Мӗн пурнӑҫ тӑршшӗпе эпир Аслӑ Вӗрентекенрен вӗренсе пурӑнатпӑр

АТТЕ-АННЕН ТӖСЛӖХӖ

Аттепе анне 1950 ҫулсем вӗҫӗнче Италирен Канадӑри Ки́ндерсли хулине (Саска́чеван провинцийӗ) куҫса кайнӑ. Кӑшт вӑхӑт иртсен вӗсем чӑнлӑха пӗлнӗ, ҫакӑ вара пирӗн ҫемьере чи пӗлтерӗшли пулса тӑнӑ. Хӑш-пӗр чухне эпир кунӗпех ырӑ хыпар сараттӑмӑр. Ҫавӑнпа эпӗ шӳтлесе хӑш-пӗр чухне ҫапла калатӑп: «Эпӗ ӗнтӗ сакӑр ҫултах пулӑшакан пионер пулса ӗҫленӗ!»

Ман аттепе аннен пурӑнмалӑх укҫи ҫитсех кайман пулсан та, вӗсем Иеговӑшӑн ҫухатусем тӳсме хатӗр пулнӑ. Ҫапла вӗсем пире лайӑх тӗслӗх кӑтартрӗҫ. Тӗслӗхрен, 1963 ҫулта Пасаде́ну хулинче (АПШ, Калифорни штачӗ) иртекен пӗтӗм тӗнчери конгреса кайма укҫа пултӑр тесе вӗсем хӑйсен нумай япалине сутрӗҫ. 1972 ҫулта вара итальян чӗлхипе калаҫакан ҫынсене ырӑ хыпар пӗлтерес тесе 1 000 ҫухрӑма яхӑн аякра вырнаҫнӑ Канадӑри Трейл хулине (Британи Колумбийӗ провинцийӗ) куҫса кайрӑмӑр. Атте лавккара уборщик пулса ӗҫленӗ. Вӑл Турӑшӑн ытларах ӗҫлесшӗн пулнӑ, ҫавӑнпа ӑна лайӑхрах ӗҫ сӗннӗ чухне вӑл килӗшмен.

Эпӗ аттепе аннене питӗ пархатарлӑ. Вӗсен тӗслӗхӗ мана питӗ кирлӗ япалана ӑнланма пулӑшрӗ: енчен те эпӗ Турӑ Патшалӑхне хамӑн пурнӑҫра малти вырӑна хуратӑп пулсан, Иегова маншӑн тӑрӑшӗ (Матф. 6:33). Ҫавна эпӗ хамӑн пурнӑҫ тӑршшӗпех курса тӑтӑм.

ТУЛЛИ ВӐХӐТПА ӖҪЛЕМЕ ПУҪЛАТПӐР

1980 ҫулта эпӗ Де́бби ятлӑ питӗ лайӑх хӗрарӑм тӑвана качча илтӗм. Иеговӑшӑн ӗҫлесси унӑн ялан малти вырӑнта пулнӑ. Эпир Иеговӑшӑн тулли вӑхӑтпа ӗҫлесшӗн пултӑмӑр, ҫавӑнпа Дебби эпир пӗрлешнӗ хыҫҫӑн виҫӗ уйӑхран пионер пулса ӗҫлеме пуҫларӗ. Ҫулталӑкран эпир пӗчӗк пухӑва куҫса кайрӑмӑр, мӗншӗн тесен унта пулӑшу кирлӗ пулнӑ. Эпӗ те пионер пулса ӗҫлеме пуҫларӑм.

Вӑхӑт иртнӗҫемӗн пире унта килӗшми пулчӗ, ҫавӑнпа эпир куҫса кайма шутларӑмӑр. Анчах куҫса кайиччен эпир район старейшинипе калаҫса илес терӗмӗр. Вӑл ыррӑн, анчах та тӳррӗн ҫапла каларӗ: «Эсир хӑвӑр пурнӑҫа хӑвӑрах йывӑрлататӑр — начаррине кӑна куратӑр. Лайӑххине курма тӑрӑшсан вара, лайӑххине куратӑрах». Ҫак канаш питӗ вӑхӑтлӑ пулчӗ (Пс. 140:5). Эпир унпа тӳрех усӑ куртӑмӑр. Вара тӑван тӗрӗссине каланине часах ӑнлантӑмӑр. Эпир пухура Иеговӑшӑн ытларах тӑвас текенсем пулнине асӑрхарӑмӑр. Вӗсем хушшинче ачасем тата ӗненмен упӑшкасемпе пурӑнакан хӗрарӑм тӑвансем те пурччӗ. Ҫакӑ пире кирлӗ япалана вӗрентрӗ: эпир пирӗн лайӑххине курмаллине тата йывӑр лару-тӑрура Иегова пире пулӑшасса кӗтмеллине ӑнланса илтӗмӗр (Мих. 7:7). Малалла эпир савӑнӑҫлӑ пулма пултартӑмӑр, лару-тӑру та йӗркеленсе кайрӗ.

Пионерсен шкулӗнче пӗрремӗш хут вӗреннӗ чухне пире лайӑх преподавательсем лекрӗҫ. Унччен вӗсем Иеговӑшӑн урӑх ҫӗршывсенче ӗҫленӗ. Преподавательсем пире хӑйсен фотографийӗсене кӑтартатчӗҫ тата мӗнле йывӑрлӑхсемпе тӗл пулни ҫинчен, мӗнле пиллӗхсем илни ҫинчен каласа паратчӗҫ. Ҫакӑ пирӗнте миссионер пулса ӗҫлес кӑмӑл ҫуратрӗ. Вара эпир хамӑр ума ҫӗнӗ тӗллев лартрӑмӑр.

Хамӑр тӗллеве пурнӑҫлас тесе 1984 ҫулта эпир Британи Колумбийӗнчен 4 000 ҫухрӑм ытла аякра вырнаҫнӑ француз чӗлхипе калаҫакан Квебе́к провинцине куҫса кайрӑмӑр. Пирӗн ҫӗнӗ культурӑна хӑнӑхма тата ҫӗнӗ чӗлхе вӗренме тиврӗ. Тата тепӗр йывӑрлӑх та пулчӗ — пирӗн час-часах укҫа ҫитместчӗ. Пӗр вӑхӑт хушши эпир ҫӗрулми кӑна ҫисе пурӑнтӑмӑр. Ӑна эпир хамӑр паллакан фермер хирӗнче, унран ирӗк ыйтса, пуҫтартӑмӑр. Дебби шутласа кӑларма ӑстаччӗ — вӑл ҫӗрулминчен тем тӗрлӗ апат хатӗрлеме вӗренчӗ. Йывӑрлӑхсем пулнӑ пулсан та, эпир савӑнӑҫа ҫухатмарӑмӑр, мӗншӗн тесен эпир Иегова пирӗншӗн тӑрӑшнине курса тӑтӑмӑр (Пс. 63:11).

Пӗррехинче кӗтмен ҫӗртен телефон шӑнкӑравларӗ: пире Канадӑри Вефильте ӗҫлеме чӗнчӗҫ. Эпир ун чухне Галаад шкулӗнче вӗренме заявлени ҫырнӑччӗ, ҫавӑнпа мӗн тумалли пирки иккӗленсе тӑтӑмӑр. Ҫапах та эпир кайма килӗшрӗмӗр. Вефиле ҫитсен филиал комитетӗнче ӗҫлекен Ке́ннет Литтл тӑванран ҫапла ыйтрӑмӑр: «Пире Галаада чӗнсен, вара мӗн тумалла?» Вӑл ҫапла хуравларӗ: «Чӗнсен калаҫӑпӑр».

Пӗр эрне иртсен пире Деббипе Галаада чӗнчӗҫ. Ҫавӑнпа пирӗн йышӑну тумаллаччӗ. Литтл тӑван пире ҫапла каларӗ: «Кирек хӑшне суйласа илсен те, хӑш-пӗр чухне эсир теприне суйласа илмеллеччӗ тесе шухӑшлама пултаратӑр. Пӗри тепринчен лайӑхрах тесе калама ҫук. Иегова вӗсенчен кирек хӑшне те пиллеме пултарать». Эпир Галаада суйласа илтӗмӗр. Вара кайран Литтл тӑван каланӑ ӑслӑ сӑмахсене пӗрре кӑна мар аса илеттӗмӗр. Тӑвансен пирӗн пекрех йышӑну тумалла пулнӑ чухне те эпир вӗсене ҫак сӑмахсене час-часах калаттӑмӑр.

МИССИОНЕРСЕМ ПУЛСА ӖҪЛЕТПӖР

Эпир Галаад шкулӗн 83-мӗш класӗн 24 студенчӗ хушшинче пулма хавас пултӑмӑр. Вӗренӳ 1987 ҫулхи апрель уйӑхӗнче пуҫланчӗ. Эпир Бруклинра (Нью-Йорк) вӗрентӗмӗр. Пире ытларах чухне Ю́лиссис Гласс тата Джек Ре́дфорд тӑвансем вӗрентрӗҫ. Пилӗк уйӑх сисӗнмесӗрех иртсе кайрӗ. Вара 1987 ҫулхи сентябрӗн 6-мӗшӗнче эпир вӗренсе пӗтертӗмӗр. Пире Жонпа Мари́ Гудсемпе пӗрле Гаитине ячӗҫ.

Галаад шкулне вӗренсе тухнисене 1962 ҫултанпа Гаитине яман. Ҫавӑн чухне миссионерсене, тӑрса юлнисене, ҫӗршывран кӑларса янӑ. Вара, Галаад шкулӗнче вӗренсе тухнӑ хыҫҫӑн виҫӗ эрне иртсен, эпир Гаитине, таҫта аякри тусем хушшинчи 35 хыпарҫӑран тӑракан пӗчӗк пухӑва, ҫитрӗмӗр. Эпир, ҫамрӑкскерсем, пурнӑҫ тутине пӗлменскерсем, миссионерсен ҫуртӗнче хамӑр кӑна пурӑнтӑмӑр. Гаитире ҫынсем питӗ чухӑн пурӑнатчӗҫ, нумайӑшӗ вулама пӗлместчӗҫ. Миссионерсем пулса ӗҫленӗ чухне малтанхи ҫулсенче эпир мӗн кӑна курмарӑмӑр пуль! Халӑх пӑлханнине те, патшалӑх влаҫне улӑштарнине те, ҫунакан баррикадӑсене те, ҫил-тӑвӑлсене те куртӑмӑр.

Гаитири чӑтӑмлӑ тата савӑнӑҫлӑ тӑвансенчен эпир нумай вӗрентӗмӗр. Вӗсен пурнӑҫӗ ҫӑмӑл марччӗ, ҫапах та вӗсем Иеговӑна тата сӑваплӑ ӗҫе юрататчӗҫ. Пӗр ватӑ хӗрарӑм тӑван вулама пӗлместчӗ. Ҫапах та вӑл Библири 150-а яхӑн сӑвӑ йӗркине пӑхмасӑр калама пӗлетчӗ. Таврара мӗн пулса иртнине курса пирӗн ӗненӳ ҫирӗпленетчӗ, эпир этемлӗхӗн пур йывӑрлӑхне те Турӑ Патшалӑхӗ кӑна татса парассине уҫҫӑн кураттӑмӑр. Ҫакӑн ҫинчен ыттисене пирӗн питӗ каласа парас килетчӗ. Ҫавӑн чухне эпир кампа Библи вӗренӗвне ирттернӗ, ҫавсене ӑшӑ кӑмӑлпа аса илетпӗр. Вӗсенчен хӑш-пӗрисем каярахпа тулли тата ятарлӑ пионерсем тата старейшинӑсем пулса тӑчӗҫ.

Гаитире эпӗ мормонсен ҫамрӑк миссионерӗпе, Треворпа, паллашрӑм. Эпир унпа темиҫе хут та Библи ҫинчен калаҫрӑмӑр. Ҫулсем иртсен ман пата кӗтмен хыпар килчӗ. Эпӗ унран ҫакӑн пек сӑмахсем ҫырнӑ ҫыру илтӗм: «Ҫитес конгресра эпӗ шыва кӗретӗп! Эпӗ Гаитине, тахҫан мормонсен миссионерӗ пулса ӗҫленӗ вырӑна, таврӑнса ятарлӑ пионер пулса ӗҫлес тетӗп». Тре́ворӑн ӗмӗчӗ пурнӑҫланнӑ: вӗсем арӑмӗпе пӗрле Гаитире нумай ҫул хушши ырӑ хыпар сарнӑ.

ЕВРОПӐНА, КАЙРАН АФРИКӐНА КАЯТПӐР

Пире Европӑри пӗр вырӑна ячӗҫ, унта унччен пирӗн ӗҫ-хӗле хӑш-пӗр енчен чарса лартнӑ пулнӑ. 1992 ҫулта эпир Люблянӑна (Словени) ҫитрӗмӗр. Манӑн атте-анне ҫакӑнтан аякрах мар вырӑнта ҫуралса ӳснӗ. Унччен Югослави пулнӑ территоринче ҫав вӑхӑтра вӑрҫӑ пыратчӗ. Ҫав территоринче пирӗн организацин ӗҫӗсене Венӑра вырнаҫнӑ Австри филиалӗ, За́греб хулинчи (Хорвати) тата Белгра́д хулинчи (Серби) офиссем йӗркелесе тӑратчӗҫ. Халӗ кашни уйрӑм республикӑра хӑйӗн Вефильне уҫма палӑртнӑ.

Ҫапла вара пирӗн каллех ҫӗнӗ чӗлхене вӗренмелле тата ҫӗнӗ культурӑна хӑнӑхмалла пулчӗ. Кунти ҫынсем: «Е́зик е те́жик», — тетчӗҫ. Ҫакӑ «пирӗн чӗлхе йывӑр» тенине пӗлтерет. Чӑнах та, пире ӑна вӗренме йывӑрччӗ. Ҫапах та тӑвансем чунтан парӑннине курса эпир питӗ савӑнаттӑмӑрччӗ. Вӗсем организацире тӑвакан улшӑнусене хатӗр пулсах йышӑнатчӗҫ. Эпир вӗсен ҫавӑн пек кӑмӑлне Иегова пилленине курса тӑтӑмӑр. Иегова пурне те хӑй вӑхӑтӗнче тӳрлетнине тата вӑл ҫакна юратса тунине эпир тепӗр хут куртӑмӑр. Словенире пулнӑ чухне эпир нумай мӗне вӗрентӗмӗр. Унччен вӗреннисем нумайӑшӗ пире йывӑрлӑхсене тӳссе ирттерме пулӑшрӗҫ.

Анчах малалла пирӗн тата пысӑк улшӑнусем пулса иртрӗҫ. 2000 ҫулта пире Хӗвеланӑҫ Африкӑри Кот-д’Ивуара ячӗҫ. Кайран, 2002 ҫулхи ноябрь уйӑхӗнче, граждан вӑрҫи пуҫланнине пула пире Сье́рра-Леонене куҫарчӗҫ. Унта 11 ҫул хушши пынӑ граждан вӑрҫи тин кӑна чарӑннӑ пулнӑ. Кот-д’Ивуартан кӗтмен ҫӗртен куҫса кайма ҫӑмӑл пулмарӗ. Анчах унччен эпир мӗне вӗренни пире савӑнӑҫа упраса хӑварма пулӑшрӗ.

Сьерра-Леонере Библи вӗренес текенсем нумайччӗ. Эпир вӗсем валли ытларах вӑхӑт уйӑрма тӑрӑшрӑмӑр. Тата пире вӑрҫӑ ҫулӗсене чӑтӑмлӑн тӳссе ирттернӗ тӑвансен юратӑвӗ тӗлӗнтеретчӗ. Вӗсем чухӑн пурӑнатчӗҫ, ҫапах та хӑйсен мӗн пуррине ыттисене хаваспах паратчӗҫ. Пӗр хӗрарӑм тӑван Деббине пӗр-пӗр тумтир парнелесшӗнччӗ. Малтан Дебби илесшӗн пулмарӗ, анчах хӗрарӑм тӑван парнене йышӑнма тархасласах ыйтрӗ. Вӑл: «Вӑрҫӑ вӑхӑтӗнче ытти ҫӗршыври тӑвансем пире пулӑшса тӑчӗҫ, халӗ пулӑшма пирӗн черет», — терӗ. Эпир Деббипе вӗсем пек пулма тӗллев лартрӑмӑр.

Вӑхӑт иртсен эпир Кот-д’Ивуара таврӑнтӑмӑр. Анчах унта политика тӗлӗшӗнчен йывӑрлӑхсем пулнине пула каллех ҫынсене пусмӑрлама пуҫланӑ. Ҫавӑнпа пире 2004 ҫулхи ноябрь уйӑхӗнче вертолёт ҫине лартса урӑх ҫӗре куҫарчӗҫ. Пирӗнтен кашни 10 килограмм багаж кӑна илме пултарнӑ. Эпир Францин ҫар базинче ҫӗр каҫрӑмӑр, урайӗнче ҫывӑртӑмӑр. Тепӗр кунне вара Швейцарине вӗҫсе кайрӑмӑр. Ҫурҫӗр тӗлнелле эпир Вефиле ҫитрӗмӗр. Унта филиал комитетӗнчи тӑвансем, Сӑваплӑ ӗҫе лайӑхлатма пулӑшакан шкулӑн преподавателӗсем тата вӗсен арӑмӗсем пире ыталаса ӑшшӑн кӗтсе илчӗҫ, вӗри апат тата темӗн чухлӗ Швейцари шоколадне ҫитерчӗҫ. Вӗсен юратӑвӗ пирӗн чӗрене хускатрӗ.

Пире вӑхӑтлӑха Ганӑна ячӗҫ. Кайран вара, Кот-д’Ивуарта халӑх пӑлханма пӑрахсан, пире каллех Кот-д’Ивуара ячӗҫ. Тӑвансем ырӑ кӑмӑллӑ пулни пире пӗр ҫӗршывран тепӗр ҫӗршыва куҫса ҫӳренипе ҫыхӑннӑ йывӑрлӑхсене тӳссе ирттерме пулӑшрӗ. Эпир Деббипе хамӑр хушӑра ҫакӑн пек йышӑну турӑмӑр: Иеговӑн организацийӗнче тӑвансем хушшинчи юрату йӗркеллӗ япала пулин те, пирӗн ҫав юратӑва хаклама пӑрахмалла мар. Ҫав лӑпкӑ мар вӑхӑтсем пире нумай мӗне вӗренме пулӑшрӗҫ.

ИЕГОВӐШӐН ҪЫВӐХ ХӖВЕЛТУХӐҪРА ӖҪЛЕТПӖР

2006 ҫулта эпир пӗтӗм тӗнчери тӗп управленинчен ҫыру илтӗмӗр. Иеговӑшӑн ӗҫлеме пирӗн Ҫывӑх Хӗвелтухӑҫа каймалла пулать. Пире ҫӗнӗ приключенисем, йывӑрлӑхсем, чӗлхесем тата культурӑсем кӗтнӗ. Унта политикӑна тата тӗнсене пула нумай йывӑрлӑхчӗ. Ҫавӑн пек йывӑр лару-тӑрура пирӗн тата нумай мӗне вӗренмелле пулнӑ. Тӑвансем тӗрлӗ культурӑран пулнине пӑхмасӑрах пӗрлӗхе упратчӗҫ, ҫакӑ пире питӗ савӑнтаратчӗ. Ҫакӑ Иеговӑн организацийӗ паракан хушусене пурте итленине пула пулнӑ. Эпир тӑвансемпе мухтанаттӑмӑрччӗ, мӗншӗн тесен вӗсенчен ытларахӑшӗ хурӑнташӗсем, пӗрле вӗренекенӗсем, пӗрле ӗҫлекенӗсем тата кӳршисем хирӗҫ тӑнине хӑюллӑн тӳссе ирттернӗ.

2012 ҫулта эпир Тель-Ави́в хулинче (Израиль) иртекен пысӑк ятарлӑ конгреса кайса килтӗмӗр. Ҫак территорире пирӗн эрӑри 33-мӗш ҫулхи Аллӑмӗш кун уявӗ иртнӗренпе Иегова халӑхӗ ҫакӑн пек йышлӑ пуҫтарӑнман. Чӑнах та, ҫакӑ асран кайми событи пулчӗ.

Пӗррехинче пире пирӗн ӗҫ-хӗле хӑш-пӗр енчен чарса лартнӑ ҫӗршыва кайма ыйтрӗҫ. Эпир хамӑрпа пӗрле кӑштах литература илтӗмӗр, унти тӑвансемпе ырӑ хыпар сартӑмӑр тата пысӑк мар конгрессене кайса килтӗмӗр. Пур ҫӗрте те хӗҫ-пӑшаллӑ салтаксемччӗ, блокпостсемччӗ, ҫав-ҫавах эпир хамӑра лӑпкӑ туйрӑмӑр, мӗншӗн тесен пирӗнпе яланах темиҫе хыпарҫӑ ҫӳретчӗ тата эпир хамӑр ҫине ытлашши тимлеттерес мар тесе асӑрхануллӑ пултӑмӑр.

АФРИКӐНА ТАВРӐНАТПӐР

2013 ҫулта пире ҫӗнӗ ӗҫ шанса пачӗҫ — пире Киншасӑри (Демократиллӗ Конго Республики) филиалта ӗҫлемелле терӗҫ. Конго — пысӑк ҫӗршыв, кунта ҫутҫанталӑк питӗ илемлӗ. Ҫапах та кунта ҫынсем питӗ чухӑн пурӑнаҫҫӗ тата нумай вӑрҫӑ-харҫӑна пула асапланаҫҫӗ. Пире унта ярсан, эпир тӳрех ҫапла шутларӑмӑр: «Эпир Африкӑна пӗлетпӗр, ҫавӑнпа эпир хатӗр». Анчах пирӗн нумай мӗне вӗренмелле пулчӗ, тӗслӗхрен, ҫулсемпе кӗперсем ҫук ҫӗртре кирлӗ вырӑна мӗнле ҫитмеллине вӗренмелле пулчӗ. Кунти тӑвансем вара пире питӗ лайӑх тӗслӗх кӑтартрӗҫ! Экономика тӗлӗшӗнчен йывӑрлӑхсем пулсан та, вӗсем савӑнӑҫлӑччӗ тата чӑтӑмлӑччӗ, ырӑ хыпар сарма юрататчӗҫ, пухӑвӑн тӗлпулӑвӗсене тата конгрессене ҫӳрес тесе вӗсем нумай вӑй хуратчӗҫ. Эпир Иегова пулӑшнине тата пилленине уҫҫӑн куртӑмӑр, мӗншӗн тесен ытларах та ытларах ҫын чӑнлӑха пӗлсе Иеговӑшӑн ӗҫлесшӗнччӗ. Конгора ирттернӗ ҫулсем пирӗн пурнӑҫа пуянлатрӗҫ. Унта эпир ҫӗнӗ туссем тупрӑмӑр, эпир пӗр ҫемьери ҫынсем пек пулса тӑтӑмӑр.

2017 ҫул вӗҫӗнче эпир каллех ҫӗнӗ вырӑна куҫрӑмӑр, хальхинче — Кӑнтӑр Африка Республикине. Кунти Вефиль эпир унччен ӗҫленӗ Вефильсенчен чылай пысӑкрах. Пире эпир унччен нихӑҫан та туман ӗҫ шанса пачӗҫ. Сӑнарлӑ каласан, эпир каллех парта хушшине лартӑмӑр. Унччен мӗне вӗренни те пире пулӑшрӗ. Кунта эпир Иеговӑшӑн 20, 30, 40 тата ытларах та ҫул шанчӑклӑн ӗҫлесе тӑнӑ тӑвансемпе паллашрӑмӑр. Эпир вӗсене пурне те юратса пӑрахрӑмӑр. Пирӗн Вефиль ҫемйинче тӗрлӗ раса, тӗрлӗ халӑх ҫыннисем килӗштерсе, пӗрлӗхре ӗҫлесе тӑраҫҫӗ. Ҫакӑ тӗлӗнтермеллипех тӗлӗнтерет. Чӑнах та, вӗсем ҫӗнӗ ҫын пулса тӑма, Библири принципсем тӑрӑх пурӑнма тӑрӑшнине Иегова пиллет.

Тулли вӑхӑтпа ӗҫлесе тӑнӑ ҫулсем хушшинче пирӗн Деббипе тӗрлӗ интереслӗ ӗҫсем тума тӳр килчӗ. Эпир тӗрлӗ культурӑна хӑнӑхрӑмӑр тата ҫӗнӗ чӗлхесем вӗрентӗмӗр. Хӑш-пӗр чухне ҫӑмӑл пулмарӗ. Ҫапах та организаци тата пирӗн тӑвансем пулӑшса тӑнине пула эпир яланах Иегова пире чунтан парӑнса юратнине туйса тӑтӑмӑр (Пс. 144:2, ҪТ). Ҫавӑн пек нумай ҫул хушши вӗренни пире Иеговӑшӑн лайӑхрах ӗҫлеме пулӑшрӗ тесе шутлатпӑр эпир.

Атте-анне мана мӗнле пӑхса ӳстернишӗн эпӗ вӗсене питӗ пархатарлӑ. Деббин пулӑшӑвне тата тӗрлӗ ҫӗршыври тӑвансен тӗслӗхӗсене эпӗ питӗ хаклатӑп. Эпир Деббипе малалла та хамӑр Аслӑ Вӗрентекенрен вӗренсе пырасшӑн.