Иеговӑн халӑхӗ йӗркесӗрлӗхрен пӑрӑнать

1. Эпир Турра пуҫҫапнинче мӗн ятарлӑ вырӑн йышӑнса тӑрать?

СИРӖН хӑҫан та пулин пӗр-пӗр ҫурт ҫинче е музейра Иеговӑн ятне курма тӳр килнӗ-и? Ҫавӑн пек вырӑнсенче ҫак ята курни, паллах, сирӗн кӑмӑла ҫӗкленӗ ӗнтӗ. Эпир — Иегова Свидетелӗсем, ҫавӑнпа пирӗн пуҫҫапнинче Туррӑн ячӗ ятарлӑ вырӑн йышӑнса тӑрать. Пӗтӗм тӗнчипе никам та урӑх Туррӑн ячӗпе пирӗн пек усӑ курмасть. Анчах та эпир ҫакна ӑнланатпӑр: унӑн Свидетелӗсем пуласси вӑл — пысӑк чыс, ҫав вӑхӑтрах яваплӑх та.

2. Пире Туррӑн ячӗ тӑрӑх пӗлнӗрен пирӗн мӗнле яваплӑх пур?

² Эпир Туррӑн ячӗпе усӑ курнӑшӑнах Иегова пире ырлать тесе шутламалла мар. Пирӗн унӑн нравственность нормисемпе килӗшӳллӗ пурӑнмалла. Ҫавӑнпа та Библи пире Турӑ халӑхӗн «усал ӗҫрен» пӑрӑнмалла тесе аса илтерет (Пс. 33:15). Павел апостол ҫак принципа питӗ лайӑх палӑртса ҫапла ҫырнӑ: «Ҫӳлхуҫа ятне асӑнакан кирек кам та мӗн усаллинчен аякра тӑтӑр [«йӗркесӗрлӗхрен пӑрӑнтӑр», ҪХ]». (2 Тимофей 2:19 вуласа пар.) Унӑн Свидетелӗсем пулнӑ май пире Иеговӑн ятне асӑнакансем пек пӗлеҫҫӗ. Анчах та эпир йӗркесӗрлӗхрен мӗнле пӑрӑнма пултаратпӑр?

УСАЛЛӐХРАН «ПӐРӐНӐР»

3, 4. Хӑш-пӗрисене мӗнле сӑмахсене ӑнланма йывӑр тата мӗншӗн?

³ Павел 2 Тимофей 2:19-мӗшӗнчи сӑмахсене мӗншӗн каланине пӑхса тухар. Ҫак сӑвӑ йӗркинче малтан «Туррӑн ҫирӗп никӗсӗ» (ҪТ) ҫинчен каланӑ, унтан ҫав никӗс ҫине ҫырса хунӑ икӗ сӑмах ҫаврӑнӑшӗ ҫинчен асӑннӑ. Пӗрремӗш сӑмах ҫаврӑнӑшне, «Ҫӳлхуҫа Хӑйӗннисене пӗлет» текеннине, Йыша шутлани 16:5-мӗшӗнчен илнӗ курӑнать. (Унчченхи статьяна пӑхӑр.) Иккӗмӗш сӑмах ҫаврӑнӑшӗ пирки, «Ҫӳлхуҫа ятне асӑнакан кирек кам та йӗркесӗрлӗхрен пӑрӑнтӑр» текенни пирки, мӗн калама пулать? Хӑш-пӗрисене ҫак сӑмахсене ӑнланма йывӑр. Мӗншӗн?

⁴ Павел каланӑ сӑмахсем ҫине пӑхсан, вӑл вӗсене урӑх ҫӗртен илнӗ пек курӑнать. Анчах та Еврей Ҫырӑвӗнче ҫакӑн пек сӑмах ҫаврӑнӑшӗ тӗл пулмасть. Ҫавӑнпа та апостол «Ҫӳлхуҫа ятне асӑнакан кирек кам та йӗркесӗрлӗхрен пӑрӑнтӑр» тенипе мӗнле ӗҫ ҫинчен каласшӑн пулнӑ? Павел пӗрремӗш сӑмах ҫаврӑнӑшне Йыша шутлани кӗнекери Корей пӑлхавӗ ҫинчен каласа паракан 16-мӗш сыпӑкран илсе панӑ. Иккӗмӗш сӑмах ҫаврӑнӑшӗ те ҫав пӑлхав вӑхӑтӗнче пулса иртнӗ ӗҫсем ҫинченех каламасть-ши?

5—7. Павел 2 Тимофей 2:19-мӗшӗнче каланӑ сӑмахсене Моисей вӑхӑтӗнче пулса иртнӗ мӗнле событисемпе ҫыхӑнтарать?

⁵ Библире каланӑ тӑрӑх, Дафанпа Авирон, Елиав ывӑлӗсем, Корей майлӑ тӑнӑ та унпа пӗрле Моисейпа Аарона хирӗҫ ҫӗкленӗ пӑлхава ертсе пыма пуҫланӑ (Йыша шутл. 16:1—5). Вӗсем Моисее хисеплеменнине тата Турӑ ӑна панӑ влаҫа йышӑнманнине тӳррӗн кӑтартнӑ. Иеговӑн халӑхӗ хушшинче пулнӑ май ҫав пӑлхавҫӑсем Туррӑн шанчӑклӑ ӗҫлекенӗсене сиен кӳме пултарнӑ. Иегова хӑйне чунтан парӑнса пурӑнакансемпе пӑлхавҫӑсем хушшинчи уйрӑмлӑха кӑтартас умӗн уҫӑмлӑ хушу панӑ.

⁶ Библире каланӑ: «Ҫӳлхуҫа Моисее ҫапла тесе каланӑ: халӑха кала: Корей, Дафан, Авирон килӗ-ҫуртӗнчен пур енчен те сирӗлӗр, те, тенӗ. Моисей тӑнӑ та Дафанпа Авирон патне кайнӑ, ун хыҫҫӑн Израилӗн аслӑ ҫыннисем пынӑ. Моисей халӑха каланӑ: ҫак йӗркесӗр ҫынсен чатӑрӗсенчен пӑрӑнӑр, вӗсен ҫылӑхӗсемшӗн вӗсемпе пӗрле пӗтес мар тесессӗн, вӗсен пӗр япалине те ан тӗкӗнӗр, тенӗ. Вӗсем вара Корей, Дафан, Авирон килӗ-ҫуртӗнчен пур енчен те аяккарах кайса тӑнӑ» (Йыша шутл. 16:23—27). Унтан Иегова пӑлхавҫӑсене пурне те тӗп тунӑ. Анчах та Турра чунтан парӑнса пурӑнакансем — йӗркесӗрлӗхрен пӑрӑнса вӗсен чатӑрӗсенчен аяккарах кайса тӑнисем — чӗрӗ тӑрса юлнӑ.

⁷ Павел 2 Тимофей 2:19-мӗшӗнче «Ҫӳлхуҫа Хӑйӗннисене пӗлет» текен сӑмах ҫаврӑнӑшне Йыша шутлани 16:5-мӗшӗнчен илнӗ. Ҫавӑнпа та «Ҫӳлхуҫа ятне асӑнакан кирек кам та йӗркесӗрлӗхрен пӑрӑнтӑр» тенӗ чухне вӑл Йыша шутлани 16:5, 23—27-мӗш сӑвӑ йӗркисенче ҫырса панӑ событисем ҫинченех калама пултарнӑ. Эппин, ҫав икӗ сӑмах ҫаврӑнӑшӗ ҫав событисемпех ҫыхӑннӑ тесе пӗтӗмлетӳ туни вырӑнлӑ пек туйӑнать. Ҫав икӗ сӑмах ҫаврӑнӑшӗнчен эпир мӗне вӗренме пултаратпӑр? Иегова ҫынсен чӗрисене курса тӑрать. Вӑл хӑйне чунтан парӑнса пурӑнакансене пӗлет тата вӗсене йӗркесӗр ҫынсенчен пӑрӑнӑр тет.

«УХМАХЛАНСА, ПӖЛМЕСӖР ТАВЛАШАССИНЧЕН» ПӐРӐНӐР

8. Мӗншӗн Иегова ячӗпе усӑ курни ҫеҫ е христиансен пухӑвӗнче пулни кӑна ҫителӗклӗ мар?

⁸ Тимофея хӑйӗнпе Иегова хушшинчи хутшӑнусене упрама кирлине аса илтерес тесе те Павел Моисей вӑхӑтӗнче пулса иртнӗ событисем ҫинчен каласа панӑ. Моисей вӑхӑтӗнче Иеговӑн ятне асӑнни кӑна ҫителӗклӗ пулман пекех, христиансен пухӑвӗнче пулни те ҫителӗклӗ мар. Туррӑн шанчӑклӑ ӗҫлекенӗсен пурин те йӗркесӗрлӗхрен тӳрех пӑрӑнмалла. Тимофейӑн ҫакна мӗнле тумалла пулнӑ? Павелӑн Турӑ пӗлтернипе ҫырса хунӑ канашӗнчен Иеговӑн халӑхӗ хальхи вӑхӑтра мӗне вӗренме пултарать?

9. «Ухмахланса, пӗлмесӗр тавлашасси» малтанхи христиансен пухӑвӗ ҫине мӗнле витӗм кӳрсе тӑнӑ?

⁹ Христиансен мӗнле йышши йӗркесӗрлӗхрен пӑрӑнмалли тӗлӗшӗнчен Турӑ Сӑмахӗ ятарлӑ канашсем парать. Сӑмахран, Павел 2 Тимофей 2:19-мӗш ҫумӗнчи сӑвӑ йӗркисенче Тимофее [«сӑмахсем пирки», ҪТ] тавлашу ан хускат» тата «юрӑхсӑр пушӑ сӑмах калаҫассинчен аякка тар» тесе ӳкӗтлет. (2 Тимофей 2:14, 16, 23 вуласа пар.) Ҫак сӑмахсене мӗнле ӑнланмалла? Пухура хӑш-пӗрисем чӑнлӑхран пӑрӑнса кайнисен вӗрентӗвӗсене сарнӑ. Теприсем вара тавлаштарса яма пултаракан шухӑшсене ыттисене йышӑнтарасшӑн пулнӑ курӑнать. Ҫав шухӑшсем Библие тӳррӗн хирӗҫлемен пулин те, вӗсенчен пухури пӗрлӗхе аркатас хӑрушлӑх тухса тӑнӑ. Акӑ мӗншӗн Павел Тимофея «ухмахланса, пӗлмесӗр тавлашассинчен пӑрӑн» тенӗ.

10. Чӑнлӑхран пӑрӑнса кайнисемпе тӗл пулсан, пирӗн мӗн тумалла?

¹⁰ Хальхи вӑхӑтра пухусенче чӑнлӑхран пӑрӑнса каясси сайра-хутра кӑна тӗл пулать. Апла пулин те, Библипе килӗшсе тӑман вӗрентӳсене, вӗсем кирек ӑҫтан тухса тӑрсан та, пирӗн тӳрех сирсе ямалла. Чӑнлӑхран пӑрӑнса кайнисемпе куҫа-куҫӑн, Интернет урлӑ е мӗнле те пулин урӑх майпа хутшӑнни тӗрӗс мар пулнӑ пулӗччӗ. Эпир ҫавӑн пек майсемпе кама та пулин пулӑшас тетпӗр пулсан та, ҫакӑн пек хутшӑнни Библири ӳкӗтсене, эпир тин кӑна пӑхса тухнисене, пӑсни пулать. Ҫавӑнпа эпир, Иеговӑн халӑхӗ пулнӑ май, чӑнлӑхран пӑрӑнса кайнисемпе пӗртте хутшӑнмастпӑр, вӗсенчен пӑрӑнатпӑр та.

11. а) Ухмахланса тавлашасси мӗнрен пуҫланма пултарать? ӑ) Пухури старейшинӑсем мӗнле майпа лайӑх тӗслӗх кӑтартма пултараҫҫӗ?

¹¹ Чӑнлӑхран пӑрӑнса кайнисем кӑна мар пухури мире пӑсса яма пултараҫҫӗ. Сӑмахран, христиансемшӗн мӗнле вӑйӑ-кулӑ вырӑнлӑ пулни, мӗнли вырӑнлӑ мар пулни пирки тӗрлӗрен шухӑшлама пултараҫҫӗ. Ҫав шухӑшсене ыттисене вӑйпа йышӑнтарма тӑрӑшнине пула «ухмахланса, пӗлмесӗр тавлашасси» пуҫланма пултарать. Анчах пухура кам та пулин Иеговӑн нравственность нормисене хирӗҫ пыракан вӑйӑ-кулла ырлать, сарать пулсан, мӗн тумалла? Пухури старейшинӑсен ҫавӑн пек хӑтланнине ҫынна кӳрентерес мар тесе кӑна чӑтса тӑмалла мар (Пс. 10:5; Эф. 5:3—5). Ҫав вӑхӑтрах старейшинӑсен хӑйсене килӗшнӗ пек тутарассинчен те сыхланмалла. Ун вырӑнне вӗсем ҫак канаша тытса тӑраҫҫӗ: «Хӑвӑра шанса панӑ Туррӑн кӗтӗвне пӑхӑр... Хӑвӑра пӑхма шанса панисем вӗсем сирӗн мар — Туррӑн. Ҫавӑнпа вӗсемпе ан хуҫаланӑр, вӗсемшӗн тӗслӗх пулӑр» (1 Петр 5:2, 3, ҪХ; 2 Коринф 1:24 вуласа пар).

12, 13. а) Иегова Свидетелӗсем вӑйӑ-кулӑ суйласа илесси пирки мӗн шутлаҫҫӗ тата ҫавна тума Библири мӗнле принципсем пулӑшаҫҫӗ? ӑ) Хамӑр тӗллӗн йышӑну тунӑ чухне 12-мӗш абзацра сӳтсе явнӑ принципсемпе мӗнле усӑ курма пулать?

¹² Мӗнле вӑйӑ-кулӑ суйласа илес тӗлӗшрен пирӗн организаци хӑш фильм, хӑш компьютер вӑййи, хӑш кӗнеке е юрӑ вырӑнлӑ пулнипе пулманнине кӑтартса тӑмасть. Мӗншӗн? Мӗншӗн тесен Библи кашнине «ырӑпа усала уйӑрма хӑнӑхса» ҫитмешкӗн хӑйӗн совеҫне вӗрентме хавхалантарать (Евр. 5:14). Эпир вӑйӑ-кулӑ суйласа илес тӗлӗшрен тӗрӗс йышӑнусем тума пулӑшакан Библи принципӗсемпе усӑ курма пултаратпӑр. Ҫав йышӑнусене тунӑ чухне пуринче те пирӗн «Турра мӗн юрӑхлине пӗлме» тӑрӑшмалла (Эф. 5:10). Библи каланӑ тӑрӑх, ҫемье пуҫӗн власть пур, ҫавӑнпа та вӑл хӑйӗн ҫемйишӗн мӗнле вӑйӑ-кулӑ вырӑнлӑ пулнине палӑртса хума пултарать (1 Кор. 11:3; Эф. 6:1—4)a.

¹³ Маларах сӳтсе явнӑ Библи принципӗсем вӑйӑ-кулӑ суйласа илнӗ чухне кӑна мар пулӑшаҫҫӗ. Мӗнле тумтир тӑхӑнас, мӗнле ҫи-пуҫпа ҫӳрес, мӗнле апат ҫиес, сывлӑха мӗнле сиплес тӗлӗшрен тата ҫын хӑй тӗллӗн тӑвакан ытти йышӑнусем пирки ҫынсем тӗрлӗрен шухӑшлама пултараҫҫӗ. Хӑш-пӗрисем ҫак ыйтусем тӗлӗшӗнчен ыттисене хӑйсене килӗшнӗ пек тутарасшӑн, ҫакӑ вара пӗр-пӗрне хирӗҫтерсе яма пултарать. Анчах та Библи принципӗсене пӑсман чухне Иеговӑн ӗҫлекенӗсен ҫав ыйтусем пирки тавлашма кирлӗ мар, мӗншӗн тесен «Ҫӳлхуҫа чурийӗн хирӗҫес пулмасть, унӑн пуринпе те ӑшӑ кӑмӑллӑ пулмалла» (2 Тим. 2:24).

УСАЛ ҪЫНСЕМПЕ АН ЯВӐҪӐР!

14. Усал ҫынсемпе явӑҫма кирлӗ маррине кӑтартас тесе Павел мӗнле тӗслӗхпе усӑ курнӑ?

¹⁴ «Ҫӳлхуҫа ятне асӑнакансем» йӗркесӗрлӗхрен тата мӗнле пӑрӑнма пултараҫҫӗ? Йӗркесӗр хӑтланакан ҫынсемпе явӑҫманнипе. Ҫакна Павел мӗнле кӑтартса панӑ? «Туррӑн ҫирӗп никӗсӗ» ҫинчен асӑннӑ хыҫҫӑн вӑл «пысӑк ҫурт» ҫинчен калакан тӗслӗх илсе панӑ. Вӑл ҫав ҫурт ӑшӗнче «ылтӑн савӑтсемпе кӗмӗл савӑтсем ҫеҫ пулмаҫҫӗ, йывӑҫ савӑтсемпе тӑм савӑтсем те пулаҫҫӗ; хӑшне чаплӑ ҫӗрте тыткалаҫҫӗ, хӑшне ӑҫта килчӗ унта тыткалаҫҫӗ» тесе ҫырнӑ (2 Тим. 2:20, 21). Унтан вӑл христиансене «таса» пулма, урӑхла каласан, «ӑҫта килчӗ унта тыткалакан» савӑтсенчен пӑрӑнма ӳкӗтленӗ.

15, 16. «Пысӑк ҫурт» ҫинчен калакан тӗслӗхрен эпир мӗне вӗренме пултаратпӑр?

¹⁵ Ҫак тӗслӗхе мӗнле ӑнланмалла? Павел христиансен пухӑвне «пысӑк ҫуртпа», пухури кашни христианина «савӑтпа», е кил-ҫуртра тыткаламалли хатӗрпе, танлаштарнӑ. Килте ҫав хатӗрсенчен хӑш-пӗрисемпе таса мар ҫӗрте усӑ курнӑран е вӗсем наркӑмӑшлӑ япаласене перӗннӗрен вараланаҫҫӗ. Кил хуҫи ҫав хатӗрсене таса савӑт-сапаран, калӑпӑр, апат ҫимелли кашӑк-чашӑкран, уйрӑм тытӗ.

¹⁶ Иеговӑн хальхи ӗҫлекенӗсем те пур енчен те таса пуласшӑн пулсан, вӗсен пухура Иеговӑн принципӗсене пӑсса тӑракансенчен пӑрӑнмалла. (1 Коринф 15:33 вуласа пар.) Пухура пирӗн ҫавӑн пек ҫынсемпе ытлашши хутшӑнсах каймалла мар пулсан, пухура маррисенчен пирӗн тата ытларах пӑрӑнмалла мар-и вара, мӗншӗн тесен вӗсенчен нумайӑшӗ укҫана хапсӑнать, ашшӗ-амӑшне пӑхӑнмасть, шанчӑксӑр, пӗр-пӗрне элеклет, хытӑ кӑмӑллӑ, ырра юратмасть, сутӑнчӑкла хӑтланать тата Турра юратассинчен ытла киленӗҫе юратать (2 Тим. 3:1—5).

ЭПИР ЧУНТАН ПАРӐНСА ПУРӐННИНЕ ИЕГОВА ПИЛЛЕТ

17. Йӗркесӗрлӗхрен пӑрӑнӑр текен ӳкӗте шанчӑклӑ израильтянсем мӗн таран тӗплӗн тунӑ?

¹⁷ Иегова «Корей, Дафан, Авирон килӗ-ҫуртӗнчен пур енчен те сирӗлӗр» тесе хушсан, шанчӑклӑ израильтянсем «[«тӳрех», ҪТ] аяккарах кайса тӑнӑ» (Йыша шутл. 16:24, 27). Вӗсем иккӗленсе, тӑхтаса тӑман. Сӑваплӑ Ҫыру вӗсем ҫавна тӗплӗн тунӑ тесе те палӑртать. Вӗсем «пур енчен те аяккарах кайса тӑнӑ». Иеговӑн шанчӑклӑ ӗҫлекенӗсен ҫак ӗҫе вӑраха ярас шухӑш та пулман. Вӗсем пӗтӗм чӗререн итлесшӗн пулнӑ. Ҫапла вӗсем Иегова майлӑ пулнине, йӗркесӗрлӗхе хирӗҫ тӑнине уҫӑмлӑ кӑтартнӑ. Ҫак тӗслӗхрен эпир мӗне вӗренме пултаратпӑр?

18. Павел Тимофее «ҫамрӑк кӑмӑл хыҫҫӑн каяссинчен тар» тенипе мӗн каласшӑн пулнӑ?

¹⁸ Иеговӑпа хамӑр хушӑри туслӑха хӳтӗлемелле чухне пирӗн ҫавна вӑраха ямасӑр, ҫине тӑрса тумалла. Павел Тимофея «ҫамрӑк кӑмӑл хыҫҫӑн каяссинчен тар» тенӗ чухне шӑп ҫавна каласшӑн пулнӑ та (2 Тим. 2:22, ҪС). Ҫав вӑхӑт тӗлнелле Тимофей 30 ҫултискер пулнӑ пулас. Анчах та «ҫамрӑк кӑмӑл хыҫҫӑн каясси» хӑш-пӗр чухне ҫитӗнсе ҫитсен те иртсе каймасть. Ҫавӑн пек кӑмӑл хыҫҫӑн каяс шухӑш ҫуралсанах Тимофейӑн ҫавӑнтан «тармалла» пулнӑ. Урӑхла каласан, Тимофейӑн йӗркесӗрлӗхрен пӑрӑнмалла пулнӑ. Иисус: «Сана куҫу илӗртет пулсан, кӑларса ывӑтса яр ӑна»,— тенипе шӑп ҫавна каласшӑн пулнӑ та (Матф. 18:9). Ҫак канаша итлес тата Турӑпа хӑйсем хушшинчи туслӑха упраса хӑварас текен христиансен ҫавна ҫине тӑрса, вӑраха ямасӑр тумалла.

19. Иеговӑпа хӑйсем хушшинчи хутшӑнусене хӑш-пӗрисем мӗнле хӳтӗлеҫҫӗ?

¹⁹ Чӑнлӑха пӗличчен эрех ӗҫме юратнӑ хӑш-пӗр тӑвансем урӑх пӗр тумлам та ӗҫмӗп тесе палӑртса хунӑ. Теприсем хӑш-пӗр вӑйӑ-кулла — вырӑнлӑ шутланакан, анчах та хӑйсенче тӗрӗс мар кӑмӑл-туйӑмсем вӑратма пултаракан вӑйӑ-кулла — сирсе яма йышӑннӑ (Пс. 100:3). Сӑмахран, пӗр арҫын тӑван Свидетель пулса тӑриччен ташӑ каҫӑсене ҫӳреме килӗштернӗ, мӗншӗн тесен ҫынсем унта аскӑнланма юратнӑ. Анчах та чӑнлӑха пӗлсен вӑл урӑх пӗртте, Свидетельсем пӗрле савӑнма пуҫтарӑннӑ чухне те, ташламӑп тесе шут тытнӑ, мӗншӗн тесен вӑл хӑйӗн унчченхи тӗрӗс мар туйӑмӗсем, шухӑшӗсем ҫуралма пултарасран хӑранӑ. Паллах ӗнтӗ, ҫакӑ христиансен урӑх эрех ӗҫмелле мар, ташламалла мар е ытти япаласене, вӗсенче ним начарри ҫук пулсан та, тумалла мар тенине пӗлтермест. Ҫавна пӑхмасӑрах пирӗн пурин те тимлӗ пулмалла та Иеговӑпа хамӑр хушӑри хутшӑнусене хӳтӗлемелле.

20. Йӗркесӗрлӗхрен пӑрӑнма ҫӑмӑл мар пулма пултарать пулин те, пире мӗн вӑй парать тата мӗн тӗреклетет?

²⁰ Иегова Свидетелӗсенчен пӗри пуласси вӑл — пысӑк чыс кӑна мар, яваплӑх та. Пирӗн йӗркесӗрлӗхрен тата «усал ӗҫрен» пӑрӑнмалла (Пс. 33:15). Чӑнах та, ҫакна тума яланах ҫӑмӑл мар. Анчах та Иегова «Хӑйӗннисене» тата хӑйне итлесе пурӑнакансене яланах юратассине пӗлни пире тӗреклетет (2 Тим. 2:19; 2 Ҫулсеренхи 16:9а вуласа пар).