Pan Fo Cymar yn Anffyddlon

“O’n i jest eisiau marw pan ddywedodd fy ngŵr wrtho i ei fod yn fy ngadael i am ddynes iau. Oedd y peth mor annheg, yn enwedig o gofio cymaint oeddwn i wedi ei aberthu drosto.”—Maria, Sbaen.

“Pan adawodd fy ngwraig yn gwbl ddirybudd, suddodd fy nghalon. Chwalwyd ein gobeithion, ein breuddwydion, a’n cynlluniau. Ambell ddiwrnod o’n i’n meddwl bod fy mhryderon wedi diflannu, dim ond i syrthio’n ôl i anobaith unwaith eto.”—Bill, Sbaen.

MAE anffyddlondeb yn y briodas yn ergyd drom. Mae’n wir bod rhai wedi gallu maddau eu priod edifar ac ailadeiladu eu perthynas.a P’un a yw’r briodas yn goroesi neu beidio, bydd y cymar dieuog yn wastad yn ei chael yn brofiad hynod o boenus. Sut gall y rhain ddelio â’u hemosiynau bregus?

ADNODAU O’R BEIBL A ALL HELPU

Er gwaethaf eu loes calon, mae sawl cymar dieuog wedi cael cysur o’r Ysgrythurau. Maen nhw wedi dysgu bod Duw yn gweld eu dagrau ac yn teimlo eu poen.—Malachi 2:13-16.

“Pan oeddwn i’n poeni am bob math o bethau, roedd dy gefnogaeth di yn fy ngwneud i’n llawen.”—Salm 94:19.

“Wrth imi ddarllen yr adnod honno, wnes i ddychmygu Jehofa yn fy nghefnogi ac yn fy nghysuro yn dyner, fel y byddai tad cariadus yn ei wneud,” meddai Bill.

“Ti’n ffyddlon i’r rhai sy’n ffyddlon.”—Salm 18:25.

Dywedodd Carmen, ar ôl i’w gŵr odinebu dros gyfnod o fisoedd, “Oedd fy ngŵr wedi bod yn anffyddlon, ond o’n i’n gallu ymddiried yn ffyddlondeb Jehofa. Fyddai ef byth yn fy siomi.”

“Peidiwch gadael i ddim byd eich poeni chi. Gweddïwch, a gofyn i Dduw am bopeth sydd arnoch ei angen. . . . Byddwch chi’n profi’r heddwch perffaith mae Duw’n ei roi—y daioni sydd tu hwnt i bob dychymyg.”—Philipiaid 4:6, 7.

“Darllenais yr adnodau hyn drosodd a throsodd, ac wrth imi weddïo a gweddïo, rhoddodd Duw heddwch yn fy mywyd.” meddai Sasha.

Roedd pawb a ddyfynnwyd uchod yn teimlo fel rhoi’r ffidil yn y to ar brydiau. Ond roedden nhw’n ymddiried yn Nuw a chawson nhw nerth o’i Air. Yn ôl Bill: “Rhoddodd fy ffydd ystyr i fy mywyd pan oedd popeth arall yn mynd ar chwâl. Er imi dreulio cyfnod yn cerdded drwy’r ‘ceunant tywyll dychrynllyd,’ roedd Duw gyda mi.”—Salm 23:4.

a Am drafodaeth ar p’un ai maddau neu beidio, gweler y gyfres yn Deffrwch! Saesneg 22 Ebrill, 1999, “When a Mate Is Unfaithful.”

Awgrymiadau i’ch Helpu i Ymdopi

Myfyriwch ar adnodau cysurlon.

“Darllenais lyfr Job ac yna’r Salmau,” esboniodd Bill, “gan danlinellu pob adnod a oedd yn berthnasol i’m sefyllfa. Sylweddolais fod y bobl yr oeddwn i wedi darllen amdanyn nhw wedi profi’r un fath o boen a phryder â minnau.”

Gwrandewch ar gerddoriaeth i’ch cysuro.

Dyma brofiad Carmen: “Mi fyddwn i’n gwrando ar gerddoriaeth pan o’n i’n cael trafferth cysgu. Oedd hyn o gysur mawr imi.” Dywedodd Daniel: “Dysgais sut i chwarae’r gitâr ac oedd harmoni’r gerddoriaeth yn fy helpu i deimlo heddwch mewnol unwaith eto.”

Siaradwch am eich teimladau.

Dywedodd Daniel, “Doeddwn i ddim wedi arfer trafod fy nheimladau ag eraill, ond oedd gen i ffrindiau da, a byddwn i’n sgwrsio â nhw bob dydd. Agorais fy nghalon drwy siarad a thrwy ysgrifennu llythyrau. Gwnaeth hynny wir helpu.” Eglurodd Sasha: “Mi oedd help fy nheulu yn hanfodol. Oedd fy mam yn barod i wrando arna’ i pryd bynnag o’n i eisiau siarad. Hefyd, helpodd fy nhad drwy wneud imi deimlo’n ddiogel a chaniatáu imi wella yn fy amser fy hun.”

Daliwch ati i weddïo.

“O’n i’n gweddïo’n ddi-baid ac yn teimlo bod Duw yn agos ata’ i, yn gwrando arna’ i, ac yn fy helpu. Yn ystod yr adeg anodd honno, mi wnes i glosio at Dduw,” meddai Carmen.