Jehová tijicña miʼ qʼuelet

1. ¿Chuqui miʼ mejlel i ñaʼtañob chaʼtiqui uxtiquil?

UTSʼATAX cheʼ la cujil chaʼan Jehová «tijicña miʼ qʼuel i chaʼañoʼ bʌ» (Sal. 149:4). Pero tajol an muʼ bʌ i yubiñob i chʼijyemlel i miʼ ñaʼtañob: «Jehová utsʼatʌch miʼ qʼuel jiñi i tejclum, pero ¿mach cujilic mi utsʼatʌch miʼ qʼuelon jaʼel?». Ti wajali an i wiñicob Jehová tsaʼ bʌ i ñaʼtayob jaʼel chaʼan Jehová mach utsʼatic miʼ qʼuelob (1 S. 1:6-10; Job 29:1, 2, 4; Sal. 51:11).

2. ¿Majqui jiñi utsʼat bʌ miʼ qʼuejlelob ti Jehová?

² Jiñi Biblia wen tsiquil miʼ pʌs chaʼan anquese xmulilonla Jehová utsʼat miʼ mejlel i qʼuelonla. ¿Bajcheʼ? Jiñʌch cheʼ mi lac ñop Jesucristo yicʼot mi lac chʼʌmjaʼ (Juan 3:16). Cheʼ bajcheʼ jiñi mi lac pʌs chaʼan tsaʼix laj cʌyʌ pejtelel mach bʌ weñic yicʼot chaʼan mi caj lac mel chuqui yom Jehová (Hech. 2:38; 3:19). Cheʼ mi lac mel iliyi Jehová tijicña miʼ yubin come miʼ qʼuel chaʼan la com sujtel tiʼ yamigo. I cheʼ mucʼʌch lac chaʼlen wersa lac tsʼʌctesan lac tʼan tsaʼ bʌ la cʌqʼue, utsʼat miʼ qʼuelonla i miʼ chʌn ajñel bajcheʼ la camigo (Sal. 25:14).

3. ¿Chuqui tac ti cʼajtiya mi caj i jajqʼuel ti ili estudio?

³ Pero ¿chucoch an i tajol an muʼ bʌ i ñaʼtañob chaʼan mach utsʼatic miʼ qʼuejlelob ti Dios? ¿Bajcheʼ miʼ pʌsbeñonla Jehová chaʼan utsʼatʌch miʼ qʼuelonla? ¿I chuqui mi caj i coltañonla lac ñop chaʼan cheʼʌchi?

¿CHUCOCH AN MUʼ BɅ I ÑAʼTAÑOB CHAʼAN MACH UTSʼATIC MIʼ QʼUEJLELOB TI JEHOVÁ?

4, 5. Anquese mi lac ñaʼtan chaʼan maʼañic laj cʼʌjñibal, ¿chuqui miʼ mejlel lac ñop?

⁴ Cabʌlonla muʼ bʌ lac ñaʼtan chaʼan maʼañic laj cʼʌjñibal (Sal. 88:15). Juntiquil hermano i cʼabaʼ Adrián miʼ yʌl: «Tiʼ pejtelel ora an c ñaʼta chaʼan maʼañic j cʼʌjñibal. Cheʼ bʌ chutonto tsaʼ j cʼajtibe Jehová chaʼan laʼ i yʌcʼ chaʼan jiñi c familia miʼ yajñel yaʼ ti Paraíso, pero mic ñaʼtan chaʼan joñon maʼañic». Jiñi i papá i mamá Tony mach Testigojobic, miʼ yʌl bajcheʼ tsaʼ coli: «Jiñi c papá c mamá maʼañic baʼ ora tiʼ subeyoñob chaʼan miʼ cʼuxbiñoñob o chaʼan miʼ qʼueloñob ti ñuc, jin chaʼan tsaʼ c ñaʼta chaʼan maʼañic ba ora tijicña mi caj i yubiñob tic tojlel, mach yʌlʌyic chuqui mic mel».

⁵ Cheʼ bʌ mi la cubin chaʼan maʼañic laj cʼʌjñibal, laʼ laj cʼajtesan chaʼan jiñʌch Jehová tsaʼ bʌ i pʌyʌyonla tilel tiʼ tejclum (Juan 6:44). Miʼ taj i qʼuel chuqui wem bʌ ti lac tojlel anquese joñonla tajol maʼañic mi laj qʼuel. Wen i cʌñʌyonla, yujil chuqui an ti lac pusicʼal (1 S. 16:7; 2 Cr. 6:30). Jin chaʼan, cheʼ bʌ miʼ subeñonla chaʼan ñuc laj cʼʌjñibal, yomʌch mi lac ñop (1 Juan 3:19, 20).

6. ¿Bajcheʼ tsiʼ yubi i bʌ Pablo cheʼ tsiʼ ñaʼta tsaʼ tac bʌ i mele?

⁶ Tajol cheʼ bʌ maxto laj cʌñʌ i sujmlel tsaʼ lac wen mele mach bʌ weñic i mi la cubin chaʼan bej anto lac mul (1 Ped. 4:3). O tajol añix ora cajel lac melben i yeʼtel Jehová, pero an jumpʼejl laj cʼunlel woli bʌ lac chaʼlen wersa lac mʌlben (jotben). Miʼ cheʼ bajcheʼ jiñi, ¿muʼ baʼ ñaʼtan chaʼan Jehová maʼañic miʼ ñusʌbeñet? Miʼ mejlel i coltañet jiñi ejemplo tac am bʌ ti Biblia tsaʼ bʌ i yubiyob i bʌ jaʼel bajcheʼ jiñi. Jumpʼejl ejemplo jiñʌch jiñi apóstol Pablo, cheʼ bʌ miʼ ñaʼtan i sajtemal tac miʼ wen ubin i chʼijyemlel (Rom. 7:24). Anquese tsaʼix i cʌyʌ pejtelel mach bʌ weñic i tsaʼix i chʼʌmʌ jaʼ, tsiʼ yʌlʌ: «Ti jiñi apóstolob joñon jiñi mach bʌ ñoj ñucoñic». Yicʼot tsiʼ yʌlʌ chaʼan jiñʌch jiñi ñumen xmulil bʌ (1 Cor. 15:9; 1 Tim. 1:15).

7. ¿Chuqui miʼ mel Jehová mi mucʼʌch lac chaʼ ñaʼtan lac bʌ?

⁷ Jiñi lac Tat am bʌ ti panchan miʼ yʌcʼ i tʼan chaʼan mi caj i ñusʌbeñonla lac mul (Sal. 86:5). Jin chaʼan, mi mucʼʌch lac chaʼ ñaʼtan lac bʌ chaʼan tsaʼ bʌ lac mele, miʼ mejlel lac ñop chaʼan mi caj i tsʼʌctesan i tʼan i mi caj i ñusʌbeñonla (Col. 2:13).

8, 9. ¿Chuqui mi caj i coltañonla chaʼan maʼañic mi lac ñaʼtan chaʼan pejtelel muʼ bʌ lac mel mach jasʌlic chaʼan miʼ tijicñesan Jehová?

⁸ Ti lac pejtelel la com la cʌqʼuen Jehová jiñi ñumen wem bʌ. Pero an muʼ bʌ i ñaʼtañob chaʼan pejtelel muʼ bʌ i melob mach jasʌlic chaʼan Jehová utsʼat miʼ qʼuelob. Juntiquil hermana i cʼabaʼ Amanda miʼ yʌl: «Mic ñaʼtan chaʼan tiʼ pejtelel ora yom mi cʌqʼuen Jehová jiñi ñumen wem bʌ, jin chaʼan ñumento chuqui mic ñop c mel. Pero cheʼ bʌ maʼañic mic mejlel, mach wis tijicñayic mi cubin i mic ñaʼtan chaʼan cheʼʌch miʼ yubin i bʌ Jehová jaʼel».

⁹ ¿Chuqui mi caj i coltañonla chaʼan maʼañic mi lac ñaʼtan chaʼan pejtelel muʼ bʌ lac mel mach jasʌlic chaʼan Jehová tijicña miʼ qʼuelonla? Jiñʌch cheʼ mi laj cʼajtesan chaʼan Jehová miʼ chʼʌmbeñonla i sujm i maʼañic miʼ cʼajtibeñonla chuqui ñumeñix bʌ ti pʼis. Miʼ wen qʼuel ti ñuc cheʼ mi lac chaʼlen wersa lac mel cheʼ bajcheʼ cʼamel mi lac mejlel. Miʼ mejlel i coltañonla jaʼel jiñi ejemplo tac am bʌ ti Biblia chaʼan tsaʼ bʌ i chaʼleyob wersa i melbeñob i yeʼtel (troñel) Jehová, bajcheʼ tiʼ tojlel Pablo. Tsiʼ wen chaʼle ñajt bʌ xʌmbal chaʼan miʼ chaʼlen subtʼan yicʼot miʼ waʼchocon congregación tac. Pero ti jumpʼejl bʌ qʼuin tsaʼ qʼuextʌyi bajcheʼ an i maʼañix tsaʼ mejli ti subtʼan. ¿Chuqui tsaʼ ujti? ¿Mach ba tijicñayix tsiʼ bej qʼuele Jehová? Mach cheʼiqui, come tsaʼʌch i chaʼle wersa i bej mel bajcheʼ cʼamel miʼ mejlel, i Jehová tsiʼ bej aqʼue i bendición (Hech. 28:30, 31). Joñonla jaʼel maʼañic mi caj i mejlel lac mel bajcheʼ cʼamel la com tiʼ pejtelel ora, pero ñuc bʌ i cʼʌjñibal tiʼ tojlel Jehová jiñʌch chucoch mi lac mel. Wʌle mi caj laj qʼuel bajcheʼ tac miʼ pʌsbeñonla Jehová chaʼan tijicña miʼ qʼuelonla.

¿BAJCHEʼ MIʼ PɅSBEÑONLA JEHOVÁ CHAʼAN UTSʼATɅCH MIʼ QʼUELONLA?

10. ¿Bajcheʼ miʼ subeñonla Jehová chaʼan tijicñayʌch yicʼotonla? (Juan 16:27).

¹⁰ Miʼ cʼʌn jiñi Biblia. Jehová miʼ mulan i pʌsben i wiñicob chaʼan miʼ cʼuxbiñob yicʼot miʼ qʼuelob ti ñuc. Yaʼ ti Biblia miʼ yʌl chaʼan chaʼyajl tiʼ sube Jesús chaʼan miʼ cʼuxbin yicʼot utsʼat miʼ qʼuel (Mat. 3:17; 17:5). ¿Muʼ baʼ mulan chaʼan cheʼ miʼ subeñet Jehová jaʼel bajcheʼ jiñi? I sujmʌch, maʼañic mi caj pejcañet ti panchan cheʼ bajcheʼ tsiʼ mele tiʼ tojlel Jesús. Pero miʼ cʼʌn jiñi Biblia. Cheʼ bʌ mi lac pejcan chuqui tac tiʼ sube Jesús jiñi xcʌntʼañob i chaʼan, lajal bajcheʼ jiñʌch Jehová woli bʌ (choncol bʌ) i subeñonla bajcheʼ jiñi (pejcan Juan 16:27). Jesús tsiʼ laji i Tat, jin chaʼan cheʼ bʌ mi lac taj laj qʼuel chaʼan Jesús tiʼ sube jiñi xcʌntʼañob i chaʼan chaʼan miʼ cʼuxbiñob anquese añob i sajtemal, laʼ lac ñaʼtan chaʼan cheʼʌch woliʼ subeñonla Jehová jaʼel (Juan 15:9, 15).

11. ¿Chucoch mach yomic mi lac ñaʼtan chaʼan jiñi wocol tac yom i yʌl chaʼan Jehová mach utsʼatix miʼ qʼuelonla? (Santiago 1:12).

¹¹ Ti chuqui tac miʼ mel ti lac tojlel. Jehová yom i coltañonla. Jin chaʼan, miʼ yʌqʼueñonla chuqui i cʼʌjñibal lac chaʼan. Pero an i tajol miʼ yʌcʼ chaʼan mi lac ñusan wocol tac, cheʼ bajcheʼ tsaʼ ujti tiʼ tojlel Job (Job 1:8-11). Pero mach lac ñaʼtan chaʼan jiñi wocol tac yom i yʌl chaʼan Jehová mach utsʼatix miʼ qʼuelonla. Yom bʌ mi lac ñaʼtan jiñʌch chaʼan jiñi wocol tac miʼ yʌcʼ chaʼan miʼ mejlel lac pʌs chaʼan mi lac wen cʼuxbin Jehová yicʼot mi lac ñop tiʼ tojlel (pejcan Santiago 1:12). Ti jimbʌ ora mi caj laj qʼuel chaʼan Jehová mucʼʌch i cʼuxbiñonla i miʼ coltañonla chaʼan mi lac lʌtʼ.

12. ¿Chuqui miʼ pʌsbeñonla tsaʼ bʌ ujti tiʼ tojlel Dimitri?

¹² Laʼ laj qʼuel tsaʼ bʌ ujti tiʼ tojlel Dimitri, juntiquil hermano ti Asia. Tiʼ sʌtʌ i yeʼtel i mach orajic tsiʼ taja yambʌ, jin chaʼan tsiʼ ñaʼta chaʼan miʼ ñumen aqʼuen i yorajlel chaʼan miʼ chaʼlen subtʼan i miʼ pʌsben Jehová chaʼan mucʼʌch i ñop tiʼ tojlel. Pero tsaʼ bej ñumi jiñi uw i maʼañic tsiʼ taja yambʌ eʼtel. Cheʼ jiñi tsaʼ cʼamaʼ i maʼañix miʼ mejlel ti tejchel. Tsaʼ caji i ñaʼtan chaʼan mach weñic bʌ tatʌl yicʼot ñoxiʼalʌl, i chaʼan Jehová mach utsʼatix woli (yʌquel) i qʼuel. Pero ti jumpʼejl bʌ qʼuin, jiñi i yalʌ chʼoc tsiʼ chaʼle ti imprimir ti jumpʼejl jun jiñi texto am bʌ ti Isaías 30:15, baqui miʼ yʌl: «Ñopox c tʼan. Cheʼ jini ñʌchʼʌl mi caj a wajñel. Mi caj a taj a pʼʌtʌlel». Tsiʼ chʼʌmbe majlel i papá i tiʼ sube: «Papá, cheʼ chʼijyemet, cʼajtesan ili texto». Dimitri tsaʼ cʼoti i qʼuel chaʼan tiʼ coltaya Jehová, añob i yotot, an chuqui miʼ cʼuxob i maʼañic jilemob i pislel. Dimitri miʼ bej al: «Tsaʼ j qʼuele chaʼan mach yomic mij cʌlʌx chaʼlen pensar i yom jach mic ñop ti Jehová». Mi cheʼ woli a ñusan jaʼel, cʼajtesan chaʼan Jehová mucʼʌch i ñaʼtañet i mi caj i coltañet chaʼan maʼ cuch jiñi wocol.

13. ¿Chuqui yambʌ miʼ pʌsbeñonla chaʼan Jehová utsʼat miʼ qʼuelonla?

¹³ Miʼ cʼʌn jiñi hermanojob. Jehová miʼ mejlel i cʼʌn jiñi yambʌ hermanojob chaʼan miʼ subeñoñobla tʼan tac muʼ bʌ i tijicñesan lac pusicʼal cheʼ i cʼʌjñibal lac chaʼan. Jiñʌch tsaʼ bʌ ujti tiʼ tojlel juntiquil hermana ti Asia. Tiʼ sʌtʌ i yeʼtel i tsiʼ taja tsʌts bʌ cʼamʌjel. Ti wiʼil, jiñi i ñoxiʼal tsiʼ chaʼle tsʌts bʌ mulil i tiʼ sʌtʌ i privilegio bajcheʼ anciano. Jiñi hermana wen wocol woliʼ ñusan i tsiʼ yʌlʌ: «Maʼañic mic chʼʌmben i sujm chucoch cheʼ woli cujtel bajcheʼ jiñi. Tsaʼ c ñaʼta chaʼan an chuqui mach bʌ weñic tsaʼ c mele i jin chaʼan Jehová mach utsʼatix woliʼ qʼuelon». Cheʼ jiñi tsiʼ pejca Jehová i tsiʼ cʼajtibe chaʼan miʼ coltan i qʼuel chaʼan mucʼʌch i bej cʼuxbin. Jehová tsaʼʌch i jacʼbe. ¿Bajcheʼ? Miʼ yʌl: «Jiñi ancianojob tsiʼ pejcayoñob i tsiʼ coltayoñob j qʼuel chaʼan Jehová wolʌch i bej cʼuxbiñon». Ti wiʼil, tsiʼ chaʼ cʼajtibe Jehová chaʼan miʼ coltan. ¿Chuqui tsaʼ ujti? Jiñi hermana miʼ yʌl: «Ti jin jach bʌ qʼuin tsaʼ aqʼuentiyon jumpʼejl carta tsaʼ bʌ i tsʼijbuyob chaʼtiqui uxtiquil hermanojob ti congregación, i cheʼ bʌ tsaʼ c pejca tsaʼ j qʼuele chaʼan Jehová tsaʼʌch i ñʌchʼtayon». Cheʼ bajcheʼ mi laj qʼuel, jiñi wen tac bʌ chuqui mi lac subentel, miʼ pʌsbeñonla chaʼan Jehová utsʼat miʼ qʼuelonla (Sal. 10:17).

14. ¿Bajcheʼ yambʌ miʼ cʼʌn Jehová jiñi hermanojob chaʼan miʼ pʌsbeñonla chaʼan utsʼat miʼ qʼuelonla?

¹⁴ Yambʌ bajcheʼ miʼ pʌsbeñonla Jehová chaʼan utsʼatʌch miʼ qʼuelonla jin cheʼ miʼ yʌcʼ chaʼan jiñi hermanojob miʼ ticʼoñobla cheʼ i cʼʌjñibalʌch lac chaʼan. Jumpʼejl ejemplo, Jehová tsiʼ yʌcʼʌ chaʼan jiñi apóstol Pablo miʼ tsʼijbuben majlel 14 carta jiñi hermanojob, yaʼi tsiʼ yʌcʼʌ ticʼojel tac. ¿Chucoch tsiʼ mele Jehová bajcheʼ jiñi? Come miʼ cʼuxbiñob i yujil chaʼan i wenlelobʌch, cheʼ bajcheʼ juntiquil tatʌl miʼ ticʼ i yalobil come miʼ cʼuxbin (Pr. 3:11, 12). Jin chaʼan, mi an majqui miʼ ticʼonla mach yomic i yʌl chaʼan Jehová mach utsʼatix miʼ qʼuelonla, yom i yʌl chaʼan mucʼʌch i cʼuxbiñonla (Heb. 12:6). ¿Chuqui tac yambʌ miʼ pʌs chaʼan Jehová utsʼat miʼ qʼuelonla?

YAMBɅ CHUQUI TAC MIʼ PɅS CHAʼAN JEHOVÁ UTSʼAT MIʼ QʼUELONLA

15. ¿Majqui miʼ yʌqʼuen Jehová jiñi chʼujul bʌ i yespíritu, i chuqui miʼ mejlel lac ñop?

¹⁵ Jehová miʼ yʌqʼuen chʼujul bʌ i yespíritu jiñi utsʼat bʌ miʼ qʼuelob (Mat. 12:18). Miʼ mejlel laj cʼajtiben lac bʌ: «¿Tsiquil ba tij cuxtʌlel jiñi melbalʌl (chaʼlibal) tac muʼ bʌ i yʌcʼ jiñi espíritu?». Jumpʼejl ejemplo, ¿ñumen a wujil ba pijt bajcheʼ ti ñaxan? Mi tsaʼ qʼuele chaʼan mucʼʌch a wen pʌs jiñi melbalʌl tac tilem bʌ ti jiñi espíritu, ñumento miʼ mejlel a ñop chaʼan Jehová tijicña yicʼotet (qʼuele jiñi recuadro «Jiñi melbalʌl tac muʼ bʌ i yʌcʼ jiñi espíritu jiñʌch. . .»).

16. Cheʼ bajcheʼ miʼ yʌl 1 Tesalonicenses 2:4, ¿majqui miʼ cʼʌn Jehová chaʼan miʼ sub jiñi wen tʼan? ¿I bajcheʼ yubil maʼ wubin cheʼ a wujil jiñi?

¹⁶ Jehová miʼ yʌcʼ chaʼan miʼ subob jiñi wen tʼan jiñi utsʼat bʌ miʼ qʼuelob (pejcan 1 Tesalonicenses 2:4). Jiñʌch tsaʼ bʌ i qʼuele Jocelyn. Ti jumpʼejl bʌ qʼuin, wen chʼijyem tsaʼ tejchi cheʼ ti sʌcʼan. Miʼ yʌl: «Maʼañic chuqui wis com tsaʼ cubi, pero come precursorajon, ti jiñi bʌ qʼuin yom mic loqʼuel ti subtʼan. Jin chaʼan, tsaʼ c mele oración i tsaʼ majliyon. I cheʼ woliyon ti subtʼan, tsaʼ c taja juntiquil xʼixic i cʼabaʼ Mary, wen uts i tsiʼ jacʼʌ jumpʼejl estudio». I cheʼ bʌ añix chaʼpʼej uxpʼejl uw i cajelob ti estudio, Mary tiʼ sube Jocelyn chaʼan cheʼ bʌ tsaʼ ñumi ti subtʼan tiʼ yotot, woliʼ cʼajtiben Dios chaʼan miʼ coltan. ¿Chuqui tsiʼ pʌsbe Jocelyn jiñi? Miʼ yʌl: «Tsaʼ cubi chaʼan lajal bajcheʼ Jehová woliʼ subeñon: ‹Utsʼat mij qʼuelet›». Ili mach yomic i yʌl chaʼan pejtelel lac piʼʌlob wen mi caj i jacʼob jiñi wen tʼan. Pero miʼ mejlel lac ñop chaʼan Jehová tijicña miʼ yubin cheʼ miʼ qʼuel bajcheʼ woli lac chaʼlen wersa lac sub jiñi wen tʼan.

17. ¿Chuqui miʼ pʌsbeñonla tsaʼ bʌ i yʌlʌ Vicky chaʼan jiñi i tojol laj coltʌntel? (Salmo 5:12).

¹⁷ Jehová miʼ cʼʌn jiñi i tojol laj coltʌntel chaʼan miʼ ñusʌben i mul jiñi utsʼat bʌ miʼ qʼuelob (1 Tim. 2:5, 6). Pero ¿ixcu mi maʼañic mi lac wen ñop chaʼan Jehová utsʼat miʼ qʼuelonla anquese la cujil chaʼan tsaʼix i yʌcʼʌ i tojol laj coltʌntel i tsaʼix lac chʼʌmʌ jaʼ? Laʼ laj cʼajtesan chaʼan maʼañic miʼ mejlel lac ñop pejtelel chuqui miʼ subeñonla lac pusicʼal, pero mucʼʌch i mejlel lac ñop muʼ bʌ i subeñonla Jehová. Jehová miʼ qʼuelonla ti toj mi mucʼʌch lac wen ñop i tojol laj coltʌntel i miʼ yʌcʼ i tʼan chaʼan mi caj i yʌqʼueñonla i bendición (pejcan Salmo 5:12; Rom. 3:26). Juntiquil hermana i cʼabaʼ Vicky tsiʼ wen ñaʼta tsaʼ bʌ i mele Jehová tiʼ tojlel. Anquese wocolʌch tsiʼ yubi chaʼan miʼ ñop chaʼan Jehová miʼ cʼuxbin, tsaʼ cʼoti i ñaʼtan: «Jehová an i wen pʌsbeyon i yutslel [ . . . ]. Pero joñon lajal bajcheʼ tsaʼ c sube: ‹Jatet mach mejlic a cʼuxbiñon. Jiñi i cuxtʌlel a walobil, mach jasʌlic chaʼan maʼ ñusʌbeñon c mul›». Cheʼ bajcheʼ Vicky, mi tsaʼ la cʌqʼue i yorajlel chaʼan mi lac ñaʼtan tsaʼ bʌ i mele Jehová ti lac tojlel, mi caj la cubin chaʼan mucʼʌch i cʼuxbiñonla yicʼot mi caj lac ñop chaʼan utsʼat miʼ qʼuelonla.

18. ¿Chuqui miʼ mejlel lac ñop mi mucʼʌch lac chʌn cʼuxbin Jehová?

¹⁸ Anquese mi lac chaʼlen wersa lac mel bajcheʼ tsaʼ ujti laj cʌn, an i tajol chʼijyem mi la cubin lac bʌ i mi laj cʼajtiben lac bʌ mi utsʼatʌch miʼ qʼuelonla Jehová. Mi cheʼ mi la cujtel, laʼ laj cʼajtesan chaʼan Jehová utsʼat miʼ qʼuel «jiñi muʼ bʌ i chʌn cʼuxbiñob» (Sant. 1:12). Jin chaʼan, chʌn lʌcʼtesan a bʌ tiʼ tojlel i qʼuele chuqui tac miʼ pʌs chaʼan tijicña yicʼotet. I mach ñajʌyic a chaʼan chaʼan Dios «mach wen ñajtic an ti jujuntiquilonla» (Hech. 17:27).