Laʼ la cʌqʼuen i ñuclel Jehová

1. ¿Chuqui miʼ melob cabʌl lac piʼʌlob ili ora?

¿AM BAʼ qʼuele chaʼan cabʌl lac piʼʌlob jin jach miʼ bajñel pensariñob i bʌ i maʼañix miʼ ñaʼtañob yañoʼ bʌ? Jumpʼejl ejemplo, an muʼ bʌ i cʼʌñob jiñi internet chaʼan miʼ pʌsob bajcheʼ yilalob o chuqui tac an i meleyob. Pero mach cabʌlic lac piʼʌlob miʼ yʌqʼueñob i ñuclel Jehová. Ti ili estudio mi caj laj qʼuel chuqui yom i yʌl cheʼ mi la cʌqʼuen i ñuclel Jehová i chucoch yomʌch mi lac mel. Cheʼ jaʼel, mi caj laj cʌn bajcheʼ miʼ mejlel la cʌqʼuen i ñuclel, i mach jalix yom chaʼan miʼ yʌcʼ ti ñuc i cʼabaʼ.

¿CHUQUI YOM I YɅL CHEʼ MI LA CɅQʼUEN I ÑUCLEL JEHOVÁ?

2. ¿Bajcheʼ tsiʼ pʌsʌ Jehová i ñuclel yaʼ ti wits Sinaí? (Qʼuele jaʼel jiñi dibujo).

² Jiñi Biblia miʼ yʌl chaʼan Jehová jiñʌch jiñi ñuc bʌ Dios. Cheʼ bʌ Jehová tsiʼ locʼsa jiñi israelitajob ti Egipto, cabʌl bajcheʼ tsiʼ pʌsʌ i ñuclel. Laʼcu lac ñaʼtan: Yonlel israelitajob yaʼ waʼalob tiʼ yebal jiñi wits Sinaí chaʼan miʼ ñʌchʼtʌbeñob i tʼan Dios. Cheʼ jiñi miʼ tilel jumpʼejl colem tocal yaʼ tiʼ pam jiñi wits, miʼ ñijcan i bʌ jiñi lum i miʼ tech loqʼuel butsʼ, lemlaw i cʼʌcʼal jiñi chajc (Éx. 19:​16-18; 24:17; Sal. 68:8). Tsiquil miʼ pʌs chaʼan jiñi israelitajob tsaʼ toj sajtiyob i pusicʼal cheʼ bʌ tsiʼ qʼueleyob i ñuclel Jehová.

3. ¿Bajcheʼ miʼ mejlel la cʌqʼuen i ñuclel Jehová?

³ ¿Ixcu joñonla? ¿Muʼ ba i mejlel la cʌqʼuen i ñuclel Jehová? Mucʼʌch. Junchajp bajcheʼ mi la cʌqʼuen i ñuclel jiñʌch cheʼ mi lac suben yambʌlob bajcheʼ an i cʼʌñʌ i pʼʌtʌlel chaʼan miʼ mel (pʌt) pejtelel chuqui an yicʼot bajcheʼ yilal bʌ Dios. Yambʌ jiñʌch cheʼ mi la cʌqʼuen wocolix i yʌlʌ chaʼan pejtelel chuqui mi lac mel, come yicʼotʌch i coltaya miʼ mejlel lac mel (Is. 26:12). Juntiquil tsaʼ bʌ i yʌqʼue i ñuclel Jehová jiñʌch jiñi rey David. Ti jumpʼejl oración tsaʼ bʌ i mele, tsiʼ yʌlʌ: «A chaʼañʌch a ñuclel yicʼot a pʼʌtʌlel, yicʼot a cʼuxbintel, yicʼot a yumʌntel, yicʼot pejtelel chubʌʼañʌl. Come laj a chaʼañʌch ti panchan yicʼot ti pañimil». Cheʼ bʌ tsaʼ ujti i mel jiñi oración, «pejtelel israelob tsaʼ caji i subeñob i ñuclel lac Yum» (1 Cr. 29:​11, 20).

4. ¿Bajcheʼ tsiʼ yʌqʼue i ñuclel Jehová jiñi Jesús?

⁴ Cheʼ bʌ Jesús tsajñi wʌʼ ti pañimil (mulawil) tsaʼʌch i yʌqʼue i ñuclel Jehová. Jumpʼejl ejemplo, cheʼ bʌ tsiʼ mele milagro tac tsiʼ yʌlʌ chaʼan tiʼ pʼʌtʌlelʌch Jehová tsiʼ mele (Mar. 5:​18-20). Cheʼ jaʼel, pejtelel chuqui tsiʼ yʌlʌ yicʼot bajcheʼ yilal tiʼ tojlel jiñi lac piʼʌlob tsiʼ yʌqʼue i ñuclel Jehová. Ti jumpʼejl bʌ qʼuin cheʼ bʌ woli (choncol) ti cʌntesa yaʼ ti sinagoga tsiʼ taja i qʼuel juntiquil xʼixic añix bʌ 18 jab cajel i ñusan wocol. Come juntiquil jontol bʌ espíritu tsaʼ ochi tiʼ tojlel i tiʼ caj jiñi cʼuchulix i pat miʼ chaʼlen xʌmbal. ¡Wen wocolʌch woliʼ ñusan! Jin chaʼan, cheʼ bʌ Jesús tsiʼ qʼuele ti uts jach bʌ tʼan tiʼ sube: «Xʼixic, tsaʼix cʼoqʼuesʌntiyet ti jiñi a cʼamʌjel». Cheʼ bʌ Jesús tsiʼ yʌcʼʌ i cʼʌb tiʼ tojlel jiñi xʼixic ti orajach tsaʼ tojʼa i pat «cheʼ jiñi tsaʼ caji i yʌqʼuen i ñuclel Dios» (Luc. 13:​10-13). Ili xʼixic chaʼ cʼoqʼuix i weñix miʼ qʼuejlel ti lac piʼʌlob, jin chaʼan añʌch chucoch yom miʼ yʌqʼuen i ñuclel Jehová. Cheʼ jaʼel, joñonla añʌch chucoch yomʌch mi la cʌqʼuen i ñuclel Jehová.

¿CHUCOCH YOM MI LA CɅQʼUEN I ÑUCLEL JEHOVÁ?

5. ¿Chucoch yom mi laj qʼuel ti ñuc Jehová?

⁵ Mi la cʌqʼuen i ñuclel Jehová come mi lac wen qʼuel ti ñuc. Jehová maʼañic i pʼisol i pʼʌtʌlel (Sal. 96:​4-7). Wen an i ñaʼtʌbal, tsiquil ti jiñi melbil tac bʌ i chaʼan. An i yʌqʼueyonla laj cuxtʌlel yicʼot pejtelel i cʼʌjñibal bʌ lac chaʼan (Apoc. 4:11). Juntiquilʌch Dios xucʼul bʌ (Apoc. 15:4). Pejtelel muʼ bʌ i mel luʼ toj miʼ mel, i miʼ tsʼʌctesan i tʼan (Jos. 23:14). Jin chaʼan jiñi xʼaltʼan Jeremías tsiʼ yʌlʌ: «Come Reyet ti pejtelel tejclum tac. Maʼanic yambʌ, jatet jach» (Jer. 10:​6, 7). Ili miʼ pʌs chaʼan cabʌlʌch chucoch yom mi laj qʼuel ti ñuc Jehová yicʼot mi laj cʼuxbin.

6. ¿Chucoch mi laj cʼuxbin Jehová?

⁶ Mi la cʌqʼuen i ñuclel Jehová come mi laj cʼuxbin tiʼ pejtelel lac pusicʼal. Jehová wen yujil pʼuntaya (Sal. 103:13; Is. 49:15). Cʼux miʼ yubin cheʼ bʌ mi lac ñusan wocol (Zac. 2:8). Miʼ coltañonla chaʼan mi lac lʌcʼtesan lac bʌ tiʼ tojlel i mi lac sujtel tiʼ yamigo (Sal. 25:14; Hech. 17:27). Cheʼ jaʼel, miʼ pʌs i pecʼlel i «miʼ juʼsan i wut chaʼan miʼ qʼuel panchan yicʼot pañimil. Miʼ locʼsan pobre baʼ cʼax pʼumpʼun» (Sal. 113:​6, 7). Tiʼ sujm Jehová wen utsʼatax ti lac tojlel, jin chaʼan miʼ cʼotel laj cʼuxbin. ¿Mach ba muqʼuic lac mulan la cʌqʼuen i ñuclel juntiquil Dios cheʼ bʌ yilal i melbal bajcheʼ ili? (Sal. 86:12).

7. ¿Chuqui muʼ bʌ i mejlel lac mel?

⁷ Mi la cʌqʼuen i ñuclel Jehová come la com chaʼan jiñi yambʌ lac piʼʌlob miʼ cʌñob. Cabʌl lac piʼʌlob miʼ yʌlob mach bʌ weñic tiʼ tojlel Dios. ¿Chucoch? Come Satanás an i yʌlʌ lot tac tiʼ tojlel i an i mʌcbeyob i ñaʼtʌbal jiñi lac piʼʌlob (2 Cor. 4:4). An i yʌcʼʌ ti ñaʼtʌntel chaʼan Jehová jontol yicʼot miʼ yʌqʼueñonla lac toj lac mul. Pero joñonla la cujil chaʼan mach i sujmic jiñi. La com la cʌqʼuen i ñaʼtan jiñi lac piʼʌlob majqui Dios yicʼot bajcheʼ yilal, cheʼ bajcheʼ jiñi mi la cʌqʼuen i ñuclel (Is. 43:10). Mi caj laj qʼuel versículo tac am bʌ ti Salmo 96 muʼ bʌ i yʌqʼuen i ñuclel Jehová. Iliyi mi caj i coltañonla chaʼan mi la cʌqʼuen i ñuclel Jehová cheʼ bajcheʼ yom.

¿BAJCHEʼ MIʼ MEJLEL LA CɅQʼUEN I ÑUCLEL JEHOVÁ?

8. ¿Bajcheʼ yambʌ mi la cʌqʼuen i ñuclel Jehová? (Salmo 96:​1-3).

⁸ (Pejcan Salmo 96:​1-3). Jiñi muʼ bʌ la cʌl tiʼ tojlel Jehová miʼ mejlel i yʌqʼuen i ñuclel. Ili versículo tac miʼ subeñonla chaʼan yom mi laj cʼʌyin Jehová, mi lac sub jiñi wen tʼan chaʼan bʌ coltʌntel yicʼot mi la cʌcʼ ti cʌñol jiñi i ñuclel ti tejclum tac, pejtelel iliyi miʼ yʌqʼuen i ñuclel Jehová. Jiñi i wiñicob Jehová ti wajali tsaʼʌch i yʌcʼʌyob ti cʌñol majqui Jehová yicʼot chuqui tsaʼ bʌ i mele Jehová tiʼ tojlelob (Dn. 3:​16-18; Hech. 4:29). ¿Bajcheʼ miʼ mejlel lac lajiñob?

9, 10. ¿Chuqui mi laj cʌn tiʼ tojlel Angelina? (Qʼuele jaʼel jiñi foto).

⁹ Laʼ laj qʼuel bajcheʼ tsiʼ pʌsʌ i chʼejlel juntiquil hermana chʼoyol bʌ ti Estados Unidos i cʼabaʼ Angelinaa yicʼot bajcheʼ tsiʼ ñuqʼuesʌbe i cʼabaʼ Jehová tiʼ yeʼtel (troñel). Cheʼ bʌ maxto jali ochi ti eʼtel tsaʼ subentiyob chaʼan pejtelel jiñi tsijiʼobto bʌ miʼ tempañob i bʌ chaʼan miʼ ñumen cʌñob i bʌ. Angelina tsiʼ ñaʼta i subeñob jiñi i piʼʌlob chaʼan i testigo Jehová i tsiʼ yajca foto tac chaʼan miʼ pʌsbeñob. Pero jiñi i piʼʌl ti eʼtel tsaʼ bʌ ujti ti tʼan cheʼ bʌ muʼto i cajel ti tʼan Angelina, tsiʼ yʌlʌ chaʼan tsaʼ coli bajcheʼ i testigo Jehová, pero mach weñic tsaʼ bʌ i yʌlʌ tiʼ tojlel jiñi Testigojob. Angelina miʼ yʌl: «Tsaʼ wen cajiyon ti bʌqʼuen, muqʼuix caj i loqʼuel c pusicʼal tsaʼ cubi. Pero tsaʼ j cʼajtibe c bʌ: ‹¿Chuqui yom mic mel? ¿Muʼ ba caj coltan Jehová o cheʼ jach mi caj c ñʌchʼtan?›».

¹⁰ Cheʼ bʌ jiñi i piʼʌl ti eʼtel tsaʼ ujti ti tʼan, Angelina tsiʼ mucu mele jumpʼejl oración, cheʼ jiñi tsiʼ yʌlʌ: «Yubil lʌcʼʌl lajal bajcheʼ tsaʼ coliyonla. Joñon tsaʼ coliyon jaʼel ti jumpʼejl familia baqui Testigojob i cʼʌlʌ ili ora bej Testigojon». Cheʼ jiñi pejtelel jiñi i piʼʌlob ti eʼtel tsaʼ cajiyob ti tʼan, pero Angelina maʼañic chuqui tsiʼ yʌlʌ. Ti wiʼil tsaʼ caji i pʌsbeñob foto tac baqui an yicʼot i yamigojob i tijicña woli (yʌquel) i melbeñob i yeʼtel Jehová, i tsaʼ caji i tsictesʌbeñob majquiyob jiñi Testigojob (1 Ped. 3:15). Cheʼ bʌ Angelina tsaʼ ujti ti tʼan jiñi i piʼʌl ti eʼtel qʼuexelix bajcheʼ yilal, i tsaʼto i yʌlʌ chaʼan i sujmʌch, cabʌlʌch chuqui utsʼatax bʌ tsiʼ ñusa jaʼel wajali. Angelina miʼ yʌl: «Wen utsʼatax cheʼ miʼ mejlel laj coltʌben i cʼabaʼ Jehová». Joñonla jaʼel an lac chaʼan jiñi ñuc bʌ privilegio chaʼan mi laj cʌcʼ ti ñuc jiñi i cʼabaʼ Jehová yicʼot chaʼan mi laj coltan cheʼ bʌ miʼ yʌjlel chuqui mach bʌ i sujmic tiʼ tojlel.

11. ¿Bajcheʼ an i jacʼʌyob jiñi i wiñicob Dios cʼʌlʌl wajali muʼ bʌ i yʌl Salmo 96:8?

¹¹ (Pejcan Salmo 96:8). Miʼ mejlel la cʌqʼuen i ñuclel Jehová cheʼ bʌ mi la cʌcʼ chuqui an lac chaʼan. Jiñʌch am bʌ i meleyob i wiñicob Dios cʼʌlʌl wajali (Pr. 3:9). Jumpʼejl ejemplo, jiñi israelitajob tsiʼ yʌcʼʌyob taqʼuin chaʼan miʼ mejlel jiñi templo yicʼot miʼ sʌqʼuesʌntel (2 R. 12:​4, 5; 1 Cr. 29:​3-9). Jiñi xcʌntʼañob i chaʼan Jesús tsiʼ cʼʌñʌyob chuqui añob i chaʼan chaʼan miʼ yʌqʼueñob chuqui i cʼʌjñibal i chaʼan Jesús yicʼot jiñi apóstolob (Luc. 8:​1-3). I ti jiñi ñaxam bʌ siglo jiñi xcʌntʼañob tsiʼ yʌqʼueyob chuqui i cʼʌjñibal i chaʼañob jiñi hermanojob woli bʌ i ñusañob wocol (Hech. 11:​27-29). Ili ora jaʼel miʼ mejlel la cʌqʼuen i ñuclel Jehová cheʼ bʌ mi la cʌcʼ jiñi lac donación.

12. ¿Bajcheʼ mi la cʌqʼuen i ñuclel Jehová ti lac donación? (Qʼuele jaʼel jiñi foto).

¹² Laʼ laj qʼuel junchajp bajcheʼ jiñi lac donación miʼ mejlel i yʌqʼuen i ñuclel Jehová. Cheʼ ti 2020, ti Zimbabue tsaʼ ñumi tsʌts bʌ jajmeñal, tiʼ caj jiñi, yonlel lac piʼʌlob colel i chʌmelob ti wiʼñal (o colel i sajtelob). Cheʼʌch tsiʼ ñusa jaʼel juntiquil hermana i cʼabaʼ Prisca. Anquese wen wocol woliʼ ñusan, ti jujumpʼejl miércoles yicʼot viernes miʼ loqʼuel ti subtʼan, anquese i yorajlel chaʼan miʼ topʼob lum chaʼan miʼ chaʼleñob pacʼ maʼañic tsiʼ cʌyʌ subtʼan. Cheʼ bʌ jiñi i piʼʌlob ti chumtʌl miʼ qʼuelob chaʼan woli ti subtʼan, miʼ subeñob: «¡Mi caʼ chʌmel ti wiʼñal!». Pero jiñi hermana miʼ subeñob: «Jehová maʼañic baʼ i bajñel cʌyʌ i wiñicob». Pero mach jalic tsaʼ ñumi i jiñi organización tsiʼ chocbe cʼotel bʌlñʌcʼʌl jiñi hermana. Cheʼ bʌ jiñi i piʼʌlob ti chumtʌl tsiʼ qʼueleyob, tsiʼ yʌlʌyob: «Machʌchcu añic miʼ cʌyet jiñi a Dios. Com lon c ñumen cʌn tiʼ tojlel». I siete lac piʼʌlob tsaʼ cajiyob ti majlel ti tempa bʌ.

13. Cheʼ bajcheʼ miʼ yʌl Salmo 96:​9, ¿bajcheʼ miʼ mejlel la cʌqʼuen i ñuclel Jehová ti lac melbal?

¹³ (Pejcan Salmo 96:9). Miʼ mejlel la cʌqʼuen i ñuclel Jehová ti lac melbal. Jiñi sacerdotejob ti wajali yom sʌcob cheʼ muʼto caj i yochelob i mel i yeʼtel yaʼ ti templo (Éx. 40:​30-32). Joñonla jaʼel yom sʌconla ti lac bʌcʼtal, pero ñumen ñuc bʌ i cʼʌjñibal jin cheʼ wen lac melbal (chaʼlibal) tiʼ wut Dios (Sal. 24:​3, 4; 1 Ped. 1:​15, 16). Yom mi laj cʌy jiñi ñoxix bʌ lac melbal i mi lac pʌs jiñi tsijiʼ bʌ lac melbal. Ili yom i yʌl, chaʼan mi lac tojʼesan lac pensar yicʼot bajcheʼ yilalonla, i mi lac pʌs jiñi utsʼatax bʌ i melbal Jehová (Col. 3:​9, 10). Tiʼ coltaya Jehová jiñi jontoloʼ bʌ (mañajoʼ bʌ) yicʼot jiñi bibiʼ jax bʌ i melbalob miʼ mejlel i qʼuextañob i melbal.

14. ¿Chuqui mi laj cʌn tiʼ tojlel Jack? (Qʼuele jaʼel jiñi foto).

¹⁴ Laʼ laj qʼuel tsaʼ bʌ ujti tiʼ tojlel Jack, juntiquil wiñic wen jontol bʌ (simaron bʌ) i tsaʼto i yʌlʌyob chaʼan añix i xibʌjlel. Tiʼ caj pejtelel tsaʼ bʌ i mele tsaʼ otsʌnti ti cárcel, i jiñi sentencia tsaʼ bʌ aqʼuenti jiñʌch chaʼan miʼ tsʌnsʌntel. Pero cheʼ wolito i pijtan chaʼan miʼ cʼotel i yorajlel chaʼan miʼ tsʌnsʌntel, tsaʼ caji ti estudio i tsaʼ caji i qʼuextan jiñi i melbal. Ti wiʼil tsiʼ chʼʌmʌ jaʼ, Jack tsaʼʌch i wen qʼuexta i melbal i yambʌlix tsaʼ sujti. Jin chaʼan, cheʼ bʌ muqʼuix caj i tsʌnsʌntel, jiñi guardiajob tsaʼto cajiyob ti uqʼuel. I juntiquil muʼ bʌ i cʌntan jiñi cárcel tsiʼ yʌlʌ: «Ti ñaxan, Jack jiñʌch jiñi wen jontol bʌ. Pero tsaʼ sujti ti wem bʌ lac piʼʌl». I cheʼ bʌ añix jumpʼejl semana i tsʌnsʌntel, jiñi hermanojob muʼ bʌ i cʼotelob i melob tempa bʌ yaʼ ti cárcel tsiʼ taja i qʼuelob juntiquil wiñic maʼañic bʌ baʼ i qʼueleyob. ¿Chucoch yaʼañi? Come yom i cʌn chuqui tsiʼ colta Jack chaʼan miʼ qʼuextan i melbal i yom i ñaʼtan chuqui yom miʼ mel jaʼel chaʼan miʼ chʼujutesan Jehová. Tsiquil chaʼan jiñi lac melbal miʼ yʌqʼuen i ñuclel Jehová (1 Ped. 2:12).

¿BAJCHEʼ MI CAJ I YɅCʼ TI ÑUC I CʼABAʼ JEHOVÁ?

15. ¿Chuqui mi caj i mel Jehová chaʼan miʼ yʌcʼ ti ñuc jiñi i cʼabaʼ? (Salmo 96:​10-13).

¹⁵ (Pejcan Salmo 96:​10-13). Tiʼ yujtibal jiñi Salmo 96 miʼ yʌl chaʼan Jehová jiñʌch jiñi Rey muʼ bʌ i mel chuqui toj. Jin chaʼan, cheʼ bʌ miʼ chaʼlen meloñel mi caj i yʌcʼ ti ñuc i cʼabaʼ. Lʌcʼʌlix mi caj i mel ili, mi caj i jisan jiñi ñopbalʌl tac am bʌ i bibʼesʌbe i cʼabaʼ (Apoc. 17:​5, 16; 19:​1, 2). Cheʼ bʌ mi caj i qʼuelob chaʼan miʼ jisʌntel jiñi mach bʌ i sujmic ñopbalʌl tac an muʼ bʌ caj i mulañob i chʼujutesañob Jehová yicʼotonla. Ti Armagedón Jehová mi caj i jisan pejtelel muʼ bʌ i contrajiñob, i miʼ bibʼesʌbeñob i cʼabaʼ. Jehová cojach cuxul mi caj i cʌy jiñi muʼ bʌ i cʼuxbiñob, muʼ bʌ i jacʼbeñob i tʼan yicʼot miʼ yʌqʼueñob i ñuclel (Mar. 8:38; 2 Tes. 1:​6-10). Jehová mi caj i yujtel i junyajl acʼ ti ñuc i cʼabaʼ cheʼ bʌ miʼ yujtel jiñi Mil jab i Yumʌntel Cristo (Apoc. 20:​7-10). Ti jimbʌ ora, ili pañimil mi caj i bujtʼel tiʼ ñaʼtʌbal lac Yum Jehová (Hab. 2:14).

16. ¿Chuqui jiñi muʼ bʌ i mejlel a mel jatet? (Qʼuele jaʼel jiñi dibujo).

¹⁶ ¡Wen utsʼatax miʼ cajel cheʼ bʌ ti lac pejtelel mi caj la cʌqʼuen i ñuclel i cʼabaʼ Jehová cheʼ bajcheʼ yom! Pero cheʼ wolito lac pijtan, ili ora mucʼʌch i mejlel la cʌcʼ ti cʌjñel majqui jiñi lac Dios yicʼot chuqui an i mele. Chaʼan mi lac chʌn ñaʼtan chaʼan ñucʌch i cʼʌjñibal ili, jiñi Junmojt muʼ bʌ i pʌsob bij tsiʼ yajcayob jiñi Salmo 96:8 bajcheʼ jiñi texto chaʼan jabil 2025: «Subenla i ñuclel i cʼabaʼ lac Yum come cheʼʌch yom».