Te Zemmo Ane Te Naaŋ Moɔloo Toma Lammo Yelsɛgree Yelpeɛre Gane

© 2025 Watch Tower Bible and Tract Society of Pennsylvania

JULY 7-13

BAABOLE POƆ YELNIMIZEERE YENG YELIBIE 21

Baabole Sowuli Naŋ Na Baŋ Soŋ Kultaa Deme Ka Ba Taa Popeɛloŋ Ba Kultaa Poɔŋ

w03 10/15 4 wɛl. 5

Wala Hoŋ Na Baŋ E A De Gbɛ-Sonne?

Ka teneeŋ lonne de gbɛɛ, a ba maŋ baare soŋ. Yeng Yelibie 21:5 kpãã teŋ ka: “Neɛ naŋ maŋ mãã o meŋɛ kyɛ erɛ yɛlɛ maŋ toɔ̃ eɛ yɛlɛ aŋ maale soŋ zaa, kyɛ neɛ naŋ lonno o yel-eree poɔŋ na kpɛ la nandaaloŋ poɔ.” Aŋa mannoo poɔŋ, baapaalba naŋ ba taa nɔmmo meŋɛ ko taa ba seŋ ka ba lonne kpɛ kultaa poɔŋ. Aŋa yuomo 300 mine naŋ pare, William Congreve naŋ da maŋ sɛgrɛ drama da yeleeŋ ka: “Ka teneeŋ wa lonne kpɛ kultaa poɔ, a puoriŋ kaapɔge te na yeleeŋ ka, ka N da baŋ ka lɛ.”

g 7/08 7 wɛl. 2

Lɛ Yɛŋ Na Toɔ̃ E A Taa Popeɛloŋ Yɛ Kultaa Poɔŋ

Taa sigrimennoŋ. “Yɛ ta wa derɛ tage-kaŋ-tage kyɛbee zɛgemeŋɛ erɛ yelzaa, kyɛ a yi sigrimennoŋ poɔŋ yɛ maŋ de yɛ taaba ka ba waa la kpoŋ gaŋ yɛ.” (Filipae 2:3) Nɔkpeɛne maŋ iriŋ bonso kultaa deme maŋ paanɛɛ taa ka yelkaŋaŋ wa e, kyɛ aseŋ ka ba yi sigrimennoŋ poɔŋ a nyɛ sori baŋ na baŋ tu a sɛgre a yɛlɛ. Sukyirimaaroŋ kyɛbee sigrimennoŋ na baŋ soŋeŋ ka ba ta paana taa ka nɔkpeɛneŋ wa iri.

w06 9/15 28 wɛl. 13

“Nyagna Ane Ho Baapaaloŋ Pɔge”

¹³ Ka kultaa deme yel-ereŋ vɛŋ ka popeɛloŋ ba kye a kultaa poɔŋ, aseŋ ka ba mɔɔ ba mɔɔbo zaa a bɔ sori baŋ na baŋ tu kyɛ sɛgre a yɛlɛ. Aŋa mannoo poɔŋ, aminekaŋaŋ sori na baŋ maŋ tu kyɛ yele yɛlɛ korɔ taa na ba soma. (Yeng Yelibie 12:18) Aŋa lɛ te naŋ nyɛ a zannoo naŋ pare poɔŋ na, a yel ŋa na baŋ vɛŋeŋ ka te enne kyoɔre yaga zaa. Yeng yelibie naŋ be a Baabole poɔ yeleeŋ ka: “Neɛ aŋ kpeɛrɛ mɔpiri poɔŋ seɛ la oŋ kpeɛrɛ neŋ pɔge naŋ nɔŋ zɔɔre a dɔnnɔ suuri.” (Yeng Yelibie 21:19) Ka hooŋ e pɔge a be a kultaa ŋa tɔ poɔŋ, soore ho meŋɛ ka, ‘N yel-eree maŋ vɛŋeŋ aŋ e kpeɛŋaa ka N serɛ peɛle ma bee?’ A Baabole yelko la sereba ka: “Yɛ nɔnɔ yɛ pɔgeba a ta maŋ taa suuri ne ba.” (Kolosi 3:19) Ka hooŋ e serɛ, soore ho meŋɛ ka: ‘N erɛɛ N pɔge nimikuõ-yɛlɛ ka lɛ vɛŋ oŋ boɔrɔ sukyiridii yire zi-zaala kaŋa bee?’ Kyɛ, lɛ ba wuli ka ho de ho meŋɛ eŋ peɛ̃mo toma poɔŋ. Yelmeŋɛ naŋ bebe la ka, a yelfaa ŋa na baŋ eŋ, azuŋ a eɛ nimizeɛ ka yɛ maŋ yi yɛ sukyie poɔŋ a di dama kyaare yelkpeɛne yɛ naŋ tuoro.

Baabole Poɔ Yelsonne

w05 1/15 17 wɛl. 9

Ŋmaa Foto Ho Teɛroŋ A Nyɛ Naaŋmen Naaloŋ Naŋ Dire Naaŋ

⁹ Yezu ba la e nensaalaa naŋ zeŋ boŋa zuŋ. Pampana ŋa o e la Naa naŋ taa kpeɛ̃o yaga zaa. A Baabole yeleeŋ ka o zɔŋ la wiri, ka lɛ wuli ka o gɛrɛɛ zɔɔre. (Yeng Yelibie 21:31) “Nyɛ wir-pelaa kaŋa,” lɛ ka Yel-iriwulaa 6:2 yeli, “a soba na naŋ da zɔŋ a wiri da taa la tammo; ka ba da de nazupili ko o, ka o da wa yi a zɔɔrɔ toɔnɔ kyɛ na la zɔɔtoɔ̃.” Ane meŋ Deevid da yielee yieloŋ a kyaare Yezu a yelka: “Jehoova na eŋ ka ho naaloŋ daŋkpale yi Zaayɔŋ poɔŋ, a yele: ‘Di naaloŋ ho dɔndɔnne zuŋ.’”​—Yieme 110:2.

JULY 14-20

BAABOLE POƆ YELNIMIZEERE YENG YELIBIE 22

Baabole Sowuli Naŋ Na Baŋ Soŋ Bo Ka Ho Guoli Ho Biiri Soŋ

w20.10 27 wɛl. 7

Ba Na Baaŋ A Wa Puoro Naaŋmen Bee?

⁷ Ka yɛ naŋ wa e kultaa deme a boɔrɔ ka yɛ dɔge biiri, yɛ soore yɛ menne ka: ‘Te e la noba naŋ sigri te menne, a de Jehoova puoruu nimizeɛ te zemmo poɔŋ a na baŋ kaa bie bee?’ (Yiem. 127:3, 4) Ka hooŋ wa e bidɔgrɔ, soore ho meŋɛ ka: ‘N wulee N biiri tɔnɔ naŋ be tonkpeɛne tommoŋ?’ (Ikil. 3:12, 13) ‘N maŋ mɔɔrɛɛ N mɔɔbo zaa ka N go N biiri na yi eŋgannoŋ ane yelfaare mine aŋ na baŋ pɔge ba a Setaana donɛɛ ŋa poɔŋ bee?’ (Yeng. 22:3) Ho koŋ baŋ go ho biiri yi yelkpeɛne na zaa baŋ na tuore, kyɛ ho na baŋ mɔɔ a maŋ yi nɔmmo poɔŋ a sɛgre ba a kyaare yelkpeɛne na baŋ na tuore. Maŋ wulo ba ka ba dɛle Naaŋmen Yelbiri na, a maŋ bɔ sowuli yi o poɔŋ saŋa na baŋ wa tuoro yelkpeɛne. (Kanne Yeng Yelibie 2:1-6.) Aŋa mannoo poɔŋ, ka ho booree neɛ kaŋaŋ iri ka o na barɛɛ Jehoova puoruu, soŋ ho biiri ka ba nyɛ a yi Naaŋmen Yelbiri na poɔŋ ananso a naŋ seŋ ka ba naŋ dire yelmennoŋ korɔ Jehoova. (Yiem. 31:23) Ka yɛ nɔŋna kaŋaŋ wa kpi, wuli ho biiri na lɛ baŋ na baŋ bɔ sukyiridii yɛlɛ yi Naaŋmen Yelbiri na poɔŋ.​—2 Kor. 1:3, 4; 2 Tim. 3:16.

w19.12 26 wɛl. 17-19

Bidɔgreba​—Yɛ Wulo Yɛ Biiri Ka Ba Wa Nɔŋ Jehoova

¹⁷ Piili wulo ho biiri saŋa na baŋ naŋ e bibiiri. Ka bidɔgrebaŋ wa piili wulo ba biiri ba biiloŋ saŋa a na soŋ baŋ yaga saŋa na baŋ wa baara na. (Yeng. 22:6) Hooŋ leɛ nyɛ Timoti yɛlɛ ŋa, o na ka o neŋ a bitontona Pɔɔl da laŋ kyɛnɛ na. Timoti ma Yunisi, ane o makoma Lowesi da kooŋ wuluu a “yi [o] biiloŋ saŋa.”​—2 Tim. 1:5; 3:15.

¹⁸ Kultaa deme mine yoe naŋ di Jean-Claude ane Peace naŋ yi Côte d’Ivoire, da dɔge la biiri bayoɔbo a wuli ba baŋ wa nɔŋ kyɛ puoro Jehoova meŋ. Boŋ da soŋ ba baŋ toɔ̃ e lɛ? Ba da tɔglɛɛ Yunisi ane Lowesi ewuli soŋ na. Ba yeleeŋ ka, “Te da piili wulee te biiri na Naaŋmen yɛlɛ a yi ba biiloŋ saŋa, saŋa na teŋ wa dɔge ba aŋ ba kɔɔre na.”​—Dut. 6:6, 7.

¹⁹ Ka ba naŋ yelka ‘manna’ Jehoova yɛlɛ korɔ ho biiri, wala ka lɛ wuli? A yelbie ‘maŋ manna’ wuleeŋ ka ho maŋ “wulo a kyɛ sonnɔ ba gbɛɛ yaga.” Ka bidɔgrebaŋ na toɔ̃ e lɛ, aseŋ ka ba maŋ vɛŋ ka ba neŋ ba biiri na laŋ erɛ yɛlɛ. Wagre mineŋ, a na maŋ erɛ boŋ suuri ka ho maŋ leɛ teɛre ho biiri sowuli mine hoŋ da ko ba. Kyɛ aseŋ ka bidɔgreba nyɛ ka a eɛ sori baŋ na baŋ tu a kyɛ wuli ba biiri Naaŋmen Yelbiri na, ka ba woŋ a muni soŋ a de toŋ neŋ toma ba zemmo poɔŋ.

w06 4/1 9 wɛl. 4

Bidɔgreba Yɛ E Ewuli Soŋ Ko Yɛ Biiri

Bibiiri na maŋ taa la bibili yɛŋ, ba mine na baŋ zagrɛɛ kawane a gba piili erɛ yelfaare. (Munpiilee 8:21) Bo ka bidɔgreba na baŋ e? A Baabole yeleeŋ ka: “Damboloŋ le marɛɛ bibile sukyiriŋ, kyɛ wulibo daa na iruuŋ gaaneŋ tɔɔre zaa.” (Yeng Yelibie 22:15) Noba mine maŋ teɛreŋ ka a yɛlɛ ŋa eebo e la potu-yɛlɛ kyɛ e yɛlɛ naŋ pare wa gaa. A Baabole ba sage ka neɛ erɛ o tɔ nimikuõ-yɛlɛ bee a eroo yɛlɛ naŋ ba soma. Wagre mineŋ “wulibo daa,” na baŋ wulee kpeɛ̃o na bidɔgreba naŋ taa, a maŋ yi nɔmmo poɔŋ a de wuluu ane dɛnnoo korɔ ba biiri ba naŋ nɔŋ ba yɛlɛ zuŋ ka lɛ na baŋ soŋ ba ba zemmo zaaŋ.​—Hiburu 12:7-11.

Baabole Poɔ Yelsonne

w21.08 22 wɛl. 11

Maŋ Taa Popeɛloŋ Apoɔsoe Na Ho Naŋ Taa Na Eŋɛŋ

¹¹ Te popeɛloŋ na baŋ do la saa ka te naŋ de te menne zaa eŋ toma zaa ba naŋ ko te ka te toŋ Jehoova lantaapuoruu poɔŋ. “De nimizeɛ” tonɔ a naaŋ moɔloo toma, a kyɛ maŋ la de ho meŋɛ zaa eŋ a lantaapuoruu toma poɔŋ. (Tom. 18:5; Hib. 10:24, 25) Maŋ sɛgre ho meŋɛ sɛre kyɛ gɛrɛ a lammozie, a maŋ iri yɛlɛ noɔre naŋ eŋnɛ faŋa a yi boma na yɛ naŋ zanna na poɔŋ. Maŋ de sakuu biiri toma zaa ba naŋ ko bo ka ho toŋ a daagbuli poɔ lammo saŋa nimizeɛ. Ka ba naŋ wa yelka ho soŋ toŋ toma mine a lantaapuoruu poɔŋ, maŋ mɔɔ kyɛ de wagre toŋ neŋ toma kyɛ waa dɛlebo meŋ. Ta wa derɛ toma zaa ba naŋ ko bo ka a yɛlɛ ba fɛre ka ho sãã ho wagre a eŋɛŋ. Mɔɔrɔ ka ho nyɛrɛ nimitɔɔre gaabo yɛlɛ hoŋ na baŋ e na poɔŋ. (Yeng. 22:29) Ka hooŋ wa de ho meŋɛ zaa eŋ Jehoova puoruu toma poɔŋ, lɛ na vɛŋeŋ ka ho nyɛrɛ nimitɔɔre gaabo a kyɛ taa popeɛloŋ meŋ. (Gal. 6:4) A na vɛŋeŋ ka ho poɔ maŋ pɛle ko ho taaba, ka hooŋ wa nyɛ ka ba nyɛɛ apoɔsori kaŋa hoŋ da boɔrɔ.​—Uro. 12:15; Gal. 5:26

JULY 21-27

BAABOLE POƆ YELNIMIZEERE YENG YELIBIE 23

Baabole Sowuli Naŋ Kyaare Dããkpeɛne Nyuubu

w04 12/1 19 wɛl. 5-6

Taa Teɛroŋ Soŋ Kyaare Dããkpeɛne Nyuubu

⁵ Ka neɛŋ wa nyu dããkpeɛne yaga a kyɛ kaara soŋ ka neɛzaa ta baŋ ka o bugeeŋ meŋ? Noba mine na baŋ nyu la dãã yaga kyɛ ho koŋ baŋ ka ba bugeeŋ. Kyɛ ka neɛŋ wa teɛrɛ ka a lɛ eebo ba e yelfaa, o meŋɛ la oŋ bɛnlɛ. (Jeremaiya 17:9) Fẽẽfẽẽ fẽẽfẽẽ dããkpeɛne nyuubu na wa nyɔgɛɛ o soba ka a fɛre ka o nyu a sɛre kyɛ na baŋ e yelzaa, oŋ na wa baŋ na ka o e la ‘dããnyu gbaŋgbaa.’ (Tiitu 2:3) Ŋaa ka gaŋ-sɛgre kaŋa yuori naŋ di Caroline Knapp yelkyaare sori na dããkpeɛne naŋ maŋ tu kyɛ nyɔge neɛ na, o yeleeŋ ka: “Dããkpeɛne nyuubu maŋ nyɔgɛɛ neɛ bɔin lɛ, o soba naŋ na wa baŋ na ka a nyɔgoo.” Yelmeŋɛ la ka dããkpeɛne eɛ kyɛbaa naŋ e faa yaga zaa!

⁶ Nyɛ kawane Yezu naŋ da tere: “Kyɛ yɛ kaara yɛ menne zieŋ velaa zaa ka bondi-gaalii, dãã nyu-gaalii ane zemmo poɔ yelwonii ta wa e yɛlɛ naŋ paale yɛ sukyie zaa, ka lɛ vɛŋ ka a bebiri wa yɛ zuŋ tɔntɔbaalɛ. Bonso, a yɛlɛ ama na pɔge la a noba zaa naŋ be a tendaa zaa zu.” (Luka 21:34, 35) Ka neɛŋ nyu dãã te kuolo yoŋ naaneŋ na baŋ vɛŋ ka o soba niŋe soɔrɔ bee ka eŋbaare kpɛ o. Kyɛ ka onaŋ be a na yɛlɛ na poɔŋ ka Jehoova bebiri naŋ wa uruu meŋ?

it-1 656

Dããnyukuoli

A Baabole Kaarɛɛ A Na Yɛlɛ Ŋa. A Baabole yeleeŋ ka, dããkpeɛne nyu te gaalii ba soma fẽẽ zaa. Neɛ na naŋ sɛge a Yeng Yelibie ane science yɛlɛ mine naŋ be dɛlebo vɛŋɛɛŋ teŋ nyɛ lɛ dããkpeɛne nyu te gaalii naŋ na baŋ pere neɛ seŋ. O yeleeŋ ka: ‘Nembuoŋ dire nimiha? Nembuoŋ be eŋkyere poɔŋ? Nembuoŋ zɔɔrɔ zɔɔre? Nembuoŋ be dɔgɛɛ poɔŋ? Nembuo eŋɛŋ ŋmaare ŋmaare weɛ lɛ? Nembuo nimieŋ e zeere zeere? Bana na naŋ maŋ zeŋ waiŋ nyuubu zieŋ kɔɔre la lɛ. Bana na naŋ maŋ boɔrɔ waiŋ naŋ gyɛretaa la lɛ. Ta kaara waiŋ naŋ maŋ moɔ̃ na, wagre na aŋ maŋ nyegrɛ ŋmane poɔŋ [wagre na a waiŋ naŋ be ŋmane poɔŋ a nyegrɛ ka a vɔlaa maŋ kpɛ bo], wagre na aŋ wa sigre baaloŋ baaloŋ na [ka hooŋ wa nyu a, a maŋ sigree bɔin lɛ]. A baaraŋ a maŋ duŋ bon aŋa waabo, a duŋ bo aŋa duŋkuuree [a na baŋ vɛŋeŋ ka neɛ nyɛ baaloŋ (aŋa mannoo poɔŋ, a na baŋ vɛŋeŋ ka neɛ nyɛ sɔɔree baaloŋ) ane teɛroŋ poɔ baaloŋ, a na baŋ vɛŋeŋ ka neɛ kpi]. Ho meŋɛ nimie na nyɛrɛɛ yelseɛlɛ [dããkpeɛne maŋ nyɛɛ kpeɛ̃o o soba teɛroŋ poɔŋ, a maŋ vɛŋ ka o soba yel-eree leɛre; a vɛŋ oŋ nyɛrɛ yɛlɛ naŋ ba e yelmeŋɛ; a soba maŋ yelee yɛlɛ mine naŋ noma koroo; o soba maŋ erɛɛ yɛlɛ naŋ ba seŋ neŋ], ka ho sukyiri yele yelfoglo [o teɛrɛ ane yelboɔree mine oŋ daŋ ba yel a yɛlɛ, a zaa oŋ maŋ yeli].’​—Ye 23:29-33; Ho 4:11; Mt 15:18, 19.

Ŋaa ka a gaŋ-sɛgrɛ yelkyaare dããnyukuolo saŋa oŋ tɔnne o gaŋ sɛge na: “Ho na waa ŋa neɛ aŋ gaŋ mane noɔreŋ [ho teɛroŋ na gyɛreŋ, a baaraa zaa ho koŋ la baŋ ho meŋɛ], bee a waa ŋa neɛ aŋ gaŋ maŋ-gbori ŋmie eŋɛŋ [saŋa na a yɛlɛ ŋa naŋ wa erɛ na, dããnyukuolo na baŋ tuoree yɛlɛ aŋa accident, bee ka o zie kaŋa kpi, bee ka o neŋ neɛ kaŋa zɔɔ, ane a taa]. ‘Ba feɛ maŋ, kyɛ a ba beɛrɛ, ba ŋmɛ maŋ, kyɛ N ba baŋ, [lɛ ka dããnyukuolo maŋ yeli, aŋa neɛ naŋ yele yɛlɛ korɔ o meŋɛ; o ba baŋ boŋ naŋ erɛ ane yɛlɛ naŋ pɔgroo a na saŋa na]. Bo wagre maŋ na iri? A la bɔ a mine nyu [ka onaŋ gbiri a dãã o na nyu te gaali na maŋ yi la o eŋɛŋ, kyɛ onaŋ leɛ gbaŋgbaa ko a dããkpeɛne zuŋ o na lɛ boɔrɛɛ mine ka o nyu ka onaŋ wa iri].’” O na kpɛ la nandaaloŋ poɔŋ, saŋa na oŋ de o libie zaa nyu neŋ dãã, ka lɛ meŋ vɛŋ o ba waa dɛlebo azuŋ neɛzaa koŋ boɔrɔ ka o deo o toma zieŋ.​—Ye 23:20, 21, 34, 35.

Baabole Poɔ Yelsonne

w04 11/1 31 wɛl. 2

Yɛlɛ Noba Naŋ Kanna Te Gama Naŋ Maŋ Soorɔ

Aŋa mannoo poɔŋ, ka neɛŋ taa eŋɛ te gaali lɛ na baŋ wuliŋ ka o diree yaga, kyɛ wagre zaa naane aŋ maŋ waa lɛ. Aminekaŋaŋ baaloŋ bee yɛlɛ mine naŋ ba kyɛnɛ soŋ noba mine eŋdaa poɔŋ na baŋ vɛŋeŋ ka ba taa eŋɛ te gaali. Kyɛbee aminekaŋaŋ ba taa la ana yɛlɛ na ba booree poɔŋ. Azuŋ aseŋ ka te vɛŋ ka a be te teɛroŋ poɔŋ ka, ka neɛŋ taa eŋɛ te gaali a na baŋ e la baaloŋ, kyɛ neɛ naŋ nɔŋ bondirii yɛŋ, a e la teɛroŋ o naŋ taa naŋ ba soma. Ka ba naŋ yelka neɛ taa la eŋɛ te gaali a wuleeŋ ka “o eŋɛ taa la kãã te gaali,” kyɛ neɛ naŋ nɔŋ bondirii yɛŋ “bombɔ-gaŋne bee neɛ naŋ nɔŋ bonkaŋa te gaali.” Azuŋ neɛ naŋ nɔŋ bondirii te gaali eŋɛ naaŋ maŋ wuli ka o nɔŋ la bondirii kyɛ gyogo na oŋ taa na la na wuli. Neɛ kaŋa na baŋ bebeŋ o ba taa eŋɛ kyɛ o nɔŋ la bondirii te gaali. Ka hooŋ gaa ziiri mineŋ, lɛ na noba naŋ maŋ teɛre kyaare noba naŋ e bɛroŋ na ba yitaa.

JULY 28–AUGUST 3

BAABOLE POƆ YELNIMIZEERE YENG YELIBIE 24

Eŋ Ho Sagediibu Faŋa Sɛre Kyɛ Ka Yelkpeɛne Wa

it-2 610 wɛl. 8

Dɔgroŋ

Kristabiiri nimie maŋ pa neŋ la maaloo na neɛ naŋ na nyɛ saŋa na oŋ are yelkpeɛne noɔreŋ te ta a baaraa. A kyaare a na maaloo ŋa, ŋaa ka Yezu yeli: “Noba ba naŋ dɔgrɔ ba, ba naŋ e nemmenne zuŋ taaɛ popeɛloŋ, bonso a sazu naaloŋ na e la ba soobu.” (Mt 5:10) Yɛlɛ na Kristabiiri naŋ baŋ kyaare a kũũ leɛ-iruu ane Neɛ na aŋ eŋ a noɔre ŋa maŋ eŋ baŋ faŋa yaga zaa. A maŋ eŋ baŋ faŋa baŋ dire yelmennoŋ korɔ Naaŋmen saŋa na noba naŋ wa dɔgrɔ ba yaga zaa a na baŋ ko ba gba na. Sagediibu na ba naŋ taa Yezu kũũ na eŋɛŋ aneŋ maaloo na oŋ na de waneŋ na vɛŋeŋ baŋ so ba menne, a ba zoro dɔgroŋ ane kũũ dabeɛ̃. (Hi 2:14, 15) Lɛ Kristabie naŋ maŋ teɛrɛ kyɛ erɛ o yɛlɛ fɛrɛŋ yaga zaa bonso a na la na somoo ka o baŋ are yelkpeɛne noɔreŋ. “Yɛ vɛŋ ka a teɛroŋ na naŋ da be a Krista Yezu zie, ona . . . da sagra noɔre a te ta saŋa o naŋ kpi; a gba te kpi dɔgɛɛ daa zuŋ.” (Fi 2:5-8) “Bonso a popeɛloŋ naŋ da gaŋ o nimitɔɔreŋ zuŋ, [Yezu] da di la kannyiri a di dɔgɛɛ a dɔgɛɛ daa zuŋ, o da ba zagre ka o di vi.”​—Hi 12:2; kanne a sɛgre ama meŋ nyɛ 2Ko 12:10; 2Ts 1:4; 1Pi 2:21-23.

w09 12/15 18 wɛl. 12-13

Maŋ Taa Popeɛloŋ Ka Hooŋ Wa Tuoro Yelkpeɛne

¹² Yeng Yelibie 24:10 yeleeŋ ka: “Ka hooŋ vɛŋ ka ho eŋɛ kyoɔre dɔgɛɛ daare, ho faŋa na eɛ fẽẽ lɛ.” A yeng yelibiri kaŋa meŋ la yeleeŋ ka: ‘Ka sukyiriŋ wa taa posãã, a maŋ vɛŋeŋ ka neɛ faŋa baare.’ (Yeng. 15:13) Kristabiiri mine eŋɛ kyoɔreŋ ka lɛ vɛŋ ba ba la kanna Naaŋmen Yelbiri a Baabole a teɛrɛ o poɔ yɛlɛ gɛrɛ tɔɔre. Lɛ vɛŋeŋ ba ba maŋ la yi ba sukyie poɔ a puoro, lɛ na baŋ vɛŋeŋ ka ba wɛl ba menne yi ba Kristabitaaba poɔŋ. Yelmeŋɛ la, ka te eŋɛŋ kyoɔre a na baŋ de la toɔrɔ yaga waneŋ.​—Yeng. 18:1, 14.

¹³ Kyɛ, ka teneeŋ wa de te teɛroŋ eŋ yelsonne naŋ e te zemmo poɔŋ, a lɛ na baŋ soŋ teŋ ka te taa popeɛloŋ te zemmo poɔŋ. Deevid sɛgɛɛŋ ka: “Oo N Naaŋmen, a e maŋ noɔ̃ yaga ka N erɛ ho boɔbo.” (Yiem. 40:8) Ka yɛlɛŋ ba wa kyɛnɛ soŋ te zemmo poɔŋ, a ba seŋ ka te bare yɛlɛ na teŋ maŋ erɛ ka lɛ vɛŋ teŋ toɔnɔ puoro Jehoova na. Ka teneeŋ wa taa posaanaa, yɛlɛ aŋ na baŋ soŋ te la teŋ na de te menne eŋ yɛlɛ naŋ na vɛŋ ka te taa popeɛloŋ. Jehoova vɛŋɛɛŋ aŋ pɛle ka ka teneeŋ na taa popeɛloŋ aseŋ ka te kanna o Yelbiri a Baabole bebiri zaa a teɛrɛ o poɔ yɛlɛ gɛrɛ tɔɔre. (Yiem. 1:1, 2; Gyi. 1:25) A yi te Kristabiiri lammore zie ane a Baabole poɔŋ te maŋ woŋ la “yelbi-sonne” naŋ maŋ vɛŋ teŋ taa popeɛloŋ.​—Yeng. 12:25; 16:24.

w20.12 15

Yɛlɛ Noba Naŋ Kanna Te Gama Naŋ Maŋ Soorɔ

Yeng Yelibie 24:16 yeleeŋ ka: “Sontuuro na leŋ gbɛre boyɔpoi kyɛ lɛ iri.” A sɛgre ŋa kyaarɛɛ neɛ naŋ le faaloŋ poɔŋ gbɛɛ yaga ka Naaŋmen di suuri ko o yɛlɛ bee?

Lɛ naane ka a sɛgre ŋa boɔrɔ ka o wuli. Kyɛ, o wulee neɛ naŋ tuoro yelkpeɛne bee toɔrɔ yaga zaa o zemmo poɔŋ, kyɛ naŋ are kpeɛŋaa o toɔrɔ na zaa poɔŋ a zɔɔtoɔ̃ o yelkpeɛne na.

Kyɛ neɛ naŋ “le” faaloŋ poɔŋ gbɛɛ yaga naane ka a sɛgre ŋa yele o yɛlɛ. Kyɛ Yeng Yelibie 24:16 yelee neɛ naŋ tuoro yelkpeɛne bee dɔgroŋ gbɛɛ yaga o zemmo poɔŋ. Te naŋ be a donfaa ŋa poɔŋ yɛŋ, sontuuro na baŋ tuoree baaloŋ ane yelkpeɛne yaga o zemmo poɔŋ. Kaapɔge a gɔmenante na baŋ de la dɔgroŋ a waneŋ o zuŋ. Kyɛ o na baŋ sagediŋ ka Naaŋmen na somooŋ ka o toɔ̃ are kpeɛŋaa o yelkpeɛne na noɔreŋ. Azuŋ soore ho meŋɛ, ‘Ka lɛ N ba de N nimie nyɛ lɛ Naaŋmen naŋ maŋ sonnɔ o puorebiiri bee?’ Te zaa sagedieŋ ka “Jehoova maŋ sonnɛɛ noba na zaa naŋ lere na, O maŋ vɛmeŋ ka noba na zaa naŋ kyuli na iri dɔli ba menne.”​—Yiem. 41:1-3; 145:14-19.

Baabole Poɔ Yelsonne

w09 10/15 12

Yɛlɛ Noba Naŋ Kanna Te Gama Naŋ Maŋ Soorɔ

A yi takoreŋ saŋa na, ka dɔɔŋ boɔrɔ ka “o mɛ o die,” bee a boɔrɔ ka o taa booree o maŋ de la pɔge. Kyɛ sɛre oŋ na e lɛ na aseŋ ka o soore o meŋɛ ka, ‘N e la siri ka N kaa N pɔge ane biiri na teŋ na dɔge a puoriŋ na bee?’ Sɛre ka dɔɔ na piili ka o taa booree, aseŋ ka o taa toma, aminekaŋaŋ a taa weɛ. Today’s English Version Baabole meŋ yeleeŋ ka: “Ta wa meɛrɛ ho die, a derɛ pɔge a te ta saŋa na ho weɛ boma naŋ ta deebo, ho baŋ ka ho na baŋ kaa la ho meŋɛ.” Te na baŋ deɛ a kawane ŋa toŋ ne toma zenɛ ŋa bee?

Yelmeŋɛ la, dɔɔ naŋ boɔrɔ ka o de pɔge seŋ ka o nare o meŋɛ soŋ a kyaare a yɛlɛ. Ka onaŋ e neɛ laafeeloŋ naŋ paale, aseŋ ka o tonɔ toma. Dɔɔ naŋ tonɔ tonkpeɛne a kaara o yideme ba seŋ ka o vɛŋ ka o nimiri moɔ̃ o booree deme eŋgannoŋ poɔŋ yelfɛree yoŋ. A Baabole vɛŋɛɛŋ aŋ pɛle ka, dɔɔ naŋ ba kaara o yideme eŋgannoŋ ane ba siiloŋ poɔ yelfɛree e la neŋfaa a gaŋ neɛ naŋ ba taa sagediibu! (1 Tim. 5:8) Ka dɔɔŋ nara o meŋɛ ka o kpɛ kultaa poɔŋ, aseŋ ka o soore o meŋɛ a soorebie ŋa: ‘N e la siri eŋgannoŋ poɔŋ ka N kaa booree zu bee? N e la siri ka N e booree zudaana a toɔ̃ soŋ N yideme ka ba puoro Jehoova bee? N neŋ N pɔge ane N biiri na maŋ zannɛɛ boma wagre zaa bee?’ Naaŋmen Yelbiri na yeleeŋ ka, aseŋ ka dɔɔ toɔ̃ toŋ ana ferebo toma ŋa zaa.​—Dut. 6:6-8; Efe. 6:4.

Azuŋ ka dɔɔŋ boɔrɔ ka o de pɔge, aseŋ ka o teɛre a yɛlɛ ŋa naŋ be Yeng Yelibie 24:27 na soŋ. Lɛ meŋ la, ka pɔgeŋ wa boɔrɔ ka o kuli serɛ aseŋ ka o soore o meŋɛ, ka lɛ N e la siri ka N e neɛ kaŋa pɔge bee bi-ma? Baapaalba naŋ kultaa meŋ na baŋ soore la a soorebie ŋa mine ka ba naŋ wa teɛrɛ biiri dɔgebo yɛlɛ. (Luka 14:28) Ka Kristabiiriŋ de a na sowuli ŋa naŋ yi Naaŋmen zie tonɔ neŋ toma ba zemmo poɔŋ a na soŋ baŋ ka ba taa zeŋ laafeɛ a kyɛ nyɛ maaloo yaga ba zemmo poɔŋ.

AUGUST 4-10

BAABOLE POƆ YELNIMIZEERE YENG YELIBIE 25

Baabole Sowuli Naŋ Na Baŋ Soŋ Te Te Yelyaga Poɔŋ

w15 12/15 19 wɛl. 6-7

De Ho Zele Tonɔ Neŋ Toma Soŋ

⁶ Yelbie naŋ be Yeng Yelibie 25:11 wulee ananso a naŋ e nimizeɛ ka te maŋ yele yɛlɛ wagre naŋ seŋ neŋ poɔŋ: “Yelbiri ba naŋ yeli wagre naŋ seŋ neŋ poɔŋ waa ŋa salema apulihi ba naŋ maale eŋ ware pɛrɛtɛ poɔŋ.” Ka ba naŋ maale salema apulihi a maŋ veɛlɛŋ yaga zaa. Ka hooŋ de a eŋ pɛrɛtɛ ba naŋ de ware maale neŋ, a maŋ maaleŋ veɛlɛŋ yaga zaa. Lɛ neŋ o zu la, ka neɛŋ wa yeli yɛlɛ wagre naŋ seŋ neŋ poɔŋ ana baŋ vɛŋeŋ ka o yelyaga na toɔrɔ sukyiri a kyɛ eŋnɛ faŋa meŋ.

⁷ Aminekaŋaŋ yelbie na teŋ na yeli na, a na la ka te yɔɔ kaŋa boɔrɔ ana saŋa na, kyɛ aseŋ ka te bɔ wagre naŋ seŋ neŋ a yeli a yɛlɛ, ka lɛ vɛŋ ka tɔnɔ yi be wa. (Kanne Yeng Yelibie 15:23.) Aŋa mannoo poɔŋ, March 2011 teŋ-zigri kaŋa da e la Japan paaloŋ poɔŋ, ka tsunami kaŋa meŋ da wa sãã boma yaga teŋ-bilii mine pooreŋ. Noba naŋ pare 15,000 da kɔŋ la ba nyɔvoɛ a poɔŋ. Aneazaa ka a yɛlɛ ŋa da pɔge la Jehoova Sieree Deme naŋ da kpeɛrɛ beŋ na, kyɛ ba da mɔɔrɔŋ ka ba de a Baabole dii noba na aŋ da kɔŋ ba nɔŋneba na sukyie. Aneazaa ka a noba yaga zie zaa da be la a Buddhist puoruu poɔŋ, a ba baŋ yelzaa a kyaare yɛlɛ naŋ be a Baabole poɔŋ. Te yɔɔmine na da nyɛɛŋ ka saŋa na a tsunami naŋ wa e baare na, a da ba e wagre naŋ soma ka ba te manna a kũũ leɛ-iruu yɛlɛ korɔ a noba. Kyɛ, ba da de la ba yelyaga a mɔɔrɔ ka ba eŋ ba faŋa, a kyɛ soŋ ba a yi a Baabole poɔŋ ka ba nyɛ ananso a yɛlɛ ŋa naŋ pɔgrɔ noba naŋ ba taa saanaa zaa.

w15 12/15 21 wɛl. 15-16

De Kpeɛ̃o Na Ho Zele Naŋ Taa Na Tonɔ Neŋ Toma Soŋ

¹⁵ Lɛ na te naŋ maŋ yele yɛlɛ na e la nimizeɛ yaga zaa. Saŋa na Yezu naŋ da be Naazɛrɛ ŋmenpuoredieŋ a yele yɛlɛ na, a noba “nɔɛ zaaŋ da mãã ane a yelveɛle naŋ yi o noɔreŋ.” (Luka 4:22) Te na baŋ de la te zele toŋ neŋ toma soŋ, ka te yelbieŋ maŋ eŋnɛ faŋa, a kyɛ toɔrɔ noba sukyie. Yelbi-sonne na baŋ vɛŋeŋ ka te yelyaga eŋnɛ faŋa yaga zaa. (Yeng. 25:15) Te na baŋ tɔglɛɛ lɛ na Yezu yelyaga naŋ da maŋ eŋnɛ noba faŋa na, ka teneeŋ maŋ wulo nimimaaroŋ, gyeremɛ a kyɛ maŋ teɛrɛ te taaba yɛlɛ. Saŋa na Yezu naŋ da nyɛ mɔɔbo na zaa a nembeɛoŋ naŋ da mɔɔ kyɛ na wa kyɛlle woŋ o yelyaga na, nembao da kpɛ la Yezu “oŋ da piili wulo ba yɛlɛ yaga.” (Marko 6:34) Saŋa na gba baŋ da toorɔ Yezu na, o da ba yel yelzaa naŋ ba soma.​—1 Pit. 2:23.

¹⁶ A maŋ eɛ kpeɛŋaa ka te yel yɛlɛ bɔinloŋ ane nyaaŋbo sori a ko neɛ te naŋ miŋli yaga zaa. Te maŋ teɛreŋ ka aseŋ ka te maŋ yel ba nimiri yɛlɛ ko ba. A yɛlɛ ŋa na baŋ pɔge teŋ ka te neŋ te yideme bee te zɔmeŋɛ kaŋa te naŋ miŋli yaga zaa a lantaapuoruu poɔŋ wa yele yɛlɛ. Yezu da maŋ yelee nimikuõ-yɛlɛ a ko o potuuribo na o ne ba naŋ miŋli taa zuŋ bee? Ai, o daŋ ba e lɛ! Saŋa na o potuuribo naŋ da ŋmeɛrɛ nɔkpeɛne a kyaare neɛ naŋ la neŋkpoŋ ba poɔŋ na, Yezu da yi la nimimaaroŋ poɔŋ a dɛnne ba, a de bibile a e neŋ yelmannaa ka a soŋ ba. (Marko 9:33-37) Lantaapuoruu nembɛrɛ na baŋ tɔglɛɛ Yezu ewuli soŋ na ka ba naŋ maŋ yi “sumaaroŋ” soriŋ a de kawane tere​—Gal. 6:1.

w95 4/1 17 wɛl. 8

Yɛ wulo taa nɔmmo ane tonveɛle​—Sobuoŋ?

⁸ Te zaa na baŋ de la te yel-eree eŋ te taaba faŋa saŋa na teŋ puoro Jehoova Naaŋmen na. Yezu da de la o yel-eree a eŋ o kyɛllekyɛlleba na faŋa. O da nɔŋ la a Naaŋ moɔloo toma kyɛ da de a aŋ e nimizeɛ. O gba da yeleeŋ ka a waa ŋa bondirii a ko o. (Gyɔɔn 4:34; Urom 11:13) A na eŋnyagroŋ ŋa tɔ na baŋ vɛŋeŋ ka noba mine meŋ taa eŋnyagroŋ. Ho meŋ na baŋ vɛŋeŋ ka ho eŋnyagroŋ na hoŋ taa na kyaaŋ. Kyɛ saŋa na hoŋ erɛ lɛ na, kaara soŋ ka ho yelyaga ta wa wulo ka ho erɛɛ pɔloo, kyɛ maŋ manna yelsonne na mine ho naŋ nyɛ yi a naaŋ moɔloo poɔŋ korɔ ho taaba a lantaapuoruu poɔŋ. Ka hooŋ wa toŋboɔle neɛ kaŋa ka o wa ka yɛ gaa naaŋ moɔloo, maŋ mɔɔrɔ ka ho nyɛ ka ho na baŋ soŋ la o soba ka o maŋ de popeɛloŋ a moɔlɔ a te Maala Jehoova Naaŋmen yɛlɛ korɔ o taaba.​—Yeng Yelibie 25:25.

Baabole Poɔ Yelsonne

it-2 399

Sumaaroŋ

Sumaaroŋ soba maŋ taa la sagediibu aneŋ teɛretɔ. O ba maŋ vɛŋ ka yɛlɛ dɔnnoo te gaali bee a taa teɛroŋ faare. Neɛ naŋ ba taa gomeŋɛ, ka o teɛroŋ maŋ gyɛre, a ba taa sagediibu ane teɛretɔroo ba maŋ taa sumaaroŋ. Ŋaa ka yeng yelibie yelkyaare neɛ naŋ ba taa sumaaroŋ: “Neɛ naŋ koŋ baŋ nyɔge o meŋɛ, o waa ŋa yikpoŋ baŋ ŋmare oŋ ba la taa daŋkyini.” (Ye 25:28) O maŋ waa ŋa dinoɔre naŋ yuo gaŋ ka yelfaare zaa na baŋ wa kpɛ be, ka lɛ vɛŋ ka o te e yɛlɛ naŋ ba soma.

AUGUST 11-17

BAABOLE POƆ YELNIMIZEERE YENG YELIBIE 26

Tage Ho Meŋɛ Yi ‘Damboli’ Zie

it-2 729 wɛl. 6

Saa

Wagre. Zie na a Noɔre Emmo teŋgane naŋ da be na, ba taa la sẽɛ ane uonii saŋa yoŋ. Ka te naŋ na wuli a muni ka a pɛle soŋ, te na yeleŋ ka ba taa la saŋa na ŋmenaa naŋ maŋ yuoro yaga zaa aneŋ saa waa saŋa. (De manne Ym 32:4; Sol 2:11.) A yi April soŋsogreŋ a te tɔ October soŋsogreŋ saa ba maŋ waana yaga. Saa naŋ ba maŋ waana yaga na zuŋ ba maŋ derɛɛ weɛ boma a lɛ saŋa na. Yeng Yelibie 26:1 yeleeŋ ka, weɛ boma deebo saŋa saa ba maŋ kyaara waana. (De manne 1Sa 12:17-19.) Saa waa wagre gba kyɛ saa ba maŋ waana buyi buyi; saŋa kaŋa zie maŋ kyaaŋeŋ. A lɛ saŋa na ɔɔre maŋ erɛŋ, azuŋ ka saaŋ wa wa zie maŋ maaŋeŋ yaga zaa. (Ez 10:9, 13) Azuŋ noba maŋ maalɛɛ ba zie oŋ soma yaga.​—Ai 4:6; 25:4; 32:2; Jb 24:8.

w87 10/1 19 wɛl. 12

Dɛnnoo Maŋ Wɔŋ La Emmaaroŋ Wɔmɔ

¹² A maŋ seŋ ka noba mine nyɛ to-tage naŋ e kpeɛŋaa aŋa lɛ Yeng Yelibie 26:3 naŋ yel na: “Kpaara seŋnɛɛ wiri, ka gara bee yoki seŋ neŋ boŋa, ka dabɔl meŋ seŋ neŋ damboli puori.” Saŋa kaŋa Jehoova da maŋ terɛɛ sori ka a Izerayɛl biiri tuore dɔgroŋ ba menne naŋ de waneŋ ba eŋɛŋ na: “Lɛ daaŋ pɔge baŋ baŋ tuore Naaŋmen yelbie aneŋ taawae zuŋ, a zagre Sazu Baaraa Daana kawane. Lɛ zuŋ oŋ daaŋ vɛŋ baŋ tonɔ tonkpeɛne. Baŋ daaŋ le, neɛ daaŋ kyebe a na soŋ ba. Beŋ la baŋ daaŋ koŋ ko Jehoova ba toɔrɔ poɔŋ. Oŋ daaŋ deɛ ba ba toɔrɔ poɔŋ.” (Yieme 107:11-13) Dambolo maŋ vɛŋeŋ ka ba sukyie ko yaga zaa, ka dɛnnoo zaa kyebe a na baŋ vɛŋ ka ba leɛre ba eebo: “Neɛ ŋa baŋ maŋ kpaana kyɛ oŋ deri o nyuu, o soba na le la saammo poɔŋ dayeni.”​—Yeng Yelibie 29:1.

it-2 191 wɛl. 4

Gbɛree, Gbɛrɛɛ

Sekpɔgree la baŋ lɔɔ. “Neɛ aŋ de toma eŋ damboli nuŋ ŋmaarɛɛ o meŋɛ gbɛɛ, [lɛ na vɛŋeŋ ka o leɛ gbɛree] a nyuuro zɔɔre,” lɛ ka Naa Soolomoŋ da yel. Neɛ naŋ de toma eŋ damboli nuuriŋ o saanɛɛ o meŋɛ toma. Lɛ wuleeŋ ka o toma na na leŋ ka lɛ vɛŋ ka toɔrɔ kpɛ o.​—Ye 26:6.

Baabole Poɔ Yelsonne

it-1 846

Damboli

Ta iri yɛlɛ noɔre ko damboli a ‘tuuro o damboli’ yɛlɛ na o naŋ yele na ka lɛ naane ho ne o zaa na waa la bonyeni. Azuŋ ka teneeŋ ba boɔrɔ ka te waa ŋa damboli ŋa, aseŋ ka te de yɛlɛ naŋ be yeng yelibie ŋa poɔŋ tonɔ neŋ toma: ‘Ta iri yɛlɛ noɔre ko damboli a tuuro o damboloŋ.’ Yeng Yelibie 26:4, 5 meŋ yeleeŋ ka, ka hooŋ ire yɛlɛ noɔre ko o a ‘tuuro o damboloŋ’ na, teɛre yɛlɛ naŋ vɛŋ oŋ ŋmeɛrɛ a nɔkpeɛne, vɛŋ ka a pɛle ko o ka o yɛlɛ na ba tori, kyɛ vɛŋ ka o nyɛ ka nɔkpeɛne na o naŋ ŋmeɛrɛ na ba taa tɔnɔ zaa.

AUGUST 18-24

BAABOLE POƆ YELNIMIZEERE YENG YELIBIE 27

Tɔnɔ Te Naŋ Maŋ Nyɛ Yi Zɔmeŋ-Sonne Zieŋ

w19.09 5 wɛl. 12

Jehoova Maŋ Nyɛɛ O Puorebiiri Naŋ Taa Sigrimennoŋ Na Ka Ba Eɛ Nanee Yaga Zaa Koo

¹² Neɛ naŋ taa sigrimennoŋ maŋ wulee nimipa ka ba naŋ wa ko o kawane. Aŋa mannoo poɔŋ: Te de ka ho gaa la Kristabiiri lammore zie, a lammo naŋ wa baare na ho neŋ te yɔɔmine di la dama, a dama puoriŋ ka te yɔɔ na kaŋa tage bo yineŋ, a yelko bo ka zɛvaare marɛɛ ho nyeneŋ, vi na kpɛ boŋ yaga zaa. Kyɛ ho poɔ na pɛleŋ o naŋ yelko bo. Kaapɔge ho poɔ naaŋ pɛleŋ yaga zaa ka neɛ kaŋaŋ da daŋ yelko bo wieoŋ! Lɛ neŋ o zu aŋ seŋ ka te wuli nimipa ka te kristabitɔŋ wa ko te kawane. A ba seŋ ka te nyɛ te yɔɔ na ka o e la te dɔndɔma kyɛ aseŋ ka te nyɛ o ka o e la te zɔmeŋɛ.​—Kanne Yeng Yelibie 27:5, 6; Gal. 4:16.

it-2 491 wɛl. 3

Kpeɛreŋtɔ

Sagediibu teŋ na taa a kyɛ dɛle te kpeɛreŋ taaba, a maŋ bɔ sommo yi ba zie saŋa na teŋ wa be yelkpeɛne poɔŋ la ka Yeng Yelibie ko te kawane ka te erɛ: ‘Ta wa zagra ho zɔmeŋɛ bee ho ba zɔmeŋɛ. Ta wa gɛrɛ ho babie meŋ die ho toɔrɔ kpoŋ daare. Kpeɛreŋtɔ naŋ peɛle, onaŋ seɛ babie naŋ bi tɔɔre zaa’ (Ye 27:10) A zie ŋaŋ, a gaŋ-sɛgrɛ da boɔrɔŋ ka o yelka, kpeɛreŋtɔ naŋ peɛle zie aŋ seŋ ka ho bɔ sommo a yi, a gaŋ babie naŋ ba peɛle bo bee naŋ kpeɛrɛ tɔɔre zaa, aminekaŋaŋ o ba e siri bee o ba taa a faŋa a na saŋa na ka o soŋ bo.

w23.09 10 wɛl. 7

Baapaalba​—Wala Yɛŋ Boɔrɔ Ka Yɛ Zemmo Waa?

⁷ Yelkaŋa teŋ na baŋ zanne yi Gyɛhowaz gbɛ-faa na o naŋ da de na la ka, te maŋ kaa iri zɔmenne naŋ nɔŋ Jehoova, a boɔrɔ ka ba erɛ yɛlɛ naŋ pɛlɛ Jehoova poɔ. A zɔmenne ŋa taa na soŋ teŋ ka te erɛ yɛlɛ naŋ pɛlɛ Jehoova poɔ. Te na baŋ nyɔgɛɛ zɔmennoŋ ne noba te naŋ kore bee noba naŋ kore te. Ka hooŋ nyɛ, Gyɛhoiyada da korɛɛ o zɔmeŋɛ Gyɛhowaz. A kyaare ho zɔmenne nyɔgebo, ho na baŋ soorɛɛ ho meŋɛ ka: ‘Ka lɛ N zɔmenne maŋ sonnɔ maŋ ka N sagediibu maŋ taa Jehoova eŋɛŋ e kpeɛŋaa bee? Ba maŋ mɔɔrɛɛ ba mɔɔbo zaa ka ba erɛ Naaŋmen boɔbo a eŋnɛ ma faŋa ka N meŋ erɛ lɛ bee? Ba maŋ diree dama a kyaare Jehoova ane yɛlɛ baŋ zanne yi a Baabole poɔŋ bee? Ba maŋ yelee yɛlɛ naŋ na vɛŋ ka N poɔ pɛle yoŋ, kyɛbee ka maaŋ wa ŋmɛ gbɛre ba maŋ ko maŋ kawane naŋ seŋ neŋ?’ (Yeng. 27:5, 6, 17) A yelmeŋɛ la ka, ka ho zɔmenneŋ ba nɔŋ Jehoova, ba koŋ baŋ soŋ bo. Kyɛ ka ba naŋ nɔŋ Jehoova yɛŋ, nyɔge ba taa, ba na soŋ boŋ!​—Yeng. 13:20.

Baabole Poɔ Yelsonne

w06 9/15 19 wɛl. 12

Yeng Yelibie Gane Poɔ Yɛlɛ

27:21. Pugibo na baŋ wulee neɛ na meŋɛ te naŋ waa. Sigrimennoŋ maŋ vɛŋeŋ teŋ de pugibo korɔ Jehoova lɛ maŋ vɛŋeŋ teŋ nyɛ lɛ a naŋ e nimizeɛ seŋ ka te de puoruu koroo, kyɛ maŋ eŋ te faŋa teŋ boɔrɔ ka te gɛrɛ nimitɔɔre puoruu. Ka neɛ ba taa sigrimeŋɛ a maŋ pɛleŋ ka neɛzaa nyɛ saŋa na baŋ wa pugoo na, o maŋ zɛgrɛɛ o meŋɛ.

AUGUST 25-31

BAABOLE POƆ YELNIMIZEERE YENG YELIBIE 28

Wɛltaa Naŋ Be Neŋfaa Ane Sontuuro Kpakyagaŋ

w93 5/15 26 wɛl. 2

Ho Yi La Ho Sukyiri Zaa A Tonɔ Korɔ Jehoova Bee?

“Sontuuribo maŋ taa la nyaa aŋa gbeŋni.” (Yeng Yelibie 28:1) Ba maŋ taa la sagediibu, a dɛle Naaŋmen Yelbiri a Baabole a kyɛ de nyaa a tonɔ toma yaga Jehoova puoruu poɔŋ, ka ba na gbaŋ tuoro yelkpeɛne.

it-2 1139 wɛl. 3

Yɛlɛ muni wommo

Ba ba maŋ bɔ sowuli yi Naaŋmen Zie. Ka neɛŋ wa pilli erɛ yelfaare o ba maŋ teɛrɛ Naaŋmen yɛlɛ, azuŋ o gbɛ-deree zaa poɔŋ, o ba maŋ bɔ sowuli a yi Naaŋmen zie. (Joob 34:27) A soba vɛŋɛɛŋ ka o sukyiri bɛnloo ka lɛ vɛŋ o ba maŋ lɛ teɛrɛ yɛlɛ gɛrɛ tɔɔre. (Ym 36:1-4) Ka onaŋ gbaŋ yelka o puoree Naaŋmen, kyɛ nensaaleba teɛroŋ oŋ maŋ de tegroŋ a gaŋ Naaŋmen. (Ai 29:13, 14) O maŋ teɛreŋ ka yelfaare na o naŋ erɛ na e la deɛŋ onaŋ ‘deɛnɛ’ (Ye 10:23) a lɛ maŋ vɛŋeŋ oŋ taa nimikuonii, kyɛ maŋ teɛrɛ damboli yɛlɛ o sukyiriŋ, ka lɛ gba maŋ vɛŋ oŋ teɛrɛ ka Naaŋmen na teŋ koŋ baŋ nyɛ na ba baŋ bee ba nyɛrɛ o yelfaare na, aŋa ka lɛ Naaŋmen kpeɛ̃o na onaŋ taa ka o nyɛ yɛlɛ na baareŋ. (Ym 94:4-10; Ai 29:15, 16; Jr 10:21) Azuŋ yɛlɛ na o soba naŋ maŋ erɛ na, o maŋ boɔrɔŋ ka o wuli ka, “Jehoova kyebe” (Ym 14:1-3) ka lɛ vɛŋ ba ba maŋ de o poɔ ba ‘yel-eree poɔŋ.’ A soba naŋ ba de Naaŋmen sowuli tonɔ neŋ toma zuŋ, lɛ maŋ vɛŋeŋ o koŋ baŋ teɛre yɛlɛ soŋ, a nyɛ a yɛlɛ nimiri a toɔ̃ de gbɛ-sonne.​—Ye 28:5.

it-1 1211 wɛl. 4

Yelmennoŋ

Yelmeŋɛ la ka neɛ na baŋ taa la yelmennoŋ, kyɛ a soba meŋɛ faŋa naane na baŋ somoo ka o e lɛ, kyɛ a de tuuro sagediibu naŋ e kpeɛŋaa ane lɛ na o naŋ dɛle Jehoova ane O faabo kpeɛ̃o na la na somoo. (Ym 25:21) Naaŋmen eŋ la noɔre ka o na e la “kuri bonlɛgraa” ane “daŋkyiŋ-kpeɛŋaa,” a maŋ go noba naŋ kyɛnɛ yelmennoŋ poɔŋ. (Ye 2:6-8; 10:29; Ym 41:12) Ba naŋ maŋ boɔrɔ ka ba pɛlɛ Jehoova poɔ wagre zaa na maŋ vɛŋeŋ baŋ taa zeŋ laafeɛ, a kyɛ soŋ ba baŋ de ba teɛroŋ eŋ yɛlɛ na baŋ de biŋ ba nimitɔɔreŋ. (Ym 26:1-3; Ye 11:5; 28:18) Saŋa na Gyoob naŋ wa teɛre a yɛlɛ ŋa na a da e oŋ nɔmãã, bonso noba naŋ ba taa saanaa zaa meŋ na baŋ di la dɔgɛɛ neŋfaa naŋ dire naaŋ ba zuŋ, ka ba neŋ neŋfaare na baŋ laŋ kpi meŋ. Jehoova eŋ teŋ faŋa kyɛ vɛŋ teŋ baŋ ka o nyɛrɛɛ yɛlɛ na zaa neɛ naŋ ba taa saanaa zaa naŋ tuoro na, a eŋ noɔre meŋ ka o na nyɛ la maaloo, a taa emmaaroŋ nendaarekaŋa, kyɛ nyɛ yel-sonne yaga. (Jb 9:20-22; Ym 37:18, 19, 37; 84:11; Ye 28:10) Aŋa lɛ na aŋ da waa ko Gyoob na, bondaaŋ boma naane maŋ vɛŋ ka neɛ e nanee ko Jehoova, kyɛ yelmennoŋ a soba naŋ taa na la maŋ vɛŋ oŋ e nanee ko Jehoova, aseŋ neŋ gyeremɛ. (Ye 19:1; 28:6) Bibiiri na aŋ nyɛ apoɔsori ka ba dɔgreba taa ana gyogo ŋa taa la popeɛloŋ. (Ye 20:7) Bonso ba saa mine yelmennoŋ na naŋ e ewuli soŋ na e la kyɔɔtaa, kyɛ baŋ maŋ nyɛ gyeremɛ yi ba yo-soŋ na meŋ eŋɛŋ.

Baabole Poɔ Yelsonne

w01 12/1 11 wɛl. 3

Ho Na Baŋ Go La Niiloŋ Na Ho Neŋ Jehoova Naŋ Taa Na Ka Yelzaa Ta Pɔgoo

Neɛ naŋ dɛle o meŋɛ te gaali. Noba naŋ taa sukyiri baaloŋ maŋ dɛlɛɛ ba menne a teɛre ka yelzaa ba erɛ ba, a te ta saŋa na a baaloŋ naŋ wa lɔɔ ba teŋɛŋ. Sɛre ka a yɛlɛ ŋa na pɔgeba na, ba maŋ zagreŋ ka ba te kaa ba laafeeloŋ yɛlɛ. Lɛ meŋ la, noba na baŋ teɛreŋ ka ba naŋ puore Jehoova kɔɔre na zuŋ yɛlɛ zaa koŋ baŋ pɔge ba. Azuŋ ba maŋ zagreŋ ka ba peɛre ba menne nyɛ lɛ ba neŋ Jehoova niiloŋ naŋ be, saŋa na baŋ ba kaara soriŋ na yelfaa kaŋa maŋ pɔge baŋ. Aseŋ ka te de Pɔɔl kawane na tonɔ neŋ toma a kaara soŋ a ta dɛle te menne te gaali: “Azuŋ, ka hooŋ wa teɛre ka ho are la kpeɛŋaa, go ho meŋɛ velaa a ta wa lere.” Ka teneeŋ sage ka te ba pɛgeyi a maŋ mɔɔrɔ a peɛrɛ te menne nyɛrɛ lɛ te neŋ Jehoova niiloŋ naŋ be, a wuleeŋ ka te taa la yɛŋ.​—1 Korinti 10:12; Yeng Yelibie 28:14.