Сӑваплӑ ӗҫре вӑхӑтпа тӗрӗс усӑ курӑр
Сӑваплӑ ӗҫӗн 2014-мӗш ҫулӗнче Иегова Свидетелӗсем ырӑ хыпар сарас ӗҫе тума 1 945 487 604 сехет уйӑрнӑ, ҫакӑ эпир Иеговӑшӑн тӑрӑшса ӗҫлеме ҫирӗп шут тытнине уҫҫӑн кӑтартса парать! (Пс. 109:3; 1 Кор. 15:58.) «Вӑхӑт кӗскелсе» килнӗрен ырӑ хыпара ытларах та ытларах ҫынна пӗлтерес тесе сӑваплӑ ӗҫри хаклӑ вӑхӑтпа пӗлсе усӑ курма пултаратпӑр-и? (1 Кор. 7:29.)
Сӑваплӑ ӗҫре вӑхӑтпа тӗрӗс усӑ курас тесен улшӑнусем тума хатӗр пулмалла. Тӗслӗхрен, ырӑ хыпара пӗр-пӗр майпа сарнӑ чухне пӗр сехет е ытларах вӑхӑт пӗр ҫынпа та калаҫма май килменни санӑн час-часах пулкалать пулсан, эсӗ улшӑнусем тума пултаратӑн-и? Паллах ӗнтӗ, лару-тӑру тӗрлӗрен пулма пултарать. Анчах та аяларах илсе панӑ канашсем сана, «ҫиле ҫеҫ тивертесшӗн» ҫапас мар тесе, вӑхӑтпа тӗрӗс усӑ курма пулӑшӗҫ (1 Кор. 9:26).
Килтен киле ырӑ хыпар сарни. Вун-вун ҫул хушши ӗнтӗ хыпарҫӑсем сӑваплӑ ӗҫе ытларах чухне килтен киле ырӑ хыпар сарнипе пуҫлаҫҫӗ. Анчах та ҫынсем нумайӑшӗ кӑнтӑрла ӗҫленӗрен мӗншӗн-ха участока каҫхине, ҫынсем килте пулнӑ чухне тата вӗсем каннӑ чухне каяс мар? Кӑнтӑрла ырӑ хыпара урамра е ӗҫлӗ территорире сарни тухӑҫлӑрах пулма пултарать.
Халӑх йышлӑ пулакан вырӑнта ырӑ хыпар сарни. Сӗтелсемпе стендсене пухӑвӑн территорийӗнчи нумай ҫын ҫӳрекен вырӑнсенче лартмалла. (2013 ҫулхи июльти «Пирӗн сӑваплӑ ӗҫ», 5 с. пӑхӑр.) Ҫавӑн пек вырӑнсенче ҫынсем сахалрах ҫӳреме пуҫлаҫҫӗ пулсан, пухӑвӑн сӑваплӑ ӗҫ комитечӗ сӗтелсемпе стендсене ҫынсем йышлӑрах пулакан вырӑна куҫармалла тесе йышӑнма пултарать.
Тепӗр хут килни тата Библи вӗренни. Ырӑ хыпара ытти майсемпе сарни тухӑҫлӑ пулман чухне эсӗ ҫынсем патне тепӗр хут кайма е Библи вӗренӗвӗ ирттерме пултаратӑн-и? Тӗслӗхрен, килтен киле ырӑ хыпар сарни шӑматкун ирхине тухӑҫлӑ пулсан, эсӗ Библи вӗренӗвне кӑнтӑрла хыҫҫӑн е каҫхине ирттерме пултаратӑн-и? Ҫынсем патне тепӗр хут кайнӑ чухне ырӑ хыпар сарас ӗҫе ытларах хутшӑнас тесе, хыпарҫӑсем пӗчӗкрех ушкӑнсем ҫине пайланса темиҫе машинӑпа кайма пултараҫҫӗ-и?
Ырӑ хыпар сарнӑ вӑхӑта пӗтӗмпех отчёта кӗртме пултаратпӑр пулсан та, сӑваплӑ ӗҫ тухӑҫлӑрах пулни пире ытларах савӑнӑҫ парӗ. Ырӑ хыпара пӗр-пӗр майпа сарни хӑш-пӗр вӑхӑтра тухӑҫлах маррине асӑрхасан, сӑваплӑ ӗҫе урӑх майпа туса пӑх. Иеговӑна, «вырма ани Хуҫине», вӑхӑтпа тӗрӗс усӑ курма пулӑш тесе кӗлту (Матф. 9:38).