Chʌn tsajcan Jesús cheʼ bʌ tsaʼix a chʼʌmʌ jaʼ

1, 2. Cheʼ bʌ juntiquil miʼ chʼʌmjaʼ, ¿chuqui ti bendición tac miʼ taj?

CHEʼ bʌ juntiquil miʼ chʼʌmjaʼ miʼ yochel tiʼ familia Jehová, i wen tijicña miʼ yubin come miʼ ñumen lʌcʼtesan i bʌ tiʼ tojlel. Tajol cheʼ miʼ yubin i bʌ cheʼ bajcheʼ miʼ yʌl jiñi Salmo 65:4: «Tijicña muʼ bʌ a yajcan. Maʼ pʌy chaʼan miʼ chumtʌl ti awotot».

² Jehová miʼ wen qʼuel majqui miʼ yotsan tiʼ familia. Jin jach miʼ lʌcʼtesan i bʌ tiʼ tojlel muʼ bʌ i pʌsob chaʼan yomobʌch sujtel tiʼ yamigo (Sant. 4:8). Cheʼ bʌ juntiquil miʼ yʌcʼ i bʌ ti Jehová i miʼ chʼʌmjaʼ, miʼ pʌs chaʼan lʌcʼʌlʌch yom ajñel tiʼ tojlel. Jin chaʼan, Jehová miʼ yʌcʼ i tʼan: «Mi caj c jambeñetla jini panchan chaʼan mi cʌqʼueñetla pejtel chuqui laʼ wom» (Mal. 3:10; Jer. 17:7, 8).

3. ¿Chuqui yom bʌ mi lac mel pejtelel tsaʼix bʌ la cʌcʼʌ lac bʌ ti Jehová yicʼot tsaʼ lac chʼʌmʌ jaʼ? (Eclesiastés 5:4, 5).

³ Cheʼ mi lac chʼʌmjaʼ i tejchibal jaxto. ¿Chucoch? Come yomʌch mi caj lac tsʼʌctesan jiñi tʼan tsaʼ bʌ la cʌcʼʌ, mach yʌlʌyic mi tsaʼ tili wocol tac ti laj cuxtʌlel o i yilʌntel lac pusicʼal (pejcan Eclesiastés 5:4, 5). Cheʼ jaʼel yomʌch mi lac chʌn tsajcan Jesús yicʼot mi lac jacʼ muʼ bʌ i subeñonla (Mat. 28:19, 20; 1 Ped. 2:21). Ili estudio mi caj i coltañonla chaʼan miʼ mejlel lac mel.

CHɅN TSAJCAN JESÚS ANQUESE AN I TAJOL WOCOLɅCH MAʼ WUBIN

4. ¿Chuqui yom i yʌl cheʼ mi lac chʼʌm majlel jiñi «teʼ chaʼan bʌ wocol»? (Lucas 9:23).

⁴ Mach a ñaʼtan chaʼan cheʼ bʌ tsaʼix a chʼʌmʌ jaʼ junyajl maʼañix mi caj a ñusan wocol. Jesús tiʼ sube jiñi xcʌntʼañob i chaʼan: «Mi an majqui yom i tsajcañon [ . . . ] laʼ i chʼʌm ti jujumpʼejl qʼuin i teʼ chaʼan bʌ wocol» (pejcan Lucas 9:23). ¿Yom ba i yʌl Jesús ilayi chaʼan tiʼ pejtelel ora wocol jax mi caj lac ñusan? Maʼañic. Yom i bʌ i yʌl jiñʌch chaʼan anquese mucʼʌch caj lac taj bendición tac, pero mi caj lac ñusan wocol tac jaʼel, an i tajol tsʌts tac bʌ wocol (2 Tim. 3:12).

5. ¿Chuqui tac ti bendición miʼ tajob jiñi ñaxam bʌ miʼ yʌcʼob i chaʼan bʌ Jehová?

⁵ Tajol jatet tsaʼix a taja tsʼaʼlentel ti a familia o añix chuqui tac tsaʼ cʌyʌ chaʼan ñaxan maʼ wʌcʼ i chaʼan bʌ Jehová (Mat. 6:33). Mi cheʼ bajcheʼ jiñi, miʼ mejlel a ñop chaʼan Jehová yujil pejtelel am bʌ a mele tiʼ tojlel (Heb. 6:10). I tajol tsaʼix a qʼuele bajcheʼ miʼ tsʼʌctiyel ti a tojlel tsaʼ bʌ i yʌlʌ Jesús: «Maʼañic majqui tsaʼ bʌ i cʌyʌ i yotot, i yuscuñob, i chichob, i yijtsʼiñob, i ñaʼ, i tat, i yalobilob o i lum tij caj yicʼot tiʼ caj jiñi wen tʼan mach bʌ añic mi caj i taj wʌle, ti ili ora, 100 i ñumelal i yotot, i yuscuñob, i chichob, i yijtsʼiñob, i ñaʼ, i yalobilob yicʼot i lum, anquese an i contrajintel i ti talto bʌ ora i cuxtʌlel mach bʌ yujilic jilel» (Mar. 10:29, 30). Jiñi bendición tac am bʌ a taja ñumento bajcheʼ pejtelel am bʌ a cʌyʌ (Sal. 37:4).

6. ¿Chucoch yomʌch maʼ bej chaʼlen wersa chaʼan maʼañic maʼ mel chuqui yom a bʌcʼtal cheʼ bʌ tsaʼix a chʼʌmʌ jaʼ?

⁶ Cheʼ bʌ mi lac chʼʌmjaʼ mach yomic i yʌl chaʼan tojoñixla, yomʌch mi caj lac chaʼlen wersa chaʼan maʼañic mi lac mel chuqui yom lac bʌcʼtal (1 Juan 2:16). Tajol cheʼ mi caj a wubin bajcheʼ jiñi apóstol Pablo cheʼ bʌ tsiʼ yʌlʌ: «Tic pusicʼal mic wen mulan i mandar Dios, pero tic bʌcʼtal mij qʼueleʼ yambʌ mandar muʼ bʌ i contrajin jiñi mandar am bʌ tic ñaʼtʌbal i miʼ cʌchon tiʼ mandar jiñi mulil am bʌ tic bʌcʼtal» (Rom. 7:22, 23). Tajol chʼijyem maʼ wubin a bʌ come a wujil chaʼan yom maʼ chaʼlen wersa chaʼan maʼañic maʼ mel mach bʌ weñic. Pero cheʼ maʼ ñaʼtan jiñi tʼan tsaʼ bʌ a wʌqʼue Jehová cheʼ bʌ muʼto caj a chʼʌmjaʼ mi caj i yʌqʼueñet a pʼʌtʌlel chaʼan maʼañic maʼ chaʼlen mulil. Tiʼ sujm, cheʼ mi la cʌcʼ lac bʌ ti Jehová mach wen wocolic mi la cubin chaʼan maʼañic mi lac yajlel ti mulil. ¿Chucoch?

7. ¿Chucoch miʼ coltañonla chaʼan xucʼulonla ti Jehová cheʼ tsaʼ la cʌcʼʌ lac bʌ tiʼ tojlel?

⁷ Cheʼ mi la cʌcʼ lac bʌ ti Jehová woli (choncol) la cʌl chaʼan maʼañix mi caj lac mel o mi caj lac sʌclan chuqui bajñel la com, ñumento mi jin maʼañic bʌ miʼ mulan Jehová (Mat. 16:24). Jin chaʼan cheʼ bʌ mi lac taj jumpʼejl wocol mejl bʌ i yʌcʼonla ti mulil, maʼañic mi caj lac wen ñaʼtan chuqui yom mi lac mel. La cujilix chaʼan junchajp jach yom bʌ mi lac mel: Yom xucʼulonla ti Jehová i mi lac mel chuqui miʼ mulan. Cheʼ bʌ tsaʼ la cʌcʼʌ lac bʌ ti Jehová tsaʼ la cʌlʌ chaʼan mi caj laj cʌy pejtelel jiñi yan tac bʌ. Cheʼ bajcheʼ ili mi caj lac lajin Job, anquese tsiʼ ñusa tsʌts tac bʌ wocol, tsiʼ yʌlʌ: «Cʼʌlʌlto mic chʌmel mux c sub maʼanic c mul», yom bʌ i yʌl, jiñʌch chaʼan chʌn xucʼul tsaʼ ajñi (Job 27:5).

8. ¿Chucoch miʼ coltañonla chaʼan maʼañic mi lac yajlel ti mulil cheʼ mi lac ñaʼtan jiñi lac tʼan tsaʼ bʌ la cʌcʼʌ?

⁸ Cheʼ mi lac wen ñaʼtan chaʼan tsaʼ la cʌcʼʌ lac tʼan chaʼan mi caj lac mel chuqui yom Jehová, mi caj i yʌqʼueñonla lac pʼʌtʌlel chaʼan maʼañic mi lac mel muʼ bʌ i mejlel i pʌyonla ti mulil. Jumpʼejl ejemplo, maʼañic mi lac ñiqʼui mulan o mi lac pʌs chaʼan mi lac mulan juntiquil ñujpuñemix bʌ, come cheʼ tsaʼ la cʌcʼʌ lac bʌ ti Jehová lajal bajcheʼ tsaʼ la cʌlʌ chaʼan maʼañic mi caj lac mel jiñi. Jin chaʼan, ti wiʼil maʼañic mi caj la cubin wocol come maʼañic mi caj lac ñiqʼui acʼ ti colel ti lac pusicʼal chuqui mach bʌ weñic. Ti wiʼil, maʼañic mi caj la cubin wocol tiʼ caj jiñi. Cheʼ bajcheʼ jiñi, maʼañic mi caj lac chaʼlen xʌmbal tiʼ bijlel jontoloʼ bʌ (mañajoʼ bʌ) (Pr. 4:14, 15).

9. ¿Chucoch miʼ coltañonla chaʼan ñaxan mi lac chʌn acʼ Jehová cheʼ mi lac ñaʼtan jiñi tʼan tsaʼ bʌ la cʌcʼʌ?

⁹ ¿Ixcu mi tsaʼ subentiyonla jumpʼejl eʼtel (troñel) muʼ bʌ i mʌctañonla chaʼan mi lac majlel ti tempa bʌ? Tsiquil chuqui yom bʌ mi lac mel. Cheʼ bʌ maxto subentiyonla jiñi eʼtel wʌn ñaʼtʌbilix lac chaʼan chaʼan maʼañic mi caj lac chʼʌm. Lajal bajcheʼ jiñʌch tsaʼ bʌ la cʌlʌ cheʼ tsaʼ la cʌcʼʌ lac bʌ ti Jehová. Mi tsaʼ lac chʼʌmʌ jiñi eʼtel tajol ti wiʼil muʼto caj lac poj sʌclan chuqui mi lac mel chaʼan ñaxan mi la cʌcʼ Jehová, pero wocolix mi caj la cubin. Jiñi ejemplo chaʼan Jesús miʼ mejlel i coltañonla. Cheʼ bajcheʼ Jesús, joñonla jaʼel maʼañic mi caj lac mel maʼañic bʌ miʼ mulan Jehová come tsaʼix la cʌcʼʌ lac bʌ tiʼ tojlel (Mat. 4:10; Juan 8:29).

10. ¿Bajcheʼ mi caj i coltañonla Jehová chaʼan mi lac chʌn tsajcan Jesús cheʼ bʌ tsaʼix lac chʼʌmʌ jaʼ?

¹⁰ Cheʼ mi lac ñusan wocol tac yicʼot mi laj qʼuelbentel lac pusicʼal, miʼ mejlel lac pʌs mi la comʌch lac chʌn tsajcan Jesús. Cheʼ jaʼel, Jehová miʼ yʌl chaʼan mi caj i coltañonla. Jiñi Biblia miʼ yʌl: «Dios xucʼulʌch i maʼañic mi caj i yʌcʼ chaʼan mi laʼ qʼuelbentel laʼ pusicʼal baqui jaxʌl maʼañix miʼ mejlel laʼ lʌtʼ, i cheʼ bʌ mi laʼ qʼuelbentel laʼ pusicʼal mi caj i yʌqʼueñetla laʼ loqʼuib jaʼel chaʼan miʼ mejlel laʼ cuch» (1 Cor. 10:13).

MUʼ BɅ MEJLEL A MEL CHAʼAN MAʼ CHɅN TSAJCAN JESÚS

11. ¿Baqui bʌ junchajp mi caj i wen coltañonla chaʼan mi lac chʌn tsajcan Jesús? (Qʼuele jaʼel jiñi foto tac).

¹¹ Jesús tsiʼ melbe i yeʼtel Jehová ti jumpʼejl i pusicʼal, i jiñi oración tsiʼ colta chaʼan chʌn lʌcʼʌl miʼ yajlel tiʼ tojlel (Luc. 6:12). Junchajp muʼ bʌ caj i wen coltañonla chaʼan mi lac chʌn tsajcan Jesús jiñʌch cheʼ mi lac ñʌmtesan lac bʌ chaʼan mi lac mel muʼ bʌ i ñumen lʌcʼtesañonla ti Jehová i maʼañic mi laj cʌy lac mel. Jiñi Biblia miʼ yʌl: «Mach yʌlʌyic bajcheʼix cʼamel lac taja laj colel, toj yom mi lac bej chaʼlen xʌmbal ti jin jach bʌ bij» (Filip. 3:16). Tajol la cujil tiʼ tojlel hermanojob am bʌ i ñumen melbeyob i yeʼtel Jehová. Tajol tsaʼ majliyob ti Escuela chaʼan evangelizadores o ti jumpʼejl congregación o ti jumpʼejl territorio baqui ñumen yomto xsubtʼañob. ¿Muʼ baʼ mejlel a mel jaʼel jiñi? Mi cheʼʌchi, aqʼuen a bʌ jiñi meta. Jiñi i wiñicob Jehová tiʼ pejtelel ora miʼ sʌclañob bajcheʼ miʼ mejlel i ñumen melbeñob i yeʼtel Dios (Hech. 16:9). Pero ¿ixcu mi maʼañic maʼ mejlel? Mach a ñaʼtan chaʼan maʼañix a cʼʌjñibal. Ñuc bʌ i cʼʌjñibal jiñʌch cheʼ maʼ lʌtʼ tiʼ melol i yeʼtel Dios (Mat. 10:22). Cʼajtesan, Jehová tijicña miʼ yubin cheʼ maʼ wʌqʼuen jiñi ñumen wem bʌ jiñʌch bajcheʼ cʼamel miʼ mejlel a mel. Cheʼ bajcheʼ jiñi, mi caj i mejlel a bej tsajcan Jesús cheʼ bʌ tsaʼix a chʼʌmʌ jaʼ (Sal. 26:1).

12, 13. ¿Chuqui yom maʼ mel mi wolix a sʌt a tijicñʌyel tiʼ melol i yeʼtel Dios? (1 Corintios 9:16, 17; qʼuele jiñi recuadro «Muʼ bʌ i mejlel a mel chaʼan maʼ melben i yeʼtel Dios»).

¹² ¿Ixcu mi jiñi a woración mach loqʼuemix ti a pusicʼal maʼ wubin i maʼañix maʼ wubin a tijicñʌyel ti subtʼan yicʼot cheʼ maʼ pejcan jiñi Biblia? Mi cheʼ bajcheʼ jiñi, mach a ñaʼtan chaʼan maʼañix a wicʼot i yespíritu Jehová. Come xmulilonla, i tilelʌch cheʼ an i tajol maʼañic chuqui la com mi la cubin. Mi tsaʼ wubi chaʼan wolix (yʌquelix) a sʌt a tijicñʌyel, jiñi ejemplo chaʼan jiñi apóstol Pablo miʼ mejlel i coltañet. Tsaʼʌch i chaʼle wersa chaʼan miʼ tsajcan Jesús, pero yujil chaʼan an i tajol mi caj i cʼuñʼan jaʼel (pejcan 1 Corintios 9:16, 17). Jin chaʼan tsiʼ yʌlʌ: «Anquese mach comic, yomʌch mic mel come tsaʼ waʼchocontiyon chaʼan mic mel». Ili miʼ pʌs chaʼan Pablo yomʌch i tsʼʌctesan i yeʼtel, mach yʌlʌyic bajcheʼ woliʼ yubin i bʌ.

¹³ Cheʼ bajcheʼ Pablo, mach a wʌcʼ chaʼan jiñi bajcheʼ maʼ wubin a bʌ miʼ mʌctañet chaʼan maʼ mel chuqui yom bʌ maʼ mel. Mele chuqui wem bʌ anquese an i tajol mach a womic a mel. Ti wiʼil, jiñi muʼ bʌ a mel mi caj i coltañet chaʼan miʼ qʼuextʌyel bajcheʼ maʼ wubin a bʌ. Jin chaʼan, chaʼlen wersa chaʼan maʼ pejcan jiñi Biblia, chaʼan maʼ mel oración, chaʼan maʼ majlel ti tempa bʌ yicʼot maʼ chaʼlen subtʼan. Ili mi caj i coltañet chaʼan maʼ chʌn tsajcan Jesús cheʼ bʌ tsaʼix a chʼʌmʌ jaʼ. Cheʼ jaʼel, jiñi wem bʌ ejemplo muʼ bʌ a pʌs mi caj i coltan jiñi yambʌ hermanojob (1 Tes. 5:11).

«CHɅN TSAJIN LAʼ BɅ»

14. ¿Chuqui tac yom bʌ maʼ bixel tsajin, i chucoch? (2 Corintios 13:5).

¹⁴ Cheʼ bʌ tsaʼix a chʼʌmʌ jaʼ weñʌch cheʼ bʌ maʼ bixel locʼsʌben i yorajlel chaʼan maʼ tsajin a melbal (chaʼlibal) yicʼot bajcheʼ yilal añet (pejcan 2 Corintios 13:5). Miʼ mejlel a qʼuel mi wolʌch a chʌn chaʼlen oración ti jujumpʼejl qʼuin, mi mucʼʌch a pejcan jiñi Biblia yicʼot mi maʼañic woli a cʌy a bʌ ti tempa bʌ yicʼot subtʼan. Sʌclan bajcheʼto miʼ mejlel a ñumen locʼsʌben i wenlel pejtelel iliyi yicʼot maʼ ñusan a bʌ. Cʼajtiben a bʌ: «¿Cujilix ba tsictesʌntel muʼ bʌ i yʌl jiñi Biblia? ¿Chuqui miʼ mejlel c mel chaʼan ñumen tijicña mic ñusan ti subtʼan? ¿Jamʌ tsiquil ba chuqui mij cʼajtin ti coración i tsiquil ba chaʼan mucʼʌch c ñop ti Jehová? ¿Muʼ ba c chaʼlen wersa chaʼan maʼañic mic sʌt jiñi tempa bʌ? ¿Chuqui miʼ mejlel c mel chaʼan mic xucʼchocon c pusicʼal ti tempa bʌ yicʼot mic ñumen weñʼesan j comentario?».

15, 16. ¿Chuqui maʼ cʌn tiʼ tojlel Robert?

¹⁵ Cheʼ mi lac bixel tsajin lac bʌ (qʼuel lac bʌ) miʼ coltañonla chaʼan mi laj qʼuel baqui bʌ laj cʼunlel. Tsaʼ bʌ ujti tiʼ tojlel Robert miʼ pʌsbeñonla chucoch ñucʌch i cʼʌjñibal. Robert miʼ yʌl: «Cheʼ 20 c jabilel mic chaʼlen eʼtel ojlil qʼuin. Jumpʼejl bʌ qʼuin, juntiquil xchʼoc c piʼʌl bʌ ti eʼtel tiʼ subeyon majlel tiʼ yotot, tsiʼ yʌlʌ chaʼan tijicña mi caj lon c ñusan come maʼañic majqui an tiʼ yotot. Ti ñaxan, tsaʼto c joyo c tʼan chaʼan mi cʌqʼuen i ñaʼtan chaʼan maʼañic, pero ti wiʼil tsaʼ c jamʌ sube chaʼan maʼañic i tsaʼ c tsictesʌbe chucoch». Robert weñʌch tsiʼ mele come maʼañic tsiʼ jacʼʌ i mel muʼ bʌ i mejlel i pʌy ti mulil. Pero cheʼ tsiʼ chaʼ ñaʼta jiñi tsaʼ bʌ ujti, an chuqui tsiʼ cʌñʌ. Miʼ yʌl: «Mach cheʼic tsaʼ c mele bajcheʼ José come mach ti orajic tsaʼ cʌlʌ chaʼan maʼañic (Gn. 39:7-9). Maʼañic tsaʼ c ñaʼta chaʼan wocolʌch mi caj cubin chaʼan mic suben chaʼan maʼañic. Jiñi tsaʼ bʌ ujti tsiʼ pʌsbeyon chaʼan yom mic ñumen lʌcʼtesan c bʌ ti Jehová chaʼan xucʼul mi cajñel».

¹⁶ Ñaʼtancu chaʼan maʼ subentel a mel mach bʌ weñic i maʼañic maʼ jacʼ. Pero ¿ixcu cheʼ muqʼuic a mel bajcheʼ Robert? Cʼajtiben a bʌ: «¿Ti ora ba tsaʼ cʌlʌ chaʼan maʼañic?». Mi anto yom maʼ weñʼesan maʼ wubin mach a wubin a chʼijyemlel. Weñʌch cheʼ tsaʼ cʼoti a qʼuel baqui bʌ jiñi a cʼunlel. Cʼajtiben i coltaya Jehová i chaʼlen wersa chaʼan maʼ pʼʌtʼesan a bʌ i maʼ mel chuqui miʼ mulan Jehová (Sal. 139:23, 24).

17. Cheʼ bajcheʼ miʼ pʌs tsaʼ bʌ ujti tiʼ tojlel Robert, ¿baqui bʌ i wenlel cheʼ xucʼulonla ti Jehová?

¹⁷ Cheʼ bʌ Robert tiʼ sube jiñi xchʼoc chaʼan maʼañic mi caj i majlel yicʼot, miʼ yʌl chuqui tsaʼ bej ujti: «Cheʼ bʌ tsaʼ c sube chaʼan maʼañic, jiñi xchʼoc tsiʼ yʌlʌ: ‹Maʼañic tsaʼ yajliyet›. Joñon tsaʼ j cʼajtibe chuqui yom i yʌl, cheʼ jiñi tsiʼ yʌlʌ chaʼan juntiquil i yamigo Testigo bʌ wajali, tiʼ sube chaʼan pejtelel jiñi xcolelob Testigojoʼ bʌ orajach mi caj i melob mach bʌ weñic cheʼ mucʼʌch i mejlelob miʼ yubin. Jin chaʼan, jiñi xchʼoc tsiʼ yʌlʌ chaʼan mi caj i qʼuel tic tojlel miʼ sujmʌch. ¡Wen tijicña mi cubin come maʼañic tsaʼ c bibʼesʌbe i cʼabaʼ Jehová!».

18. ¿Chuqui a wom a bej mel cheʼ tsaʼix a chʼʌmʌ jaʼ? (Qʼuele jiñi recuadro «Chaʼpʼejl tema muʼ bʌ caj i coltañet»).

¹⁸ Cheʼ maʼ wʌcʼ a bʌ ti Jehová yicʼot maʼ chʼʌmjaʼ maʼ pʌs chaʼan a wom a sʌqʼuesʌben i cʼabaʼ Jehová, mach yʌlʌyic chuqui tac maʼ ñusan. Miʼ mejlel a ñop chaʼan Jehová miʼ qʼuel jiñi wocol tac muʼ bʌ a ñusan yicʼot chuqui tac yom i jisʌbeñet a xucʼtʌlel. Miʼ qʼuel bajcheʼ maʼ chaʼlen wersa i mi caj i yʌqʼueñet i bendición. Jehová mi caj i cʼʌn i yespíritu chaʼan miʼ yʌqʼueñet a pʼʌtʌlel ti melol chuqui wen (Luc. 11:11-13). Tiʼ coltaya Jehová, mucʼʌch a mejlel a chʌn tsajcan Jesús cheʼ bʌ tsaʼix a chʼʌmʌ jaʼ.