañix miʼ qʼuel, wen cʼuxbibil i chaʼan, i yaʼ ochemet jaʼel (Dt. 7:6).

¹⁷ Pero mi jiñi a papá a mamá woliʼ cʌntesañetob, tajol maʼ ñaʼtan chaʼan yaʼañet ti congregación pero mach chaʼañic Jehová tsiʼ pʌyʌyet ochel. Mach cheʼic bajcheʼ jiñi. Tiʼ tojlel Jehová mach yambʌyet jach yaʼ ti congregación, yaʼañet come jin tsiʼ pʌyʌyet ochel anquese jiñi a papá a mamá Testigojobix. Jehová ti jujuntiquil miʼ pʌyonla tilel. I jiñi Biblia miʼ yʌl: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Sant. 4:8; 1 Cr. 28:9). Ili yom i yʌl chaʼan mi jatet ñaxan maʼ lʌcʼtesan a bʌ tiʼ tojlel, Jehová mi caj i lʌcʼtesan i bʌ ti a tojlel jaʼel (laja iliyi yicʼot muʼ bʌ i yʌl 2 Tesalonicenses 2:13).

18. ¿Chuqui mi caj laj qʼuel ti yambʌ estudio? (Salmo 40:8).

¹⁸ Cheʼ tsiʼ chʼʌmʌ jaʼ Jesús, tiʼ sube i Tat chaʼan mi caj i mel chuqui yom (pejcan Salmo 40:8; Heb. 10:7). Cheʼ bʌ jatet maʼ wʌcʼ a bʌ ti Jehová i maʼ chʼʌmjaʼ mi caj a lajin Jesús. Ti jiñi yambʌ estudio mi caj laj qʼuel chuqui mi caj i coltañet chaʼan maʼ bej melben i yeʼtel Jehová cheʼ bʌ tsaʼix a chʼʌmʌ jaʼ.