Laʼ chʌn ajñiconla baqui sʌc jaman

1, 2. a) ¿Jalix, baqui yicʼot chucoch Pablo tiʼ tsʼijbubeyob majlel carta jiñi hermanojob ti Éfeso? b) ¿Chuqui ti cʼajtiya tac mi caj lac jacʼ?

CHEʼ bʌ jiñi apóstol Pablo yaʼ chucul ti Roma, tsiʼ mulaj i coltan jiñi hermanojob, pero come maʼañic miʼ mejlel i julaʼtañob tiʼ tsʼijbubeyob majlel cabʌl carta. Jumpʼejl jiñʌch tsaʼ bʌ i chocbe majlel jiñi añoʼ bʌ ti Éfeso cheʼ ti jabil 60 o 61 (Efes. 1:1; 4:1).

² Añix lʌcʼʌ 10 jab cheʼ bʌ Pablo tsiʼ chaʼle subtʼan yicʼot cʌntesa yaʼ ti tejclum (Hech. 19:1, 8-10; 20:20, 21). Miʼ wen cʼuxbin jiñi hermanojob i jin chaʼan tsiʼ chocbeyob majlel jiñi carta come yom i coltañob chaʼan chʌn xucʼulob ti Jehová. Pero ¿chucoch tsiʼ tajbeyob ti tʼan jiñi icʼyochʼan bʌ pañimil yicʼot jiñi sʌc jaman bʌ? ¿I chuqui miʼ mejlel laj cʌn joñonla? Jiñʌch muʼ bʌ caj laj qʼuel ti ili estudio.

TSAʼ LOQʼUIYOB BAQUI ICʼYOCHʼAN

3. ¿Chuqui tsiʼ taja ti tʼan Pablo yaʼ ti Efesios capítulo 5?

³ Pablo tiʼ sube jiñi xñoptʼañob ti Éfeso: «Ti wajali añetla baqui icʼyochʼan, pero wʌleʼli añetixla baqui sʌc jaman» (Efes. 5:8). Tsiʼ yʌlʌ iliyi chaʼan miʼ yʌqʼueñob i ñaʼtan chaʼan wen ñucʌch chuqui tsiʼ meleyob chaʼan miʼ qʼuextañob i melbal (chaʼlibal). Laʼ lac ñaxan qʼuel chucoch tiʼ subeyob chaʼan ti wajali añob baqui icʼyochʼan.

4. ¿Chuqui tac tsiʼ meleyob jiñi xñoptʼañob ti Éfeso cheʼ bʌ maxto i cʌñʌyob i sujmlel?

⁴ Tsaʼ ajñiyob ti mach bʌ i sujmic ñopbalʌl. Cheʼ bʌ jiñi xñoptʼañob maxto i cʌñʌyob i sujmlel miʼ wen ñopob mach bʌ i sujmic cʌntesa tac yicʼot miʼ melob magia. Cheʼ jaʼel, yaʼ ti Éfeso yaʼan i templo jiñi diosa Ártemis, wen cʌmbil bʌ ti jimbʌ ora. Jin chaʼan cabʌl lac piʼʌlob miʼ majlel i chʼujutesañob i diosob yaʼi. Cabʌl xchoñoñelob miʼ wen tajob taqʼuin come mi wen choñob i yejtal jiñi templo chaʼan Ártemis (Hech. 19:19, 23-27).

5. ¿Chucoch mach junyajl weñic i melbalob jiñi añoʼ bʌ ti Éfeso?

⁵ Mach junyajl weñix i melbalob. Jiñi chumuloʼ bʌ ti Éfeso miʼ wen chaʼleñob tsʼiʼlel i maʼañix miʼ quisñiñob chuqui tac miʼ melob. Jiñi i ñusaqʼuiñob yicʼot pejtelel chuqui miʼ melob chaʼan bʌ i diosob miʼ wen xʌbob yicʼot jiñi tsʼiʼlel (Efes. 5:3). Jiñi Biblia miʼ yʌl chaʼan «maʼañobix i quisin». Jiñi tʼan ti griego tsaʼ bʌ cʼʌjñi ilayi, yom i yʌl chaʼan maʼañix bajcheʼ yubil miʼ yubiñob i bʌ chaʼan chuqui tac miʼ melob (Efes. 4:17-19). Cheʼ bʌ jiñi xñoptʼañob maxto i cʌñʌyobic i sujmlel maʼañix chuqui miʼ subeñob i conciencia i mach i wentajobic bajcheʼ yubil miʼ yubin i bʌ Jehová. Jin chaʼan, Pablo tsiʼ yʌlʌ chaʼan «icʼyochʼan baqui an jiñi i ñaʼtʌbalob i ñajt añob ti jiñi cuxtʌlel i chaʼan bʌ Dios».

6. ¿Chucoch Pablo tiʼ subeyob jiñi xñoptʼañob ti Éfeso chaʼan añobix baqui sʌc jaman?

⁶ Jin chaʼan Pablo tiʼ subeyob: «Wʌleʼli añetixla baqui sʌc jaman yicʼot i chaʼañetixla lac Yum». ¿Chucoch? Come ti ñaxan lajal bajcheʼ añob baqui icʼyochʼan (Efes. 5:8). Pero tsaʼ caji i jacʼbeñob i tʼan Jehová i lajal bajcheʼ sʌcjamañix baqui tsaʼ cajiyob ti xʌmbal (Sal. 119:105). Tsiʼ cʌyʌyob jiñi mach bʌ i sujmic ñopbalʌl yicʼot jiñi tsʼiʼlel. Tsaʼ caji i lajiñob Dios i tsiʼ chaʼleyob wersa chaʼan miʼ chʼujutesañob yicʼot miʼ melob chuqui miʼ mulan (Efes. 5:1).

7. ¿Chucoch mi la cʌl chaʼan ti ñaxan cheʼ añonla bajcheʼ jiñi añoʼ bʌ ti Éfeso?

⁷ Miʼ mejlel la cʌl chaʼan cheʼʌch añonla jaʼel ti ñaxan. Cheʼ bʌ maxto laj cʌñʌyic i sujmlel tajol tsaʼ la cotsa lac bʌ tiʼ melol i chaʼan tac bʌ jiñi ñopbalʌl mach bʌ i sujmic, i tajol an tsaʼto bʌ lac mele tsʼiʼlel. Pero cheʼ bʌ tsaʼ laj cʌñʌ Jehová tsaʼ laj cʌyʌ lac mel pejtelel jiñi i tsaʼ caji lac mel chuqui miʼ mulan. I jiñi añʌch i wen coltayonla (Is. 48:17). Pero an i tajol wocolʌch mi la cubin chaʼan maʼañic mi lac chaʼ ochel yaʼ baqui icʼyochʼan i mi lac chʌn ajñel bajcheʼ «i yalobilob sʌcjamañiyel». Laʼ laj qʼuel chuqui mi caj i coltañonla.

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

MACH AJÑICONLA YAʼ BAQUI ICʼYOCHʼAN

8. Cheʼ bajcheʼ miʼ yʌl Efesios 5:3-5, ¿chuqui jiñi mach bʌ yomic miʼ melob jiñi añoʼ bʌ ti Éfeso?

⁸ (Pejcan Efesios 5:3-5). Jiñi xñoptʼañob ti Éfeso yomʌch miʼ chʌn cʌntañob i bʌ chaʼan maʼañic miʼ chaʼ ochelob yaʼ baqui icʼyochʼan, i chaʼan miʼ melob mach cojach yom miʼ cʌyob jiñi chaʼan bʌ tsʼiʼlel. Mi yomicto miʼ yʌlob ti alas tʼan chaʼan tac bʌ jiñi. Pablo tiʼ subeyob chaʼan yom miʼ cʌyob pejtelel jiñi mi yomob ochel ti jiñi «i Yumʌntel Cristo yicʼot Dios».

9. ¿Chucoch mach yomic mi laj qʼuel o mi lac ñʌchʼtan chaʼan tac bʌ tsʼiʼlel?

⁹ Joñonla jaʼel yom mi laj cʌntan lac bʌ chaʼan maʼañic mi lac mel «jiñi mach bʌ añic i cʼʌjñibal tac tilem bʌ baqui icʼyochʼan» (Efes. 5:11). Wen la cujil chaʼan mi juntiquil miʼ chʌn qʼuel chuqui tac mach bʌ weñic, chaʼan tac bʌ tsʼiʼlel o muʼ bʌ i taj ti tʼan chaʼan tac bʌ jiñi, ti jumpʼejl bʌ qʼuin mi caj i chaʼlen mulil (Gn. 3:6; Sant. 1:14, 15). Jiñʌch tsaʼ bʌ ujti ti jumpʼejl país, an hermanojob tsaʼ bʌ i meleyob jumpʼejl grupo ti internet chaʼan miʼ pejcañob i bʌ. Ti ñaxan wen jach chuqui tac miʼ yʌlob, pero cʼunte cʼunte tsaʼ caji i yʌlob chuqui tac mach bʌ weñic i tsaʼ caji i yʌlob chaʼan tac bʌ piʼleya. Ti wiʼil, jin jach miʼ tajob ti tʼan. Ti wiʼil an hermanojob tsaʼ bʌ i yʌlʌyob chaʼan tiʼ caj jiñi tsiʼ chaʼleyob tsʼiʼlel.

10. ¿Bajcheʼ miʼ ñop i lotiñonla Satanás? (Efesios 5:6).

¹⁰ Jumpʼejl yac muʼ bʌ i cʼʌn Satanás jiñʌch cheʼ miʼ lotin lac piʼʌlob chaʼan maʼañix miʼ ñaʼtañob chuqui wen o chuqui mach bʌ weñic (Is. 5:20; 2 Cor. 4:4). Jin chaʼan, ili pañimil (mulawil) miʼ pʌs chaʼan mach lecojic jiñi tsʼiʼlel (2 Ped. 2:19). ¿Bajcheʼ miʼ mel? Miʼ cʌn película tac, jiñi televisión yicʼot página tac chaʼan internet. Satanás yom i yʌqʼueñonla lac ñaʼtan chaʼan mach lecojic pejtelel chuqui am bʌ ila ti pañimil, bajcheʼ jiñi tsʼiʼlel. Miʼ poj pʌs chaʼan utsʼatʌch i chaʼan maʼañic chuqui mi lac chaʼlen cheʼ mi lac mel (pejcan Efesios 5:6).

11. ¿Bajcheʼ miʼ pʌsbeñonla tsaʼ bʌ ujti tiʼ tojlel Angela chaʼan wen ñuc i cʼʌjñibal mi lac jacʼ muʼ bʌ i yʌl Efesios 5:7? (Qʼuele jaʼel jiñi foto tac).

¹¹ Satanás yom jaʼel chaʼan mi lac ñochtañob jiñi mach bʌ weñobic i melbal chaʼan mi lac ñusʌben i tʼan Jehová. Jin chaʼan, Pablo tsiʼ yʌcʼʌ ili ticʼojel: «Mach laʼ mel cheʼ bajcheʼ miʼ melob» (Efes. 5:7). Ili ora ñumento yom mi laj cʌntan lac bʌ bajcheʼ ti wajali. ¿Chucoch? Come jiñi mach bʌ weñobic i melbal muʼto i mejlel lac tajob ti internet. Juntiquil hermana chʼoyol bʌ ti Asia i cʼabaʼ Angelaa miʼ yʌl bajcheʼ miʼ mejlel i ticʼlañonla jiñi internet: «Xucʼu xucʼul miʼ qʼuextan majlel a pensar. Maʼañix bajcheʼ yubil tsaʼ cubi cheʼ an camigojob maʼañic bʌ miʼ qʼuelob ti ñuc i mandar tac Dios. I tsaʼ cʼoti c ñaʼtan chaʼan mach lecojic mi tsaʼ c mele maʼañic bʌ miʼ mulan Jehová». Pero jiñi ancianojob tsiʼ coltayob i tojʼesan i melbal, miʼ bej al: «Wʌle jin jach mi cotsan tic ñaʼtʌbal i chaʼan tac bʌ Jehová i mach jiñix an tac bʌ ti internet».

12. Mi la com lac jacʼben i tʼan Jehová, ¿chuqui yom mi lac mel?

¹² Jiñi lac piʼʌlob miʼ mejlel i subeñoñobla chaʼan weñʌch jiñi tsʼiʼlel, chaʼan maʼañic i wocolel. Pero mach la cʌcʼ lac bʌ ti lotintel (Efes. 4:19, 20). Laʼ laj cʼajtiben lac bʌ: «¿Muʼ ba j cʌlʌx ñochtañob jiñi c piʼʌlob ti escuela, c piʼʌlob ti eʼtel (troñel) o yambʌ lac piʼʌlob maʼañic bʌ miʼ qʼuelob ti ñuc chuqui miʼ yʌl Jehová? ¿Muʼ ba c pʌs c chʼejlel chaʼan mic chʌn jacʼ muʼ bʌ i yʌl jiñi Biblia anquese an muʼ bʌ i yʌlob chaʼan muqʼuix c ñumel ti pʼis?». Cheʼ jaʼel, cheʼ bajcheʼ miʼ yʌl 2 Timoteo 2:20-22, yomʌch mi lac wen qʼuel jaʼel majqui jiñi la camigojob yaʼ ti congregación. Mach tiʼ pejtelelobic mi caj i coltañoñobla chaʼan chʌn xucʼulonla ti Jehová.

LAʼ CHɅN AJÑICONLA «BAJCHEʼ I YALOBILOB SɅCJAMAÑIYEL»

13. ¿Chuqui yom i yʌl cheʼ mi lac chʌn ajñel «bajcheʼ i yalobilob sʌcjamañiyel»? (Efesios 5:7-9).

¹³ Cheʼ bʌ Pablo tsaʼ ujti i subeñob jiñi xñoptʼañob ti Éfeso chaʼan mach yomic miʼ chaʼ ajñelob yaʼ baqui icʼyochʼan, tiʼ subeyob jaʼel: «Chʌn ajñenla bajcheʼ i yalobilob sʌcjamañiyel» (pejcan Efesios 5:7-9). ¿Chuqui yom i yʌl jiñi? Chaʼan tiʼ pejtelel ora yom tsiquil chaʼan i sujm bʌ xñoptʼañonla. Pero an tacʌch chuqui yom mi lac mel. Yom mi lac pejcan jiñi Biblia i mi lac wen tsajin (qʼuel) chuqui miʼ yʌl, yicʼot mi lac pejcan lac publicación tac. Cheʼ bʌ mi lac mel, laʼ lac wen qʼuel chuqui mi laj cʌn tiʼ tojlel Jesús yicʼot i cʌntesa tac, come jiñʌch jiñi «i sʌclel pañimil» (Juan 8:12; Pr. 6:23).

14. ¿Bajcheʼ miʼ coltañonla jiñi chʼujul bʌ espíritu?

¹⁴ Chaʼan mi lac chʌn ajñel «bajcheʼ i yalobilob sʌcjamañiyel», i cʼʌjñibal lac chaʼan jiñi i yespíritu Jehová. ¿Chucoch? Come wocolʌch chaʼan sʌc mi lac chʌn ajñel ti ili bibiʼ jax bʌ pañimil (1 Tes. 4:3-5, 7, 8). Jiñi chʼujul bʌ espíritu miʼ mejlel i coltañonla chaʼan maʼañic mi lac ñop chuqui tac miʼ yʌlob jiñi lac piʼʌlob wʌʼ ti pañimil, poj wem bʌ miʼ yʌlob, pero am bʌ tiʼ contra chuqui miʼ yʌl Dios. Cheʼ jaʼel miʼ coltañonla chaʼan mi lac pʌs la cutslel, chaʼan tojonla yicʼot mi lac chumtʌl cheʼ bajcheʼ an jiñi i sujmlel (Efes. 5:9).

15. ¿Chuqui miʼ mejlel lac mel chaʼan mi lac taj jiñi chʼujul bʌ espíritu? (Efesios 5:19, 20).

¹⁵ Jesús tsiʼ yʌlʌ chaʼan Jehová «mi caj i yʌqʼuen chʼujul bʌ espíritu jiñi muʼ bʌ i cʼajtibeñob» (Luc. 11:13). An chaʼchajp bajcheʼ miʼ mejlel lac taj. Jumpʼejl jiñʌch cheʼ mi laj cʼajtin ti oración. I yambʌ jiñʌch cheʼ mi lac tempan lac bʌ la quicʼot jiñi hermanojob chaʼan mi lac chʼujutesan Jehová (pejcan Efesios 5:19, 20). Cheʼ bajcheʼ jiñi, jiñi chʼujul bʌ espíritu mi caj i coltañonla chaʼan cheʼʌch mi lac chumtʌl cheʼ bajcheʼ miʼ mulan Jehová.

16. ¿Chuqui mi caj i coltañonla chaʼan wen chuqui mi lac mel? (Efesios 5:10, 17).

¹⁶ Cheʼ bʌ an chuqui woli (choncol) lac ñaʼtan lac mel yom mi lac ñaxan qʼuel chuqui miʼ ñaʼtan Jehová i mi lac chʼʌm ti ñuc (pejcan Efesios 5:10, 17). Cheʼ bʌ mi lac sʌclan principio tac am bʌ ti Biblia muʼ bʌ i coltañonla lac ñaʼtan mi weñʌch chuqui la com lac mel, tiʼ sujm, la com laj qʼuel chuqui miʼ ñaʼtan Jehová, i mi mucʼʌch lac chʼʌm ti ñuc wen chuqui mi caj lac mel.

17. ¿Bajcheʼ miʼ mejlel laj cʼʌn ti wen jiñi lac tiempo? (Efesios 5:15, 16; qʼuele jaʼel jiñi foto).

¹⁷ Pablo tiʼ sube jaʼel jiñi xñoptʼañob ti Éfeso chaʼan yom miʼ cʼʌñob ti wen jiñi tiempo (pejcan Efesios 5:15, 16). Satanás miʼ mulan chaʼan yaʼ jach mi lac ñusan qʼuin tiʼ melol chuqui tac am bʌ wʌʼ ti pañimil (1 Juan 5:19). Mach wis wocolic chaʼan yaʼ jach mi la cʌcʼ lac pusicʼal tiʼ sʌclʌntel taqʼuin, ti escuela o ti la queʼtel, i mach jiñic tiʼ melol i yeʼtel Jehová. Mi cheʼ mi la cujtel bajcheʼ jiñi, woli (yʌquel) i pʌs chaʼan cheʼix woli lac ñaʼtan bajcheʼ lac piʼʌlob ti ili pañimil. Mach yomic i yʌl chaʼan mach wentaquic iliyi, pero mach jiñic ñaxam bʌ yom mi la cʌcʼ ti laj cuxtʌlel. Chaʼan mi lac chʌn ajñel bajcheʼ «i yalobilob sʌcjamañiyel» yomʌch mi laj cʼʌn ti wen jiñi i yorajlel am bʌ lac chaʼan, yom i yʌl, chaʼan ñaxan mi lac mel jiñi ñucʌch bʌ i cʼʌjñibal.

18. ¿Chuqui tsiʼ mele Donald chaʼan ñumen wen miʼ cʼʌn jiñi i tiempo?

¹⁸ Laʼ lac sʌclan bajcheʼ miʼ mejlel lac ñumen melben i yeʼtel Jehová. Cheʼʌch tsiʼ mele Donald, chumul bʌ ti Sudáfrica. Miʼ yʌl: «Tsaʼ c wen qʼuele bajcheʼ yilal chumulon lojon i tsaʼ j cʼajtibe i coltaya Jehová chaʼan mic ñumen mejlel ti subtʼan. Tsaʼ c sube chaʼan miʼ coltañon c taj yambʌ queʼtel maʼañic bʌ miʼ mʌctañon chaʼan mic ñumen chaʼlen subtʼan. I tsaʼʌch c taja. Ti wiʼil, tsaʼ ochiyon bajcheʼ precursor quicʼot quijñam».

19. ¿Chuqui yom mi lac mel chaʼan mi lac chʌn ajñel yaʼ baqui sʌc jaman?

¹⁹ Jiñi carta tsaʼ bʌ i tsʼijbube majlel Pablo jiñi añoʼ bʌ ti Éfeso tsiʼ coltayob chaʼan xucʼul miʼ yajñelob, i miʼ mejlel i coltañonla jaʼel. Cheʼ bajcheʼ tsaʼix laj qʼuele, miʼ coltañonla chaʼan mi lac yajcan ti wen lac ñusaqʼuin yicʼot mi lac wen qʼuel majqui la camigojob. Cheʼ jaʼel, miʼ coltañonla chaʼan mi lac chʌn tsajin jiñi Biblia i mi lac chʼʌm ti ñuc muʼ bʌ i yʌl. Yicʼot chaʼan wen ñuc i cʼʌjñibal jiñi chʼujul bʌ espíritu chaʼan mi lac taj wen tac bʌ lac melbal. Mi mucʼʌch lac chʼʌm ti ñuc tsaʼ bʌ i yʌlʌ Pablo, mi caj lac mel chuqui wen i mi caj lac tijicñesan Jehová. Cheʼ bajcheʼ jiñi mi caj lac chʌn ajñel yaʼ baqui sʌc jaman.