Jiñi arca tsaʼ bʌ i mele Noé

Cheʼ tsaʼ caji ti ñumel jabil tac, tsaʼ pʼojli wiñicob xʼixicob (quixtañujob). Lʌcʼʌ tiʼ pejtelel mach weñic i melbalob. An ángelob mach bʌ weñic tsaʼ caji i melob (chaʼleñob) i bʌ. Tsaʼ loqʼuiyob ti panchan i tsaʼ tiliyob wʌʼ ti lum. ¿A wujil ba chucoch? Chaʼan miʼ chʼʌmob i bʌcʼtal bajcheʼ wiñicob yicʼot chaʼan miʼ pʌyob i yijñam.

Jiñi ángelob tsiʼ yʌqʼueyob i yalobil. Ñoj pʼʌtʌl yicʼot jontol (simaron) tsaʼ coliyob, i tsiʼ wen ticʼla jiñi quixtañujob. Jehová maʼañic tsiʼ bej acʼʌ ti ujtel jiñi. Tsaʼ yʌcʼʌ ti yajlel wen tsʌts bʌ jaʼal tiʼ pejtelel pañimil i tsiʼ jisa ti Butʼjaʼ jiñi jontoloʼ bʌ.

Pero an juntiquil wiñic yʌñʌl bʌ tsaʼ ajñi come tsiʼ cʼuxbi Jehová. I cʼabaʼ jiñʌch Noé. An i yijñam yicʼot uxtiquil i yalobil: Sem, Cam yicʼot Jafet. Añob i yijñam tiʼ yuxticlelob. Jehová tsiʼ sube Noé chaʼan miʼ mel (pʌt) jumpʼejl arca, ili jiñʌch jumpʼejl caja melbil bʌ ti teʼ muʼ bʌ i mejlel ti cʼʌjlel ti jaʼ. Jin chaʼan, maʼañic tsaʼ chʌmi Noé yicʼot i familia. Jehová tsiʼ sube jaʼel chaʼan miʼ yotsan tiʼ chajp tiʼ chajp añimal tac chaʼan maʼañic miʼ chʌmelob.

Ora tsaʼ caji i mel Noé jiñi arca. Cheʼ bʌ 50 jab tsaʼ jalʼa i mel yicʼot i familia i cheʼʌch tsiʼ meleyob bajcheʼ tsaʼ yʌlʌ Jehová. Cheʼ bʌ woli (yʌquel) to i pʌtob, Noé tsiʼ sube jiñi quixtañujob chaʼan mi caj i tilel Butʼjaʼ pero maʼañic majqui tsiʼ jacʼbe i tʼan.

Tsaʼ cʼoti i yorajlel chaʼan miʼ yochelob yaʼ ti arca. ¿A wom baʼ ñaʼtan chuqui tsaʼ ujti?