GWERS 25
Beth Yw Pwrpas Duw ar Ein Cyfer?
Mae’r Beibl yn cydnabod mai “byr ydy bywyd dyn, . . . ac mae ei ddyddiau yn llawn trafferthion.” (Job 14:1) Ai dyma’r bywyd mae Duw yn dymuno inni ei gael? Os nad yw, yna beth yw ei bwrpas ar ein cyfer, ac a gaiff ei gyflawni? Ystyriwch atebion calonogol y Beibl.
1. Pa fath o fywyd y mae Jehofa yn dymuno inni ei gael?
Mae Jehofa am inni gael y bywyd gorau posib. Pan greodd Duw y bobl gyntaf, Adda ac Efa, rhoddodd baradwys hyfryd, gardd Eden, yn gartref iddyn nhw. Yna, “dyma Duw yn eu bendithio nhw, a dweud wrthyn nhw . . . ‘Llanwch y ddaear a defnyddiwch ei photensial hi.’” (Genesis 1:28) Roedd Jehofa yn dymuno iddyn nhw gael plant, gofalu am yr anifeiliaid, a throi’r ddaear gyfan yn baradwys. Ei fwriad oedd i bobl gael iechyd perffaith a byw am byth.
Er na ddigwyddodd hynny,a nid yw pwrpas Duw wedi newid. (Eseia 46:10, 11) Y mae’n dal i ddymuno i fodau dynol fyw am byth mewn byd perffaith.—Darllenwch Datguddiad 21:3, 4.
2. Sut gallwn ni gael bywyd ystyrlon heddiw?
Mae Jehofa wedi rhoi inni “angen ysbrydol” sef yr awydd i’w adnabod a’i addoli. (Darllenwch Mathew 5:3-6.) Mae’n dymuno inni fod yn ffrindiau agos iddo, “i rodio yn ei ffyrdd a’i garu,” ac i’w wasanaethu â’n “holl galon.” (Deuteronomium 10:12, BCND; Diarhebion 3:32) Drwy wneud hynny, gallwn ni fod yn hapus er gwaethaf ein problemau. Mae addoli Jehofa yn rhoi ystyr a phwrpas i’n bywydau.
CLODDIO’N DDYFNACH
Dysgwch am gariad mawr Jehofa drwy’r ffordd y creodd y ddaear i ni, a dysgwch o’i Air am bwrpas bywyd.
3. Mae gan Jehofa bwrpas gwych ar gyfer dynolryw
Gwyliwch y FIDEO, ac yna trafodwch y cwestiwn sy’n dilyn.
Pam creodd Duw blaned mor hardd inni?
Darllenwch Pregethwr 3:11 BCND, ac yna trafodwch y cwestiwn hwn:
Beth rydych chi’n ei ddysgu am Jehofa o’r adnod hon?
4. Nid yw pwrpas Jehofa wedi newid
Darllenwch Salm 37:11, 29 ac Eseia 55:11, ac yna trafodwch y cwestiwn hwn:
Sut rydyn ni’n gwybod nad yw pwrpas Jehofa wedi newid?
Mae’n bosib adfer tŷ sydd mewn cyflwr gwael. Yn yr un modd, bydd Duw yn adfer y ddaear ar gyfer y rhai sydd yn ei garu.
5. Mae addoli Jehofa yn rhoi pwrpas i’n bywydau
Mae gwybod beth yw pwrpas bywyd yn ein gwneud ni’n hapus. Gwyliwch y FIDEO, ac yna trafodwch y cwestiwn canlynol:
Sut mae dysgu beth yw pwrpas bywyd wedi helpu Terumi?
Darllenwch Pregethwr 12:13, ac yna trafodwch y cwestiwn hwn:
Gan fod Jehofa wedi gwneud cymaint ar ein cyfer, sut gallwn ni ddangos ein bod ni’n ddiolchgar?
BYDD RHAI YN GOFYN: “Beth yw pwrpas bywyd?”
Sut byddech chi’n ateb?
CRYNODEB
Mae Jehofa eisiau inni fwynhau bywyd am byth mewn amgylchiadau perffaith ar y ddaear. Os ydyn ni’n ei addoli â’n holl galon, bydd ystyr i’n bywydau—hyd yn oed heddiw.
Adolygu
Beth oedd bwriad gwreiddiol Jehofa ar gyfer Adda ac Efa?
Sut rydyn ni’n gwybod nad yw pwrpas Jehofa ar gyfer dynolryw wedi newid?
Sut gallwch chi gael bywyd ystyrlon?
DARGANFOD MWY
Ystyriwch y dystiolaeth y bu gardd Eden ar y ddaear ar un adeg.
“Gardd Eden—Myth neu Ffaith?”(Y Tŵr Gwylio, Ionawr 1, 2011)
Dysgwch pam gallwn fod yn sicr y bydd y ddaear yn para am byth.
“A Gaiff y Ddaear ei Dinistrio Ryw Ddydd?” (Erthygl ar jw.org)
Ystyriwch beth mae’r Beibl yn ei ddweud am sut i gael bywyd ystyrlon.
Gwelwch sut daeth dyn o hyd i rywbeth a oedd ar goll yn ei fywyd, er ei fod yn meddwl bod popeth ganddo.
a Yn y wers nesaf, byddwch yn dysgu beth a aeth o’i le.